Gikan sa Pagkaluwas [Rescued] ngadto sa Tigluwas [Rescuer]

Usa ka gabii niadtong 1978, ako anaa sa Logan Airport sa Boston, Massachusetts, USA, nagpaabut sa pipila ka higala nga moabut. Usa ka lalaki misugod og pakig-istorya kanako, ug kami nag-istoryahanay kabahin sa among kinabuhi. Giingnan nako siya nga ako nakauli og mas sayo og tulo ka bulan gikan sa usa ka biyahe sa Central America.

Miadto ko aron sa paglikay sa kasakit sa mga kamatuoran sa akong kinabuhi, giingnan nako siya. Siyam ka tuig ang milabay ang akong igsoong lalaki namatay. Pagkasunod tuig ang akong mga ginikanan namatay sa usa ka aksidente sa sakyanan. Usa ka tuig ang milabay nianang adlawa, ang akong lola namatay. Sulod sa mubong panahon, nawala kanako ang pipila sa hilabihan ka importante nga mga tawo sa akong kinabuhi. Nasagmuyo ako pag-ayo.

Nakapanunod ako og dakong kantidad sa kwarta sa pagkamatay sa akong mga ginikanan, ug gigamit ni nako sa paglikay sa akong kasubo. Gigasto ni nako sa mahalon nga mga sinina, mga sakyanan, drugas, ug mga biyahe sa lagyo nga mga lugar.

Sa akong pinaka bag-o nga pagbiyahe gikatkat nako ang piramide sa Tikal, Guatemala. Didto, bisan kon ako mismo diha sa taas nga dapit, nakahinumdom ko nga mas gibati og tumang kasubo sa dugay nga panahon. Dili nako makapuyo sa paagi sama sa akong gipuy-an sa una. “Dios,” miingon ko, “kon anaa Ka diha, nagkinahanglan ko Nimo aron usabon ang akong kinabuhi.” Nagbarug ko didto sulod sa pipila ka mga minuto, hilum nga nangamuyo og tabang gikan sa usa ka binuhat nga dili ko sigurado nga anaa. Sa akong pagkanaog sa piramide, mibati ko og kalinaw. Walay nausab sa akong kinabuhi, apan sa laing bahin mibati ko nga ang mga butang mamaayo ra.

Ug mao kadto niadtong tulo ka bulan ang milabay nga akong nakaplagan ang akong kaugalingon naghisgut niining tanan sa usa ka tawo didto sa airport. Siya mapailubong naminaw ug dayon nangutana kon nakahibalo ba ko nga si Jesukristo nagpakita ngadto sa Amerika.

Nianang higayona wala gihapon ko kaayo maghunuhuna kabahin sa Dios. Unsa nga matang sa Dios ang mokuha sa akong pamilya? Gisultian gyud nako pag-ayo ang tawo, ug siya mitubag nga ang Dios nga iyang gituohan naghimo og paagi alang kanako nga makauban pagbalik ang akong pamilya. Karon nakuha niya ang akong atensyon.

“Unsay buot nimo nga ipasabut?” Nangutana ko.

“Nakadungog na ba ka kabahin sa mga Mormon?” Wala ko masayud og daghan kabahin nila, apan ang tawo nagpadayon sa pagpasabut sa plano sa kaluwasan ngari kanako. Ug bisan sa akong dili pagtuo sa sinugdanan, adunay usa ka butang nga iyang gipakigbahin nga mora og tinuod.

Ang akong bag-ong kaila ug ako naghatagay sa among mga numero sa telepono, ug sa sunod pipila ka bulan, nag-date mi og kadiyot. Kami nag-istoryahanay usab sa ebanghelyo. Gihatagan ko niya og kopya sa Basahon ni Mormon, ug naghisgut mi niini ug ubang mga kasulatan sulod sa pipila ka oras diha sa telepono. Siya mihisgut kanako kabahin ni Joseph Smith nga nagpahiuli sa Simbahan ni Jesukristo. Kadto usa ka nindot kaayong panahon sa paglaum ug pagtubo.

Ang among paghinigalaay naluya og gamay, apan human sa pipila pa ka semana, ang akong higala miingon kanako nga ganahan siyang mopadala og pipila ka mga higala sa pagpakig-istorya kanako. Ang mga higala nga iyang gipadala, siyempre, mga misyonaryo. Ug uban sa full-time nga mga elder mao si Bruce Doane, usa ka stake missionary nga nahimo nakong bana sa kaulahian.

Human sa pipila ka semana og pormal nga mga diskusyon, ang misyonaryo nangutana kanako kon ako andam ba sa pagpabunyag. Miingon ko kanila sigurado. Dayon ila kong giingnan nga sa dili pa ko mabunyagan, kinahanglan kong mosunod sa Pulong sa Kaalam.

Wala nako mag-inom o maggamit og drugas sama sa una. Ang mga butang nausab sa akong kinabuhi; mas mibati ko nga mas malaumon kaysa kaniadto—apan sa pagkatinuod kadtong mga batasan imposible nga hingpit nga mabiyaan. Gawas pa, daghan nako og gibiyaan sa pagdawat sa ebanghelyo—lakip na sa pipila ka mga higala kinsa naghunahuna nga ako nabuang sa pagpakita og interes sa Simbahan sa Mormon. Nagpadayon ko tungod kay mibati ko nga ang ebanghelyo tinuod. Apan hingpit ba akong makabiya sa dugay nang pagkaadik?

Ang mga misyonaryo mitanyag nga hatagan ko og priesthood nga panalangin aron sa pagtabang kanako. Diha-diha dayon, gilabay nako ang tanang drugas ug ilimnon nga anaa nako. Ug nianang gabhiona ang tinguha sa pag-inom sa tanang butang batok sa Pulong sa Kaalam nawala kanako. Kadto usa ka tinuod nga milagro.

Nabunyagan ko niadtong Hunyo 1978. Mga sobra og gamay sa usa ka tuig ang milabay, si Bruce ug ako naminyo sa Templo sa Washington D.C.

Ang ebanghelyo sa literal nga paagi nakaluwas kanako gikan sa pagkawalay og paglaum. Sa una, nawagtang kanako ang tanang kahulugan sa pulong. Ang akong mga ginikanan ug igsoong lalaki ug lola nawala, apan mibati ko nga daw ako nawala usab. Human sa ilang kamatayon wala nako kaila kon si kinsa ko. Karon akong nakaplagan ang akong pagkatawo. Nasayud ko nga ako usa ka anak sa Dios ug Siya nakaila kanako ug nahigugma kanako. Sa dihang gi-sealed ko ngadto sa akong mga ginikanan, lola, ug igsoong lalaki, ang akong kasubo napulihan og hingpit nga kalipay uban sa kasiguradoan nga kami mag-uban hangtud sa kahangturan. 

Ang ebanghelyo ni Jesukristo nakaluwas [rescued] usab kanako gikan sa akong pagkaadik. Sulod sa nangaging pipila ka tuig ang akong bana ug ako nagserbisyo isip mga misyonaryo alang sa pagkaayo gikan sa pagkaadik sa LDS Family Services, nakigtambabayong uban sa mga miyembro sa among stake kinsa nanlimbasug sa nagkalain-laing mga klase sa pagkaadik. Mapasalamaton kaayo ko nga nakatabang niining mga kaigsoonan. Mibati ko nga napanalanginan nga mahimo kong mopakigbahin sa akong istorya ngadto kanila sa pagtabang kanila nga makasabut nga kitang tanan maluwas pinaagi sa ebanghelyo.