Ang Pag-ula Nakapahimo sa Paghinulsol nga Posible

Mianhi kita sa yuta alang sa katuyoan nga motubo ug mouswag. Hinay ang atong pag-uswag kon kita makasala. Gawas kang Jesukristo, kinsa nagpuyo og usa ka hingpit nga kinabuhi, ang tanan nga nakapuyo sa yuta nakasala (tan-awa sa Ecclesiastes 7:20; Mga Taga-Roma 3:23; 1 Juan 1:8).

Ang pagpakasala mao ang pagsupak sa mga sugo sa Dios. Usahay kita nakasala pinaagi sa pagbuhat sa usa ka butang nga atong nasayran nga sayop, apan usahay kita nakasala pinaagi sa pagkapakyas sa pagbuhat sa unsay atong nasayran nga matarung (tan-awa sa Santiago 4:17).

Matag sugo gikan sa Dios makapanalangin kanato kon kita mosunod niini (tan-awa sa D&P 130:20–21). Hinoon, kon kita dili mosunod niini, adunay silot nga gipauban (tan-awa sa Alma 42:22). Kining paghatag sa mga panalangin o mga silot gitawag og kaangayan.

Tungod kay ang atong Langitnong Amahan nahigugma kanato, Siya mihimo niining posible alang kanato nga maghinulsol: sa pagkumpisal ug pagsalikway sa atong mga sala ug sa ingon mabuntog ang mga epekto niini. Gipadala Niya ang Iyang Bugtong Anak, si Jesukristo, aron sa pag-antus alang sa atong mga sala. Nga mao, si Jesus ang mibayad sa silot nga gikinahanglan sa balaod sa kaangayan tungod sa atong pagsupak sa mga sugo sa Dios. Tungod kay ang Manluluwas ang nag-antus alang sa atong mga sala, kita dili kinahanglang mag-antus sa kinatibuk-an nga silot niini kon kita maghinulsol (tan-awa sa D&P 19:16). Ang Iyang Pag-ula “nakatagbaw sa mga gipangayo sa kaangayan” (Mosiah 15:9), nagtugot sa Langitnong Amahan sa pagpasaylo kanato sa maloloy-on nga paagi ug pagpugong sa silot.

Ang paghinulsol mao ang gasa sa Dios ngari kanato. Mahinungdanon kini alang sa atong kalipay niining kinabuhia. Pinaagi sa paghinulsol kita mahimong malimpyo pag-usab, makapahimo niining posible alang kanato nga makabalik ngadto sa atong Langitnong Amahan (tan-awa sa Moises 6:57).

Ang proseso sa paghinulsol naglakip sa mosunod:

• Pagbaton og hugot nga pagtuo diha sa atong Langitnong Amahan ug kang Jesukristo (tan-awa sa Alma 34:17).

• Pag-ila sa atong mga sala ug pagbati og kasubo (tan-awa sa Lucas 16:15; Alma 42:29–30).

• Pagkumpisal sa atong mga sala ngadto sa Langitnong Amahan ug, kon gikinahanglan, ngadto sa atong bishop o presidente sa branch (tan-awa sa D&P 61:2).

• Pagbiya sa atong mga sala (tan-awa sa D&P 58:43).

• Paghimo og pag-uli kon mahimo (tan-awa sa Ezequiel 33:15–16).

• Pagpasaylo sa uban nga nakasala batok kanato (tan-awa sa D&P 64:9; 3 Nephi 13:14–15).

• Pagpuyo sa matarung nga paagi (tan-awa sa D&P 1:32).