Mga Young Adult ug Family Home Evening

Isip usa ka kinabig ug nag-inusarang miyembro sa Simbahan sa akong pamilya, motambong ko og family home evening sa sentro sa young adult sa akong siyudad. Ang pag-apil sa family home evening kanunayng importante kanako tungod kay nakakat-on ako kon unsaon sa pagtudlo sa gamay nga grupo, mas nakasabut ako sa mga baruganan sa ebanghelyo nga gitudlo kanako samtang nag-imbestigar sa Simbahan, ug nakita nako ang uban nga molambo kon sila motudlo o mopakigbahin sa ilang mga pagpamatuod.

Nasayud ko nga kini importanting mga kahanas alang kanako sa umaabot. Kon ako aduna na unyay kaugalingong pamilya, makahibalo ko unsaon sa pag-organisar og gamhanan ug makalingaw nga family home evening tungod sa maayong mga ehemplo nga akong nakita.

Apan ang family home evening importante usab nga bahin sa kahimtang sa akong kinabuhi karon. Usahay mas sayon nga magpabilin sa balay sa Lunes sa gabii, ilabi na kon ang panahon bati o kon ako adunay daghan kaayong tun-anan. Apan ako hapit kanunay anaa niining kapiut, bisan pa moadto gihapon ko sa family home evening tungod kay nasayud ko nga kini importante nga makauban ang ubang mga young adult aron sa paghisgut kabahin sa ebanghelyo ug kaubang maglingaw-lingaw. Bisan kon gamay lang ang motambong, kini nindot gihapon nga kasinatian.

Ang nindot nga butang sa paghimo og family home evening sa sentro sa young adult mao nga kami makaadto og sayo o magpabiling maulahi aron sa pagtuon, pagbansay sa piyano, pagdula, o magpahayahay lang—aduna gayuy butang nga buhaton.

Nasayud ko nga kon ako magmasulundon ug mosunod sa propetikanhong tambag sa pag-apil sa family home evening, ako mapanalanginan. Akong nakita ang ebidensya niini sa akong pagtuon, sa akong trabaho, nga napanalanginan uban sa kusog alang sa umaabot nga semana, ug sa kinatibuk-ang pagbati nga nabayaw.

Nagdako ako sa usa ka pamilya diin kami adunay regular nga mga family home evening. Nakahinumdom ko sa dihang bata pa ko, ang family home evening mao ang usa sa labing importante nga mga panghitabo sa akong kinabuhi, ug ako mobangon nga maghinam-hinam matag Lunes sa buntag ug mopahinumdom sa akong mga ginikanan sa family home evening nianang gabii. Karon isip usa ka young adult, ako nagpuyo uban sa akong mga ginikanan ug mopadayon sa paggahin niining espesyal nga panahon uban sa akong pamilya matag semana.

Tungod kay ang among pamilya kanunay adunay family home evening sukad pa sa dihang bata pa ko, ako kanunay nga nakasabut sa kaimportante niini. Sa Korea, diin daghang mga ginikanan ug mga bata nagkapuliki kaayo ug nihit kaayo ang panahon uban sa pamilya, ang home evening mao ang usa ka talagsaong oportunidad nga magkauban ug maglig-on sa usag usa.

Laing panalangin ang miabut gikan sa mga paningkamot sa akong mga ginikanan mao nga ako nahatagan og lig-ong pundasyon diin itukod ang akong pagpamatuod ni Jesukristo. Bisan tuod ako nakakat-on sa ebanghelyo diha sa simbahan, pinaagi sa mga leksyon sa family home evening nga tinuoray akong nasabtan ang mga baruganan niini. Isip resulta, ako nakahimo sa pag-adto sa simbahan ug nagtubo sa ebanghelyo basi sa akong kaugalingong hugot nga pagtuo ug dili diha sa akong mga ginikanan.

Ako 24 anyos nga batan-ong lalaki kinsa nakaangkon og lig-ong pagpamatuod sa ebanghelyo ni Jesukristo pinaagi sa pagsunod sa propetikanhong tambag sa paghimo og family home evening. Bisan tuod nga ako lang ang miyembro sa Simbahan sa akong pamilya, human ako mabunyagi, ako nakaamgo nga ang family home evening makapalig-on kanato, ug ako mihukom sa pagpa-ila-ila niini sa balay.

Ang tibuok pamilya karon nasayud nga ang mga Lunes mao ang espesyal nga mga adlaw diin kami magtapok isip usa ka pamilya sa pagkat-on sa mga kamatuoran sa ebanghelyo. Usahay among sulbaron ang mga problema sa pamilya o hisgutan ang mga hagit, mga panginahanglan, o mga interes sa indibidwal nga mga miyembro sa pamilya. Ako nakakat-on unsaon gayud sa pagpakigsulti sa akong Langitnong Amahan ug sa pagtinambagay nga may gugma uban sa mga sakop sa akong pamilya. Isip resulta, kami mas nagkahiusa, nga mao ang usa ka dako nga panalangin.

Dugang pa, ang family home evening nakahimo og lig-ong pundasyon alang sa akong pamilya diha sa ebanghelyo ni Jesukristo, ug sila karon nag-imbistigar sa Simbahan. Sa pagkatinuod, ang full-time nga mga misyonaryo moapil kanamo sa family home evening panagsa.

Ako nasayud nga kon ako maminyo, ang akong pamilya mapanalangin pinaagi sa family home evening, apan mapasalamaton usab ko kaayo nga ang family home evening nahimong importante nga bahin sa akong kinabuhi karon. Ako nasayud nga Ang Simbahan ni Jesukristo sa mga Santos sa Ulahing mga Adlaw tinuod ug ang programa sa family home evening dinasig gikan sa Dios.

Ako nagtubo sa usa ka pamilya nga mihimo sa family home evening nga usa ka prayoridad. Aron makaabut sa saktong oras sa Lunes, kami modiretso og uli gikan sa eskwelahan nga dili makigsabut og mga plano uban sa mga higala. Ang personal nga mga buluhaton, sama sa homework, humanon inighuman sa family home evening. Wala gyuy laing butang nga mas mauna kaysa niining espesyal nga panahon alang sa among pamilya nga magkauban.

Ang family home evening nakahimo og dakong epekto sa among pagdako dili lang tungod kay gi-prayoridad kini namo apan dungan usab kini namong gitrabaho aron mahitabo kini. Among gipuli-puli kinsa ang mohatag sa leksyon, kinsa ang moandam sa snacks, ug kinsa ang maghatag sa pangbukas ug panapos nga mga pag-ampo. Kami wala lang maminaw sa mga leksyon apan aduna usab mga oportunidad nga mahimong mga magtutudlo. Ang resulta, ako napanalanginan sa pag-angkon og kahibalo ug pagpamatuod sa ebanghelyo ug sa pagbaton og lig-ong relasyon sa pamilya.

Tungod kay ang family home evening nahimong batasan sa akong kinabuhi, ako naglaum sa mga panalangin nga mahatag niini kon ako aduna nay kaugalingong pamilya.

Nagdako ko sa usa ka pamilya diin ang akong ginikanan nahimong nindot kaayong ehemplo sa akong duha ka igsoong lalaki, akong igsoong babaye, ug kanako, ug ang among pamilya nakadawat og daghang mga panalangin tungod sa ilang mga paningkamot. Sama pananglit, kami dungang nagdako nga nahimong suod nga pamilya, nagsalig sa usag usa panahon sa panginahanglan o mga pagsulay. Ug bisan tuod ang pipila sa mga sakop sa pamilya dili kaayo aktibo, sila moapil gihapon sa family home evening.

Nakapuyo ako og diyutayng panahon sa Sydney, Australia, ug hilabihan ang kamingaw nga nagpuyo og layo kaayo gikan sa Ireland. Swerte lang, nagpuyo ko duol sa usa ka meetinghouse sa Simbahan diin ako makatambong og family home evening kauban ang ubang mga young adult. Kini usa ka dakong panalangin ngari kanako, ug kon ako motambong, dili nako mobati og kamingaw. Kini nindot kaayo nga makighugoy-hugoy sa kaubang mga miyembro sa hayahay nga kahimtang ug diin ang Espiritu anaa.

Nagpamiyembro ko sa Simbahan niadtong Mayo 2009. Sukad niadto dali akong nakahatag og bili sa mga panalangin nga miabut tungod sa makanunayong pagtambong sa family home evening. Usa ka dili makalimtan nga kasinatian nahitabo sa dihang ang among young single adult sa ward midula og “chair soccer,” usa ka klase nga indoor soccer, diha sa cultural hall sa usa ka lokal nga meetinghouse. Ang punto mao ang pagdepensa sa inyong lingkuranan samtang moatake sa lingkuranan sa uban gamit ang goma nga bola. Nakigsabut ko sa laing duha ka magdudula sa katapusan kaming tulo na lang ang nabilin sa dula, ug kami nagsangka sa usag usa. Imbis nga masuko, kami dili makahunong sa pagkatawa! Kadto mao ang pinakalingaw nga akong nasinati sulod sa dugay nga panahon, ug ako nasayud nga lisud sa pagpangita og ingon ana nga kasinatian gawas sa Simbahan. Ang tanan nalingaw kaayo, bisan wala makadaug, apan kana dili mao ang nakahimo sa kasinatian nga espesyal ngari kanako. Ang nakahimo gyud niini nga dili nako makalimtan mao ang diwa sa pagpakighigala nga akong gibati sa kalihokan.

Ang mga higayon sama niini makatabang kanako nga mogaan ang hilabihang kakapoy sa graduate school. Bisan unsa pa man ang mahitabo sa semana, nasayud ko nga mobati ko og mas maayo kanunay kon ako motambong sa family home evening. Dili man sa kanunay ako maghinam-hinam sa kalihokan ug dili man sa kanunay gusto nako ang higayon, apan wala gyud ko magmahay nga mitambong.

Adunay daghang mga paagi nga akong magahin ang mga gabii sa Lunes, gikan sa pag-apil sa mga organisasyon sa unibersidad ngadto sa uban pang mga kalihokan sa sports ug paglulinghayaw. Apan alang niadtong nagpuyo sa among student house—ang tanang mga Santos sa Ulahing mga Adlaw—nakahukom nga importante ang pagbuhat og family home evening, ug gihimo ni namong prayoridad. Among gipili kining prayoridad sa paglig-on sa usag usa sa panahon sa kinabuhi diin ang pagpuyo sa ebanghelyo makitang lisud. Ang pagpakigbahin og mga pagpamatuod ug mga kasinatian sa usag usa nakapahimo kanamong suod isip mga young adult ug mga higala.

Ang family home evening usa ka higayon sa semana diin ako makasalig sa pagdawat og espirituhanong pag-amuma. Kadaghan sa mga okasyon nga moadto ko sa family home evening nga adunay mga pangutana sa akong hunahuna aron lang makakaplag og tubag diha sa mga leksyon o sa spiritual thought nga gipakigbahin. Kini usab usa ka panahon sa paghimo ug pagpamalandong sa mga tumong nga nakatabang kanako nga molambo sa personal nga paagi.

Nakadesisyon na nga kanunayng mohimo og family home evening, kini dili nako makonsiderar nga usa ka sakripisyo. Kahibalo ko nga kini ang dapit nga kinahanglang anaa ko; kini usab ang panahon diin ako gustong maanaa.