Pagpalambo sa Kalooy

Sa sambingay mahitungod sa nawala nga karnero, ang magbalantay sa karnero miadto aron sa pagpangita sa nawala nga karnero ug nangita hangtud nga kini iyang nakit-an. Dayon siya mipauli, nga malipayon (tan-awa sa Lucas 15:4–7).

Sa sambingay mahitungod sa nawala nga salapi, gidagkutan sa biyuda ang kandila, nga maoy naghatag og kahayag, ug gisilhigan ang matag suok aron makit-an ang salapi. Nalipay siya sa iyang pagkakita niini (tan-awa sa Lucas 15:8–10).

Kining duha ka mga sambingay mga ehemplo sa buhat nga gihimo sa pagpangita, pagpahayag sa kangitngit, ug pagpanilhig hangtud nga ang giampingan nga butang o ang nawala nga kalag nakit-an ug mipauli ngadto sa nagmaya nga panimalay.

Ang usa ka maayong ehemplo sa kalooy ug pagserbisyo nga naghimo og kalainan mao ang ehemplo nila ni Don ug Marian Summers. Samtang nagserbisyo didto sa England, gihangyo sila nga moserbisyo sa ilang katapusang unom ka bulan sa ilang misyon didto sa Swindon Branch aron sa pagtudlo ug pagtabang sa pagpa-aktibo sa mga miyembro. Sulod sa 80 ka tuig ang Swindon nahimo nang usa ka branch nga may pipila ka matinud-anon ug may daghang maayo nga mga miyembro nga nahimong dili na kaayo aktibo.

Sila si Don ug Marian misulat: “Ang among unang pagbisita sa Swindon Branch medyo makapaguol samtang among gihimamat ang mga Santos diha sa usa ka bugnaw, inabangan nga hall. Ang kongregasyon nga 17 ka buok, lakip nila ni President ug Sister Hales ug 4 ka mga misyonaryo. Nagsul-ob pa gihapon kami sa among mga winter coat, kaming tanan nagtapok sa usa ka gamay, dili igo nga heater samtang naminaw kami sa leksyon sa Sunday School.”

Ang sulat mipadayon: “Usa ka miyembro sa branch miduol kanako usa ka adlaw niana: ‘Elder Summers, mahimo ba ko nga mohatag kanimo og gamay nga tambag? Ayaw gayud hisguti ang pulong ikapulo ngadto sa mga miyembro sa Swindon; wala gayud sila motuo niini, ug makapasagmuyo ka lang kanila.’”

Si Brother Summers miingon: “Gitudlo gayud namo ang ikapulo ug ang uban pa nga mga baruganan sa ebanghelyo. Uban sa ehemplo ug pag-awhag sa usa ka presidente sa branch, dihay kausaban sa kasingkasing, ug ang hugot nga pagtuo ug pagka-aktibo misugod sa paglambo. Ang mga rekord sa mga miyembro updated kaayo samtang gibisitahan namo ang matag balay sa miyembro. Sa dihang ang mga lider misugod sa pagpakabana, ang mga miyembro misugod sa pagsanong, ug usa ka bag-ong diwa ang mipatigbabaw sa branch. Ang mga miyembro nahimong mahinamon na usab mahitungod sa ebanghelyo ug nagtinabangay sa usag usa. …

“Usa ka batan-ong magtiayon naglisud sa pag-adjust ingon nga ang ilang mga kostumbre, mga kinaiya, ug sininaan lahi. Nasilo sila sa mga sugyot alang sa mga kausaban. Ang magtiayon misulat og kaduha ngadto sa bishop [nianang higayuna ward na kini] ug mihangyo nga ipatangtang ang ilang mga pangalan sa mga rekord sa Simbahan. Diha sa katapusan nilang sulat ilang gidid-an ang bisan kinsa nga mga miyembro sa pagbisita kanila, busa [kami] miadto sa nagtinda og mga bulak ug mipalit og maanindot nga tanom nga mga chrysanthemum ug gipahatud kini ngadto sa batan-ong magtiayon. Simple lang kadto nga sulat: ‘Nahigugma kami kaninyo; gimingaw kami kaninyo; nagkinahanglan kami kaninyo. Palihug balik.’ Nagpirma, Swindon Ward.

“Pagkasunod Dominggo mao ang miting sa pagpuasa ug pagpamatuod ug katapusan namong Dominggo sa Swindon. Adunay 103 ka mga miyembro ang nanambong, ikomparar sa 17 unom ka bulan ang milabay. Ang batan-ong magtiayon anaa didto, ug sa paghatag sa iyang pagpamatuod, ang bana nagpasalamat sa Swindon Ward sa wala pagbiya kanila.”

Matag usa kanato mahimong adunay susama nga mga kasinatian diha sa atong lokal nga mga ward ug mga branch pinaagi sa pagtrabaho ug paghigugma niadtong kinsa dili kaayo aktibo. Unsa kini ka dakong kalipay sa paghatag og “kalooy, maghimo og kalainan” (Judas 1:22) niadtong kinsa tingali andam nang makit-an ang ilang kaugalingon ug dayon gusto nang mobalik.