Unsa ka Dako ang Imong Hingpit nga Kalipay

Pipila lang sa hingpit nga kalipay sa kinabuhi ang mas tam-is ug mas malungtaron kay sa pagkasayud nga kamo makatabang sa uban sa pagdawat sa gipahiuli nga ebanghelyo ni Jesukristo ngadto sa ilang mga kasingkasing. Ang pag-angkon nianang hingpit nga kalipay mao ang oportunidad sa matag miyembro sa Simbahan. Sa dihang kita nabunyagan, mihimo kita og usa ka saad nga kita “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa, bisan hangtud sa kamatayon, nga [kita] mahimo nga matubos sa Dios, ug malakip uban niadto nga diha sa unang pagkabanhaw, nga [kita] makabaton og kinabuhi nga dayon” (Mosiah 18:9).

Ang tanang mga miyembro midawat sa bahin niana nga responsibilidad nga gihatag sa Simbahan sa pagdala sa ebanghelyo ni Jesukristo ngadto sa kalibutan, bisan asa ug samtang buhi pa sila. Ang Ginoo klaro nga miingon niini: “Tan-awa, Ako mipadala kaninyo sa pagpamatuod ug pagpasidaan sa mga katawhan, ug matag tawo kinsa napasidan-an magpasidaan sa iyang silingan” (D&P 88:81). Ang full-time nga mga misyonaryo adunay gahum sa pagtudlo niadtong kinsa dili pa mga miyembro sa Simbahan. Ang mga miyembro sa Simbahan makabaton og gahum sa pagpangita niadtong giandam sa Ginoo aron tudloan sa mga misyonaryo.

Kinahanglan natong gamiton ang atong hugot nga pagtuo nga ang Ginoo nag-andam og mga tawo sa atong palibut aron matudloan. Nakaila Siya kon si kinsa sila ug kon kanus-a sila andam, ug makagiya Siya kanato ngadto kanila pinaagi sa gahum sa Espiritu Santo ug makahatag kanato og mga pulong sa pagdapit kanila aron matudloan. Ang saad nga gihatag sa Ginoo ngadto sa usa ka misyonaryo niadtong 1832 mao usab ang saad nga Iyang ihatag kanato sa atong responsibilidad sa pagpangita sa mga tawo nga andam na aron tudloan sa mga misyonaryo: “Ako mopadala diha kaniya sa Maghuhupay, nga motudlo kaniya sa kamatuoran ug sa agianan diin siya molakaw; ug tungod kay siya matinud-anon, Ako mokorona kaniya pag-usab og mga binugkos” (D&P 79:2–3).

Ug ang saad sa labing hingpit nga kalipay alang sa matinud-anon nga misyonaryo maato usab isip matinud-anon nga mga miyembro kinsa naghatag sa atong mga kasingkasing ngadto sa misyonaryo nga buhat:

“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!

“Tan-awa, ikaw nakabaton sa akong ebanghelyo sa imong atubangan, ug sa akong lig-on nga sukaranan, ug sa akong kaluwasan.

“Pangayo sa Amahan pinaagi sa akong ngalan, sa hugot nga pagtuo nga ikaw makadawat, ug ikaw makabaton sa Espiritu Santo, nga nagpadayag sa tanan nga mga butang nga angay ngadto sa mga katawhan” (D&P 18:16–18).

Agig dugang sa Espiritu Santo nga motabang kanato sa pag-ila ug pagdapit niadtong andam na aron matudloan, ang Ginoo mitawag ug mibansay og mga lider aron sa paggiya kanato. Sa usa ka sulat nga gipetsahan og Pebrero 28, 2002, ang Unang Kapangulohan mihatag og dugang nga responsibilidad alang sa misyonaryo nga buhat diha sa mga bishop ug sa mga ward.¹ Uban sa tabang sa ward o konseho sa branch, ang executive committee sa priesthood nagpalambo og usa ka misyonaryo nga plano alang sa unit. Diha niana nga plano mao ang mga sugyot mahitungod kon sa unsang paagi nga ang mga miyembro makapangita niadtong andam na aron matudloan sa mga misyonaryo. Adunay usa ka tawo nga gitawag isip mission lider sa ward o branch. Kana nga mission lider adunay close contact sa full-time nga mga misyonaryo ug sa ilang mga investigator.

Adunay daghang mga paagi nga kamo mas makatubag sa inyong personal nga obligasyon sa pagtabang sa pagpangita og mga tawo aron matudloan sa mga misyonaryo. Ang labing yano nga paagi mao ang labing maayo.

Pag-ampo aron magiyahan sa Espiritu Santo. Pakigsulti sa lokal nga mga lider ug sa mga misyonaryo, nga mangutana sa ilang mga sugyot ug mosaad kanila sa inyong tabang. Dasiga kadtong miapil kaninyo niini nga buhat. Ug magmahimong usa ka saksi sa tanang panahon diha sa unsay imong isulti ug buhaton nga si Jesus mao ang Kristo ug nga ang Dios motubag sa mga pag-ampo.

Ako mopamatuod nga ang Espiritu Santo mogiya kaninyo ngadto niadtong kinsa nangita sa kamatuoran samtang kamo mag-ampo ug mobuhat niana nga paggiya. Ug ako nasayud gikan sa kasinatian nga ang inyong hingpit nga kalipay magmalungtaron kauban niadtong kinsa mipili sa pagdawat sa ebanghelyo nganha sa ilang mga kasingkasing ug dayon molahutay diha sa hugot nga pagtuo.