Atong Pahina
Usa ka adlaw sa among pagpamauli gikan sa simbahan, aduna koy gibati sa akong kasingkasing nga nakapalipay gyud kanako. Mibati ko nga ang Espiritu Santo anaa kanako, ug gusto kong mosangyaw sa ebanghelyo ngadto sa tanang tawo kinsa wala makahibalo niining kahibulongan nga buhat nga nakapausab sa akong kinabuhi ug sa akong pamilya. Sa among pag-abut sa balay, miadto ko sa akong kwarto ug nagbasa sa Basahon ni Mormon. Ang akong paboritong kasulatan mao ang Mosiah 2:17, diin kini naghisgut kanako nga kon ako moserbisyo sa uban, ako nagserbisyo sa Langitnong Amahan.
Roberto C., age 10, Bolivia
Dili gayud nako makalimtan ang hilabihang kalipay nga akong gibati sa dihang ako gibunyagan. Ang akong amahan nagbunyag kanako, ug ang akong mga igsoon nanganta para kanako. Ang akong inahan nangutana kon gusto nakong mopamatuod, ug ako miingon kaniya nga gusto kong moawit og kanta sa Primary nga akong nakat-unan nga nagpahayag sa akong gibati. Ako mikanta, “Gusto ko nga makit-an bangaw kon mag-ulan, giisip ang katahum sa limpyong kalibutan” (“When I Am Baptized,” Children’s Songbook, 103). Samtang mikanta ko, mibati ko nga mora og ang akong kasingkasing gibayaw og maayo! Dili gayud nako makalimtan ang mga nawong sa akong pamilya ug unsa ang akong gibati niadtong adlawa. Kadto ang labing espesyal nga adlaw sa akong kinabuhi.
Esther F., edad 8, Costa Rica
Elena Z., edad 9, Belarus
Marcelo B., edad 9, nagpuyo sa Brazil. Siya adunay pagpamatuod sa Manluluwas. Siya nasayud nga si Jesus buhi, ug siya nasayud nga siya makabalik sa presensya sa Langitnong Amahan kon siya mosunod sa mga sugo. Siya ganahang mobasa sa mga pahina alang sa mga bata diha sa Liahona.
Ang mga bata sa Primary sa Cabudare Ward, Barquisimeto Venezuela Stake, mipaabut sa ilang gugma sa tanang mga bata sa Primary sa tibuok kalibutan. Sila ganahang mokanta og mga himno, ug sila nag-ampo alang sa ilang mga higala sa Primary ug alang sa propeta, si Presidente Thomas S. Monson, ug para kang Sister Monson.
Joshua A., edad 12, Pilipinas
Ang akong mga ginikanan nabunyagan sa wala pa ko natawo, mao nga anaa nako sa Simbahan sa akong tibuok kinabuhi. Gipanganlan ko og Joseph sa akong amahan tungod sa maayong mga butang nga gihimo ni Propeta Joseph Smith ug ni Jose usab kinsa gibaligya ngadto sa Ehipto. Si Jose sa Ehipto miluwas og daghan gikan sa hulaw, ug si Propeta Joseph Smith mipahiuli sa tinuod nga Simbahan dinhi sa yuta. Kining duha ka talagsaong mga Joseph nagdasig kanako sa pagsunod sa ebanghelyo.
Ganahan ko sa Primary, ug ganahan ko sa mga istorya sa Basahon ni Mormon. Ang akong paborito anaa sa Alma 8, diin si Alma misunod sa Ginoo ug mibalik aron sa pagtudlo sa ebanghelyo ngadto sa mga katawhan sa Ammonihah uban ni Amulek. Gusto kong mahimong usa ka misyonaryo nga may kasingkasing nga molahutay sama kang Alma.
Joseph O., edad 11, Ghana
Paghulagway sa bunyag pinaagi ni James Johnson