Pagkat-on sa Pagpaminaw ug Pagsabut sa Espiritu

Ang Manluluwas misaad sa Iyang mga Apostoles nga human Siya mobiya kanila, sila makatagamtam sa gasa sa Espiritu Santo. Siya miingon, “Ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo” (Juan 14:26). Kini nga saad natuman sa adlaw sa Pentecostes.

Ang mga miyembro sa Ang Simbahan ni Jesukristo sa mga Santos sa Ulahing mga Adlaw may katungod [entitled] niining sama nga gasa. Human kita mabunyagi, ang gasa sa Espiritu Santo gihatag kanato pinaagi sa pagpandong sa mga kamot niadtong kinsa may katungod sa pagpahigayon sa mga ordinansa sa ebanghelyo. Kini nga gasa mao ang katungod, kon kita takus niini, sa makanunayong pagpakig-uban sa ikatulo nga miyembro sa Dios nga Kapangulohan.

Ang pagpakig-uban sa Espiritu Santo mao ang usa sa labing dako nga panalangin nga atong matagamtan dinhi sa mortalidad. Si Elder Bruce R. McConkie (1915–85) sa Korum sa Napulog Duha ka mga Apostoles miingon:

“Ang mga tawo kinahanglan—labaw sa tanang mga butang dinhi sa kalibutan—sa pagtinguha sa paggiya sa Espiritu Santo. Walay lain nga sama kaimportante kaysa pagpakig-uban sa Espiritu Santo. …

“Walay presyo nga hilabihan ka mahal, walay trabaho nga hilabihan ka lisud, walay sakripisyo nga hilabihan ka dako, kon tungod niining tanan kita makadawat ug makatagamtam sa gasa sa Espiritu Santo.”²

Si Propeta Joseph Smith mitudlo nga ang Espiritu sa Dios makat-unan ug “pinaagi sa pagkat-on sa Espiritu sa Dios ug sa pagsabut niini, kamo mahimong molambo ngadto sa baruganan sa pagpadayag, hangtud nga kamo mahimong hingpit diha ni Kristo Jesus.”³

Usa sa labing importanting mga butang nga atong buhaton mao ang pagkat-on sa Espiritu sa Dios—pagkat-on sa pagpaminaw ug pagsunod sa mga aghat sa Espiritu. Kon ato kining tinguhaon ug mahimong takus, ang Ginoo motudlo kanato sa mga baruganan sa pagpadayag.

Sa pagkat-on sa Espiritu sa Dios, kita kinahanglang magkat-on sa pagpaminaw sa atong kasingkasing. Si Presidente Boyd K. Packer, Presidente sa Korum sa Napulog Duha ka mga Apostoles, miingon: “Ang Espiritu mao ang ligdong, hinay nga tingog—usa ka tingog nga mabati kaysa madungog. Kini usa ka espirituhanong tingog nga moabut sa hunahuna isip usa ka panghunahuna nga gibutang sa inyong kasingkasing.”⁴

Si Presidente Packer mitudlo usab: “Ang inpirasyon mas daling moabut sa linaw nga mga panghitabo. Ang ingon nga mga pulong hilum, ligdong, malinawon, Maghuhupay daghan diha sa mga kasulatan: ‘Humilom kamo ug ilhon ninyo nga ako mao ang Dios.’ (Sal. 46:10; mga italic gidugang.) Ug ang saad, ‘Ikaw makadawat sa akong Espiritu, ang Espiritu Santo, gani ang Maghuhupay, nga magtudlo kanimo sa malinawon nga mga butang sa gingharian.’ (D&P 36:2; mga italic gidugang).”

Si Presidente Packer midugang: “Samtang kita makadapit niining komunikasyon, kini dili mapugos! Kon ato kining pugson, mahimo kitang malingla.”⁵

Ang labing importante sa proseso sa atong pagkat-on mao ang atong responsibilidad sa pagbuhat, walay paglangay, sumala sa espirituhanong mga pag-aghat nga atong nadawat. Si Presidente Thomas S. Monson misulat: “Kita magbantay. Kita magpaabut. Kita maminaw nianang ligdong, hinay nga tingog. “Kon kini mosulti, ang maalamong mga tawo mosunod. Ang mga pag-aghat sa Espiritu dili unya-unyaon.”⁶

Ang pagkat-on sa pagpaminaw ug pagsabut sa Espiritu usa ka hinay-hinay ug padayon nga proseso. Ang Manluluwas miingon, “Siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (D&P 50:24). “Kay ngadto kaniya nga modawat Ako mohatag og dugang pa” (2 Nephi 28:30).

Sama nga si Kristo “wala makadawat sa kahingpitan sa sinugdanan, apan nakaangkon og grasya ug dugang pa nga grasya” (D&P 93:12), mao usab, samtang kita mosunod sa Iyang mga sugo, kita “makaangkon og grasya ug dugang pa nga grasya” (D&P 93:20; tan-awa usab sa Juan 1:16) ug “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Ang proseso sa atong pagkat-on sa kanunay sama kahinay sa pagkahulog sa yamog gikan sa langit (tan-awa sa D&P 121:45; 128:19).

Si Elder Richard G. Scott sa Korum sa Napulog Duha ka mga Apostoles nagtudlo nga “walay yano nga pormula o pamaagi nga motugot dayon [kanato] sa pagkahimong hanas sa abilidad nga magiyahan pinaagi sa tingog sa Espiritu.” Hinoon, “ang atong Amahan naglaum nga [kita] makakat-on unsaon sa pagbaton nianang balaanong tabang pinaagi sa pagpakita og hugot nga pagtuo ngadto Kaniya ug sa Iyang Balaang Anak, nga si Jesukristo.”

Si Elder Scott mipadayon: “Unsay nakita nga makahasol nga buluhaton sa sinugdanan mahimong mas sayon sa pagdumala sa paglabay sa panahon samtang kamo kanunay nga maningkamot sa pag-ila ug pagsunod sa mga pagbati nga giaghat sa Espiritu. Ang inyong pagsalig sa direksyon nga inyong nadawat gikan sa Espiritu Santo mahimo usab nga mas malig-on,” ug ang “inyong pagsalig diha sa mga impresyon nga inyong gibati mahimong mas sigurado kay sa inyong pagdepende diha sa unsay inyong nakita o nadungog.”⁷

Isip kabahin sa atong proseso sa pagkat-on, ang Ginoo motabang kanato nga makita ang mga resulta, diha sa atong kinabuhi mismo ug sa kinabuhi sa uban, sa atong pagbuhat sa mga pag-aghat nga atong nadawat gikan sa Espiritu. Kini nga mga kasinatian makapalig-on sa atong hugot nga pagtuo ug makahatag kanato og mas dakong kaisug sa pagbuhat sa umaabot.

Ang pagkat-on sa pagpaminaw ug pagsabut sa Espiritu nagkinahanglan og dakong paningkamot. Apan ang Ginoo misaad nga ang matinud-anon “makadawat og pagpadayag ug dugang nga pagpadayag, kahibalo ug dugang nga kahibalo, nga [unta sila] masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon” (D&P 42:61).