Nalig-on pinaagi sa usa ka Himno

Mihukom ako sa pag-apil og kompetisyon sa usa ka marathon uban sa mga katrabaho sa Western Cape, South Africa. Nagbansay ug nagkugi ko pag-ayo agi og pagpangandam sa lumba.

Sa adlaw sa lumba, mibangon ko, nagbasa sa kasulatan, ug nag-ampo. Gikulbaan ko, apan gibati usab nako nga ako kinahanglang mosalig sa Ginoo. Nasayud ko nga kon ako ning buhaton, Siya motabang aron makalahutay ug mosuporta.

Kami kinahanglang molakaw o modagan og 40 kilometros (25 ka milya). Kami nagsugod sa alas 8:00 sa buntag. Ang panahon bugnaw ug nagtaligsik, busa sa sinugdanan nalingaw sa paglakaw ug maayo ra ko. Apan sa dihang diha nako sa mga 10 kilometros gikan sa katapusang linya, ang lumba nahimong lisud kaayo para kanako. Misakit ang kaunuran sa usa nako ka paa, ug ako dihay mga luto. Gusto nakong moundang. Dayon misugod ako sa pagkanta og usa ka himno:

Ang mga pulong sa himno nagbalik-balik sa akong hunahuna ug mipakusog sa akong dagan, ug akong nahuman ang lumba diha sa kalig-on sa himno sa Ginoo.

Kini nga kasinatian nakatudlo kanako nga ang ebanghelyo ni Jesukristo kabahin sa paglahutay. Kini susama sa paglakaw o pagdagan sa usa ka lumba. Kita usahay kapuyon, mopahulay, ug molakaw pagbalik. Ang Langitnong Amahan dili mobiya kanato bisan kapila pa kita madagma; alang Kaniya ang importante mao nga kon kapila kita mobarug ug molakaw pag-usab. Ang Iyang ebanghelyo kabahin sa paghuman sa lumba.