Elder Carl B. Cook

Tē ti’aturi nei Elder Carl B. Cook ē, te fāna’ora’a ’ia tāvini, ’o te hō’ē ïa o te mau ha’amaita’ira’a rahi roa a te mau melo o te ’Ēkālesia a Iesu Mesia i te Feiā Mo’a i te mau Mahana Hope’a Nei. Tē parau ato’a nei rā ’oia ē, tītauhia te fa’aro’o nō te fāri’i ’e nō te fa’arahi i te hō’ē pi’ira’a.

’Ua fa’a’au ’o Elder Cook, tei pāturuhia ’ei melo nō te peresidenira’a o te Hitu ’Ahuru i te 31 nō Māti 2018, i te mau melo o te ’Ēkālesia—e tāvini ’āmui nei i roto i te mau ’āma’a ’e te mau pāroita, i roto i te mau pupu autahu’ara’a ’e te mau pupu tauturu—’ei « tī’ohura’a huira nihoniho » i ni’a i te hō’ē pere’o’o, nāna e hōro’a i te hō’ē pūai rahi atu.

’Ua parau ’oia i te ’āmuira’a rahi nō ’Ātopa 2016 ē : « ’Ia ’āpitihia te tī’ohura’a huira nihoniho ’e nā to’omaha huira, e ti’a ia ’oe ’ia tu’u mai te tauira’a i raro, ’ia hōro’a i te pūai ’e ’ia tere. » « Mai te mau huira nihoniho e tāhō’ē ia rātou nō te hōro’a i te pūai rahi a’e, e rahi a’e tō tātou pūai mai te mea ē, e tāhō’ē tātou. Mai te mea ē, e tāhō’ē tātou nō te tāvini i te tahi ’e te tahi, e rahi atu tā tātou ’ohipa e oti i tā tātou e rave tātou ana’e. E mea fa’ahiahia ’ia fafau ’e ’ia tāhō’ē tātou nō te tāvini ’e nō te tauturu i te ’ohipa a te Fatu. »

’Ua pāturuhia Elder Cook ’ei Hitu ’Ahuru Hui mana fa’atere rahi i te 2 nō ’Ēperēra 2011. Nā mua a’e i teie tonora’a ’āpī tāna, ’ua tāvini Elder Cook i te pū fa’atere o te ’Ēkālesia, ’ua tauturu ’oia i te ha’apa’o i te ārea nō Amerika Apato’erau Tō’o’a o te rā, ’e tē vai atu ra. Nā mua atu ’ua tāvini ’oia ’ei peresideni nō te ārea nō Afirika Apato’a Hiti’a o te rā.

’Ua fa’aitoito Elder Cook i te feiā mo’a ’ia ha’amana’o ē, te mau pi’ira’a i roto i te ’Ēkālesia, nō ’ō mai ïa i te Atua nā roto mai i tāna mau tāvini i fa’ata’ahia.

« E tae mai te mau ha’amaita’ira’a mai te mea ē, e tāmau māite noa tātou i roto i tō tātou mau pi’ira’a ’e te mau hōpoi’a, ’e ’ia tāmau noa ma tō tātou fa’aro’o ato’a. »

’Ua noa’a tā Elder Cook parau tū’ite Licence i te fare ha’api’ira’a Weber State College i Utah ’e te parau tū’ite Master nō te fa’aterera’a faufa’a i Utah State University. Hou ’oia ’a pi’ihia ai i te Hitu ’Ahuru, ’ua ’ohipa ’oia i roto i te tapiho’ora’a fenua.

I roto i te mau pi’ira’a a Elder Cook, ’ua tāvini ’oia ’ei misiōnare rave tāmau i Hambourg (Heremani), ’e ’ei ’episekōpo, ’ei peresideni titi, ’ei Hitu ’Ahuru ārea ’e ’ei peresideni nō te misiōni nō New Zealand Auckland.

’Ua fānauhia ’oia i Ogden, i Utah (Marite), i te 15 nō ’Ātopa 1957. ’Ua fa’aipoipo ’oia ia Lynette Hansen i te ’āva’e Tītema 1979. E pae tā rāua tamari’i.