Elder José A. Teixeira

Tē ha’amana’o nei Elder José A. Teixeira i te hō’ē ha’api’ira’a tāna i ’apo mai i tōna ’āpīra’a i Pōtītī. I te hō’ē putuputura’a ’utuāfare tā rātou, ’ua ha’amo’e ’oia iāna nō te haere e tāi’a. ’Ua tae mai te mana’o e parau i tōna nā metua i te vāhi tāna e haere ra, ’ua fa’aoti rā ’oia ’eiaha i te mea tē paraparau noa ra rātou.

Tau hora i muri mai, ’e ’ua ’itehia mai ’oia i te pae ’ānāvai, ’ua pe’ape’a roa tōna nā metua. Mai reira, ’ua ha’api’i ’oia e fa’aro’o i tōna nā metua, e ’ere noa rā terā, e fa’aro’o ato’a i te mau muhumuhu a te Vārua Maita’i.

Mai reira atu, ’ua fa’ariro Elder Teixeira ’ei peu nōna ’ia pe’e i te reo iti marū. ’Ua fa’aro’o rātou tōna ’utuāfare i te ’evanelia i te matahiti 1976, i te ’īritira’ahia Pōtītī nō te ’ohipa misiōnare. ’Ua bāpetizohia ’oia i te 16ra’a o tōna matahiti ’e ’ua tāvini ’oia i te hō’ē misioni i roto i te misiōni nō Lisbon Portugal.

« E mana tō tā tātou mau mā’itira’a i taui i tō tātou orara’a, e’ita e nehenehe e huna », tē nā reira ra ’ō Elder Teixeira, tei pāturuhia ’ei melo nō te peresidenira’a nō te Hitu ’Ahuru i te 31 nō Māti 2018. « Teie hōro’a, e tāpa’o fa’ahiahia ïa nō te ti’aturi i ni’a ia tātou ’e e hōpoi’a poihere ato’a nō tātou e fa’a’ohipa i te reira ma te pa’ari », ’o tāna ïa i ha’api’i i te ’āmuira’a rahi nō ’Ēperēra 2009.

’Ua noa’a ia Elder Teixeira i te mau parau tū’ite nō te ’ohipa nūmerara’a faufa’a ’e te fa’atere faufa’a, ’e ’ua ’ohipa ’oia nō te ’Ēkālesia ’ei ti’a hi’opo’a nā te ara. ’Ua tāvini ato’a oia i roto i te nu’u reva nō Pōtītī nō te OTAN. I terā tau, ’ua pi’ihia ’oia ’ei upo’o fa’atere nō te ’ohipa ha’apararera’a a te ’Ēkālesia. Mai reira, ’ua fārerei ’oia i tāna vahine ’o Maria Filomena Lopes Teles Grilo. ’Ua fa’aipoipohia rāua i te matahiti 1984 i roto i te hiero nō Bern (Helevetia) ’e e toru tamari’i tā rāua.

’Ua fānauhia José Augusto Teixeira da Silva i Vila Real (Pōtītī), i te 24 nō Fepuare 1961. ’Ua tāvini ’oia ’ei tauturu i roto i te ’episekōpora’a, ’ei peresideni mata’eina’a, ’ei peresideni titi, ’ei Hitu ’Ahuru ārea ’e ’ei peresideni nō te misiōni nō Brazil São Paulo South. ’Ua pāturuhia ’oia ’ei Hitu ’Ahuru Hui mana fa’atere rahi i te 65 nō ’Ēperēra 2008. Tē tāvini nei ’oia ’ei peresideni nō te ārea nō Amerika Apato’a, te pae Apato’a ’e e ha’amata ’oia i tāna tāvinira’a i roto i te peresidenira’a o te Hitu ’Ahuru i te 1 nō ’Ātete 2018.

Nā ni’a roa atu, ’ua parau mai Elder Teixeira ia tātou i roto i te ’āmuira’a rahi nō ’Ēperēra 2015 ’ia « fa’ahōhonu… i tō tātou hāro’aro’a i te Fa’aora… ’Eiaha e vai’iho nō ananahi te mau ’ohipa ’o tā tātou e nehenehe e rave i teie mahana. ’A haere i teie nei iho ā taime i te Mesia. »