Mau ture ’āpī, mau fa’anahora’a ’āpī ’e te mau tao’a ’āpī

Te feiā ’āpī ’e te ’ohipa hiero. ’Ua fa’aara te Peresidenira’a Mātāmua i te tahi mau tauira’a i roto i te mau ture nō te hiero nō te hōro’a i te mau feiā ’āpī tamāroa ’e tamāhine i te rāve’a nō te ’ohipa rahi atu ā i roto i te hiero, ’e nō te tauturu i te mau tamari’i o te Paraimere ’ia fa’aineine maita’i a’e nō te tāvini i roto i te hiero.

Arai, tuatāpapa ’e pāhono i te mau hāmani-’ino-ra’a. ’Ei tauto’ora’a tāmau nō te tauturu i te feiā fa’atere nō ni’a i te huru e arai, e tuatāpapa ’e e pāhono i te hāmani-’ino-ra’a, ’ua hāpono te Peresidenira’a Mātāmua i te hō’ē rata ’e te tahi mātēria tauturu i te mau feiā fa’atere o te ’Ēkālesia i te Fenua Marite ’e i Canada, i te 26 nō Māti 2018. Tē vai nei i roto i te reira mātēria te tahi mau arata’ira’a ’āpī nō ni’a i te huru te mau ’episekōpo ’e te mau peresideni titi e nehenehe e tauturu i te mau ta’ata tei rave-’ino-hia ’e e fa’atere i te mau uiuira’a ’e te mau melo o te ’Ēkālesia.

Mau tauira’a nō te pūhapara’a feiā ’āpī tamāhine. I roto i te mau tauira’a nō te fa’anahora’a pūhapara’a a te feiā ’āpī tamāhine o te ’Ēkālesia ’e te buka e pūharahia i te mau ’āva’e i muri nei, tē vai nei te fa’a’orera’a i te fa’anahora’a ha’apāpūra’a ’e te tūra’ira’a i te mau tamāhine feiā fa’atere i mua.

’Ua ’ōpuahia te buka ’āpī ’ia « tano » nō te feiā ’āpī tamāhine e ora ra nā te ao tā’āto’a, i teienei rā, ’o te reo peretāne noa e vai ra, te Young Women Camp Guide (’e i muri iho e hurihia nā roto i e 23 reo) nō te riro ’ei mātēria tauturu nō te mau peresidenira’a Feiā ’Āpī Tamāhine, nō te feiā ’aravihi i te parau nō te pūhapara’a ’e te mau tamāhine feiā fa’atere, e ’itehia i ni’a ia youngwomen.lds.org.

Hāponora’a i te tahi pehe. Nā roto i te mau tauira’a i roto i te hāponora’a i te pehe i te ’Ēkālesia, e mea ’ōhie ’e te vitiviti i teienei nō te mau melo ’ia hāpono i te tahi pehe mo’a i te ’Ēkālesia tā rātou i pāpa’i. E hāponohia te mau pehe i ni’a ia apps.lds.org/artcomp.

Te rēni video « How To [Nāhea] ». ’Ua haumau te ’Ēkālesia i te hō’ē rēni ’āpī i ni’a ia YouTube tei topahia te i’oa « How To », nō te hōro’a i te tahi tauturu ’ōhie ’e te au i roto i te mau tāmatara’a o te orara’a nei. ’Ua fa’aarahia te reira ’ei « rēni hō’ē roa e ’itehia mai te tauturu nō te mea tā ’oe e hina’aro », ’e ’ua hau i 600 video i teienei tei fa’ata’ahia ’ei iva tuha’a, ’e i roto i te tuha’a tāta’itahi, tē vai ra e rave rahi video nō ni’a i te mau tumu parau rau, nā roto i te reo peretāne ’e te tahi nā roto i te reo pāniora ’e te reo pōtītī. ’A hi’o atu i ni’a ia HowTo.lds.org.

Mau ’īritira’a pāpa’ira’a mo’a. ’Ua fa’aara te ’Ēkālesia i te mau ’ōpuara’a ’īritira’a ineine nō e 34 fa’ahou reo, nā reira ato’a te hō’ē fa’anahora’a ’āpī e ti’a ai i te mau ta’ata ’ia tuatāpapa i te mau tuha’a ’īritira’a ’aita i oti roa hou te pūharara’a hope’a o te reira, te aura’a ra, e roa’a ’oi’oi i te mau melo i te tai’o i te mau pāpa’ira’a mo’a nā roto i tō rātou reo.