Fa’a’ōhie i te ’ohipa misiōnare

I roto i nā ’āva’e e ono i ma’iri, ’ua rave te ’Ēkālesia i te tahi mau ’ohipa rau nō te fa’a’ōhie i te ’ohipa misiōnare.

Mau uira’a nō te mau misiōnare. ’Ua tu’u mai te Peresidenira’a Mātāmua i te tahi mau uira’a nō te mau ’episekōpo ’e te mau peresideni titi ’ia ui atu i te mau ta’ata e tano ’ei misiōnare rave tāmau. Tē fa’aitoito nei rātou i te mau feiā fa’atere, te mau metua ’e te feiā ’āpī ’ia ha’amātau i teie mau uira’a.

’Aita te mau tītaura’a i roto i teie mau uira’a e taui nei ’e e fa’arahi nei i te mau tītaura’a nō te tāvini ’ei misiōnare rave tāmau, nā te hi’o-pinepine-ra’a rā i te reira e tauturu i te mau ta’ata e tano ’ei misiōnare ’e tō rātou metua ’ia ha’api’i i te mau parau tumu ’e ’ia hi’o i te mau vāhi e tītau nei te tahi ha’amaita’ira’a ’aore rā te tahi fa’aineinera’a hau.

Te fa’a’ohipara’a i te mau rāve’a ’āpī. ’Ua pa’uma te nūmera o te mau misiōni e fa’a’ohipa nei i te mau rāve’a ’āpī, mai te 87 i te 162, ’e tē ravehia nei te mau niuniu roro uira’a nō te mono i te mau ’iri roro uira. E tauturu te mau niuniu i te mau misiōnare nō tā rātou mau tuatāpapara’a, te ’imira’a ’e te ha’api’ira’a.

Tē fa’a’ohipa-ato’a-hia nei te rāve’a ’āpī nō te tu’u i ni’a i te natirara te mea e pāhono atu i te mau uira’a a te ta’ata nō ni’a i te fa’aro’o. ’Ua ha’amata te ’Ēkālesia i te fa’a’ohipa i te mau pū ha’api’ira’a nā ni’a i te natirara ’a ono matahiti i teienei, ’e i teie mahana, e 20 pū ha’api’ira’a nā ni’a i te natirara ’ati a’e te ao.

Maoti te rāve’a ’āpī e ti’a ai i te mau melo, i teienei, ’ia paraparau i te mau misiōnare tā rātou i hōro’a atu i te mau hoa nō te ha’api’i. E nehenehe tā rātou e paraparau nō ni’a i te mau hina’aro ’e te mau misiōnare, ’e e ’āmui ato’a i te ha’api’ira’a nā roto i te natirara. E ’ite ’outou nāhea i te rave i reira i ni’a ia lds.org/referrals.

Pāhono i te mau hina’aro e vai ra. Ha’amata i te ’āva’e Tiurai 2018, e fa’atanotano te ’Ēkālesia i te mau ’ōti’a o te tahi 19 misiōni ’e e ha’amauhia e 5 misiōni ’āpī. E riro atura te rahira’a misiōni i te topa mai te 421 i te 407. Teie te mau misiōni ’āpī, ’o te misiōni nō Beresiria Rio de Janeiro South, te misiōni nō Cote d’Ivoire Yamoussoukro, te misiōni nō Nigeria Ibadan, te misiōni nō Philipino Cabanatuan ’e te misiōni nō Zimbabwe Bulawayo. ’Āraua’e e fa’ata’ahia atu te mau ha’amāramaramara’a nō ni’a i te mau misiōni e ’āmui, nā roto i te mau peresideni misiōni i te mau metua o te mau misiōnare i reira.

Mai te taime ’a tauihia ai te matahiti nō te tāvinira’a misiōnare i te matahiti 2012, ’ua ha’amau te ’Ēkālesia e 76 misiōni ’āpī nō te fāri’i i te mau misiōnare tei mara’a mai te 58 000 misiōnare i te 88 000 missionaries. ’Ua marū ri’i mai teie vave’a misiōnare i teienei, mai tei mana’ohia a’ena, ’e i teienei tē vai ra e 68 000 misiōnare e tāvini ra. Te aura’a ra, nō teienei, tītauhia e fa’aiti a’e i te mau misiōni. Te aura’a ato’a, tītauhia ’ia hi’o-maita’i-hia te tonora’a i te mau vāhi e hina’arohia.

Mau pū ha’api’ipi’ira’a misiōnare. ’Ua fa’arahihia te pū ha’api’ipi’ira’a misiōnare nō Provo i Utah (Marite), nā reira ato’a te pū ha’api’ipi’ira’a misiōnare nō Philipino, ’e ’ua ha’amo’ahia rāua to’opiti, ’ua ha’amo’a-ato’a-hia te pū ha’api’ipi’ira’a misiōnare ’āpī nō Ghana. E riro te mau pū ha’api’ipi’ira’a misiōnare nō Pāniora ’e nō Tīreni i te ’ōpanihia i te ’āva’e Tēnuare 2019, ’e e fāri’i te mau misiōnare i tā rātou ha’api’ipi’ira’a misiōnare i roto i nā pū ha’api’ipi’ira’a misiōnare e 13 e vai ra ’ati a’e te ao.