Elder Jack N. Gerard

I tōna ’āpīra’a, ’ua ara Elder Jack N. Gerard i te hora 5 i te po’ipo’i i te mau mahana ato’a nō te ha’apa’o i tā rātou mau pua’atoro. Nō tōna pa’arira’a i te hō’ē vāhi fa’a’apu ’aore re’a ta’ata tāpiri ia Mud Lake, i Idaho (Marite), ’ua ha’api’i ’oia ’ia ’ohipa ’e ’ia amo i te hōpoi’a, e ’ere noa rā terā, ’ua ha’api’i ato’a ’oia i te faufa’a rahi o te mau ta’ata ato’a ’ei tamari’i nā te Atua.

« E ’ohipa nō te ta’ata ato’a i reira ’e e tumu rātou i reira, noa atu ā te ti’ara’a ’aore rā te rahi i roto i te orara’a », ’ua parau Elder Gerard, tei pāturuhia i te 31 nō Māti 2018 ’ei Hitu ’Ahuru Hui mana fa’atere rahi. E ha’api’ira’a tei riro ’ei hōro’a nōna i roto i tōna orara’a.

Nā roto i tāna ’ohipa, ’oia ho’i e tōro’a fa’atere i roto i te mau fa’anahora’a mai te National Mining Association, te America Chemistry Council ’e, ’aita i maoro a’enei, te American Petroleum Institute—’ua fāna’o ’oia ’ia rave i te ’ohipa ’e te mau ta’ata nō te mau vāhi ato’a.

’Ua fānauhia Elder Gerard i te matahiti 1957, nā James ’e Cecil Gasser Gerard. I muri mai i tāna tāvinira’a misiōni i Sydney (Auterāria), ’ua haere Elder Gerard i te fare ha’api’ira’a University of Idaho, i reira te noa’ara’a iāna te tahi ha’api’ipi’ira’a ’e i muri iho te hō’ē tōro’a pāpū i roto i te pupu ’ohipa nō te hō’ē ti’a ’īriti ture nō Idaho mai.

I te ’ohipara’a ’oia i Washington, D.C., ’ua mātau ’oia ia Claudette Neff, e ’ohipa ra ’ei tauturu pupu ’ohipa nō te hō’ē to’ofa nō Utah. « ’Ua ’ana’ana ’oia i te māramarama o te ’evanelia », tē nā ’ō ra Elder Gerard nō ni’a i tā rāua fārereira’a. ’Ua fa’aipoipo rāua i te 4 nō ’Ēperēra 1984, i roto i te hiero nō Roto Miti. E va’u tamari’i tā rāua ’e e maha mo’otua.

’Ua noa’a tā Elder Gerard te parau tū’ite Licence nō te ’ihi poritita ’e te hō’ē parau tū’ite nō te ture i te fare ha’api’ira’a George Washington University.

’Ua tāvini Elder Gerard ’ei ’episekōpo, ’ei peresideni titi, ’ei Hitu ’Ahuru ārea, ’ei ’orometua ha’api’ira’a ’evanelia ’e ’ei peresideni Ha’api’ira’a Sābati.

Tē parau nei Elder Gerard ē, hō’ē ā tō rāua tāna vahine hia’ai ’ia rave i te hina’aro o te Fatu. « Tātou te mau ta’ata tāhuti paruparu nei, ’ua pūpū tātou ia tātou i te mea ato’a e hina’aro te Fatu ’ia rave tātou, ’e tē vai nei te mana’o ha’eha’a ’e te hanahana… nō te ha’amo’ara’a i tō tātou taime ’e tā tātou mau tauto’ora’a i te ’ohipa a te Fatu. »