សូមស្វាគមន៍មកកាន់សន្និសីទ
ដោយប្រធាន ថូម៉ាស អេស ម៉នសុន
នៅពេលយើងស្ដាប់ នោះដួងចិត្តយើងត្រូវបានប៉ះ ហើយជំនឿរបស់យើងបង្កើតឡើង ។
បងប្អូនប្រុសស្រី ខ្ញុំមានអំណរណាស់ដើម្បីស្វាគមន៍បងប្អូនមកកាន់សន្និសីទទូទាំងពិភពលោកដ៏ធំមួយនេះ ។ យើងប្រជុំគ្នាក្នុងទីតាំងជាច្រើនជុំវិញពិភពលោកដើម្បីស្ដាប់ ហើយរៀនពីពួកបងប្អូនប្រុស/ស្រី ដែលយើងបានគាំទ្រជាអ្នកមានសិទ្ធិអំណាច និងអ្នកកាន់តំណែងទូទៅនៃសាសនាចក្រ ។ ពួកលោកបានស្វែងរកជំនួយពីព្រះសម្រាប់សារលិខិតដែលពួកលោកនឹងថ្លែង ហើយពួកលោកមានការបំផុសគំនិតចំពោះអ្វីដែលនឹងត្រូវថ្លែង ។
សន្និសីទនេះបង្គ្រប់ខួបទី 90 ឆ្នាំ របស់ស្ថានីយវិទ្យុនៃការចាក់ផ្សាយសន្និសីទទូទៅ ។ ក្នុងខែ តុលា ឆ្នាំ1924 សម័យប្រជុំនានាត្រូវបានចាក់ផ្សាយតាមវិទ្យុជាលើកដំបូងតាមរយៈស្ថានីយវិទ្យុ KSL គ្រប់គ្រងដោយសាសនាចក្រ ។ សន្និសីទនេះក៏បង្គ្រប់ខួបទី 65 ឆ្នាំ នៃការចាក់ផ្សាយតាមទូរទស្សន៍នៃសន្និសីទទូទៅផងដែរ ។ សន្និសីទទូទៅដែលបានធ្វើឡើងក្នុងខែ តុលា ឆ្នាំ1949 សម័យប្រជុំនានាត្រូវបានបញ្ចាំងតាមទូរទស្សន៍ជាលើកដំបូងទៅពាសពេញតំបន់នៃទីក្រុង សលត៍ លេក តាមរយៈស្ថានីយទូរទស្សន៍ KSL ។
យើងទទួលស្គាល់ពរជ័យនៃប្រព័ន្ធផ្សព្វផ្សាយទំនើបដែលអនុញ្ញាតឲ្យសមាជិកសាសនាចក្ររាប់លាននាក់មើល ឬស្ដាប់សន្និសីទទូទៅ ។ សម័យប្រជុំនានានៅចុងសប្ដាហ៍នេះត្រូវបានចាក់ផ្សាយតាមទូរទស្សន៍ វិទ្យុ ខ្សែកាប បញ្ជូនតាមផ្កាយរណប និងលើអ៊ិនធើរណិត រួមទាំងឧបករណ៍ចល័តផ្សេងៗផងដែរ ។
អំឡុងពេលប្រាំមួយខែបន្ទាប់ពីយើងបានជួបគ្នាចុងក្រោយ មានព្រះវិហារបរិសុទ្ធថ្មីមួយត្រូវបានឧទ្ទិសឆ្លង និងមួយទៀតត្រូវឧទ្ទិសឆ្លងឡើងវិញ ។ ក្នុងខែ ឧសភា ប្រធាន ឌៀថើរ អេហ្វ អុជដូហ្វ បានឧទ្ទិសឆ្លងព្រះវិហារបរិសុទ្ធទីក្រុង ហ្វដ ឡូឌើរដេល រដ្ឋ ផ្លរីដា ។ ការសម្ដែងខាងវប្បធម៌របស់យុវវ័យបានប្រព្រឹត្តទៅមួយថ្ងៃមុនការឧទ្ទិសឆ្លង ។ នៅថ្ងៃបន្ទាប់ ជាថ្ងៃ អាទិត្យ ទី 4 ខែ ឧសភា ព្រះវិហារបរិសុទ្ធត្រូវបានឧទ្ទិសឆ្លងជាបីវគ្គ ។
ទើបតែពីរសប្ដាហ៍កន្លងទៅ ខ្ញុំមានឯកសិទ្ធិដើម្បីឧទ្ទិសឆ្លងព្រះវិហារបរិសុទ្ធទីក្រុង អូកឌិន រដ្ឋ យូថាហ៍ ឡើងវិញ ដែលបានឧទ្ទិសឆ្លងដំបូងបំផុតក្នុងឆ្នាំ 1972 ដោយប្រធាន យ៉ូសែប ហ៉្វីលឌីង ស៊្មីធ ។ ការសម្ដែងខាងវប្បធម៌មួយដ៏ធំ បានប្រព្រឹត្តទៅមួយថ្ងៃមុនការឧទ្ទិសឆ្លងឡើងវិញ ដោយមានយុវវ័យជាច្រើនបានចូលរួមសម្ដែងជាពីរវគ្គដាច់ពីគ្នា ដោយមានតួសម្ដែងខុសគ្នាសម្រាប់ក្រុមនីមួយៗ ។ មានយុវវ័យចូលរួមសរុបទាំងអស់ចំនួន 16,000 នាក់ ។ ការឧទ្ទិសឆ្លងឡើងវិញបានប្រព្រឹត្តទៅនៅថ្ងៃបន្ទាប់នោះ ដោយមានពួកបងប្អូនប្រុសជាច្រើននាក់ចូលរួម អមដោយថ្នាក់ដឹកនាំអង្គការជំនួយ និងប្រធានព្រះវិហារបរិសុទ្ធ ទីប្រឹក្សា និងភរិយាពួកលោក ។
ការសាងសង់ព្រះវិហារបរិសុទ្ធនៅតែបន្ត ដោយការយកចិត្តទុកដាក់ ។ ព្រះវិហារបរិសុទ្ធថ្មីនៅទីក្រុង ហ្វូនិក រដ្ឋ អារីហ្សូណា នឹងត្រូវឧទ្ទិសឆ្លងនៅខែក្រោយ ហើយឆ្នាំក្រោយឆ្នាំ 2015 យើងរំពឹងឧទ្ទិសឆ្លង ឬឧទ្ទិសឆ្លងឡើងវិញឲ្យបានយ៉ាងហោចណាស់ព្រះវិហារបរិសុទ្ធចំនួនប្រាំ អាចមានច្រើនជាងនេះអាស្រ័យទៅលើការបញ្ចប់ការសាងសង់ ។
ដូចខ្ញុំបានលើកឡើងក្នុងខែ មេសា ថានៅពេលព្រះវិហារបរិសុទ្ធដែលបានប្រកាសប្រាប់ពីមុនៗទាំងអស់ត្រូវបានសាងសង់ចប់ និងឧទ្ទិសឆ្លងហើយនោះ យើងនឹងមានព្រះវិហារបរិសុទ្ធចំនួន 170 កំពុងដំណើរការនៅលើពិភពលោក។ ដោយសារយើងកំពុងផ្ដោតការខិតខំលើការបញ្ចប់ការសាងសង់ព្រះវិហារបរិសុទ្ធដែលប្រកាសប្រាប់ពីមុនៗ នោះយើងសូមមិនប្រកាសនាពេលឥឡូវនេះពីព្រះវិហារបរិសុទ្ធថ្មីៗនោះឡើយ ។ យ៉ាងណាក៏ដោយក្នុងពេលខាងមុខ ពេលយើងរកឃើញពីតម្រូវការ និងទីតាំងហើយនោះ សេចក្ដីប្រកាសបន្ថែមពីព្រះវិហារបរិសុទ្ធនឹងត្រូវបានធ្វើឡើង ។
សាសនាចក្របន្តរីកចម្រើនទៅមុខ ។ បច្ចុប្បន្ននេះ យើងមានចំនួនសមាជិករឹងមាំជាង 15 លាននាក់ ហើយកំពុងបន្តកើនឡើងជាលំដាប់ ។ កិច្ចការផ្សព្វផ្សាយសាសនាកំពុងឆ្ពោះទៅមុខមិនបង្អង់ឡើយ ។ យើងមានអ្នកផ្សព្វផ្សាយសាសនាជាង 88,000 នាក់កំពុងបម្រើ ចែកចាយសារលិខិតពាសពេញពិភពលោក ។ យើងសូមបញ្ជាក់សាជាថ្មីថា កិច្ចការផ្សព្វផ្សាយសាសនា គឺជាករណីយកិច្ចរបស់បព្វជិតភាព ហើយយើងសូមលើកទឹកចិត្តយុវជនដែលសក្ដិសម និងមានសមត្ថភាពឲ្យចេញបម្រើ ។ យើងមានអំណរគុណជាខ្លាំងចំពោះយុវនារីដែលចេញបម្រើ ។ ពួកគេរួមចំណែកយ៉ាងសំខាន់ ទោះបីជាគ្មានករណីយកិច្ចដើម្បីបម្រើដូចជាយុវជនក៏ដោយ ។
ឥឡូវនេះ ខ្ញុំសូមអញ្ជើញបងប្អូនឲ្យយកចិត្តទុកដាក់ស្ដាប់ដល់ពួកបងប្អូនប្រុស/ស្រី ដែលនឹងរួមចំណែកថ្លែងសុន្ទរកថានៅថ្ងៃនេះ និងថ្ងៃស្អែកក្នុងសម័យប្រជុំសន្និសីទទាំងឡាយរបស់យើង ។ អ្នកដែលត្រូវបានស្នើឲ្យឡើងនិយាយ មានការទទួលខុសត្រូវដ៏ធំមួយ ដើម្បីធ្វើដូច្នោះ ។ នៅពេលយើងស្ដាប់ សូមឲ្យដួងចិត្តយើងត្រូវបានប៉ះពាល់ ហើយសេចក្ដីជំនឿយើងកើនឡើង ខ្ញុំសូមលំអោនកាយអធិស្ឋានក្នុងព្រះនាមព្រះយេស៊ូវគ្រីស្ទ អាម៉ែន ។