ဘုရားသခင်၏ခိုင်မာသောသက်သေ၊ မော်မုန်ကျမ်း

မော်မုန်ကျမ်းသည် ကျွန်တော်တို့ဘာသာတရား၏ အထိန်းကျောက်မျှသာမဟုတ်ဘဲ၊ စုံစမ်းခံရခြင်းများ သို့မဟုတ် အဖြေမရတဲ့မေးခွန်းများနဲ ကျွန်တို့ရင်ဆိုင်ရတဲ့အခါမှာလည်း ကျွန်တော်တို့သက်သေခံချက်များရဲ့ အထိန်းကျောက်ဖြစ်လာနိုင်ပါတယ်။ အဲဒီကျမ်းက ကျွန်တော်တို့ရဲ့သက်သေခံချက်များကို ခိုင်မာမှန်ကန်စွာတည်ရှိနိုင်စေပါတယ်။ ဒီကျမ်းဟာ သမ္မာတရားချိန်ခွင်မှာ ဝေဖန်သူတွေရဲ့ ငြင်းခုံခြင်းအားလုံးပေါင်းစပ်ထားသောအလေးချိန်ထက် အလေးချိန်သာတဲ့ကျမ်းတစ်ကျမ်းဖြစ်ပါတယ်။ ဘာကြောင့်ပါလဲ၊ ဘယ်လိုပဲသမိုင်းနှင့်ဆိုင်သော၊ သို့မဟုတ် အခြားသောဆန့်ကျင်ငြင်းခုံခြင်းများရှိရှိဒီကျမ်းကအမှန်ဖြစ်မယ်ဆိုလျှင်၊ ဂျိုးဇက်စမစ်က ပရောဖက်တစ်ပါးဖြစ်ပြီးတော့၊ ဒီအသင်းတော်ဟာ ယေရှုခရစ်တော်၏ ပြန်လည်ပြင်ဆင်ထားသောအသင်းတော်ဖြစ်သောကြောင့်ပါပဲ။ ဒီအကြောင်းရင်းကြောင့်ပဲ၊ ဝေဖန်သူတွေဟာ မော်မုန်ကျမ်းကို ငြင်းဆိုချင်ကြပါတယ်။ ဒါပေမယ့် ဒီကျမ်းဟာ အမှန်ဖြစ်နေတာကြောင့် သူတို့ရင်ဆိုင်ရတဲ့ အတားအဆီးတွေဟာ ကျော်လွှား၍မရနိုင်သောအရာများ ဖြစ်နေကြပါတယ်။

ပထမဆုံးကတော့၊ ဝေဖန်သူတွေဟာ ဂျိုးဇက်စမစ်ဆိုတဲ့၊ ပညာအနည်းငယ်သာတတ်တဲ့၊ ၂၃နှစ်သားလယ်သမားလေးဟာ ရာပေါင်းများစွာသော တစ်မူထူးခြားတဲ့အမည်တွေနဲ့ နေရာဒေသတွေနဲ့အတူ အကြောင်းအရာ၊ အဖြစ်အပျက်အသေးစိတ်တွေပါဝင်တဲ့ကျမ်းတစ်ကျမ်းကို ဘယ်လိုနည်းနဲ့ ဖန်တီးခဲ့သလဲဆိုတာ ရှင်းပြရမှာဖြစ်ပါတယ်။ သို့ဖြစ်သောကြောင့်၊ ဝေဖန်သူများစွာတို့က၊ သူသည် မြောက်မြားစွာသောစာအုပ်များနဲ့ အခြားဒေသဆိုင်ရာရင်းမြစ်များကို အမှီပြုပြီး မော်မုန်ကျမ်း၏သမိုင်းဆိုင်ရာအကြောင်းအရာတို့ကို ဖန်တီးနိုင်စွမ်းသော ဉာဏ်ကြီးရှင်တစ်ဦးဖြစ်တယ်လို့ အဆိုပြုကြပါတယ်။ ဒါပေမယ့် သူတို့ရဲ့အခိုင်အမာပြောဆိုခြင်းတွေနဲ့ဆန့်ကျင်တာကတော့၊ ဘာသာပြန်ဆိုခြင်းမစတင်မီမှာ ဂျိုးဇက်ကို ဤစွပ်စွဲထားသောရင်းမြစ်တစ်စုံတစ်ခုနှင့်အတူ မြင်ရတယ်လို့ဆိုသူ အသိသက်သေတစ်ဦးမျှမရှိပါဘူး။

ဒီငြင်းခုံခြင်းက မှန်တယ်ဆိုလျင်တောင်မှ၊ မော်မုန်ကျမ်းတည်ရှိခြင်းကို ရှင်းပြဖို့ စိတ်ပျက်စွာပဲမလုံမလောက်ဖြစ်ရပါတယ်။ ဂျိုးဇက်စမစ်သည် ဘယ်လိုနည်းဖြင့် ဤစွပ်စွဲထားသောရင်းမြစ်အားလုံးကို ဖတ်ရှု၍၊ အဆက်အစပ်မရှိတာတွေကို ဖယ်ထုတ်လျက်၊ ဘယ်သူက၊ ဘယ်နေရာ၊ ဘယ်အချိန်စတဲ့ ရှုပ်ထွေးတဲ့အချက်တွေကို ရှင်းလင်းစေပြီးတော့၊ ပြည့်စုံသောမှတ်ဉာဏ်ဖြင့် နှုတ်တိုက်ချပေးသလဲဆိုတဲ့ အမေးကိုဖြေရမှာလည်းဖြစ်ပါတယ်။ ဘာကြောင့်လည်းဆိုရင် ဂျိုးဇက်ဘာသာပြန်ဆိုစဉ်က သူ့မှာ ဘာမှတ်စုမျှမရှိခဲ့လို့ပါပဲ။ အမှန်ကတော့၊ “သူ့မှာ ပုံနှိပ်စာမူလည်းမရှိ၊ ဖတ်စရာစာအုပ်လည်းမရှိ။ … အကယ်၍၊ သူ့မှာ အဲဒီလိုအရာမျိုးတစ်စုံတစ်ခုရှိမယ်ဆိုရင် ကျွန်မ မမြင်အောင်ဖုံးကွယ်ထားနိုင်မှာမဟုတ်ပါဘူး”လို့ သူ့ဇနီး အီမာကပြန်ပြောပြခဲ့ပါတယ်။^၁

ဒါဆိုရင် ဂျိုးဇက်ဟာစာအုပ်တစ်အုပ်မျှမရှိဘဲနဲ့ ဒီထူးခြားပြောင်မြောက်တဲ့ နှုတ်တိုက်လက်ရာဖြစ်တဲ့ စာမျက်နှာ၅၀၀ပါကျမ်းတစ်ကျမ်းကို ဘယ်လိုနည်းနဲ့ပြုလုပ်ခဲ့ပါသလဲ။ ဒီလိုပြုလုပ်ဖို့ရာဆိုရင်၊ သူဟာ ဖန်တီးနိုင်စွမ်းသောဉာဏ်ကြီးရှင်တစ်ဦးဖြစ်ရုံမျှမက၊ အသေးစိတ်မှတ်မိနိုင်စွမ်းလည်း အဆမတန်ကြီးမားစွာရှိရမှာဖြစ်ပါတယ်။ အကယ်၍၊ ဒီအချက်မှန်ကန်မယ်ဆိုရင်၊ သူ့ကိုဝေဖန်သူတွေဟာ သူရဲ့ထူးခြားပြောင်မြောက်တဲ့ ဒီပါရမီကို ဘာကြောင့်သတိမထားကြပါသလဲ။

အကြောင်းရင်းတွေ အများကြီးရှိပါသေးတယ်။ ဒီငြင်းခုံခြင်းတွေဟာ ကျမ်းရဲ့သမိုင်းဆိုင်ရာအကြောင်းအရာကိုသာ ရှင်းပြပါတယ်။ ဂျိုးဇက်ဟာ ဝိညာဉ်တော်နဲ့လွှမ်းတဲ့ ကျမ်းတစ်ကျမ်းကို ဘယ်လိုနည်းနဲ့ထုတ်လုပ်ပြီး၊ အများစုမှာ သူ့ခေတ်ကခရစ်ယာန်ယုံကြည်မှုများကို ရှင်းလင်းစေ၊ သို့မဟုတ် ဆန့်ကျင်တဲ့ ထိုကဲ့သို့အလွန်လေးနက်သောအယူဝါဒကို သူဘယ်နေရာကရခဲ့ပါသလဲဆိုတဲ့ တကယ့်အကြောင်းအရာကိစ္စတွေ ဆက်လက်ကျန်ရှိပါသေးတယ်။

ဥပမာအားဖြင့်၊ အာဒံ၏ကျဆုံးခြင်းဟာ အပြုသဘောဆောင်သော ရှေ့သို့တက်လမ်းခြင်းဖြစ်ကြောင်း မော်မုန်ကျမ်းက ခရစ်ယာန်ယုံကြည်မှုအများစုနဲ့ ဆန့်ကျင်၍သွန်သင်ပါတယ်။ နှစ်ခြင်းမင်္ဂလာပြုရာမှာ ဖွဲ့ခဲ့တဲ့ပဋိညာဉ်များကို ဒီကျမ်းက ဖော်ပြပါတယ်။ အဲဒီပဋိညာဉ်များကို သမ္မာကျမ်းထဲမှာပြမထားပါဘူး။

ထပ်လောင်းပြီးပြောရမယ်ဆိုရင်တော့၊ ခရစ်တော်၏အပြစ်ဖြေခြင်းမင်္ဂလာကြောင့်ကျွန်တော်တို့ကို သန့်ရှင်းစေနိုင်တော်မူရုံမျှမက၊ စုံလင်ရာသို့လည်းရောက်စေနိုင်တော်မူ၏ဟူသော အားကောင်းတဲ့အတွေးအမြင်ကို ဂျိုးဇက်ဘယ်ကရခဲ့ပါသလဲ။အယ်လမာ ၃၂ရှိ ယုံကြည်ခြင်းအကြောင်း၊ အံ့ဩတုန်လှုပ်ဖွယ်ဒေသနာကို၊ သို့မဟုတ်၊ ကယ်တင်ရှင်၏အပြစ်ဖြေခြင်းမင်္ဂလာအကြောင်း ဗင်္ယာမိန်မင်းကြီး၏ဒေသနာ၊ ဒီအကြောင်းကိစ္စနှင့်စပ်လျဉ်း၍ ကျမ်းစာအပေါင်းတို့၌ အထူးခြားအပြောင်မြောက်ဆုံး ဖြစ်ကောင်းဖြစ်နိုင်တဲ့ဒေသနာကို၊ သို့မဟုတ် ခက်ခဲနက်နဲမှုနဲ့ အယူဝါဒဆိုင်ရာကြွယ်ဝမှုတို့နှင့်အတူ သံလွင်ပင်အကြောင်းတင်စားချက်ကို သူဘယ်ကရခဲ့ပါသလဲလို့ မေးချင်မေးကြပါလိမ့်မယ်။ ဒီတင်စားချက်ကို ကျွန်တော်ဖတ်ရှုရတဲ့အခါ၊ တင်းစားခြင်းရဲ့ ရှုပ်ထွေးမှုကို သဘောပေါက်ဖို့ အသေးစိတ်စီအစဉ်ရေးဆွဲရပါတယ်။ ဂျိုးဇက်စမစ်ဟာ ဘာမှတ်စုမျှမရှိဘဲနဲ့ ဒီဒေသနာတွေကို သူ့ခေါင်းထဲကနေ နှုတ်တိုက်ချပေးခြင်းမျှသာဖြစ်တယ်လို့ ယခု ကျွန်တော်တို့ယုံကြည်သင့်ကြပါသလားခင်ဗျာ။

ထိုကောက်ချက်ကို ဆန့်ကျင်လျက်၊ ဘုရားသခင်၏လက်ဗွေရာတွေဟာ မောမုန်ကျမ်းတစ်ခုလုံးမှာ မြင့်မြတ်သောအယူဝါဒဆိုင်ရာအမှန်တရားများ၊ အထူးသဖြင့် ယေရှုခရစ်တော်၏အပြစ်ဖြေခြင်းမင်္ဂလာအကြောင်း ပြောင်မြောက်သောဒေသနာများအဖြစ် သက်သေခံလျက်ရှိပါတယ်။

ဂျိုးဇက်ဟာ ပရောဖက်တစ်ပါး မဟုတ်ခဲ့လျှင်၊ ဒီအရာတွေနဲ့၊ အခြားသော ထူးခြားပြောင်မြောက်တဲ့ အယူဝါဒဆိုင်အရာအတွေးအမြင်များစွာကို ရှင်းပြဖို့ရာ၊ သူသည် ဘာသာရေးဆိုင်ရာ ဉာဏ်ကြီးရှင်တစ်ဦးလည်းဖြစ်တယ်လို့ ဝေဖန်သူတို့ ငြင်းခုံရကြမှာဖြစ်ပါတယ်။ အဲဒီလိုအခြေအနေ ဖြစ်ခဲ့လျှင်၊ ခရစ်တော်၏အမှုဆောင်တော်မူခြင်းသို့လိုက်လျှောက်၍ ထိုကဲ့သို့ တစ်မူထူးခြားပြီး၊ ရှင်းပြတဲ့ ထိုကဲ့သို့နက်ရှိုင်းတဲ့အယူဝါဒများကိုပြုဖို့ရာ နှစ်ပေါင်း ၁၈၀၀ မှာ အဘယ်ကြောင့်ဂျိုးဇက်သည်သာလျှင် တစ်ဦးတည်းသောသူဖြစ်ရသလဲလို့ မေးချင်မေးကြပါမယ်။ အဖြေကတော့၊ ဉာဏ်ထက်မြက်ခြင်းမဟုတ်တဲ့ ဗျာဒိတ်တော်ဟာ ဒီကျမ်းရဲ့ အရင်းအမြစ်ဖြစ်လို့ပါပဲ။

ဒါပေမယ့်၊ ဂျိုးဇက်ဟာ အသေးစိတ်မှတ်မိနိုင်စွမ်းရှိတဲ့၊ ဖန်တီးနိုင်စွမ်းရှိတဲ့ ဘာသာရေးဆိုင်ရာဉာဏ်ကြီးရှင်တစ်ယောက်ဖြစ်တယ်လို့ ကျွန်တော်တို့ထင်မှတ်လျှင်တောင်မှ၊ ဒီပါရမီတွေနဲ့ချည်းပဲ သူ့ကို ကျွမ်းကျင်သောစရေးဆရာတစ်ယောက် မဖြစ်စေနိုင်ပါဘူး။ မော်မုန်ကျမ်း၏ဖြစ်တည်ခြင်းကို ရှင်းပြဖို့ရာမှာ၊ ဝေဖန်သူတွေဟာ ဂျိုးဇက်စမစ်ကို အသက် ၂၃နှစ်မှာ အထုံပါရမီ အလိုအလျောက်ရှိတဲ့ စာရေးဆရာတစ်ယောက်ဖြစ်တယ်လို့ ဆိုရကြမှာဖြစ်ပါတယ်။ သို့မဟုတ်လျှင်၊ သူဟာ များစွာသောအမည်၊ ဒေသနဲ့ အဖြစ်အပျက်တွေကို မညီမညွတ်မဖြစ်ဘဲ လုံးဝသင့်မြတ်လိုက်ဖက်သောအရာတစ်ခုအဖြစ် ဘယ်လိုနည်းနဲ့ရောယှက်ခဲ့မှာပါလဲ။ စစ်ဆင်ခြင်းပရိယာယ်ကိုရေး၍၊ အာဝဇ္ဇန်းရွှင်သောဒေသနာကို ရေးဖွဲ့ပြီး၊ သန်းပေါင်းများစွာသောလူတို့ စိတ်ဝင်စား၍၊ မှတ်မိလျက်၊ ကိုးကားဖော်ပြလျက်၊ ရေခဲသေတ္တာတံခါးတို့၌ကပ်ထားသည့် “သင်တို့သည် သင်တို့အပေါင်းအဖော်များ၏အမှုကို ထမ်းဆောင်ရာတွင် ရှိသောအခါ၌ သင်တို့ဘုရားသခင်၏အမှုကို ထမ်းဆောင်ခြင်း၌ အမှန်ရှိကြ၏”(မိုဇိယ ၂း၁၇) သို့မဟုတ် “လူသားတို့သည် ပျော်ရွှင်ခြင်းရှိနိုင်ကြစေဖို့ ဖြစ်တည်ကြ၏” (၂  နီဖိုင်း ၂း၂၅) အစရှိတဲ့ စကားပိုဒ်တို့ကို ဘယ်လိုနည်းနဲ့ သူတီထွင်ခဲ့မှာပါလဲခင်ဗျာ။ အသက် ၂၃ နှစ်အရွယ်ဂျိုးဇက်စမစ်အား ဤအလွန့်အလွန်ကြီးမားသောအမှုကို တစ်ခုတည်းသောမူကြမ်းဖြင့် အလုပ်ချိန် ၆၅ ရက်ခန့်ဖြင့် ရေးခြင်းငှာလိုအပ်တဲ့ကျွမ်းကျင်မှုများရှိတယ်လို့ ထင်မှတ်ဖို့ဆိုတာ တကယ့်လက်တွေ့ဘဝနဲ့ ရိုရှင်းစွာပဲဆန့်ကျင်တဲ့အရာတစ်ခုဖြစ်ပါတယ်။

အတွေ့အကြုံရှိပြီး၊ ကျွမ်းကျင်တဲ့စာရေးဆရာတစ်ယောက်ဖြစ်တဲ့ ဥက္ကဌရပ်ဆဲလ် အမ်၊ နယ်လဆင်က သူ့မှာ မကြာသေးသော အထွေထွေညီလာခံတစ်ခုရဲ့ ပြန်လည်ရေးသားထားတဲ့ မိန့်ခွန်း ၄၀ ကျော်ရှိတဲ့အကြောင်း ဝေငှခဲ့ပါတယ်။ ဂျိုးဇက်စမစ်ဟာ မော်မုန်ကျမ်းတစ်ကျမ်းလုံးကို မူကျမ်းတစ်ခုတည်းမှာ၊ အများအားဖြင့် နောက်မှပြုလုပ်တဲ့ သဒ္ဒါဆိုင်ရာပြောင်းလဲမှုအနည်းငယ်တို့ဖြင့် သူကိုယ်တိုင်နှုတ်တိုက်ချပေးခဲ့တယ်လို့ ယခုအချိန်မှာ ကျွန်တော်တို့ယုံကြည်ကြပါပြီလားခင်ဗျာ။

“လူငယ်လေးတစ်ယောက်ဖြစ်တဲ့ ဂျိုးဇက်စမစ်ဟာ မော်မုန်ကျမ်းကဲ့သို့သော ကျမ်းတစ်ကျမ်းကို နှုတ်တိုက်ချဖို့ နေနေသာသာ၊ စာတစ်စောင်ကိုတောင် ရှင်းရှင်းလင်းလင်း ဟန်ကျပန်ကျ ရေးလည်းမရေးနိုင်၊ နှုတ်တိုက်လဲမချနိုင်ပါ” လို့ ထိုသို့သော တာဝန်ယူဆောင်ရွက်မှု မဖြစ်နိုင်ခြင်းအကြောင်း ဂျိုးဇက်ရဲ့ဇနီး အီမာက အတည်ပြုခဲ့ပါတယ်။^၂

နောက်ဆုံးမှာတော့၊ တစ်ယောက်သောသူသည် ရှေ့ကပြဆိုခဲ့ပြီးသော ငြင်းခုံခြင်းများကို သံသယရှိနိုင်တဲ့အတိုင်း လက်ခံရင်တောင်မှ ဝေဖန်သူတွေဟာ ရေးရေးမျှပေါ်လာသောအတားအဆီးကို ရင်ဆိုင်ရဦးမှာဖြစ်ပါတယ်။ မော်မုန်ကျမ်းကို ရွှေပုရပိုက်ပြားများပေါ်မှာ ရေးသားထားခဲ့တယ်လို့ ဂျိုးဇက်ကဆိုပါတယ်။ ဤသို့ဆိုခြင်းဟာ သူ့ခေတ်မှာ မရပ်နားသော ဝေဖန်ခြင်းကို ရရှိခဲ့ပါတယ်။ ဘာကြောင့်လဲဆိုရင်၊ နောက်နှစ်များကြာမှ ရှေးစာများနှင့်အတူတွေ့ရတဲ့သတ္တုပြားကို မတွေ့မီတိုင်အောင် ရှေးသမိုင်းများကိုကျူစက္ကူ သို့မဟုတ် စာရေးသားရေချပ်ပေါ်မှာရေးသားထားကြောင်းကို လူတိုင်းသိကြလို့ပဲဖြစ်ပါတယ်။ ထပ်လောင်းပြောရမယ်ဆိုရင်၊ မော်မုန်ကျမ်းထဲမှ ဖော်ပြထားတဲ့ ဘိလပ်မြေအသုံးပြုခြင်းဟာ ရှေးအမေရိကမှာ ဘိလပ်မြေအဆောက်အအုံတို့ကိုမတွေ့ရမီ၌ ရှေ့ကျသောအမေရိကန်လူမျိုးတို့၏ နည်းပညာဆိုင်ရာကျွမ်းကျင်မှုထက်ပိုလွန်တယ်လို့ ဝေဖန်သူတွေက ဆိုကြပါတယ်။ ဝေဖန်သူတွေဟာ မဖြစ်တန်ရာသောအလားတူ ရှာဖွေတွေ့ရှိချက်တွေကို ဘယ်လိုရှင်းပြကြမှာပါလဲ။ ခင်ဗျားတို့သိတဲ့အတိုင်း၊ ဂျိုးဇက်ဟာ အလွန့်အလွန်ကံကောင်းသောခန့်မှန်းသူတစ်ယောက်ဖြစ်ခဲ့ပါတယ်။ ဘာကြောင့်မှန်းတော့မသိ၊ သူ့ကိုဆန့်ကျင်၍ တစ်ဖက်စောင်းနင်းဖြစ်ခြင်းအပေါင်းတို့၊ လက်ရှိသိပ္ပံနဲ့ ပညာရေးအသိဉာဏ်တို့ ရှိသော်ငြားလည်း၊ အခြားသောသူအားလုံး လွဲမှာတဲ့အချိန်မှာ သူမှန်ကန်စွာ ခန့်မှန်းခဲ့ပါတယ်။

အားလုံးကို ပြောကြ၊ ပြုကြပြီးတဲ့နောက်၊ ဝေဖန်သူတို့ အဆိုပြုထားတဲ့အတိုင်း၊ မော်မုန်ကျမ်းကို ရေးဖို့ ဂျိုးဇက်ကိုထောက်ကူတဲ့ ၊စာတန်လှည့်ကွက်ကို မြေတောင်မြှောက်ပေးဖို့ ကံအားလျော်စွာပေါင်းစပ်ထားကြတဲ့ ဤစွပ်စွဲထားသော အချက်အလက်များအားလုံးနဲ့ အနိုင်အထက်ပြုခြင်းတို့ကို တစ်စုံတစ်ယောက် ဘယ်လိုနည်းနဲ့ယုံကြည်နိုင်တယ်ဆိုတာ အံ့ဩချင်အံ့ဩပါလိမ့်မယ်။ ဒါပေမယ့် အဲဒီအရာက ဘယ်လိုနည်းနဲ့ အဓိပ္ပာယ်ရှိပါသလဲ။ ထိုကဲ့သို့သောအခိုင်အမာပြောဆိုခြင်းကို တိုက်ရိုက်အတိုက်အခံပြုရမယ်ဆိုရင်၊ ဒီကျမ်းဟာ သန်းပေါင်းများစွာသောသူတို့အား စာတန်ကို ငြင်းပယ်ပြီး၊ ခရစ်တော်နဲ့သာ၍တူသောအသက်တာနဲ့ နေထိုင်ဖို့ လမ်းပြလှုံ့ဆော်ခဲ့ပါတယ်။

တစ်စုံတစ်ယောက်သောသူဟာ ဝေဖန်သူတို့ရဲ့ စဉ်းစားတွေးခေါ်ခြင်းကို ယုံကြည်ဖို့ ရွေးချယ်ချင်ရွေးချယ်မယ်ဆိုရင်၊ ကျွန်တော့အနေနဲ့ကတော့ အဲဒါဟာ အသိဉာဏ်ဆိုင်ရာနဲ့ ဝိညာဉ်ပကတိဆိုင်ရာမှာ ဘာမှလုပ်မရတော့တဲ့လမ်းဆုံးတစ်ခုပဲဖြစ်ပါတယ်။ ထိုကဲ့သို့ ယုံကြည်ဖို့ဆိုရင်၊ အထောက်အထားသက်သေပြစရာမရှိတဲ့ ယူဆချက်ကို တစ်ခုပြီးတစ်ခု ကျွန်တော်လက်ခံရမှာဖြစ်ပါတယ်။ ထပ်လောင်း၍ပြောရမယ်ဆိုရင်၊ တစ်ဦးချင်း မိမိသက်သေခံချက်ကို တကယ့်အဆုံးထိ ဆက်၍သစ္စာရှိခဲ့ကြတဲ့ အသိသက်သေ ၁၁ ဦးလုံးရဲ့^၃သက်သေခံချက်ကို ကျွန်တော်လျစ်လျူရှုရပါလိမ့်မယ်။ ဤသန့်ရှင်းမွန်မြတ်သောကျမ်းရဲ့ တစ်မျက်နှာပြီးတစ်မျက်နှာမှာ ကောင်းကင်ဆိုင်ရာသမ္မာတရားတို့ဖြင့် ပြည့်တဲ့ မြင့်မြတ်သောအယူဝါဒကို ကျွန်တော်ငြင်းပယ်ရမှာဖြစ်ပါတယ်။ ကျွန်တော်ကိုယ်တိုင်အပါအဝင်၊ လူများစွာတို့ဟာ အခြားတစ်စုံတစ်ခုသောကျမ်းထက် ဤကျမ်းကိုဖတ်ရှုခြင်းအားဖြင့် ဘုရားသခင်နဲ့သာ၍နီးရာသို့ ရောက်လာကြတယ်ဆို့တဲ့အချက်ကို ကျွန်တော်မသိကျိုးကျွန်ပြုရမှာဖြစ်ပါတယ်။ အဲဒါတွေအားလုံးထက်၊ သန့်ရှင်းသောဝိညာဉ်တော်ရဲ့ အတည်ပြုသောတိုးတိုးပြောခြင်းကို ကျွန်တော်ငြင်းဆိုရမှာဖြစ်ပါတယ်။ ဒီအရာဟာဆိုရင်၊ မှန်တယ်လို့ ကျွန်တော်သိတဲ့အရာတိုင်းနဲ့ ဆန့်ကျင်ဘက်ဖြစ်ပါလိမ့်မယ်။

တော်ပြီးဉာဏ်ထက်တဲ့ ကျွန်တော့သူငယ်ချင်းတွေထဲက တစ်ယောက်ဟာ အသင်းတော်ကို ကာလအတန်ကြာအောင် စွန့်ခွာခဲ့ပါတယ်။ သူပြန်လာတဲ့အကြောင်းကို ကျွန်တော့ဆီ မကြာသေးမီက စာရေးခဲ့ပါတယ် “ အစတုန်းက၊ မော်မုန်ကျမ်းကို သမိုင်းသဘောအရ၊ ပထဝီသဘောအရ၊ ဘာသာစကားသဘောအရနဲ့ ယဉ်ကျေးမှုသဘောအရ ငါ့ကို သက်သေအထောက်အထားပြစေချင်ခဲ့တာ။ ဒါပေမယ့် ငါ့ရဲ့အာရုံကို ယေရှုခရစ်တော်၏ဧဝံဂေလိတရားတော်နဲ့ သူ့ရဲ့ကယ်တင်ခြင်းသာသနာအကြောင်း အဲဒီကျမ်းသွန်သင်တဲ့အရာပေါ်ကို ပြောင်းလိုက်တဲ့အခါ၊ ငါဟာ ဒီကျမ်းရဲ့အမှန်ဖြစ်ခြင်းအကြောင်း သက်သေခံချက်ကို တစ်ဖန်ပြန်ပြီးရစပြုခဲ့ပါတယ်။ တစ်နေ့၊ ငါ့အခန်းထဲမှာ မော်မုန်ကျမ်းကို ဖတ်နေတုန်း၊ ခဏရပ်နားပြီး၊ ဒူးထောက်လျက် စိတ်နှလုံးခံစားမှုနဲ့ဆုတောင်းတဲ့အခါ၊ အသင်းတော်နဲ့ မော်မုန်ကျမ်းဟာ အသေအချာမှန်ကန်ကြောင်း ငါ့စိတ်ဝိညာဉ်အား ကောင်းကင်ဘုံရှင်အဘ တိုးတိုးပြောတာကို ထပ်ခါထပ်ခါ ခံစားခဲ့ရပါတယ်။ အသင်းတော်ကို တစ်ဖန်ပြန်ပြီးလေ့လာတဲ့ငါ့ရဲ့ သုံးနှစ်ခွဲအချိန်က အသင်းတော်ရဲ့အမှန်ဖြစ်ခြင်းသို့ စိတ်ရောကိုယ်ပါ၊ သဘောပေါက်နားလည်အောင် ငါ့ကို တစ်ဖန်ပြန်ပြီးပို့ဆောင်ခဲ့ပါတယ်။”ဆိုပြီးရေးခဲ့ပါတယ်။

တစ်စုံတစ်ယောက်ဟာ ကျွန်တော့သူငယ်ချင်းပြုသကဲ့သို့ မော်မုန်ကျမ်းကို နှိမ့်ချစွာဖတ်ပြီး၊ နှလုံးသွင်းစဉ်းစားဆင်ခြင်ဖို့အချိန်ပေးပြီး၊ ဝိညာဉ်တော်ရဲ့ချိန်မြိန်တဲ့အသီးကို နာထောင်မယ်ဆိုရင်၊ သူ သို့မဟုတ် သူမဟာ နောက်ဆုံးမှာ အလိုရှိတဲ့သက်သေကို လက်ခံရရှိပါလိမ့်မယ်။

မော်မုန်ကျမ်းဟာ ကျွန်တော်တို့အဖို့ ဘုရားသခင်၏တန်ဖိုးမဖြတ်နိုင်သောဆုကျေးဇူးတွေထဲက တစ်ခုဖြစ်ပါတယ်။ အဲဒီကျမ်းဟာ ဓားနဲ့ ဒိုင်း နှစ်ခုစလုံးဖြစ်ပါတယ်။ အဲဒီကျမ်းဟာ တရားသောသူတို့၏စိတ်နှလုံးအတွက်တိုက်ဖို့ တိုက်ပွဲသို့ ဘုရားသခင်၏နှုတ်ကပတ်တော်ကို ပို့ဆောင်ပြီး၊ သမ္မာတရားအတွက် အရေးကြီးသောအကာအကွယ်လည်းဖြစ်ပါတယ်။ သန့်ရှင်းသူတို့အနေဖြင့်၊ ကျွန်တော်တို့မှာ မော်မုန်ကျမ်းကို ကာကွယ်ဖို့ အထူးအခွင့်အရေးရှိရုံသာမက၊ တိုက်ခိုက်ဖို့၊ အဲဒီကျမ်းရဲ့ မြင့်မြတ်သောအယူဝါဒကို စွမ်းအားဖြင့်ဟောပြောလျက်၊ အဲဒီကျမ်းဟာ ယေရှုခရစ်တော်၏အကောင်းဆုံးသက်သေဖြစ်ကြောင်း သက်သေခံကြဖို့အခွင့်အလမ်း ရှိကြပါတယ်။

မော်မုန်ကျမ်းဟာ ဘုရားသခင်၏တန်ခိုးတော်နဲ့ ဆုကျေးဇူးတို့အားဖြင့် ဘာသာပြန်ဆိုထားခြင်းဖြစ်ကြောင်း ကျွန်တော် အလေးအနက် သက်သေခံပါတယ်။ အဲဒီကျမ်းဟာ ယေရှုခရစ်တော်၏မြင့်မြတ်ခြင်းအကြောင်း၊ ဂျိုးဇက်စမစ်၏ပရောဖက်ဆိုင်ရာ အမှုတော်ဆောင်တာဝန်၊ ဤအသင်းတော်၏ အကြွင်းမဲ့အမှန်တရားဖြစ်ကြောင်း ဘုရားသခင်၏ခိုင်းမာသောသက်သေဖြစ်ပါတယ်။ အဲဒီကျမ်းသည် ကျွန်တော်တို့သက်သေခံချက်များ၏ အထိန်းကျောက်ဖြစ်လာပါစေ။ ထို့ကြောင့်၊ ပြောင်းလဲခဲ့သောလာမန်အမျိုးသားများကဲ့သို့ “အဘယ်တော့မျှ မရွေ့လျော့မဖောက်ပြန်ကြ” (အယ်လမာ ၂၃း၆) လို့ ဒီကျမ်းအကြောင်းကို ကျွန်တော်တို့ ပြောနိုင်ကြပါစေ( အယ်လမာ ၂၃း၆)။ ယေရှုခရစ်တော်၏နာမတော်အားဖြင့်၊ အာမင်။