?Olsem Wanem Nao Mi Save Andastanem?

Ol dia brata mo sista. Hem i wan bigfala glad blong stap wetem yufala bakegen long jeneral Konfrens blong Jos blong Jisas Kraes blong Ol Lata-dei Sent anda long daereksen blong profet we yumi lavem, Presiden Russell M. Nelson. Mi testifae long yu se bae yumi gat spesel janis ia blong harem voes blong Sevya blong yumi Jisas Kraes tru long ol tijing blong olgeta we oli prea, singsing, mo toktok from ol nid blong taem blong yumi long konfrens ia.

Olsem we oli raetem long buk blong Ol Wok, Filip, Ivanjelis ia, i tijim gospel long wan Man Itiopia we i go long Jerusalem blong wosip. Hem nao i lukaot long evri rij samting we i blong Kwin blong Itiopia.¹ Taem hem i wosip finis long Jerusalem, i gobak, hem i ridim buk blong Aesea. Spirit i pusum hem, nao Filip i go kolosap long hem mo talem: “?Olsem wanem? ?Yu yu save mining blong tok ya we yu stap ridim?”

Nao haeman ya i talem se, “?Bambae mi mi save olsem wanem? I no gat man blong i talemaot mining blong hem long mi.”

“Nao Filip i stat stret long tok ya blong Baebol we man ya i stap ridim, i talemaot gud nius blong Jisas long hem.”²

Kwestin ia we Man Itiopia i askem, i rimaenem yumi long tabu wok blong yumi evriwan, blong lukaot blong lanem mo tijim wanwan long yumi long gospel blong Jisas Kraes.³ Wanem i tru, i we, long saed blong fasin blong stap lanem mo tijim gospel, samtaem yumi olsem Man Itiopia ia—yumi nidim help blong wan fetful tija wetem insperesen; mo samtaem, yumi olsem Filip—yumi nidim blong tijim mo mekem ol narawan oli kam strong moa blong jenisim laef.

Stamba tingting blong yumi, taem yumi stap lukaot blong lan mo tijim gospel blong Jisas Kraes, hem i blong kam antap long fet long God, mo long tabu plan blong Hem blong stap hapi, mo long Jisas Kraes, mo long sakrifaes blong Hem we i pem praes from sin, mo blong jenisim laef fogud. Kaen fet mo jenis long laef we i kam antap olsem, bae i helpem yumi blong mekem mo kipim ol kavenan blong yumi wetem God, mo long wei ia, mekem hat blong yumi i wantem moa blong folem Jisas mo mekem se i gat wan tru jenis insaed long yumi—o long nara toktok, i jenisim yumi i kam niu man, olsem we Aposol Pol i bin tijim long leta blong hem i go long Ol Man Korin.⁴ Jenis ia, bae i givim yumi wan laef we i moa hapi, yumi mekem moa, mo yumi helti, mo i helpem yumi blong holemtaet wan lukluk i go long taem we i no save finis. ?Hemia i no wanem i bin hapen long Haeman blong Itiopia afta we hem i lanem abaot Sevya mo i bin jenisim laef blong hem long gospel blong Sevya? Skripja i talem se hem i go we “hem i glad tumas.”⁵

Komanmen ia blong lanem mo tijim gospel long wanwan long yumi, i no niu; oli givim long stat blong histri blong man.⁶ Long wan spesel taem, taem Moses mo ol pipol blong hem oli bin stap long ol flat ples blong Moab bifo oli go insaed long promes graon, Lod i givim insperesen long hem blong askem strong ol pipol blong hem long saed blong responsabiliti blong olgeta blong lanem ol rul mo ol kavenan we oli bin kasem long Lod mo blong oli tijim i go long laen blong olgeta,⁷ mo plante long olgeta oli no bin gotru long eksperiens ia blong krosem Red Si, o revelesen ia we God i givim long Hil blong Sinae.

Moses i askem strong long ol pipol blong hem:

“[O Isrel, Yufala i mas obei long olgeta loa ya we mi stap tijim yufala long hem. Hae God i God blong ol bubu blong yumi bifo, mo sapos yufala i mekem olsem, bambae yufala i gat longfala laef, mo … save go holem kantri ya we hem i rere blong givim long yufala. …

Bambae yufala i mas talemaot long ol pikinini … mo ol smol bubu blong yufala.”⁸

Moses i talem laswan: “Yufala i mas obei long olgeta loa ya blong hem we mi mi givim long yufala tedei. Mo sapos yufala i mekem olsem, bambae yufala i save harem gud, mo ol pikinini blong yufala wetem olgeta we bambae oli kamaot biaen long yufala … Mo bae yufala i save stap longtaem long kantri ya we Hae God bambae i givim long yufala.”⁹

Ol profet oli givim instraksen oltaem se yumi nid blong tijim ol famli blong yumi long ol tijing mo rul blong Lod,¹⁰ mo tijim laet mo trutok.¹¹ I no longtaem, Presiden Nelson i talem: “long taem naoia we rabis tingting mo ponografi adiksen i go olbaot, ol papa mo mama oli gat wan tabu responsabiliti blong tijim ol pikinini blong olgeta long hamas God mo Jisas Kraes oli impoten long laef blong olgeta.”¹²

Ol brata mo sista.Woning we i kam long profet blong yumi i mekem yumi tingbaot responsabiliti blong wanwan long yumi blong lukaot blong lanem mo blong tijim famli blong yumi se i gat wan Papa i stap long Heven we i lavem yumi, mo i mekem wan tabu plan blong hapines blong ol pikinini blong Hem; se Jisas Kraes, Pikinini blong Hem, i Ridima blong wol; mo fasin blong sevem man i kam tru long fet long nem blong Hem.¹³ Laef blong yumi, rus blong hem i nid blong i fas long strong ston blong Ridima blong yumi, Jisas Kraes, we i save helpem yumi wanwan mo olsem ol famli, blong gat ol filing blong spirit we yumi raetem long hat blong yumi, we bae i helpem yumi blong stap strong long fet blong yumi.¹⁴

Bae yufala i tingbaot se tufala disaepol blong Jon Baptaes i folem Jisas Kraes, afta we tufala i harem Jon i witnes se Jisas i Smol Sipsip blong God, i Mesaea. Tufala gudfala man ia, i akseptem invitesen blong Jisas blong “kam mo luk”¹⁵ nao tufala i stap wetem hem long dei ia. Oli kam blong save se Jisas i Mesaea, Pikinini blong God, mo oli folem Hem long ful laef blong olgeta.

Semmak, taem yumi akseptem invitesen blong Sevya blong “kam mo luk,” yumi nidim blong stap wetem Hem, yumi draon insaed long ol skripja, yumi glad long ol skripja, stap lanem doktrin blong Hem, mo traehad blong laef long wei we Hem i bin laef. Long taem ia nomo, bae yumi kam blong save Hem, Jisas Kraes, mo haremsave voes blong Hem, wetem save ia se taem yumi kam long Hem mo biliv long Hem, bae yumi neva hanggri o tosta.¹⁶ Bambae yumi save luksave o haremsave ol trutok long eni mo evri taem, olsem we i bin hapen long tufala disaepol we oli bin stap wetem Jisas.

Ol brata mo sista. Hemia i no hapen olsem wan janis. Blong stretem yumi long ol hae paoa blong fasin blong God, i no wan simpol wok; i nidim blong stap prea long God, mo blong lanem hao blong tekem gospel blong Jisas Kraes i kam long stamba blong laef blong yumi. Taem yumi mekem olsem, mi promes se paoa blong Tabu Spirit bae i tekem trutok i go long hat mo maen blong yumi, mo bae i stap olsem wan witnes blong trutok ia,¹⁷ i stap tijim evri samting.¹⁸

Kwestin blong Man Itiopia ia: “Bambae mi mi [andastan] olsem wanem?” i gat spesel mining long wanwan responsabiliti blong yumi blong praktisim ol prinsipol blong gospel we yumi bin lanem insaed long laef blong yumi. Long kes blong Haeman Itiopia ia, eksampol, hem i bin tekem aksen folem trutok we hem i bin lanem aot long Filip. Hem i bin askem blong kasem baptaes. Hem i kam blong save se Jisas Kraes i bin Pikinini blong God.¹⁹

Ol brata mo sista. Ol aksen blong yumi i mas soemaot wanem yumi stap lanem mo tijim. Yumi nid blong soem olgeta bilif blong yumi tru long wei we yumi stap laef long hem. Bes tija i gudfala rol model. Blong stap tijim wan samting we yumi rili stap biliv long hem, i save mekem samting i defren long hat blong olgeta we yumi stap tijim. Sapos yumi wantem se ol pipol, ol famli o eni narawan, blong oli glad fulwan blong laekem ol skripja mo ol tijing blong ol aposol mo ol profet we oli stap laef, oli nid blong luk se sol blong yumi i glad tu long olgeta samting ia. Semmak, sapos yumi wantem olgeta oli save se Presiden Russel M. Nelson i profet, sia, mo reveleta blong tedei, oli nidim blong luk yumi leftemap han blong sastenem hem mo oli nid blong luksave se yumi stap folem ol insperesen tijing blong hem. Olsem gudfala toktok ia blong Man Amerika i talem: “Aksen i toktok laod i bitim ol toktok.”

Mebi sam long yufala i stap askem yufalawan naoia: “Elda Soares, mi bin stap mekem olgeta samting ia mo mi bin folem eksampol ia miwan, mo olsem famli, be sore tumas, sam long fren mo famli blong mi oli go longwe long Lod. ?Bae mi mekem wanem?” Long yufala we i stap gotru naoia, long ol filing ia blong hat i harem nogud, tingting i trabol, mo mebi rigret, plis yufala i mas save se, olgeta ia, oli no lus evriwan from se Lod i save se oli stap wea mo i stap lukaot gud long olgeta. !Tingbaot se oli ol pikinini blong Hem tu!

Hem i had blong andastanem stret from wanem sam pipol oli tekem wan nara rod. Bes samting we yumi save mekem long ol situesen ia i blong jes lavem mo akseptem olgeta, blong prea from gudlaef blong olgeta, mo blong lukaotem help blong Lod blong save wanem blong mekem mo talem. Stap glad wetem olgeta mo sakses blong olgeta; stap olsem fren blong olgeta mo luk long gud saed blong olgeta. Yumi no mas givap long olgeta ia be holemtaet rilesensip blong yumi wetem olgeta. Neva sakemaot o jajem nogud olgeta. !Jes lavem olgeta! Parabol blong pikinini we i lus i tijim yumi se taem gud tingting i kambak long pikinini blong yumi, plante taem oli wantem kambak hom. Sapos hemia i hapen wetem olgeta we yu lavem, fulumap hat blong yu wetem lav mo sore, ron i go long olgeta, haggem olgeta, mo kisim olgeta, olsem papa ia wetem pikinini blong hem we i kambak.²⁰

Long en, gohed blong laef wan klin laef, stap wan gud eksampol long wanem yu biliv long hem, mo go kolosap long Sevya blong yumi, Jisas Kraes. Hem i save mo i andastanem ol dip harem nogud mo sobodi blong yu, mo bae Hem i blesem ol hadwok mo strong tingting blong yu long ol famli blong yu, sapos i no long laef ia, bae long nekis laef. Tingbaot oltaem, ol brata mo sista, se hop i wan impoten pat blong plan blong gospel.

Truaot long plante yia blong seves insaed long Jos, mi bin luk ol fetful memba we oli bin strong blong praktisim ol prinsipol ia oltaem insaed long laef blong olgeta. Hemia i kes blong wan singgel mama we mi singaotem hem “Meri.” Sore tumas, Meri i gotru long wan had divos. Long stret taem ia, Meri i bin luksave se moa stamba desisen blong hem long saed blong famli blong hem, bae i long saed blong spirit. ?Bae prea, skripja stadi, livim kaekae, mo jos mo tempol oli gohed blong stap impoten long hem?

Meri bin fetful oltaem, mo long bigfala krosrod ia, hem i disaed blong hang long wanem hem i bin save se i tru. Hem i bin faenem paoa insaed long “Famli Ofisol Toktok i go long Wol” we, wetem plante nara prinsipol, i tijim se “ol papa mo mama oli gat wan tabu wok blong lukaotem gud pikinini blong olgeta wetem lav mo stret mo gud fasin,” mo blong tijim olgeta blong oltaem folem ol komanmen blong God.²¹ Oltaem hem i gohed blong lukaotem ol ansa we i kam long Lod mo i serem olgeta wetem ol fofala pikinini blong hem long eni kaen famli taem. Olsem wan famli, oli toktok raon long gospel, oli serserem ol eksperiens mo ol testemoni blong olgeta.

Nomata ol harem nogud we oli gotru long olgeta, ol pikinini blong hem oli developem wan lav blong gospel blong Kraes mo wan filing blong wantem givim seves mo serem wetem ol narawan. Tri long olgeta, oli fetful blong wok long ol fultaem misin, mo yangwan i stap long misin naoia long Saot Amerika. Bigfala gel blong hem, we naoia i mared mo i stap strong long fet blong hem, i serem: “Mi neva filim se mama i lukaotem mifala hemwan, from se Lod i stap oltaem long hom blong mifala. Mo taem mama i talem witnes blong hem abaot Jisas, wanwan i stat blong tanem mifala i go long Hem blong askem kwestin blong mifala. Mi talem tangkyu from hem i mekem gospel i laef.”

Ol brata mo sista. Gudfala mama ia i bin save mekem hom blong hem i senta blong lanem samting long saed blong spirit. Semmak long kwestin blong Man Itiopia, Meri i askem hemwan plante taem: “?Olsem wanem ol pikinini blong mi oli save lanem samting sapos wan mama i no tijim olgeta?”

Ol dia kompanion blong mi long gospel. Mi testifae long yufala se, taem we, taem yumi wantem tumas, wetem ful hat, strong tingting, mo tru tingting, lukaotem blong lanem gospel blong Jisas Kraes, mo tijim gospel ia wetem ril stamba tingting mo wetem paoa blong Spirit, ol tijing ia oli save jenisim hat fogud mo givim insperesen long yumi blong laef folem ol trutok blong God.

Mi testifae se Jisas Kraes i Sevya blong wol. Hem i Ridima ia; mo Hem i stap laef. Mi save se Hem i stap lidim Jos blong Hem tru long ol profet, sia mo reveleta blong Hem. Mi testifae long yu God i stap laef, mo Hem i lavem yumi. Hem i wantem yumi blong go bak stap wetem Hem—evriwan long yumi. Hem i stap lisin long ol prea blong yumi. Mi talem testemoni blong mi long nem blong Jisas Kraes, amen.