Fasin blong Sakem Sin I Klinim Mi

Fasin blong sakem sin i stat wetem Sevya blong yumi, mo hem i wan glad, i no wan hevi samting. Long las Krismes divosen blong Disemba, Presiden Nelson i tijim: “Tru fasin blong sakem sin, i no hapen long wan taem nomo. Hem i wan spesel janis we i no gat en blong hem. Hem i stamba blong save progres, mo blong gat pis long maen, save leftemap tingting mo gat glad.³

Sam long ol bigfala tijing blong fasin blong sakem sin, oli stap long Buk blong Momon, long toktok blong Alma i go long ol memba blong Jos, we afta, hem i talem se ol memba ia oli bin stap long wan ples blong “bigfala fasin blong no biliv … [we oli] gat hae tingting … [mo oli] putum hat blong [olgeta] long ol rij samting mo ol samting nating blong wol” (Alma 7:6). Wanwan memba blong Jos ia we i kambak, i gat fulap blong lanem aot long ol insperesen tijing blong Alma.

Yumi stat wetem fet long Jisas Kraes, from se “hem nao we bae i kam blong tekemaot ol sin blong wol” (Alma 5:48). Yumi mas sakem sin from se, olsem we Alma i bin tijim: “sapos yufala i no sakem sin, yufala i no save go stap long kingdom blong heven” (Alma 5:51). Fasin blong sakem sin, hem i wan stamba pat blong plan blong God. From se evriwan bae i mekem sin long eksperiens blong yumi long wol ia, mo bae kamaot long ples we God i stap long hem, bae man i no gat wan man we Jisas i save sevem sapos hem i no sakem sin. (Alma 5:31; luk tu long Hileman 12:22).

Hemia oli bin tijim stat long stat finis. Lod i givim komanmen long Adam: “Yu mas tijim samting ia long ol pikinini blong yu; se evri man, long evri ples, oli mas sakem sin, sapos no, i no gat wei we bae oli save kasem kingdom blong God, from se i no gat samting we i no klin we i save stap long ples ia, o stap long ples we God i stap long hem” (Moses 6:57). Yumi mas sakem evriwan long ol sin blong yumi—evri aksen blong yumi, o olgeta we yumi no mekem, we oli agensem komanmen blong God. I no gat wan i save ronwe long hemia. Yestedei, Presiden Nelson i givim jalenj long yumi: “Ol brata. Yumi evriwan i nid blong sakem sin.”⁴

Taem yumi kam klin tru long fasin blong sakem sin, yumi lego ol sin blong yumi fogud mo konfesem olgeta long Lod mo long jaj blong Hem long wol ia, taem i mas olsem (luk long Doktrin mo Ol Kavenan 58:43). Alma i bin tijim se, yumi mas “karem i kam ol wok blong stret mo gud fasin” (Alma 5:35 Evri samting ia i pat blong skripja invitesen, we i kamaot oltaem, blong kam long Kraes.

Yumi nidim blong tekem mo kakae sakramen evri Sabat dei. Long odinens ia, yumi stap mekem ol kavenan mo stap kasem ol blesing we i stap helpem yumi blong winim evri aksen mo tingting blong hat we i blokem yumi blong kam stret evriwan olsem we Sevya i stap invaetem yumi blong mekem (luk long Matiu 5:48; 3 Nifae 12:48). Taem we yumi “tanem baksaed blong [yumi] long evri fasin we i no olsem blong God, mo lavem God wetem ful paoa blong tingting, ful maen mo ful paoa blong [yumi], afta nao, … [yumi] save kam stret evriwan tru Kraes” mo “kam tabu” tru long blad blong Hem we i bin ron, blong yumi “kam klin evriwan, we [yumi] no gat mak” (Moronae 10:32–33). !Hemia i wan gudfala promes! !Hem i wan blesing! !Hem i wan blesing!

Wan stamba tingting blong plan blong God long saed blong eksperiens blong yumi long laef ia, i blong “testem” yumi blong “luk sapos bae [yumi] mekem evri samting we Lod blong [yumi] bae i givim oda long [yumi]” (Ebraham 3:25). Olsem pat blong plan ia, yumi mas ansa long God mo ol wokman blong Hem we Hem i jusum, mo ol ansa ia, bae i tekem ol jajmen, tugeta blong laef ia mo blong heven.

Insaed long Jos blong Lod, ol jajmen blong laef ia blong ol memba o ol fiuja memba, ol lida nao oli mekem, mo oli lukaotem tabu daereksen. Hem i responsabiliti blong olgeta blong jajem ol man mo woman we oli stap lukaot blong kam long Kraes blong kasem paoa blong Atonmen blong Hem taem oli stap long kavenan rod ia we i go long laef we i no save finis. Ol jajmen long laef ia, oli talemaot sapos wan man o wan woman i rere blong baptaes. ?Man o woman ia i klin inaf blong kasem wan rekomen blong go long tempol? ?Man o woman ia, we oli karemaot nem blong hem long ol rekod blong Jos, i sakem sin inaf tru long Atonmen blong Jisas Kraes blong oli putumbak hem tru long baptaes?

Be, taem wan jaj blong wol ia, we God i singaotem hem, i agri blong wan i progres i go, olsem blong kasem ol spesel janis blong tempol, hem i no stap talem se man o woman ia i stret evriwan, mo hem i no stap fogivim eni sin. Elda Spensa W. Kimbol, i bin tijim se, afta we oli karemaot ol panismen long wan man o woman, hem i mas askem mo kasem fogivnes long God blong heven tru wan las fasin blong sakem sin, from God nomo i save fogivim sin.”⁵ Mo sapos ol aksen mo tingting blong hat we oli sin, oli stil no sakemaot kasem Las Jajmen, hem ia we i no sakem sin, i gohed blong no stap klin. Las taem blong stap ansa, wetem las risal blong kam klin afta we yumi sakem sin, i stap bitwin wanwan long yumi mo God.

Jajmen we oli tokbaot plante long ol skripja i stap long Las Jajmen we i kam afta long Laef Bakegen long Ded (luk long 2 Nifae 9:15). Plante long ol skripja oli talem se “evri pipol oli mas stanap long fored blong jea blong jajmen blong Kraes” (Rom 14:10; luk tu long 2 Nifae 9:15; Mosaea 27:31) “blong hem i jajem yufala folem ol wok we yufala i bin mekem long taem we yufala i gat bodi ia we i save ded” (Alma 5:15; luk tu long Revelesen 20:12; Alma 41:3; 3 Nifae 26:4). Evriwan bae Hem i jajem olgeta “folem ol wok blong olgeta” (3 Nifae 27:15) mo “folem wanem we hat blong olgeta i wantem” (Doktrin mo Ol Kavenan 137:9; luk tu long Alma 41:6).

Stamba tingting blong Las Jajmen ia, i blong faenemaot sapos yumi kasem wanem we Alma i tokbaot olsem “wan bigfala jenis long hat” (luk long Alma 5:14, 26), we yumi kam ol niu man o woman, we yumi “nomo wantem blong mekem nogud fasin, be blong gohed blong mekem gudfala fasin oltaem” (Mosaea 5:2). Jaj ia bae i Sevya blong yumi, Jisas Kraes (luk long Jon 5:22; 2 Nifae 9:41). Afta long jajmen blong Hem, bambae evriwan long yumi i konfes “se ol jajmen blong hem oli stret” (Mosaea 16:1; luk tu long Mosaea 27:31; Alma 12:15), from Hem i save evri samting (luk long 2 Nifae 9:15, 20) nao Hem i save stret evriwan long ol aksen mo tingting blong hat blong yumi, tugeta olgeta we oli stret mo gud, mo yumi sakem sin from, mo olgeta we oli no stret mo no gud mo yumi no sakem sin from, o no jenis.

Ol skripja oli tokbaot rod ia blong Las Jajmen. Alma i stap tijim se jastis blong wan God blong lav, i nidim se, long laef bakegen long ded, “evri samting bae oli putumbak long stret oda blong olgeta” (Alma 41:2). “Sapos ol wok blong olgeta long laef ia oli bin gud, mo ol tingting blong hat blong olgeta oli bin gud, long las dei, bae ol samting we oli gud oli kambak long olgeta.” (Alma 41:3). Semmak, “sapos ol wok [o tingting blong hat] blong olgeta i nogud, bae oli putumbak ol samting we i nogud long olgeta” (Alma 41:4–5; luk tu long Hileman 14:31). Olsem ia nao, profet Jekob i tijim se, long Las Jajmen, “olgeta we oli stret mo gud bae oli stap stret mo gud yet, mo olgeta we oli doti bae oli stap doti yet” (2 Nifae 9:16; luk tu long Momon 9:14; 1 Nifae 15:33). Hemia i rod we i hapen fastaem long wanem Moronae i singaotem “gudfala kot blong hae Jehova, Jaj we I No Save Finis blong olgeta we oli stap laef tugeta wetem olgeta we oli ded” (Moronae 10:34; luk tu long 3 Nifae 27:16).

Blong meksua se bae yumi kam klin long fes blong God, yumi mas sakem sin bifo Las Jajmen (luk long Momon 3:22). Olsem we Alma i bin talem long boe blong hem we i mekem sin, yumi no save haedem sin blong yumi long fored blong God, “mo sapos yu no sakem sin bae oli stap olsem wan testemoni agensem yu long las dei” (Alma 39:8; oli ademap italik). Atonmen blong Jisas Kraes i givim yu, wan wei ia nomo, blong save kam klin tru long fasin blong sakem sin, mo laef ia long wol i taem blong yumi blong mekem hemia. Nomata we oli tijim yumi se fasin blong sakem sin i save hapen long spirit wol (luk long Doktrin mo Ol Kavenan 138:31, 33, 58), hemia yumi no save stret long hem. Elda Melvin J. Ballard i bin tijim: “Hem i isi moa blong winim mo wok blong God taem we bodi blong mit mo spirit i joen tugeta olsem wan. Taem naoia i taem we man i save stretem hem mo man i tijim hem. … Laef ia i taem blong sakem sin.”⁶

Taem yumi sakem sin, yumi gat toktok we i kam stret long Lod we i talem se sin blong yumi, wetem ol aksen mo tingting blong hat blong yumi, bae oli kam klin, mo jaj blong yumi we i gat sore bae “i nomo tingbaot olgeta” (Doktrin mo Ol Kavenan 58:42; luk tu long Aesea 1:18; Jeremaea 31:34; Hibrus 8:12; Alma 41:6; Hileman 14:18–19). Taem yumi kam klin tru long fasin blong sakem sin, yumi save kwalifae from laef we i no save finis, we King Benjamin i tokbaot olsem se “blong mekem se oli save stap wetem God long wan ples blong hapi we i neva gat en” (Mosaea 2:41; luk tu long Doktrin mo Ol Kavenan 14:7).

Olsem wan nara pat blong “plan blong restoresen” blong God, (Alma 41:2, Laef Bakegen long Ded bae i putumbak “evri samting … i kambak bakegen long stret fasin mo wei blong olgeta we i stret evriwan” (Alma 40:23). Hem i tekem evri samting we i no wok stret, o i no stap stret long bodi blong yumi long laef ia, wetem tu ol safaring mo ol sik we yumi bon wetem, bae oli kam stret evriwan bakegen.

?Hemia i minim se taem evri ting i kambak stret bae i klinim yumi mo mekem i stret evriwan ol nogud tingting blong hat, o ol adiksen? Hemia i no save olsem. Yumi save, aot long revelesen blong taem tedei, se bae oli jajem yumi from ol tingting blong hat blong yumi, mo tu, from ol aksen blong yumi (luk long Alma 41:5; Doktrin mo Ol Kavenan 137:9) mo we, iven ol tingting blong yumi bae oli panisim yumi (luk long Alma 12:4). Yumi no mas “pusumbak dei blong sakem sin blong [yumi]” i go kasem ded (Alma 34:33), from se semfala spirit ia we i bin stap long bodi blong yumi long laef ia—sapos i blong Lod o i blong devel—“i gat paoa blong stap long bodi blong [yumi] insaed long wol ia we i no save finis” (Alma 34:34). Sevya blong yumi i gat paoa, mo Hem i stanap i rere blong klinim yumi long ol rabis samting. Naoia, i taem ia blong lukaotem help blong Hem blong yumi sakem ol nogud mo rabis tingting blong hat mo tingting, blong kam klin mo rere blong stanap long fored blong God long Las Jajmen.

Plan blong God we i kavremap evri samting mo ol komanmen blong Hem, i lav ia we Hem i gat long wanwan long yumi, we i “samting we evri man i wantem moa i bitim evri narafala samting, … hem i wan glad we i bigwan olgeta long sol” (1 Nifae 11:22–23). Profet Aesea i talem gud, iven long ol man nogud se, taem oli “kambak long Hae God ya … Hem i gat sore long yumi, mo i kwik blong fogivim yumi” (Aesea 55:7). Alma i tijim se, “Luk, hem i sendemaot wan toktok long evri man blong kam, from hem i stretem ol han blong sore i go long olgeta” (Alma 5:33; luk tu long 2 Nifae 26:25–33). Lod we i bin girap long ded i bin talem long Ol Man blong Nifae: “Luk, mi stretem han blong sore blong mi i kam long yufala, mo huia we bae i kam long mi, bae mi akseptem hem” (3 Nifae 9:14). Aot long skripja ia mo plante moa tijing long skripja, yumi save naoia se, Sevya blong yumi, we i gat lav, i openem ol han blong Hem blong akseptem evri man mo woman, wetem kondisen blong lav ia we Hem i putum blong stap glad long ol blesing we oli hae olgeta we God i gat long ol pikinini blong Hem.⁷

From plan blong God mo from Atonmen blong Jisas Kraes, mi testifae, “wetem wan stret mo klin hop,” se God i lavem yumi mo yumi save kam klin tru long rod blong fasin blong sakem sin. Yumi kasem promes ia se, “sapos [yumi] gohed strong i go, mo stap kakae gud long toktok blong Kraes, mo stap strong kasem en, luk, olsem ia nao Papa i talem: ‘Bae yufala i kasem laef we i no save finis’” (2 Nifae 31:20). Bae yumi evriwan i mekem olsem, mi plis mo prea from, long nem blong Jisas Kraes, amen.