Fasin Ia blong God, we I Gud Tumas mo I Kam Kwiktaem

Sam yia i pas, faef yia boe blong mitufala i kam long mi mo talem se: “Papa, mi faenemaot wan samting. Mi faenemaot se i no longtaem long yu, i wan longfala taem, long mi.”

Taem we Lod o ol wokman blong Hem oli talem samting olsem: “Long samfala dei i kam,” o “Taem i stap kam kolosap,” i minim ia nao se i wan laeftaem o moa long hemia.¹ Taem blong Hem, mo plante taem, taem blong Hem, i defren long hemia blong yumi. Blong save wet longtaem, i ki. Sapos i no gat ki ia, yumi no save developem o soemaot fet long God blong kasem laef o blong sevem man. Mesej blong mi tedei i we, nomata we yumi nidim blong save wet longtaem long Lod, i gat samfala blesing we oli kam long yumi naoia nomo.

Taem we Ol Man blong Leman oli mekem Alma mo ol pipol blong hem oli kam prisena, oli bin prea blong oli kam fri. Oli no bin go fri kwiktaem; be taem oli bin wet wetem longfala tingting blong oli kam fri, Lod i bin soem gud fasin blong Hem wetem ol kwik blesing. Kwiktaem, Hem i mekem hat blong Ol Man blong Leman i sofsof blong oli no kilimded olgeta. Hem i mekem ol pipol blong Alma oli kam strong moa mo i mekem trabol blong olgeta i no hevi tumas.² Taem we oli kam fri afta, oli travel i go long Sarahemla, mo oli talemaot eksperiens blong olgeta long sam pipol we oli bin sapraes. Ol pipol blong Sarahemla i bin sapraes, mo “taem oli tingbaot fasin ia blong God we i gud tumas we i bin kam kwiktaem mo paoa blong hem blong mekem Alma mo ol brata blong hem i go fri … long slef, oli bin leftemap ol voes blong olgeta mo … talem tangkyu long God.”³

Fasin ia blong God we i gud tumas mo i kam kwiktaem, i kam long evriwan we i prea long Hem wetem tru tingting mo tru hat. I tekem tu olgeta we oli prea we oli filim se i nomo gat rod, taem we oli luk se, blong kam fri, i longwe mo safaring i gohed mo kam strong moa.

I bin semmak long wan yang profet we i bin safa long nogud ples long kalabus, nao hem i prea i talem: “O God, ?yu yu stap wea? … ?Kasem wetaem nao bae yu holembak han blong yu …? ?Yes, O Lod, ?kasem wetaem … ?⁴ Olsem wan ansa, Lod i no bin mekem Josef i fri kwiktaem, be kwiktaem, Hem i givim pis blong Hem.⁵

Oltaem God i givim hop kwiktaem blong mekem yu fri long en.⁶ I nomata wanem, i nomata weaples, long Kraes mo tru long Kraes, i gat oltaem hop we i smael gud long yumi.⁷ Kwiktaem nomo, long fored blong yumi.

Antap long hemia, Hem i promesem: “Fasin ia we mi mi lavem yufala, neva bambae hem i save finis samtaem.”⁸

Antap long evri samting, lav blong God i kam kwiktaem. Wetem Pol, mi testifae se i no gat wan samting “we i save tekemaot yumi long God, we hem i lavem yumi tumas, we yumi joen long Jisas Kraes, Masta blong yumi.”⁹ Iven ol sin blong yumi, nomata oli seperetem yumi long Spirit blong Hem blong sot taem, i no save seperetem yumi long tabu lav blong Papa we i stap oltaem mo i kam kwiktaem.

Hemia sam wei mo rod nomo we “ hem i blesem [yumi] semtaem.”¹⁰ Naoia, blong soem hao ol prinsipol ia oli blong yu, bae mi serem eksperiens blong tu pipol we laef blong tufala i stap olsem ol testeman blong fasin ia blong God we i gud tumas mo i kam kwiktaem.

Taem hem i yangfala i kam, Emili i traehad wetem drag abius. Hem i testem, i go i kam wan fasin, wan fasin we i kam strong i nomo save lego, mo i holem hem i prisena blong plante yia, nomata i kam sam gudfala taem. Emili i haedem gud problem blong hem, speseli taem hem i kam wan waef mo mama.

Taem blong stat blong kam fri, i no filim olsem wan taem blong kam fri nating. Wan minit, Emili i stap go long dokta, mo nekiswan, ambulens i draevem hem long wan tritmen senta. Hem i stat blong fraet taem hem i tingting se bae oli seperetem hem long ol pikinini, hasban mo hom blong hem.

Long naet ia, long wan kolkol rum we i tudak, Emili i benbenem hem long bed, mo i krae. Paoa blong hem blong ting stret i go daon kasem we, long en, wari mo fraet i win, mo hevi tudak long rum ia mo long sol blong hem i mekem se Emili i ting se bae hem i ded long naet ia. Hemwan nomo.

Long nogud situesen ia, Emili i karem paoa blong kamaot long bed mo nildaon. Hem i no traem blong soem hem olsem hem i bin mekem samtaem bifo long prea, nao hem i sarenda fulwan long Lod mo i plis wetem ful tingting: “Dia God, mi nidim Yu. Plis helpem mi. Mi no wantem stap miwan. Plis, mekem mi gotru long naet ia.”

Mo kwiktaem, olsem we Hem i bin mekem wetem Pita bifo, Jisas i pusum han blong Hem, i givim kamfot long sol blong hem we i stap draon.¹¹ Wanem i kavremap Emili, i wan bigfala kwaet, strong paoa long tingting, wan stret save mo lav. Rum ia i nomo kolkol, hem i no stap hemwan, mo blong fas taem, afta we hem i gat 14 yia, hem i bin save se evri samting bae i kam oraet. Emili “i wekap long God”¹² mo i go slip long pis. Mo olsem ia nao yumi luk se “sapos [yumi] sakem sin mo no mekem hat blong [yumi] i kam strong, naoia nomo bae bigfala plan blong fasin blong pemaot man i wok long [yumi].”¹³

Pikja

Famli long tempol

Hiling blong Emili mo blong hem i kam fri, i bin tekem longfala taem—ol manis blong tritmen, trening, mo kaonseling, we long tetaem ia, hem i kasem sapot mo samtaem, gud fasin blong Hem. Gud fasin blong Hem i gohed wetem hem taem hem i go insaed long tempol wetem hasban mo pikinini blong hem, blong sil tugeta blong oltaem. Olsem ol pipol blong Sarahemla, naoia Emili i talem tangkyu taem hem i tingtingbak long fasin ia blong God we i gud tumas mo i kam kwiktaem, mo paoa blong Hem blong mekem hem i fri long slef fasin.

Naoia, aot long laef blong wan narawan we i biliv. Long 27 Disemba 2013, Alicia Schroeder, i welkamem tufala fren blong hem, Sean mo Sharla Chilcote, we tufala i kamaot long hem long haos. Sean, we i bisop blong Alicia tu, i givim mobaelfon long hem mo talem: “Alicia, mitufala lavem yu. Yu nid blong ansarem fon ia.”

Hasban blong Alicia, Mario, i stap long fon. Hem i stap long wan ples longwe wetem sam long ol pikinini blong tufala, long wan sno trip we oli plan from longtaem finis. I gat wan prapa nogud aksiden. Mario i kasem bigfala kil, mo 10 yia boe blong tufala, Kaleb, i ded. Taem Mario i krae mo talem Alicia se Kaleb i ded, Alisia i sek bigwan, mo harem nogud tumas. I mekem hem i foldaon. Bodi i ded from hem i gat bigfala wari, nao Alisia i nomo save toktok o muv.

Bisop mo Sista Chilcote i leftemap hem kwiktaem mo holem hem. Oli krae mo krae sore tugeta blong smol taem. Afta, Bisop Chilcote i givim wan blesing long Alisia.

Wanem i hapen afta, man i no save andastanem sapos hem i no andastanem Atonmen blong Jisas Kraes, mo fasin blong God we i gud tumas mo i kam kwiktaem. Bisop Chilcote i putum han blong hem antap long hed blong Alicia mo, wetem voes we i seksek, i stat blong toktok. Alicia i harem tu samting olsem we God Hemwan i bin talem. Faswan, hem i harem nem blong hem, Alicia Susan Schroeder. Afta, hem i harem bisop i talem atoriti blong God we I Gat Olgeta Paoa. Long stret taem ia—taem hem i harem nem blong hem mo paoa blong God—Alicia i fulap long wan pis, lav, kamfot mo gladwe hem i no save tokbaot. Mo i neva aot long hem.

Naoia, i tru, Alicia, Mario mo famli blong olgeta oli gohed blong krae sore mo misim Kaleb. !Hem i had! Taem mi stap storian wetem olgeta, ae blong Alicia i fulap wetem wota, mo i talem hamas hem i lavem mo misim smol boe blong hem. Mo ae blong hem i wetwet taem nomo i stap taem hem i tokbaot olsem wanem Hae Man we I Mekem Hem I Fri i sapotem hem tru long evri pis blong hadtaem blong hem, i stat wetem gud fasin we i kam kwiktaem long taem we hem i lusum hop, mo i gohed wetem bigfala hop ia blong wan swit kam tugeta we i kam i no longtaem.

Mi luksave se, samtaem, ol eksperiens blong laef oli mekem tingting i fasfas, mo mekem ples i muv, we i mekem se i had blong kasem o luksave kaen help ia we i go long Emili mo Alicia. Mi bin fesem semmak kaen situesen. Mi testifae se, long ol taem olsem, wanem i holemtaet yumi, i wan saen blong gud fasin blong God we i kam kwiktaem. Tingbaot se, Isrel bifo, oli bin kam fri “tru long semfala God ia we i bin sevem olgeta”¹⁴ dei afta dei.

Mi talem witnes blong mi se Jisas Kraes i Hae Man we I Mekem Man i Fri, mo long nem blong Hem, mi promesem se taem yu stap tanem yu long Hem wetem tru hat mo ful stamba tingting long hat, bambae Hem i mekem yu kam fri long evri samting we i stap wantem spolem laef o glad blong yu. Blong kam fri, maet i tekem taem bitim yu wantem—maet i tekem ful laef o moa. Mekem se, blong givim kamfot, strong paoa long tingting mo hop, blong sapotem mo mekem yu kam strong kasem taem ia we bae yu fri, mi givim long yu mo testifae long yu abaot fasin ia blong God we i gud tumas mo i kam kwiktaem, long nem blong Jisas Kraes, amen.