Stap Lukaotem Save Tru long Spirit

Ol dia brata mo sista blong yumi. Lod i ripitim long yumi se yumi mas “lukaotem blong lanem samting tru long stadi mo tu, tru long fet.”¹ Yumi save kasem laet mo andastaning tru long nomol wei blong tingting long maen blong yumi, be tu, tru long Tabu Spirit we i lidim mo givim insperesen long yumi.

Sos blong save ia we oli ademap i no bin stap oltaem olsem pat blong laef blong mi.

Dia waef blong mi Irene, mo mi, i bin joenem Jos 31 yia i pas, taem we mitufala i jes mared nomo. Mitufala tugeta i bin bigwan long Kolombia, be sam manis afta long mared blong mitufala, wok blong mi i tekem mitufala blong go laef long Jemani. Mitufala i bin yangfala tumas mo gat ol bigfala hop mo lukluk long fored; hem i wan taem blong bigfala glad long mitufala.

Pikja

Sista mo Elda Held

Taem mi stap lukluk gud long wok blong mi, Irene i stap filim se bae mitufala i kasem wan kaen mesej we i kam long heven, be hem i no save hao o wetaem. I mekem hem i stat blong letem evri kaen kaen man we oli stap salem samting long doa blong ol man wetem ol buk blong saens, ol vakium klina, ol kuk buk, ol lektrik tul blong kijin, mo i go mo i go, mo stap wet long spesel mesej ia.

Wan naet hem i talem long mi se tu yangfala man we oli werem ol blak sut oli bin noknok long doa mo hem filim wan filing we i klia mo stret blong letem olgeta i kam insaed. Oli talem se oli wantem blong tokbaot long hem abaot God be bae oli kambak bakegen sapos mi stap long haos tu. ?Hem ia i save mesej we oli stap wet from?

Oli bin stat blong visitim mitufala, mo wetem gaed blong olgeta, mifala i ridim ol skripja mo kam blong andastanem hao Jisas Kraes olsem Sevya mo Ridima blong yumi hem i impoten. I no longtaem, mitufala i harem nogud se mitufala i bin baptaes taem mitufala i bebi nomo, we i wan kavenan we mitufala i no bin gat save long hem. Be, blong baptaes bakegen bae i minim tu blong kam olsem ol memba blong niu Jos ia, i mekem se mitufala i mas andastanem evri samting abaot Jos ia.

Be hao bae mitufala i save sapos wanem ol misinari oli stap talem abaot Buk blong Momon, abaot Josef Smit, mo abaot plan blong sevem man i rili tru? Mitufala i bin andastanem aot long ol toktok blong Lod se mitufala i save “save olgeta tru long ol frut blong olgeta.”² I mekem se, long wan wei blong tingting gud, mitufala i stat blong lukluk gud Jos mo lukaotem ol frut ia wetem ol ae blong maen blong tingting blong mitufala. ?Wanem nao mifala i bin luk? Mifala i luk:

• Ol pipol we oli mekem fren mo hapi mo gat ol naes famli we oli andastanem se yumi sapos blong filim glad long laef ia mo i blong safa nomo mo stap harem nogud.

• Wan Jos we oli no stap pem klak be wan we ol memba blong hemwan oli akseptem ol wok mo responsabiliti.

• Wan Jos we Jisas Kraes mo ol famli oli medel blong evri samting, we ol memba oli lego kakae wan taem long wan manis blong givim mane long olgeta we oli pua mo stap long nid, we oli stap leftemap ol gud fasin, blong stap tijim yumi blong stap longwe long ol samting we i save mekem yumi harem nogud.

Antap long hem:

• Mitufala i bin laekem hamas gro blong yuwan i impoten, long edukesen, long had wok mo stap dipen long yuwan.

• Mitufala i bin lanem abaot ol gudfala program blong tekem kea long ol man.

• Mitufala i glad tumas long ol jeneral konfrens wetem ol naesfala miusik mo ol dip prinsipol long saed blong spirit we oli bin serem.

Taem mitufala i luk evri samting ia, mitufala i no save faenem wan rong samting long Jos. Long narasaed, mitufala i bin laekem evri samting we mitufala i luk. Be, mitufala i stil no save disaed blong kasem baptaes from mitufala i wantem save evri samting bifo mitufala i mekem.

Be, iven taem mitufala i no save disaed, Lod i stap rere long mitufala, hem i stap sepem mitufala, mo Hem i stap helpem mitufala blong faenem se mitufala i sapos blong lanem blong luksave trutok, i no tru long maen blong yumi we i save tingting nomo, be tu, tru long smol kwaet voes blong Spirit, we i stap toktok speseli long hat blong yumi.

Voes ia mo risal blong filing ia, i kam long wan naet, afta 10 manis blong stap lanem gospel, taem mifala i bin rid long Mosaea 18: “From yufala i wantem blong … karem ol hevi samting blong wanwan long yufala, … mo leftemap tingting blong olgeta we oli nidim; … sapos hemia i tingting we hat blong yufala i wantem, ?wanem nao yufala i gat agensem baptaes blong yufala long nem blong Lod …?”³

Ol ves ia long Buk blong Momon i bin tajem ol hat mo sol blong mifala, mo kwiktaem mifala i filim mo save se i nogat wan risen blong bae mitufala i no baptaes. Mifala i luksave ol samting we mifala i wantem we i stap long ol ves ia mo tu ol samting we ol hat blong mifala i wantem mo ol samting ia oli ol samting we i mata moa. Oli bin moa impoten bitim blong andastanem evri samting from se mifala i save inaf finis. Oltaem mifala i dipen long han blong Papa long Heven we i stap gaedem mifala mo mifala i gat tras se bae Hem i gohed blong gaedem mifala.

Long semmak dei, mifala i putum wan deit blong baptaes blong mitufala, mo i no long taem mitufala i kasem baptaes.

Pikja

Baptaes blong Elda mo Sista Held

?Wanem nao mitufala i lanem aot long eksperiens ia?

Fes wan, mitufala i lanem se yumi save trastem Papa long Heven fulwan, we i stap traem oltaem blong helpem yumi kam ol man we Hem i save se yumi save kam olsem. Mifala i talem bakegen ol dip trutok blong ol toktok blong Hem taem Hem i talem: “Bae mi givim long ol pikinini blong ol man tijing folem tijing, rul folem rul, smol long ples ia mo smol longwe; mo olgeta i kasem blesing we i lisin long ol rul blong mi …, from bae oli lanem waes tingting; from long hem we i kasem bae mi givim moa.”⁴

Mo nambatu, mifala i lanem se, antap long ol maen blong yumi we i save tingting, wan nara moa lukluk blong stap kasem save, i save lidim yumi mo andastaning blong yumi. Hem i wan smol, kwaet voes blong Tabu Spirit blong Hem we i stap toktok long hat, mo tu, long maen blong yumi.

Mi laekem blong komperem prinsipol ia wetem hamas yumi save lukluk wetem ol ae. Papa blong yumi long Heven i givim yumi i no wan, be tu ae. Yumi save lukluk inaf wetem wan ae nomo, be nambatu ae i givim wan nara lukluk long yumi. Taem tugeta lukluk i kam tugeta long ol bren blong yumi, oli givim wan 3-D pikja blong ol samting raonem yumi.

Semmak we oli givim long yumi tu sos blong infomesen, tru long hamas yumi save mekem long saed blong bodi mo long saed blong spirit. Ol maen blong yumi i givim wan wei blong luksave samting tru long ol sens blong bodi blong yumi mo tru long wei blong lukluk samting blong yumi. Be tru long presen we i Tabu Spirit, Papa i givim tu long yumi wan nambatu lukluk, we i impoten moa mo i tru wan, from i kam stret long Hem. Be, from ol kwaet toktok blong Spirit fulap taem oli had blong harem, fulap man oli no luksave long ples ia we i stap tu.

Taem tufala lukluk ia i joen long ol sol blong yumi, wan pikja we i finis i soem ol tru samting olsem we oli stap. I tru, tru long ol lukluk blong Tabu Spirit we oli ademap, sam “samting we i tru tumas,” olsem we yumi pikjarem tru long ol tingting blong andastaning blong yumi, i save kamaot long wan wei we bae yu no luksave se i no tru o i no tru nomo. Tingbaot ol toktok blong Moronae: “Tru long paoa blong Tabu Spirit, bae yufala i save trutok long saed blong evri samting.”⁵

Long ol 31 yia blong mi olsem wan memba blong Jos, mi bin eksperiensem fulap taem se sapos yumi dipen nomo long maen blong yumi we i save tingting, mo tanem baksaed, o no akseptem andastaning long saed blong spirit we yumi save kasem tru long ol kwaet toktok blong Tabu Spirit, i olsem we yumi stap gotru long laef wetem wan ae nomo. Be, blong toktok long parabol, oli bin givim long yumi tufala ae. Lukluk ia we i joen nomo i save givim yumi tru mo ful pikja blong evri trutok mo long evri samting yumi eksperiensem long ol laef blong yumi, mo tu ful mo dip andastaning blong aedentiti blong yumi mo stamba tingting olsem ol pikinini blong wan Papa long Heven we i stap laef.

Mi tingbaot wanem Presiden Nelson i bin tijim yumi wan yia i pas taem hem i talem se “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”⁶

Mi kam blong save wetem tru save se:

• Yumi gat wan Papa long Heven we i lavem yumi, mo yumi bin agri blong kam long wol ia olsem wan pat blong wan tabu plan.

• Jisas Hem i Kraes; Hem i stap laef mo Hem i Sevya mo Ridima blong mi.

• Mi save se Josef, wan fam boe wetem tingting we i stap daon, God i singaotem hem mo kam olsem hae profet we i statem, taem we evri wok blong God i kamtru, wetem evri ki blong hem, paoa blong hem, mo atoriti blong tabu prishud blong God.

• Mi save se Buk blong Momon hem i wan nambatu witnes blong Jisas Kraes mo ol famli oli blong stap tugeta blong oltaem.

• Mo mi save se Lod blong yumi, Jisas Kraes, i stap lidim Jos blong Hem we i kambak long wol, tru long profet blong yumi we i stap laef, Presiden Russell M. Nelson, tedei.

Hem ia mo plante nara trutok we i gat fulap valiu i kam olsem ol blok we oli bildim long saed blong spirit we God i stap helpem mi blong kam olsem. Mo mi stap lukluk fored long fulap niufala tijing we Hem i stil wantem mi—mo yu—blong kasem taem yumi stap go tru naesfala laef ia mo “lanem … iven tru long stadi mo tu tru long fet.”

Mi save se ol samting ia oli tru mo mi testifae long olgeta, long nem blong Jisas Kraes, amen.