“Kam Folem Mi”

Ol brata mo sista blong mi we mi lavem yufala tumas. Waef blong mi, Wendy, mo mi, i glad tumas blong stap wetem yufala long Sabat moning ia. Plante samting i bin hapen stat long las jeneral konfrens blong yumi. Oli dediketem ol niu tempol, long Konsepsion, Jile; Barankuila, Kolombia, mo Rom, Itali. Yumi bin eksperiensem Spirit we i kam fulap long ol tabu taem ia.

Mi kongratuletem plante long ol woman mo man we oli jes ridim Buk blong Momon mo oli bin faenem glad mo ol rij samting we oli haed. Mi gat insperesen tru long ol ripot blong ol merikel we oli kasem.

Mi sapraes long ol yang man blong 11 yia, we naoia, olsem ol dikon, oli klin inaf blong pasem sakramen long evri Sandei. Oli go long tempol wetem ol yang woman we oli gat 11 yia, we oli stap lanem strong mo stap olsem ol Bihaev. Tugeta, ol yang man mo yang woman ia oli stap prijim ol trutok blong gospel long fasin we i klia mo wetem tru bilif.

Mi glad tumas long ol pikinini mo ol yut we oli stap help blong tijim gospel insaed long hom blong olgeta taem oli stap wok wetem papa mo mama blong olgeta, blong folem kurikulom long hom senta we Jos i sapotem.

Mifala i kasem foto ia blong Blek we i gat fo yia, we, eli long wan Satedei moning, i karem wan buk blong Jos mo talem: “!Mi nidim blong fidim spirit blong mi!”

Blek, mifala i glad tumas wetem yu mo ol narawan we oli stap jusum blong fidim spirit blong olgeta taem oli stap kakae long ol trutok blong gospel we i kambak blong Jisas Kraes. Mo mifala i laekem blong save se plante oli stap kasem paoa blong God insaed long laef blong olgeta taem oli stap wosip mo givim seves insaed long tempol.

Olsem we plante long yufala i save, famli blong mifala i kam blong seperet, tri manis i pas, long gel blong mifala, Wendy, taem hem i aot long laef ia. Long ol las dei blong faet blong hem agensem kansa, mi bin gat blesing blong gat janis ia blong stori blong talem tata long hem.

Mi holem han blong hem, mo talem long hem hamas mi lavem hem mo mi tangkyu se mi mi papa blong hem. Mi talem: “Yu mared long tempol mo stap fetful blong ona long ol kavenan blong yu. Yu mo hasban blong yu i welkamem seven pikinini long hom blong yutufala, mo resemap olgeta blong oli ol strong disaepol blong Jisas Kraes, ol strong memba blong Jos mo ol gud sitisen. Mo oli bin jusum ol hasban mo ol waef we oli strong semmak nomo. Papa blong yu i praod tumas, we tumas long yu”. !Yu givim mi plante glad!”

Kwaet nomo, hem i ansa: “Tangkyu Papa.”

Hem i wan taem blong kaen filing mo krae, blong mitufala. Long ol 67 yia blong hem, mifala i wok tugeta, singsing tugeta, mo plante taem ski tugeta. Be long naet ia, mitufala i tokbaot ol samting we oli impoten moa, olsem ol kavenan, ol odinens, fasin blong stap obei, fet, famli, stap tru long patna, lav, mo laef we i no save finis.

Mifala i misim gel blong mifala bigwan. Be, from gospel ia we i kambak blong Jisas Kraes, mifala i no stap wari long hem. Taem mifala i stap gohed blong ona long ol kavenan blong yumi wetem God, yumi stap laef wetem hop ia blong stap wetem hem bakegen. Be naoia, mifala i stap wok blong Lod long ples ia, mo hem i stap wok blong Hem longwe—long Paradaes.¹

Yes, mi mo waef i bin visitim Paradaes eli long yia ia—Hemia Paradaes long Kalifonia. I hapen se visit we mifala i plan from i 40 aoa afta we gel blong mifala i aot long wol ia. Mitufala, wetem Elda Kevin W. Pearson mo waef blong hem, Jun, mifala i kasem paoa tru long Ol Sent blong Jiko Kalifonia Stek. Mifala i lanem bigfala fet blong olgeta, givhan wok, mo ol merikel we i bin hapen long medel blong bigfala nogud disasta we i bigfala wael faea long histri blong Kalifonia.

Taem mifala i bin stap longwe, mifala i toktok longtaem wetem wan yang polis ofisa, Jon, we i wan long ol strong man blong help. Hem i tingbaot tik tudak we i kam long Paradaes long 8 Novemba 2018, taem ol flem mo ol jakol we i laet oli flae tru long taon, i kakae ol propeti mo ol samting blong man olsem wan sik, mo i no lego samting be ol hip blong asis mo brikis jimni blong haos.

Blong 15 aoa, Jon i draev tru long wan tudak we i no save luk samting nating, we ol pis faea we i laet i flaeflae taem hem i stap helpem, wan afta wan, famli afta famli blong ronwe mo go long sef ples—hemia we i putum laef blong hem long denja. Be yet, long taem blong nogud taem ia, wanem i mekem Jon i harem fraet bigwan from, i kwestin ia we i kakae tingting blong hem: “?Wehem famli blong mi?” Afta plante longfala aoa blong fraet, mo bigfala wari, hem i faenem se oli bin sef i stap.

Stori ia blong wari blong Jos from famli blong hem, i pusum mi blong toktok tedei wetem yufala we i stap askem, taem yufala i kam long en blong laef long wol ia, “?Wehem famli blong mi?” Long dei ia we i stap kam taem yu finisim tes blong yu long laef ia, mo stap go long spirit wol, bae yu kam blong fesem kwestin ia we i tanem hat blong yu: “?Wehem famli blong mi?”

Jisas Kraes i stap tijim wei we i gobak long hom blong yumi we i no save finis. Hem i andastanem gud moa plan ia blong Papa long Heven blong progres long taem we i no save finis i bitim eniwan long yumi. I tru, Hem nao i ki ston blong ful plan ia. Hem i Ridima blong yumi, Man blong Hilim yumi mo Sevya blong yumi.

Stat long taem we God i sendem Adam mo Iv i aot long Garen blong Iden, Jisas Kraes i bin givim strong han blong Hem blong helpem evriwan we bae i jusum blong folem Hem. Oli ripripitim i stap, long ol skripja, se, nomata evri kaen sin blong evri kaen pipol, ol han blong Hem oli open i stap.²

Spirit insaed long wanwan long yumi i wantem tumas se lav blong famli i stap blong oltaem. Ol lav singsing oli givim giaman hop se lav i wan samting ia nomo we yu nidim blong stap tugeta blong oltaem. Mo sam, i fani, be oli stap biliv se Laef Bakegen long Ded blong Jisas Kraes, i givim promes ia se evri pipol bae oli stap wetem famli blong olgeta afta long ded.

Wanem i tru, i we Sevya Hemwan i mekem i klia bigwan se, Laef Bakegen long Ded blong Hem, i meksua se evri man mo woman we i bin laef long wol, bae oli laef bakegen long ded mo stap laef blong olgeta,³ be i nidim moa sapos yumi wantem kam olsem wan god. Blong God i sevem yumi, i problem blong yumiwan nomo, blong kam olsem wan god, i wan famli problem.

Lisin long ol toktok ia we Lod Jisas Kraes i talem long profet blong Hem: “Evri kavenan, kontrak, agrimen, diuti, promes, strong promes, wok, rilesen, yunion, o samting we oli wet blong oli kamtru, we oli no mekem o oli no tekem, mo oli no silim tru long Tabu Spirit blong promes, … , evri samting ia oli no wok, o oli no laef, o oli no gat paoa long taem mo afta long taem blong laef bakegen long ded; from we evri kontrak ia we oli no mekem long fasin ia, oli finis nomo taem man i ded.”⁴

So, ?Wanem nao wan famli i mas mekem blong kam olsem god blong oltaem? Yumi kwalifae from spesel janis ia taem yumi mekem ol kavenan wetem God, taem yumi kipim ol kavenan ia, mo stap kasem ol stamba odinens.

Hemia i bin tru stat long stat blong taem kasem tedei. Adam mo Iv, Noa mo waef blong hem, Ebraham mo Sara, Lihae mo Saraea, mo evri nara strong disaepol blong Jisas Kraes—stat long taem oli krietem wol—oli bin mekem ol semfala kavenan wetem God. Oli bin kasem ol semfala odinens we yumi, olsem ol memba blong Jos we i kambak, blong Lod, yumi bin mekem: ol kavenan ia we yumi bin kasem long taem blong baptaes mo insaed long tempol.

Sevya i stap invaetem evriwan blong folem Hem i go long ol wota blong baptaes, mo, wetem taem, blong mekem sam moa kavenan wetem God insaed long tempol mo kasem mo stap fetful long ol nara stamba odinens. Evri samting ia, yumi nidim sapos yumi wantem kam olsem wan god wetem ol famli blong yumi mo wetem God, blong oltaem.

Trabol blong hat blong mi, i we, plante pipol we mi lavem, we mi ting hae long ol, mo we mi respektem, oli no akseptem invitesen ia blong Hem. Oli no wantem save long ol toktok blong Jisas Kraes, taem we Hem i singaot se: “Kam Folem Mi.”⁵

Mi andastanem from wanem God i stap krae.⁶ Mi tu, mi stap krae from ol kaen fren mo famli olsem. Oli ol gudfala man mo woman, we oli givim evri ting long famli blong olgeta mo responsabiliti blong olgeta olsem sitisen. Oli givim plante taem, paoa mo risos blong olgeta. Mo wol i gud moa from ol traehad blong olgeta. Be oli bin jusum blong no mekem ol kavenan wetem God. Oli no bin kasem ol odinens we bae i mekem oli kam olsem god wetem famli blong olgeta mo joenem olgeta tugeta blong oltaem.⁷

O, mi wantem tumas blong visitim olgeta mo invaetem olgeta blong tingting hevi long ol loa blong Lod we oli gat paoa. Mi bin askem miwan se bae mi talem wanem blong oli filim hamas Sevya i lavem olgeta, blong oli save hamas mi lavem olgeta, mo blong oli kam blong luksave olsem wanem ol woman mo man we oli kipim ol kavenan oli save kasem “wan glad we i fulwan.”⁸

Oli nid blong andastanem se, nomata i gat wan ples blong olgeta afta—wetem ol gudfala man mo woman we oli jusum tu blong no mekem ol kavenan wetem God—hemia i no ples we ol famli oli joen bakegen long hem, mo oli kasem spesel janis ia blong laef mo progres blong oltaem. Hemia i no kingdom ia we bae oli save kasem glad we i fulwan—o progres mo hapines we i no gat en.⁹ Ol hae blesing ia olgeta, oli save kam nomo taem wan i laef insaed long wan selestial wol wetem God, Papa blong yumi We I No Save Finis; wetem Pikinini blong Hem, Jisas Kraes; mo ol memba blong famli we oli gud tumas, oli klin inaf mo oli kwalifae.

Mi filim blong talem long ol fren blong mi we oli no wantem gospel ia:

“Insaed long laef ia, yu neva glad blong samting we i nambatu long eni samting. Yet, taem yu stap stanap strong blong no akseptem fulwan gospel ia we i kambak blong Jisas Kraes, yu stap jusum blong akseptem wan seken han laef.

“Sevya i talem: ‘Long haos blong Papa blong mi, i gat plante rum i stap.’¹⁰ Be, taem yu stap jusum blong no mekem ol kavenan wetem God, yu stap agri blong stap long anda long wan ruf we i no strong tumas blong ful taem we i no save finis.

Bae mi talem bakegen long ol fren ia blong mi se:

“Talemaot hat blong yu long God. Askem Hem sapos ol samting ia oli tru. Mekem taem blong stadi long ol toktok blong Hem. !Yu stadi tru! Sapos i tru we yu lavem famli blong yu, mo yu wantem blong kam olsem wan god tru long taem we i no save finis, pem praes naoia—taem yu series mo stadi mo prea strong—blong save ol trutok ia we oli no save finis, mo afta, folem olgeta.

“Sapos yu no save stret sapos yu iven biliv long God, stat long ples ia. Andastanem se sapos i no gat eksperiens wetem God, wan i save gat tu tingting long God. Mekem se, putum yu long wan ples blong stat gat ol eksperiens wetem Hem. Putum tingting blong yu i stap daon. Prea blong ol ae blong yu oli luk han blong God long laef blong yu mo long wol raon long yu. Askem Hem blong talem long yu sapos Hem i rili stap ia—sapos Hem i save yu. Askem Hem olsem wanem Hem i stap filim abaot yu. !Mo afta, yu lisin!”

Wan fren olsem, i no gat tumas eksperiens wetem God. Hem i wantem stap tumas wetem waef blong hem we i ded finis. Mekem se hem i askem mi blong helpem hem. Mi leftemap tingting blong hem blong mit wetem ol misinari blong yumi blong save andastanem doktrin blong Kraes mo lanem ol kavenan blong gospel, ol odinens mo ol blesing.

Hem i mekem hemia. Be hem i bin filim se rod we oli stap tokbaot bae i mekem tumas jenis long laef blong hem. Hem i talem: “Olgeta komanmen mo kavenan ia, oli had tumas long mi. Mo tu, mi no save pem taeting, mo mi no gat taem blong givim seves insaed long Jos.” Afta, hem i askem mi: “Taem bae mi ded, bae yu save mekem ol tempol wok we i nid blong mekem blong waef blong mi mo mi, blong mekem se mitufala i stap tugeta bakegen?”

Tangkyu tumas we mi mi no jaj blong man ia. Be mi stap kwestinim se proksi tempol wok blong wan man we i bin gat janis blong baptaes long laef ia, bae i wok o no—blong hem i oden long prishud mo kasem ol tempol blesing long ples ia long laef ia—be yet, i mekem desisen ia, wetem ful tingting, blong sakemaot rod ia.

Ol dia brata mo sista blong mi. Jisas Kraes i stap invaetem yumi blong tekem rod ia blong kavenan i gobak hom long Papa mo Mama blong yumi long heven blong stap wetem olgeta we yumi lavem olgeta. Hem i stap invaetem yumi blong “kam folem mi.”

Naoia, olsem Presiden blong Jos blong Hem, mi plis long yufala we i go longwe long Jos, mo long yufala we i no rili lukaotem blong save se Jos blong Sevya i kambak o no. Mekem wok long spirit blong faenemaot yufalawan, mo plis, mekem naoia. Taem i stap kam sot.

!Mi testifae se God i stap laef! Jisas Hem i Kraes. Jos ia blong Hem mo ful gospel blong Hem, Hem i putumbak blong blesem laef blong yumi wetem glad, long ples ia mo long laef afta. Mi testifae long hemia, long nem blong Jisas Kraes, amen.