O Le Mana o le Tusi a Mamona i le Liuaina

Ina ua maea ona iloiloina se lipoti mai se suesuega faaletino talu ai nei, sa ou aoaoina faapea ou te manaomia ona faia ni fetuunaiga o le ituaiga o olaga. Ina ia fesoasoani ia te a’u, sa tusia e lo’u fomai se fuafuaga o meaai paleni ma le faamalositino, lea, afai ou te filifili e mulimuli ai, o le a suia a’u i se tagata maloloina atili.

Afai tatou te faia uma se suesuega faaleagaga, o le a se mea o le a tatou aoaoina e uiga ia i tatou lava? O a ni fetuunaiga o le a tusia e lo tatou foma’i faaleagaga? Mo i tatou e avea ma tagata e tatau ona tatou avea ai, e taua lo tatou iloa o le mea e fai ma faia mea tatou te iloa.

O Iesu Keriso o le Foma’i Sili.¹ E ala mai i Lana Togiola, Na te fusifusia o tatou manu’a, tauave i Ona luga o tatou vaivaiga, ma faamaloloina o tatou loto nutimomoia.² E ala i Lona alofa tunoa, e mafai ai ona faamalosia o tatou vaivaiga.³ Na te valaaulia i tatou ia mulimuli atu ia te Ia⁴ e ala i le a’oa’o ia te Ia, faalogo i Ana afioga, ma savali i le agamalu o Lona Agaga.⁵ Ua Ia folafola mai e fesoasoani mai ia i tatou⁶ i lenei faagasologa o le liua i le olaga atoa, lea e suia i tatou ma aumaia le olioli e faavavau.⁷

Ua tuuina mai ia i tatou e le Faaola le Tusi a Mamona o se meafaigaluega mamana e fesoasoani i le liuaina. Ua saunia e le Tusi a Mamona se meaai paleni faaleagaga, tusia se fuafuaga o le faatinoga, ma faafesootai atu i tatou i le Agaga Paia. Ua tusiaina mo i tatou,⁸ o loo aofia ai le afioga a le Atua i le manino⁹ ma ta’u mai ia i tatou lo tatou faasinomaga, faamoemoega, ma le taunuuga.¹⁰ Faatasi ai ma le Tusi Paia, ua molimau mai le Tusi a Mamona ia Iesu Keriso¹¹ ma a’oa’o mai le ala e mafai ai ona tatou iloa upumoni ma avea ai e faapei o Ia.

Ata

Uso Saw Polo

O Uso Saw Polo sa 58 tausaga ina ua faailoa atu ia te ia le talalelei toefuataiina a Iesu Keriso. Ina ua ou feiloai ia te ia, sa galue o ia o se peresitene o le paranesi mo le tele o tausaga, ae na ou iloaina na te lei faitauina lava le Tusi a Mamona ona sa le’i maua i lana gagana Burmese. Ina ua ou fesili ia te ia pe faapefea ona ia iloa e moni le tusi e aunoa ma le faitauina, na tali mai o ia na ia suesueina le tusi ata o Tala o le Tusi a Mamona i aso uma e ala i le matamata i ata, faaaogaina se lolomifefiloi e faaliliu ai upu faaPeretania, ma tusi faaeteete ni faamatalaga o mea na ia aoaoina. Sa ia faamatala mai, “O taimi uma sa ou suesue ai, ou te tatalo e uiga i mea sa ou a’oa’oina, ma ou te lagona le filemu ma le olioli, e manino lo’u mafaufau, ma e faamalūlūina lo’u loto. Sa ou lagonaina le molimau mai o le Agaga Paia ia te a’u e moni. Ou te iloa o le Tusi a Mamona o le afioga a le Atua.”

E pei o Uso Saw Polo, e mafai e i tatou taitoatasi ona suesue le Tusi a Mamona e tusa ai ma o tatou tulaga. A o tatou naunau e talitonu ma mafaufau loloto i ana aoaoga i o tatou loto, e mafai ona tatou ole atu i le faatuatua i le Atua pe moni ia aoaoga.¹² Afai tatou te faamaoni i lo tatou naunau ina ia iloa ma maua le mana’o moni e galue, e tali mai o Ia ia i tatou i o tatou loto e ala i le Agaga Paia. Ma o le mana o le Agaga Paia e mafai ona tatou iloa ai le moni o mea uma lava.¹³ Pe a tatou mauaina se molimau paia o le Tusi a Mamona, tatou te iloa foi e ala i lea lava mana e tasi o Iesu Keriso, o le Faaola o le lalolagi, o Iosefa Samita o Lana perofeta, ma o Le Ekalesia a Iesu Keriso o le Au Paia o Aso e Gata Ai o Lana lava Ekalesia toefuataiga.¹⁴

A o avea ma se alii talavou i le amataina o la’u galuega faafaifeautalai, sa ou ulu atu i se vaalele e agai atu i Ausetalia. O le lagonaina o le tuuatoatasi, popole, ma le le atoatoa ae ua tautino e auauna atu, sa ou matuai manaomia lava se faamautinoaga pe moni mea na ou talitonu i ai. Sa ou tatalo ma faitau ma le naunautai a’u tusitusiga paia, ae a o faagasolo pea le faigamalaga, sa matua faateteleina lo’u lava ia masalosalo ma na faaletonu lo’u tulaga faaletino. Ina ua mavae lo’u tauivi ai mo le tele o itula, na savali mai se tama o le vaalele ma tu i autafa o lo’u nofoa. Sa ia aveese mai i o’u lima le Tusi a Mamona sa ou faitauina. Na ia tilotilo i le faava’a ma fai mai, “O se tusi maoae lena!” ona toe tuu mai lea o le tusi ia te a’u ma savali ese. Ou te le’i toe vaai lava ia te ia.

A o tatagi mai pea ana upu i o’u taliga, na ou faalogoina ma le manino ma lagonaina i lo’u loto, “O lea ou te iinei, ma ou te iloa le mea o e i ai. Tau lava o le faia o le mea sili e te mafaia, aua o le a ou faia mea o totoe.” I luga o lena vaalele i luga a’e o le Vasa Pasefika, sa ou maua ai se molimau patino e ala i a’u suesuega o le Tusi a Mamona ma uunaiga a le Agaga Paia e faapea na silafia e lo’u Faaola lo’u tagata ma e moni le talalelei.

Na a’oa’o mai Elder David A. Bednar: “O le iloaina e moni le talalelei, o le fatu lea o se molimau. O le faamaoni e le aunoa foi i le talalelei, o le fatu lea o le liuaina.”¹⁵ O le liua e manaomia ai i tatou ina ia avea ma “ē anaana i le upu ae le na o le faalogo i ai.”¹⁶ O le fuafuaga faatino a le Alii mo i tatou—le mataupu faavae a Keriso—o loo a’oa’oina manino i le Tusi a Mamona.¹⁷ Ua aofia ai:

• Muamua, faatinoina o le faatuatua ia Iesu Keriso e ala i le faalagolago ia te Ia, tausi Ana poloaiga, ma le iloaina o le a Ia fesoasoani mai ia i tatou.¹⁸

• Lua, salamo i aso taitasi i o tatou vaivaiga ma lagonaina agonaina le olioli ma le filemu pe a Ia faamagaloina i tatou.¹⁹ O le salamo e manaomia ai lo tatou faamagaloina o isi²⁰ ma fesoasoani ia i tatou ia agai i luma. Ua folafola mai e le Faaola e faamagalo i tatou i taimi uma tatou te salamo ai.²¹

• Tolu, o le osia ma le tausia o feagaiga ma le Atua e ala i sauniga e pei o le papatisoga. O lenei mea o le a faatumauina ai i tatou i luga o le ala o feagaiga lea e tau atu ia te Ia.²²

• Fa, mauaina o le meaalofa o le Agaga Paia. O lenei meaalofa tatou te maua ai le matufaga faifai pea a lē na te faapaiaina, faamafanafana, ma taialaina i tatou.²³

• Ma le lima, tumau e oo i le iuga e ala i le fetaomi atu i luma ma le tumau a o taumamafa i aso taitasi i le afioga a Keriso.²⁴ E ala i le taumafa mai le Tusi a Mamona ma le pipii mau i ana aoaoga, e mafai ai ona tatou manumalo i tofotofoga ma maua le taitaiga ma le puipuiga i o tatou olaga atoa.²⁵

O le faaaoga pea o le mataupu faavae a Keriso i o tatou olaga, o le a tatou faatoilalo ai le lagona o le le fia suia lea e faalavelave i suiga ma le fefe lea e taofiaina faatinoga. O le a tatou mauaina faaaliga faaletagata lava ia, aua o le Agaga Paia “o le a faaali mai e ia ia te outou mea uma e tatau ona outou faia,”²⁶ ma “o afioga a Keriso o le a ta’u mai ai ia te outou mea uma e tatau ona outou faia.”²⁷

Mo le 20 tausaga, na tauivi ai Uso Huang Juncong ma le avamalosi, sikareti, ma taaloga faitupe ua lēmāpuleaina. Ina ua faailoa atu i ai Iesu Keriso ma Lana talalelei toefuataiina, na manao Uso Huang e sui mo le manuia o lona aiga talavou. O lana luitau sili o le ulaula. O se tagata e le malolo le tapaa, sa ia taumafai e tuu i le tele o taimi ae sa le faamanuiaina. I se tasi aso, sa ulufia ai lona mafaufau e upu nei mai le Tusi a Mamona: “ma le loto faamaoni, ma le manatu moni i ai.”²⁸ E ui i taumafaiga muamua na le’i faamanuiaina, ae na ia lagona atonu e mafai ona ia sui i le fesoasoani mai o le Tama Faalelagi ma Iesu Keriso.

Na tuufaatasia e faifeautalai faamisiona lo latou faatuatua faatasi ma ia ma saunia se fuafuaga faatino o ni auala talafeagai, faatasi ai ma le tele o tatalo ma le suesueina o le afioga a le Atua. Faatasi ai ma le faamaoni ma le manatu moni i ai, na faatino ai e Uso Huang i le naunautaiga faamaoni ma iloa ai a o ia taulai atili atu i mausa fou na ia manao e atiae, e pei o le suesueina o le Tusi a Mamona, na faaitiitia lona taulai atu i mausa na ia manao e aveese.

O le toe manatuaina ai o lona aafiaga mai le 15 tausaga ua mavae, na ia saunoa ai, “Ou te le manatuaina po o anafea tonu lava na tuu ai la’u ulaula, ae a o ou taumafai malosi i aso uma e fai mea sa ou iloa na manaomia ona ou faia e valaaulia ai le Agaga o le Alii i lo’u olaga ma faia pea i latou, sa ou le toe tosina atu i sikareti talu mai lena taimi.” E ala i le faaaogaina o a’oa’oga o le Tusi a Mamona, ua suia ai le olaga o Uso Huang, ma ua avea ai o ia ma se tane ma se tamā lelei atu.

Ata

Huang Juncong ma le aiga

Ua folafola mai e Peresitene Russell M. Nelson: A o outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—i aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga.”²⁹

Uo pele, o le Tusi a Mamona o le afioga a le Atua, ma o le a tatou latalata atili atu ia te Ia pe afai tatou suesue i ai.³⁰ Pe a tatou tofotofo i ana upu, o le a tatou mauaina se molimau o lona moni.³¹ Pe a tatou ola ai pea e tusa ma ona a’oa’oga,31o le a tatou le mananao e fai mea leaga.³² O le a liua o tatou loto, foliga, ma le natura ina ia avea atili e faapei o le Faaola.³³ Ou te faasoa atu la’u molimau mautinoa o Iesu o le Keriso, lo tatou Faaola, Togiola ma le Uo. I le suafa o Iesu Keriso, amene.