Tutufaatasi i le Faataunuuina o le Galuega a le Atua

Uso e ma tuagane matagofie, o se fiafiaga le i ai faatasi ma outou. Po o fea lava o tou faalogologo mai ai, ou te tuuina atu ni opo i o’u uso ma faatalofa mafana i o’u tuagane. O loo tatou punouai i le galuega a le Alii o Iesu Keriso.

Pe a tatou mafaufau ia Atamu ma Eva, o le tele lava o taimi tatou te mafaufau muamua i lo la olaga atoatoa i le Faatoaga o Etena. Ou te mafaufau sa atoatoa e le aunoa le tau—e lē vevela tele ma e lē malulu tele foi—ma le mau fualaau suamalie ma fualaau faisua lea na ola ae ma mafai ona la aai ai i soo se taimi e mananao ai. Talu ai o se lalolagi fou lea mo i la’ua, sa tele mea la te vailia, o aso uma lava sa mataina a o la faamasani i olaga o meaola ma lo la siosiomaga matagofie. Sa tuuina atu foi ia i la’ua ni poloaiga e usitaia ma sa eseese auala e faia ai na faatonuga, lea na oo mai ai ni popolega ma le le mautonu. ¹ Ae a o la faia ni faaiuga ia na suia ai o la olaga e faavavau, sa la aoao e galulue faatasi ma le lotogatasi i le faataunuuina o faamoemoega o le Atua mo i la’ua—ma mo Ana fanau uma.

Sei vaai faalemafaufau la i lea lava ulugalii i le olaga faitino. Sa tatau ona la galulue mo a la meaai, o nisi o meaola na faapea o i la’ua o ni mea e ‘ai, ma sa i ai ni luitau faigata e na o le fefautuaai ma le tatalo faatasi e faatoilalo ai. Ou te mafaufau sa na o ni nai taimi sa eseese ai o la manatu e uiga i le ala e faafetaia’i ai na luitau. Ae ui i lea, o le Pa’ū, sa la aoaoina ai le taua e faatino i le lotogatasi ma le alofa. I aoaoga sa la maua mai punavai faalelagi, sa la aoao ai i le ata o le faaolataga ma mataupu faavae o le talalelei a Iesu Keriso ia e mafai ai ona faatino le fuafuaga. Talu ai sa la malamalama o o la faamoemoega faalelalolagi ma sini faavavau sa tutusa, sa la maua le faamalieina ma le manuia i le aoao e galulue faatasi i le alofa ma le amiotonu.

A o fananau mai a la fanau, na aoao atu e Atamu ma Eva lo la aiga i mea sa la aoaoina mai avefeau faalelagi. Sa la taulai atu e fesoasoani i a la fanau ia malamalama foi ma taliaina na mataupu faavae o le a latou maua ai le fiafia i lenei olaga, ma saunia e toe foi atu i o latou matua faalelagi ina ua faateleina lo latou tomai ma faamaonia lo latou usiusitai i le Atua. I le gasologa, na aoao Atamu ma Eva e talisapaia o la’ua malosiaga eseese ma lagolagoina e le tasi le isi i la la’ua galuega taua e faavavau. ²

A o gasolo mai ma mou atu seneturi ma sosoo ma le afe tausaga, o le manino o sao musuia ma le felagolagoma’i a alii ma tamaitai ua amata ona nenefu i faamatalaga ma malamalamaaga lē sa’o. I le va o lena amataga ofoofogia i le Faatoaga o Etena ma le taimi nei, sa faamanuiaina le fili i lana sini e tavavae alii ma tamaitai i ana taumafaiga e faatoilalo o tatou agaga. Ua iloa e Lusifelo afai na te faatamaoia le lotogatasi e lagona e alii ma tamaitai, afai e mafai ona ia faalēmautonuina i tatou e uiga i lo tatou taua paia ma tiutetauave o le feagaiga, o le a ia malo i le faatamaiaina o aiga, o iunite taua ia o le faavavau.

E faaosooso e Satani le taufaatusatusa e faatupu ai ni lagona o le faasausili po o le vaai maulalotaualoa, a o natiaina le upumoni faavavau faapea o eseesega faalenatura o alii ma tamaitai, ua mai le Atua ma e tutusa lava le taua. Na ia taumafai e faalumaina sao o tamaitai i le aiga ma i faapotopotoga lautele, ma faʻaitiitia ai lo latou tosinaga faagaeetia mo le lelei. O lana sini o le uunaia lea o se tauiviga mo le paoa nai lo le patipatia o sao tulaga ese o alii ma tamaitai e fefaamaloa’i ai le tasi i le isi ma saofagā ai i le lotogatasi.

O le mea lea, i le aluga o tausaga ma i le lalolagi atoa, o se malamalamaaga atoatoa i le felagolagomaʻi faalelagi ae eseese sao ma tiutetauave o alii ma tamaitai na matuā mouese atu. O tamaitai i le tele o faapotopotoga ua faalololo atu i ai alii nai lo o ni paaga soosootau’au, ua faaitiitia ai a latou gaoioiga i se tulaga vaiti. O le alualu i luma faaleagaga sa o se tulutulu lona telegese i na taimi pogisa; ioe, sa o se sulu itiiti faaleagaga sa mafai ona ofi atu i mafaufau ma loto ua lilofia i agamasani o le pule malosi.

Ona susulu mai lea o le malamalama o le talalelei toefuataiina “ua sili atu le pupula i le la” ³ ina ua faaali mai le Atua le Tama ma Lona Alo, o Iesu Keriso, i le tama o Iosefa Samita i le amataga o le tautotogo o le 1820 i lena togavao paia i le setete o Niu Ioka. O lena mea na tupu na amata ai le soloa’i mai o faaaliga mai le lagi i aso nei. O se tasi o uluai elemene o le Ekalesia anamua a Keriso na toefuatai mai o le pule lea o le perisitua a le Atua. A o faagasolo pea le tatala mai o le Toefuataiga, sa amata ona toe iloa e alii ma tamaitai le taua ma le faamoemoe o le galulue o ni paaga, ua faatagaina ma taialaina e Ia i lenei galuega paia.

I le 1842, ina ua mananao tamaitai o le Ekalesia tau atiae e faatulaga se vaega aloaia e fesoasoani ai i le galuega, sa lagona e Peresitene Iosefa Samita le musuia e faatulaga i latou “e ala i le perisitua e mulimuli i le mamanu o le perisitua.” ⁴ Na ia saunoa, “ma o lenei ua ou tuuina atu le ki ia te outou i le suafa o le Atua …—o le amataga lenei o aso sili atu ona lelei.” ⁵ Ma talu ona faaaoga lena ki, ua amata ona auauai malie mai le faalauteleina o avanoa faaleaoaoga, faaupufai, ma le tamaoaiga mo tamaitai i le lalolagi atoa. ⁶

O lenei faalapotopotoga fou a le Ekalesia mo tamaitai, ua faaigoaina o le Aualofa, e le pei o isi sosaiete a tamaitai o lena vaitaimi ona sa faavaeina e se perofeta o lē na galue i le pule o le perisitua e tuu atu i tamaitai le pule, tiutetauave paia, ma tofiga aloaia i totonu o le faatulagaga o le Ekalesia, e lē ese mai ai. ⁷

Mai i ona po o le Perofeta o Iosefa Samita e oo mai ia i tatou, o le faaauau ai pea o le toefuataiga o mea uma ua oo mai ai le malamalama i le manaomia o le pule ma le mana o le perisitua e fesoasoani i alii ma tamaitai e faataunuu ai o latou tiutetauave paia ua tofia i ai. Talu ai nei na aoaoina ai i tatou, o tamaitai ua vaetofia i lalo o le taitaiga a se tasi e umia ki o le perisitua e galulue i le pule o le perisitua i o latou valaauga. ⁸

Ia Oketopa 2019, na aoao mai ai Peresitene Russell M. Nelson o tamaitai o e ua maua faaeega paia i le malumalu ua maua le mana o le perisitua i o latou olaga ma i o latou aiga ao latou tausia na feagaiga paia sa latou osia ma le Atua. ⁹ Na ia faamalamalama mai “e tutusa lava le matala o le lagi i tamaitai ua maua faaeega paia i le mana o le Atua e tafe mai ia latou feagaiga faaleperisitua e pei ona matala foi i alii o loo umiaina le perisitua.” Ma sa ia uunaia tamaitai uma ina ia “mauaina e le aunoa le mana o le Faaola e fesoasoani ai i lou aiga ma isi e te alofa i ai.” ¹⁰

O le a la le uiga o lena mea ia te oe ma a’u? E faapefea e le malamalama i le pule o le perisitua ma le mana ona suia ai o tatou olaga? O se tasi o ki o le iloa afai e galulue faatasi tamaitai ma alii ¹¹ o le a tele atu mea tatou te faataunuuina nai lo le galulue vaoeseese. O a tatou matafaioi o le galulue soosoo tauau nai lo le faatautava. E ui e lei faauuina tamaitai i se tofi o le perisitua, e pei ona matauina talu ai nei ae ua faamanuiaina tamaitai i le mana o le perisitua a o latou tausia a latou feagaiga, ma e latou te galulue i le pule o le perisitua pe a vaetofiaina i latou i se valaauga.

I se aso matagofie ia Aokuso, sa ou maua ai se avanoa e saofafai ai ma Peresitene Russell M. Nelson i le fale ua toe fausia o Iosefa ma Ema Samita i Haramoni, Penisilevania, e lata i le nofoaga na toefuatai ai le Perisitua Arona i aso nei e gata ai. I le ma talanoaga, na saunoa ai Peresitene Nelson e uiga i le taua o le matafaioi a tamaitai o loo faia i le Toefuataiga.

Peresitene Nelson: “O se tasi o vaega sili ona taua e faamanatu mai ia te a’u pe a ou sau i lenei nofoaga o le toefuataiga o le perisitua, o le taua o le matafaioi na faia e tamaitai i le Toefuataiga.

“Ina ua faatoa amata ona faaliliu e Iosefa le Tusi a Mamona, o ai na tusitusi? Ia, na ia faia sina mea itiiti, ae e le’i tele. O Ema na tulai a’e.

“Ona ou mafaufau lea i le auala na alu ai Iosefa i le vao e tatalo e lata i lo latou fale i Palamaira, Niu Ioka O fea na ia alu i ai? Sa alu o ia i le Vao Paia Aisea na ia alu ai iina? Aua o iina na alu ai Tinā pe a manao o ia e tatalo.

“E na o le toalua lena o tamaitai o e na i ai matafaioi autu i le toefuataiga o le perisitua ma i le Toefuataiga o le Ekalesia. E lē masalomia foi lo tatou faapea atu e tutusa lava le taua o a tatou avā i le asō e pei o na aso. Ioe, o lea lava.”

E pei o Ema ma Lusi ma Iosefa, e sili lo tatou aoga pe a tatou naunau e aoao mai le tasi ma le isi ma tutufaatasi i la tatou sini ia avea ma soo o Iesu Keriso ma fesoasoani i isi i le ala.

Ua aoaoina i tatou o le “perisitua e faamanuiaina olaga o fanau a le Atua i auala e le mafaitauina. … I valaauga [i le Ekalesia], sauniga o le malumalu, sootaga faaleaiga, ma auaunaga taitoatasi lē leoa, e fetaomi atu ai i luma tamaitai ma alii o le Au Paia o Aso e Gata Ai i le mana ma le pule o le perisitua. O lenei felagolagoma’i o alii ma tamaitai i le faataunuuina o le galuega a le Atua e ala i Lona mana e totonugalemu i le talalelei a Iesu Keriso lea na toefuatai e ala mai i le Perofeta o Iosefa Samita.” ¹²

O le tutufaatasi e taua i le galuega paia ua faamanuiaina ai i tatou ma valaauina e faia, ae le’i tupufua. E manaomia ai taumafaiga ma le taimi e fefautuaai faatasi ai—e faalogo ai i le tasi ma le isi, malamalama i vaaiga a isi, ma fefaasoaai poto masani—ae o le gasologa e taunuu i faaiuga sili ona musuia. Pe i ai i le fale pe i tiutetauave o la tatou Ekalesia, o le auala sili ona lelei e faataunuu ai lo tatou faamoemoega paia o le galulue faatasi, faamanuiaina i le mana ma le pule o le perisitua i a tatou matafaioi eseese ae felagolagoma’i.

O a foliga o lena faapaaga i olaga o tamaitai o le feagaiga i le asō? Sei ou faasoa atu se faataitaiga.

Sa i ai se faapaaga tulaga ese a Alisone ma Ioane. Sa la tietie i se uila vilivae nofoalua i tuuga pupuu ma uumi. Ina ia tauva ma le manuia i lena uila, e tatau ona ogatusa le au tietie e toalua. E tatau ona la faatafa i le itu e tasi i le taimi sa’o. E le mafai ona puleaina e le tasi le isi, ae e tatau ona la fesootai manino ma fai le vaega a le tagata lava ia. O le kapeteni, i luma, e pule i le taimi e taofi pe tu ai. O le soatau i tua, e tatau ona gauai atu i le mea o loo tupu ma sauni e tuu atu se isi malosiaga pe a la pa’ūū i tua pe faalemu pe a la latalata tele i isi au tietie. E tatau ona la felagolagoma’i e agai ai i luma ma ausia le la sini.

Na faamatalaina e Alisone: “Mo le taimi muamua ao, fai mai le tagata o loo kapeteni, ‘Tu’ pe a manaomia ona ma tu ma ‘Taofi’ pe a tatau ona taofi le viliina. Pe a mavae se taimi, o le a iloa e le soatau le taimi o le a tu pe taofi ai le kapeteni, ma e lē toe tau faia ni upu. Sa ma aoao ia iloa ona ogatasi, ma pe o a mai le tasi ma le isi, ma mafai ona iloa pe a ua faataupepē le tasi [ona] taumafai lea o le isi e ‘apo mai. O le mea moni lava ia, e faatatau i le faatuatuaina ma le galulue faatasi.” ¹³

Sa lotogatasi Ioane ma Alisone e le gata i le viliina o le la uila, ae sa la lotogatasi foi i le la faaipoipoga. Sa tofu naunau i la’ua i le fiafia o le tasi nai lo ia lava; sa tofu vaavaai mo le lelei o le tasi ma le isi, ma sa la galulue e faatoilalo mea e le lelei i le tagta lava ia. Sa la feauauai e taitai ma feauauai e faaopoopo atu i le tasi pe a faataupepē le isi. Sa tofu faatauaina e le tasi le sao o le isi, ma maua ai tali e sili atu i o la’ua luitau a o la tuufaatasia a la taleni ma punaoa. E fusia moni lava i la’ua o le tasi ma le isi e ala i le alofa faaKeriso.

O le ogatusa atili ma le mamanu faalelagi o le galulue faatasi i le lotogatasi e taua i lenei taimi o savali o le “o a’u muamua” lea o loo siomia ai i tatou. Ua i ai i tamaitai ni meaalofa faapitoa ma paia ¹⁴ ma ua tuuina atu i ai ni tiutetauave tulaga ese, peitai o na mea e le sili atu—pe itiiti ifo—le taua nai lo meaalofa ma tiutetauave a alii. Ua mamanuina ma manaomia tagata uma e faataunuu ai le fuafuaga paia a le Tama Faalelagi o le tuu atu i tagata taitoatasi o Lana fanau o le avanoa sili e ausia ai lona gafatia paia.

O le taimi nei, “tatou te manaomia tamaitai o e lotototoa ma e i ai le vaaiga mamao a lo tatou Tina o Eva” ¹⁵ e o mai faatasi i le aumaia o agaga ia Keriso. ¹⁶ E tatau i alii ona avea ma paaga faamaoni nai lo le faapea ua na o i latou o i ai le tiute atoa pe galulue o ni paaga “faafoliga” ao faia e tamaitai le tele o le galuega. E tatau i tamaitai ona naunau e “laa i luma [ma] tutu [i o latou] tulaga tonu ma le manaomia” ¹⁷ o ni paaga nai lo le mafaufau e tatau ona latou faia na’o i latou pe faatali se’i faatonu atu i le mea e fai. ¹⁸

O le vaaia o tamaitai o ni tagata taua i le faatinoina, e lē faapea ai ua fatuina se “faatusatusa” ae o le malamalama i upumoni faalefaavae. Nai lo le faatuina o se polokalama e faatino ai lena mea, e mafai ona tatou galulue lelei, e faatauaina tamaitai e faapei ona faia e le Atua; o ni paaga taua i le galuega o le faaolataga ma le faaeaga.

Ua tatou sauni? Mata o le a tatou tauivi e faatoilalo le faaitu’au ae talia mamanu ma faiga faalelagi e faavae i luga o aoaoga faalefaavae? Ua valaaulia i tatou e Peresitene Russell M. Nelson ina ia “savavali soosoo tauau i lenei galuega paia … [ina ia] fesoasoani i le tapenaina o le lalolagi mo le Afio Mai Faalua o le Alii.” ¹⁹ A o tatou faia, o le a tatou aoao i le taua o sao taitasi a tagata ma le faateleina o le lelei lea tatou te faataunuu ai a tatou matafaioi paia. O le a tatou lagonaina le olioli sili nai lo le mea ua tatou oo i ai.

Ia tatou tofu filifili e lotogatasi i le ala musuia a le Alii e fesoasoani ai i Lana galuega ia agai i luma. I le suafa o lo tatou Faaola pele, o Iesu Keriso, amene.