Osana ma Aleluia—O Le Iesu Keriso Soifua: O Le Fatu lea o le Toefuataiga ma le Eseta

Uso e ma tuafafine pele: faatasi ai ma le osana ma le aleluia, tatou te faamanatuina ai le Iesu Keriso soifua i lenei vaitau o le faaauauina o le Toefuataiga ma le Eseta. Faatasi ai ma se alofa e atoatoa, ua faamautinoa mai i tatou e lo tatou Faaola: “Ia outou maua le manuia ia te a’u. E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”¹

I nai tausaga talu ai, a o ma feiloai atu ma Sister Gong i se aiga matagofie, sa ave ane ma le matamuli e lo la afafine talavou, o Ivy, le ato o lana vaiolini. Sa ia aumai i fafo le ’aū vaiolini, faamau ma ligi i ai le suauu. Ona ia toe tuu faalelei lea o le aū i le ato, ifoifo, ma nofo i lalo. O se ua faatoa amata, sa na ona ia faasoa mai o mea uma sa ia iloa e uiga i le vaiolini. I lenei taimi, i ni tausaga mulimuli ane, ua tataina ma le matagofie e Ivy le vaiolini.

Ata

Ivy ma lana vaiolini

I le vaitau o lenei soifuaga, e tai pei uma lava i tatou o Ivy ma lana vaiolini. Sa tatou amata i le amataga. O le faataitai ma le punoua’i, tatou te tuputupu ae ai ma faaleleia. I le aluga o taimi, e fesoasoani le faitalia e iloa ai ma aafiaga i le olaga nei tatou te avea atili ai e pei o lo tatou Faaola a o tatou galulue faatasi ai ma Ia i Lona tovine² ma mulimuli i Lona ala o feagaiga.

O aso faamanatu, e aofia ai lenei seneturi lona lua, ua fesoasoani tatou te manatua ai mamanu o le toefuataiga.³ I le faamanatuina ai o le Toefuataiga faifai pea o le talalelei a Iesu Keriso, ua tatou sauniuni ai foi mo le Eseta. O ia mea e lua, tatou te patipatia ai le toe foi mai o Iesu Keriso. O loo soifua o Ia—e le gata i lena taimi, ae o le taimi nei, e le mo na o ni isi, ae mo i tatou uma. Na afio mai o Ia ma e afio mai e faamalolo i e loto momomo, e talai le saolotoga i le tafeaga, ia pupula mata o e tauaso, ma tuu saoloto i e ua faasauaina.⁴ O i tatou uma lava. O Lana folafolaga togiola e faatatau, po o le a lava lo tatou taimi ua tuanai, lo tatou taimi nei, po o mea tatou te ono mafaufau i ai i lo tatou lumanai.

Ata

O le ulufale atu faatupu i Ierusalema

O a Taeao o le Aso Sa o le Lau Pama. I se tulaga masani ai, o lau pama o se faatusa paia e faaalia ai le olioli i lo tatou Alii, e pei o le Ulufale Atu Faatupu o Keriso i Ierusalema, lea sa “ave e tagata … lau o pama, ma o mai e faafetaiai ia te ia.”⁵ (Atonu e te fiafia i le iloaina o le uluai ata lenei a Harry Anderson o loo tautau i le ofisa o Peresitene Russell M. Nelson, i tua ae o lana kesi.) I le tusi o Faaaliga, o i latou e vivii ae i le Atua ma le Tamai Mamoe latou te faia a o loo “ofu i ofu sisina, ua i ai foi lau pama i o latou lima.”⁶ Faatasi ai ma “ofutalaloa o le amiotonu” ma “pale o le mamalu,” sa aofia ai lau pama i le tatalo o le faapaiaga o le Malumalu o Katelani.⁷

Ioe, o le taua o le Aso Sa o le Lau Pama e maotua atu i lo le motu o tagata e faafetaia’ia Iesu i lau pama. O le Aso Sa o le Lau Pama, sa afio atu ai Iesu i Ierusalema i ala na aloaia ai e le au faatuatua le faataunuuga o le valoaga. E pei ona sa muai ta’u mai faavaloaga e Sakaria⁸ ma le fai Salamo, sa afio atu lo tatou Alii i Ierusalema o tietie i se tamai asini a o alalaga le motu o tagata ma le iloa lelei “Osana i mea e aupito a luga.”⁹ Osana o lona uiga “faasao nei.”¹⁰ O lena taimi, e faapei o le asō, tatou te vivii ae, “Ia manuia le o maliu mai i le suafa o Ieova.”¹¹

O se vaiaso na sosoo ma le Aso Sa o le Lau Pama, o le Aso Sa o le Eseta. Ua aoao mai e Peresitene Russell M. Nelson e faapea na “afio mai [Iesu Keriso] e totogi se aitalafu Na te lei faia auā sa tatou nofo aitalafu i se aitalafu sa le mafai ona tatou totogia.”¹² E moni lava, e ala i le Togiola a Keriso, “e mafai ai ona faaolaina tagata uma, e ala i le usiusitai i tulafono ma sauniga o le Talalelei.”¹³ I le Eseta, tatou te lagiina ai le aleluia. Aleluia o lona uiga “ia viia oe le Alii o Ieova.”¹⁴ O le “Hallelujah Chorus” i le fatuga a Handel o le Messiah o se tautinoga matagofie o le Eseta e faapea o Ia o le “Tupu o Tupu, ma le Alii o Alii.”¹⁵

O mea paia na tutupu i le va o le Aso Sa o le Lau Pama ma le Aso Sa o le Eseta o le tala i le osana ma le aleluia. O le Osana o la tatou aioiga i le Atua ia faasao i tatou. O le Aleluia o loo ta’u atu ai le viiga ma le faafetai i le Alii mo le faamoemoe ua i ai i le faaolataga ma le faaeaga. I le osana ma le aleluia tatou te aloaia ai le Iesu Keriso soifua o le fatu o le Eseta ma le toefuataiga i aso e gata ai.

O le toefuataiga i aso e gata ai e amata i le teofani—o le faaali tino mai lea o le Atua le Tama ma Lona Alo, o Iesu Keriso, i le perofeta talavou o Iosefa Samita. Sa saunoa le Perofeta o Iosefa, “A mafai ona e vaai atu i le lagi mo le lima minute, o le a sili atu lou iloa nai lo lou faitauina o mea uma lava ua tusia faatatau i le matupu.”¹⁶ Ona ua toe tatala mai le lagi, o lea ua tatou iloa ai ma “talitonu i le Atua, le Tamā Faavavau, ma Lona Alo, o Iesu Keriso, ma le Agaga Paia”¹⁷—o le Aiga Atua paia.

I le Aso Sa o le Eseta i le aso 3 Aperila, 1836, i ona popofou o le Toefuataiga, sa faaali mai ai le Iesu Keriso soifua ina ua mavae le faapaiaina o le Malumalu o Katelani. O i latou sa vaai ia te Ia iina, na molimau e uiga ia te Ia i eseesega logolelei o le afi ma le vai: “O ona fofoga sa pei o se afi mumū; o lauao o lona ao sa papa’e e pei o le kiona mamā; o ona fofoga sa susulu e sili atu i lo pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova.”¹⁸

I lena vaaiga, na malele mai ai lo tatou Faaola, “O A’u o lē muamua ma lē mulimuli; o Aʼu o lē o ola, o Aʼu o lē na fasia; o Aʼu o lo oulua fautua i le Tamā.”¹⁹ Ua toe ta’ua foi eseesega logomalie—muamua ma le mulimuli, ola ma le fasiotia. O Ia o le Alefa ma le Omeka, o Ia o le amataga ma le gataaga,²¹ o le mataisau ma le faatini o lo tatou faatuatua.²¹

Ina ua mavae le afio mai o Iesu Keriso, na o mai foi Mose, Elaia, ma Elia. E ala i le taitaiga mai luga, na toefuatai mai ai e nei perofeta maoae anamua ia ki ma le pule o le perisitua. O lea la, “ua toe tuuina mai ai ki o lenei tisipenisione”²² i totonu o Lana Ekalesia toefuataiina e faamanuiaina ai fanau uma a le Atua.

O le oo mai o Elia i le Malumalu i Katelani ua faataunuuina ai foi le valoaga a le Perofeta o le Feagaiga Tuai o Malaki e faapea o le a toe foi mai Elia “a o lei oo mai le aso o Ieova e sili, ma le matautia.”²³ O le faia o lea, na fetaui tonu le oo mai o Elia, e ui e lei faafuaveta, ma le vaitau o le Paseka FaaIutaia o le agamasani e faatalitali ai ma le migao i le toe foi mai o Elia.

E toatele aiga lotu o Iutaia e faaavanoaina se nofoa mo Elia ia latou la’o’ai o le Paseka. E toatele e faatumuina se ipu e oo i le augutu e valaaulia ai ma faafeiloai atu ia te ia. Ma o ni isi, i le taimi o le Tausamiga o le Paseka, e auina atu ai se tamaitiiti i le faitotoa, o ni isi taimi e tatala faa’afa ai le faitotoa, e vaai ai pe o faatalitali i fafo Elia e faaafe atu i totonu.²⁴

I le faataunuuga o le valoaga ma e avea o se vaega o le toefuataiga na folafola mai o mea uma,²⁵ na sau Elia e pei ona sa folafolaina mai, i le Eseta ma le amataga o le Paseka. Na ia aumaia le pule o faamauga e fusia faatasi ai aiga i le lalolagi ma i le lagi. E pei ona aoaoina ai e Moronae le Perofeta o Iosefa, “o le a totoina [e Elia] i loto o fanau folafolaga na faia i tamā, ma o le a liliu atu loto o fanau i o latou tamā. Afai e lē faapea,” na toe ta’ua e Moronae, “o le a faaumatia atoa le lalolagi i le afio mai [o le Alii].”²⁶ O le agaga o Elia, o se faaaliga mai o le Agaga Paia, e tosina atu ai i tatou i o tatou augatupulaga—i le taimi tuanai, o le taimi nei, ma le lumanai—i o tatou gafa, talafaasolopito, ma galuega i malumalu.

Se’i o tatou toe tomanatu vave i le mea e faatusa i ai le Paseka. O le Paseka e faamanatu ai le faasaolotoina o le fanauga a Isaraelu mai le 400 tausaga o le nofopologa. O loo faamatala mai e le tusi o Esoto le ala na oo mai ai lea faasaolotoina ina ua mavae mala o rane, ‘utu, garova, o le mamate o povi, o ma’i fulafula, uato’a ma le afi, o se akerise, ma le pouliuli tele. O le toe mala na faamatauina ai i le fasiotia o ulumatua i le laueleele ae lei afaina fale o le aiga o Isaraelu pe afai—e tuuina e na aiga le toto o se tamai mamoe ulumatua o le lafu e lē pona i luga o uapou o o latou faitotoa.²⁷

Na laaloa e le agelu o le faafanoga ia fale sa faailoga i le toto faatusatusa o le tamai mamoe.²⁸ O lena laaloa, po o le sopo loa, e faatusa i le faatoilaloina moni e Iesu Keriso o le oti. E moni, o le toto togiola o le Tamai Mamoe a le Atua ua tuuina atu ai i le Leoleo Mamoe Lelei le mana e faapotopoto ai Lona nuu i nofoaga uma ma tulaga uma i le saogalemu o Lana lafu i itu uma o le veli.

E ofoofogia, le faamatalatalaina e le tusi a Mamona o le “mana ma le toetu o Keriso”²⁹—o le fatu lea o le Eseta—i tulaga o toefuataiga e lua.

Muamua, o le toefuataiga e aofia ai le toefuataiga faaletino o lo tatou “autino tatau ai ma atoatoa”; o “[vae] ma sooga uma,” “e oo i se lauulu o le ulu o le a le leiloa.”³⁰ O lea folafolaga ua maua ai le faamoemoe e i latou o e ua leai ni aao; o e ua le mafai ona pupula, faalogo, pe savavali; po o e ua manatu ua leiloloa i faama’i ogaoga, faama’i o le mafaufau, po o isi gafatia ua faaitiitia. Na te sueina i tatou ia maua. Na te faaatoatoaina i tatou.

O se folafolaga o le Eseta ma le Togiola a lo tatou Alii e faapea, i le faaleagaga, “o le a toefuataia mea uma i o latou tulaga e tatau ai.”³¹ O lea toefuataiga faaleagaga e atagia mai ai a tatou galuega ma manaoga. E pei o le areto i luga o le vai,³² e na te toefuatai “le mea ua lelei,” “o le amiotonu,” “le mea ua tonu,” ma le “alofa mutimutivale.”³³ E leitioa faaaoga e le perofeta o Alema le upu toefuatai faa-22³⁴ a o ia tatou “fai mea tonu, faamasino ma le amiotonu, ma fai mea lelei e le aunoa.”³⁵

Talu ai “ua togiola ai e le Atua lava ia mo agasala a le lalolagi,”³⁶ ua mafai ai e le Togiola a le Alii ona toefuatai mai e le gata i mea sa i ai a o mea foi e mafai ona i ai. Talu ai Na te silafia o tatou tiga, mafatiaga, ma’i, o tatou “faaosoosoga o ituaiga uma,”³⁷ e mafai e Ia, faatasi ma le alofa mutimutivale, ona fesoasoani ia i tatou i o tatou vaivaiga.³⁸ Talu ai o le Atua o le “Atua ua atoatoa, faamasinotonu, ma se Atua alofa mutimutivale foi,” e mafai e le fuafuaga o le alofa ona “faamalie ai manaoga o le faamasinotonu.”³⁹ Tatou te salamo ma faia mea uma tatou te mafaia. Na te siosiomia i tatou e faavavau “i aao o lona alofa.”⁴⁰

Ua tatou faamanatuina i le asō le toefuataiga ma le toetu. Faatasi ma outou, ou te faamanu i le Toefuataiga faifai pea o le atoatoaga o le talalelei a Iesu Keriso. E pei ona amatalia i le 200 tausaga talu ai i le tautotogo lenei, o loo faaauau pea ona oo mai le malamalama ma faaaliga e ala mai i le perofeta soifua a le Alii ma Lana Ekalesia ua faaigoa i Lona suafa—O Le Ekalesia a Iesu Keriso o le Au Paia o Aso e Gata Ai—ma e ala mai i faaaliga patino ma musumusuga e ala i le meaalofa ofoofogia a le Agaga Paia.

Faatasi ma outou, i lenei vaitau o le Eseta, ou te molimau atu i le Atua, lo tatou Tama e Faavavau, ma Lona Alo Pele, o Iesu Keriso soifua. O tagata ola na faasatauroina mataga ma sa toetutu mulimuli ane. Ae na o le Iesu Keriso soifua lava i Lona tino na toetu atoatoa mai ai o loo iloga ai pea faailoga o le faasatauroga i Lona lima, vae ma Lona itu. Ua na o Ia lava e mafai ona fetalai, “Ua Ou togitogia oe i luga o alofilima o o’u lima.”⁴¹ Ua na o Ia e mafai ona fetalai: “O A’u o lē na sii a’e i luga. O A’u o Iesu o le na faasatauroina. O A’u o le Atalii o le Atua.”⁴²

E faapei o le teineitiiti o Ivy ma lana vaiolini, o loo tatou aoao pea lava i ni nai itu. E moni, “o mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.”⁴³ I nei taimi, e mafai ona tatou aoaoina le tele o le agalelei o le Atua ma lo tatou gafatia paia mo le alofa o le Atua e tuputupu a’e i totonu o i tatou a o tatou sailia o Ia ma aapa atu i le tasi ma le isi. I auala fou ma nofoaga fou, e mafai ona tatou faia ma avea ai, i lea fuaiupu ma lea fuaiupu, lea agalelei ma lea agalelei, taitoatasi ma tuufaatasi.

Uso e ma tuafafine pele i soo se mea, a o tatou mafuta ma tatou aoao faatasi, ua faatumuina a’u i lo outou faatuatua ma le agalelei i se lagona o le sagisagi fiafia ma le lotofaafetai i le talalelei. O lau molimau ma lau malaga fai i le talalelei ua faamauoaina ai la’u molimau ma la’u foi malaga fai i le talalelei. O ou atugaluga ma olioliga, o lou alofa mo le aiga o le Atua ma le nuu o le Au Paia, ma lou malamalama ola i upu moni toefuatai ma le malamalama ua faateleina ai lo’u atoaga i le talalelei toefuataiina, faatasi ai ma le Iesu Keriso soifua i lona fatu. Faatasi ai tatou te faatuatuaina, “i mala, i manu, Iesu, afio mai.”⁴⁴ Ua tatou iloaina faatasi, i le lotolotoi o a tatou avega ma popolega, e mafai ona tatou faitauina o tatou manuia e tele.⁴⁵ I faʻamatalaga o aso taitasi ma mea laiti ma faigofie, e mafai ona tatou vaʻai i mea tetele na tutupu i o tatou olaga.⁴⁶

“Ma o le a oo mai o le a faapotopoto mai e e amiotonu i fafo mai i atunuu uma, ma o le a o mai i Siona, ma pepese i pese o le olioli e tumau-faavavau.”⁴⁷ I lenei vaitau o le osana ma le aleluia, pepese aleluia—auā o le a nofotupu o Ia e faavavau ma faavavau lava! Alalaga osana i le Atua ma le Tamai Mamoe! I le suafa paia ma le mamalu o Iesu Keriso, amene.