O Le Perisitua Mekisateko ma Ki

Ua ou filifili e talanoa atu atili e uiga i le perisitua a le Atua, o le mataupu ua uma ona saunoa i ai ia failauga e toatolu na muamua atu o ē sa a’oa’oina i tatou e uiga i le ala e faamanuiaina ai e le perisitua ia olaga o tamaitai, tamaitai talavou, ma alii talavou.

O le perisitua o se mana ma le pule paia a le Atua e umia ona ua faatuatuaina, e faaaoga mo le galuega a le Atua mo le manuia o Ana fanau uma. O le Perisitua e le o i latou ua faauuina i se tofi o le perisitua po o i latou o ē faaaogaina lana pule. O alii o loo umiaina le perisitua e le o le perisitua. E ui e le tatau ona tatou faasino atu i alii ua faauuina o i latou o le perisitua, ae e talafeagai le faasino ia i latou o ē umia le perisitua.

O le mana o le perisitua e i ai uma i le Ekalesia ma i le faalapotopotoga o le aiga. Peitai o le mana o le perisitua ma le pule o le perisitua e faaaoga eseese i le Ekalesia nai lo totonu o le aiga. O nei mea uma ua faia e tusa ai ma mataupu faavae sa faatuina e le Alii. O le faamoemoega o le fuafuaga a le Atua o le taitai atu o Ana fanau i le ola e faavavau. O aiga i le olaga nei e taua i lena fuafuaga. Ua i ai le Ekalesia e aumaia le aoaoga faavae, o le pule, ma sauniga e tatau ai ia faaauau ai sootaga faaleaiga i le faavavau. O lea, o le faalapotopotoga faaleaiga ma le Ekalesia a Iesu Keriso, e i ai se sootaga fefaamalosia’i o le tasi ma le isi. O faamanuiaga o le perisitua—e pei o le atoatoaga o le talalelei ma sauniga e pei o le papatisoga, faamauga ma le mauaina o le meaalofa o le Agaga Paia, faaeega paia o le malumalu, ma le faaipoipoga e faavavau—o loo avanoa mo alii faapea foi tamaitai.¹

O le perisitua o loo tatou talanoa ai nei o le Perisitua Mekisateko, na toefuatai mai i le amataga o le Toefuataiga o le talalelei. Sa faauuina Iosefa Samita ma Oliva Kaotui e Peteru, Iakopo, ma Ioane, o ē na ta’utino maia i la’ua lava “o loo umiaina ki o le malo, ma le tisipenisione o le atoaga o taimi” (Mataupu Faavae ma Feagaiga 128:20). O nei Aposetolo sinia na mauaina lena pule mai le Faaola lava Ia. O isi pule uma po o tofi i le perisitua o ni faaopoopoga i le Perisitua Mekisateko (tagai i le Mataupu Faavae ma Feagaiga 107:5), aua na te “umia le aiā o le pulefaamalumalu, ma ua i ai le mana ma le pule i luga o tofi uma i le ekalesia i tupulaga uma o le lalolagi” (Mataupu Faavae ma Feagaiga 107:8).

I totonu o le Ekalesia, o le pule o le perisitua e sili atu, o le Perisitua Mekisateko, ma o le Perisitua Arona e maualalo ifo e faaaoga i lalo o le taitaiga a se taitai perisitua, e pei o se epikopo po o se peresitene, o lē e umia ki o lena perisitua. Ina ia malamalama i le faaaogaina o le pule o le perisitua i le Ekalesia, e tatau ona tatou malamalama i le mataupu faavae o ki o le perisitua.

O ki o le Perisitua Mekisateko o le malo sa faaee mai e Peteru, Iakopo, ma Ioane, ae e le’i mae’a ai le toefuataiga mai o ki o le perisitua. O nisi o ki o le perisitua na oo mai mulimuli ane. Ina ua mae’a le faapaiaga o le uluai malumalu o lenei tisipenisione i Katelani, Ohaio, e toatolu perofeta—Mose, Elaia, ma Elia—na toefuatai maia “ki o le tisipenisione lenei,” e aofia ai ki e faatatau i le faapotopotoina o Isaraelu ma le galuega o malumalu o le Alii (tagai i le Mataupu Faavae ma Feagaiga 110), e pei ona faatoa faamatalaina atu ma le faatauanau e Peresitene Eyring.

O le faataitaiga sili ona masani ai i le faaaogaina o ki o loo maua i le faatinoga o sauniga o le perisitua. O se sauniga o se faatinoga paia, e faailo mai ai le osiga o feagaiga ma le folafolaina mai o faamanuiaga. I totonu o le Ekalesia, o sauniga uma e faatino i lalo o le faatagaga a le taitai perisitua o loo umiaina ki mo lena sauniga.

O se sauniga e masani ona faatinoina e tagata ua uma ona faauuina i se tofi i le perisitua, e faia i lalo o le taitaiga a lē o umiaina ki o le perisitua. Mo se faataitaiga, o ē umia tofi eseese o le Perisitua Arona, latou te taitai i le sauniga o le faamanatuga i lalo o ki ma le taitaiga a le epikopo, o lē e umiaina ki o le Perisitua Arona. O lea lava foi mataupu faavae e tasi e faatatau i sauniga o le perisitua ia e taitai ai tamaitai i totonu o le malumalu. E ui e lē umia e tamaitai se tofi i le perisitua, ae latou te faatinoina sauniga paia o le malumalu i lalo o le faatagaga a le peresitene o le malumalu, o lē e umiaina ki mo sauniga o le malumalu.

O se isi faataitaiga o le pule o le perisitua i lalo o le taitaiga a lē o umiaina ki, o aoaoga a alii ma tamaitai e valaauina e a’oa’o atu le talalelei, pe o ni vasega i a latou uarota masani po o le galuega faamisiona. O isi faataitaiga o i latou e umiaina tofiga faaleautaitai i le uarota ma faaaoga le pule o le perisitua ia latou taitaiga, ona o o latou valaauga ma i lalo o le vaetofiaina ma le taitaiga a le taitai perisitua o loo umiaina ki i le uarota po o le siteki. O le auala lenei e faaaoga ai le pule ma le mana o le perisitua ma sapi ai i Le Ekalesia a Iesu Keriso o le Au Paia o Aso e Gata Ai.²

E faaaogaina foi le pule o le perisitua ma e vaaia ona faamanuiaga i aiga o le Au Paia o Aso e Gata Ai. A ta’u aiga o lona uiga o se alii e umia le perisitua ma se tamaitai ua faaipoipo ma a la fanau. Ou te faaaofiaina ai foi suiga eseese mai mafutaga silisili e afua mai le maliu po o le tatala o faaipoipoga.

O le mataupu faavae e faapea o le pule o le perisitua e faatoa mafai ona faaaoga i lalo o le taitaiga a lē o loo umiaina ki mo lena matafaioi e taua tele i le Ekalesia, ae e le faatatau lea i totonu o le aiga. Mo se faataitaiga, o se tama e pulefaamalumalu ma faaaogaina le perisitua i lona aiga e ala i le pule o le perisitua o loo ia umiaina. Na te lē tau manaomia le taitaiga po o le faamaoniga a se tasi o umiaina ki o le perisitua ina ia mafai ai ona faatino ana matafaioi eseese faaleaiga. O nei mea e aofia ai le fautuaina o tagata o lona aiga, faia o fonotaga faaleaiga, tuuina atu faamanuiaga faaleperisitua i lona toalua ma le fanau, pe tuu atu foi ni faamanuiaga o faamalologa i tagata o le aiga po o isi.³ E a’oa’o atu e taitai o le Ekalesia ia tagata o aiga ae latou te le faatonuina le faaaogaina o le pule o le perisitua i totonu o le aiga.

O lea lava foi mataupu faavae e faaaoga pe a leai se tama ae o le tina o le taitai o le aiga. E pulefaamalumalu o ia i lona aiga ma o se meafaigaluega o ia i le aumaia o le mana ma faamanuiaga o le perisitua i totonu o lona aiga e ala i ona faaeega paia ma faamauga i le malumalu. E ui ina le faatagaina o ia e tuuina atu faamanuiaga faaleperisitua ia e na o se tagata o umiaina se tofi patino i le perisitua e tuuina atua, ae mafai ona ia faatinoina isi matafaioi uma po o le taitaiga faaleaiga. O le faia o lena mea na te faaaogaina ai le mana o le perisitua mo le manuia o le fanau o loo ia pulefaamalumalu ai i lona tulaga faaletaitai i totonu o le aiga.⁴

Afai o le a faalauteleina e tamā lo latou perisitua i totonu o o latou lava aiga, o le a faalauteleina le misiona a le Ekalesia e pei o le tele o isi mea uma e mafai ona latou faia. O tama o e umia le Perisitua Mekisateko e tatau ona faaaogaina la latou pule e ala “i le faatauanau, i le tali-tiga, i le agamaualalo ma le agamalu, ma le alofa faamaoni” (Mataupu Faavae ma Feagaiga 121:41). O lena tulaga faatonuina maualuga mo le faaaogaina uma o le pule o le perisitua e aupito sili ona taua i totonu o le aiga. O i latou o loo umiaina le perisitua e tatau foi ona tausia poloaiga ina ia latou maua le mana o le perisitua e tuu atu ai faamanuiaga i tagata o o latou aiga. E tatau ona latou faafaileleina sootaga alofa faaleaiga ina ia mananao ai tagata o le aiga e talosaga atu i o latou tamā mo ni faamanuiaga. Ma e tatau i matua ona uunaia ni faamanuiaga faaleperisitua se tele atu i totonu o le aiga.⁵

I nei sauniga faalekonafesi, a o tatou saili atu i sina malutaga mai i o tatou popolega faaletino i se faama’i pipisi faataumaoi, ua a’oa’oina i tatou i mataupu faavae maoae o le faavavau. Ou te uunaia i tatou taitoatasi ia “tautasi” o tatou mata i le mauaina o nei upumoni o le faavavau ina ia mafai e o tatou tino ona “tumu … i le malamalama” (3 Nifae 13:22).

I Lana lauga i le motu o tagata o loo tusia i le Tusi Paia ma i le Tusi a Mamona, sa a’oa’o atu ai e le Faaola e faapea e mafai ona faatumuina tino faaletino i le malamalama pe faatumuina i le pouliuli. O le mea moni, tatou te mananao foi ia faatumuina i le malamalama, ma sa a’oa’oina i tatou e le Faaola i le ala e mafai ai ona tupu lenei mea. E tatau ona tatou faalogo i savali e uiga i upumoni o le faavavau. Sa Ia faaaogaina le faataitaiga o o tatou mata, ia tatou te tuuina ai le malamalama i o tatou tino. Afai “e tautasi” o tatou mata—i se isi faaupuga afai tatou te gauai atu i le taliaina o le malamalama e faavavau ma le atamai—sa Ia faamatala mai, “o le a tumu lou tino atoa i le malamalama” (Mataio 6:22; 3 Nifae 13:22). Ae afai e “leaga [o tatou] mata”—o lona uiga, afai tatou te vaavaai mo mea leaga ma tuuina i o tatou tino—na Ia lapatai mai, “o le a tumu lou tino atoa i le pouliuli” (fuaiupu 23). I se isi faaupuga, o le malamalama po o le pouliuli i o tatou tino e faalagolago i le ala tatou te vaai ai—pe taliaina ai—upumoni e faavavau o loo a’oa’oina ai i tatou.

E tatau ona tatou mulimuli i valaaulia a le Faaola ia saili ma ōle atu ia malamalama i upumoni o le faavavau. Ua Ia folafola mai o loo finagalo lo tatou Tama i le Lagi e a’oa’o tagata uma i upumoni latou te sailia (tagai i le 3 Nifae 14:8). Afai tatou te mananao i lena mea ma tautasi o tatou mata ia mauaina, ua folafola mai le Faaola e faapea o upumoni o le faavavau “o le a tatala mai” ia i tatou (tagai i le 3 Nifae 14:7–8).

I se isi itu, ua naunau Satani e faafenumia’i o tatou mafaufauga pe taitai sese i tatou mai mataupu taua e pei o le faagaoioiga o le perisitua a le Atua. Sa lapatai mai le Faaola e uiga i na “perofeta pepelo, o e e o mai ia te outou i ofu faamamoe, ae i totonu o luko feai lava i latou. (3 Nifae 14:15). Na Ia tuuina mai ia te i tatou lenei suega e fesoasoani ai ia tatou filifili le upumoni mai aoaoga eseese e ono faafenumiai ai i tatou: “O le a outou iloa i latou i o latou fua,” na Ia a’oa’o mai ai (3 Nifae 14:16). “E le mafai i le laau lelei ona fua mai i fua leaga, e le [mafai] foi i le laau leaga ona fua mai i fua lelei.” (fuaiupu 18). O le mea lea, e tatau ai ona tatou vaavaai i taunuuga—“o fua”—o mataupu faavae ua a’oa’o mai ma tagata o loo a’oa’oina mai. O le tali aupito sili lena i le tele o le tetee tatou te faalogo i ai e faasaga i le Ekalesia ma ona aoaoga faavae ma aiaiga faavae ma le taitaiga. Mulimuli i le suega ua a’oa’o mai e le Faaola. Vaavaai i fua—o taunuuga.

Pe a tatou mafaufau i fua o le talalelei ma le Ekalesia toefuataiina a Iesu Keriso, tatou te olioli i le ala ua faalauteleina ai le Ekalesia, i le soifuaga o ona tagata soifua, mai i aofia i le lotoifale i atumauga i Sisifo e oo atu i mea o nonofo ai le toatele o ona tagata e silia ma le 16 miliona i atunuu e ese mai le Iunaite Setete. Faatasi ma lena tuputupu a’e, ua matou lagonaina le faatelega o le gafatia o le Ekalesia e fesoasoani atu i ona tagata. Tatou te fesoasoani atu i le tausiga o poloaiga, i le faataunuuina o tiutetauave e tala’i atu le talalelei toefuataiina, i le faapotopotoina o Isaraelu, ma i le fauina o malumalu i le lalolagi atoa.

O loo taitaia i tatou e se perofeta, Peresitene Russell M. Nelson, o lana taitaiga ua faaaogaina e le Alii e ausia ai le alualu i luma ua tatou lagonaina i le silia ma le lua tausaga atoa o lana taitaiga. O le a faamanuiaina nei i tatou e faalogologo atu ia Peresitene Nelson, o lē o le a a’oa’oina i tatou i le auala e faalauteleina atili ai lo tatou alualu i luma i lenei Ekalesia toefuataiina a Iesu Keriso i nei taimi faigata.

Ou te molimau atu i le moni o nei mea, ma aufaatasi ma outou e tatalo mo lo tatou perofeta, o lē o le a tatou faalogologo atu nei i ai, i le suafa o Iesu Keriso, amene.