O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga
O faaaliga faifai pea ua maua ma o loo maua pea e ala mai i auala ua faavaeina e le Alii.
O le asō o le a ou lauga atu ai i faaaliga faifai pea i perofeta ma faaaliga faifai pea faaletagata lava ia e taiala ai o tatou olaga.
O nisi taimi tatou te maua ai faaaliga e tusa lava pe tatou te le iloaina ia faamoemoega o le Alii. A o le’i valaauina Elder Jeffrey R. Holland e avea ma se Aposetolo ia Iuni o le 1994, sa ou maua se aafiaga faafaaaliga matagofie o le a valaauina o ia. Sa avea a’u ma se sui lisone ma sa leai se mafuaaga o le a ou maua ai lena malamalama. Ae sa avea i ma’ua ma ni soa a o avea ma faifeautalai talavou i Egelani i le amataga o le vaitau 1960, ma ou te alofa tele mo ia. Sa ou manatu i lea aafiaga o se alofa mutimutivale agamalu mo a’u. I nai tausaga talu ai nei, sa ou mafaufau ai pe sa sauniaina a’u e le Alii ia avea ma se soa laitiiti i le Toasefululua i se soa maoae faafaifeautalai sa avea ma a’u soa laitiiti a o avea ma’ua ma ni faifeautalai talavou.1 O nisi taimi ou te lapataia ai faifeautalai talavou ia agalelei i a latou soa laiti ona latou te le iloa lava le taimi e ono avea ai i latou ma a latou soa sinia.
E i ai sa’u molimau mausali o lenei Ekalesia toefuataiina o loo taitaia e lo tatou Faaola, o Iesu Keriso. E silafia e Ia po o ai e valaauina e avea ma Ana Aposetolo ma po o le a foi le faasologa e valaau ai i latou. E silafia foi e Ia le auala e saunia ai Ana Aposetolo sinia e avea ma perofeta ma Peresitene o le Ekalesia.
Ua faamanuiaina i tatou i lenei taeao e faalogo atu i lo tatou perofeta pele, Peresitene Russell M. Nelson, na fofogaina se folafolaga loloto o le faamanatuina o le lua seneturi i le lalolagi e faatatau i le Toefuataiga o le atoatoaga o le talalelei a Iesu Keriso.2 O lenei tautinoga mamana a Peresitene Nelson ua faamanino mai ai e faapea o le Ekalesia a Iesu Keriso ma lona tupuaga, ola, ma le ala e agai i ai mo le lumanai ua taula atoa i le mataupu faavae o faaaliga faifai pea. O le folafolaga fou ua fai ma faatusa o fesootaiga a se Tama alofa i Lana fanau.
I se aso ua leva atu, sa faailoa mai ai e Peresitene Spencer W. Kimball ni lagona ia o loo ia te a’u i le asō. Na ia ta’ua: “E ui lava i mea uma … ae e tatau ona sili atu lo tatou agaga faafetai i le aso [mo] ona o le tatalaina mai pea o le lagi, ma o le Ekalesia toefuataiina a Iesu Keriso ua faavaeina i luga o le papa o faaaliga. E moni lava o faaaliga faifai pea o le toto ola lea o le talalelei a le Alii ma le Faaola soifua o Iesu Keriso.”3
Na muai vaai le perofeta o Enoka i aso ua tatou ola ai nei. Sa faailoa atu e le Alii ia Enoka le amioleaga tele o le a matua salalau ma valoia mai “puapuaga e tele” o le a tutupu. Ae ui i lea, sa folafola mai e le Alii, “ae o lo’u nuu o le a Ou faasaoina.”4 “Ma o le a Ou auina atu i lalo mai le lagi le amiotonu; ma o le a Ou auina atu le upumoni i fafo mai le eleele, e molimau atu i la’u Toatasi na Fanaua.”5
Sa a’oa’o mai Peresitene Ezra Taft Benson ma le mana tele e faapea o le Tusi a Mamona, le ma’a’au’au o le tatou tapuaiga, na sau i fafo mai le eleele i le faataunuuga o le fetalaiga a le Alii ia Enoka. O le Tama ma le Alo ma agelu ma perofeta na faaali atu i le Perofeta o Iosefa Samita na “faatonuina e le lagi e toefuatai mai mana e tatau ai i le malo.”6
Na maua e le Perofeta o Iosefa Samita lea faaaliga ma lea faaaliga. O nisi [o ia faaaliga] ua uma ona talanoaina i lenei konafesi. E tele faaaliga na maua e le Perofeta o Iosefa ua faasaoina mo i tatou i totonu o le Mataupu Faavae ma Feagaiga. O tusitusiga faavae uma o le Ekalesia o loo i ai le mafaufau ma le finagalo o le Alii mo i tatou i lenei tisipenisione mulimuli.7
E faaopoopo atu i nei tusitusiga paia faavae maoae, ua faamanuiaina i tatou i faaaliga faifai pea i perofeta soifua. O perofeta o “sui tofia o le Alii, ua faatagaina e saunoa mo Ia.”8
O nisi faaaliga e matua ma’eu le taua, ma o isi e faaleleia ai lo tatou malamalama i upumoni paia taua ma maua ai le taiala mo o tatou aso.9
Tatou te matua faafetai tele mo le faaaliga ia Peresitene Spencer W. Kimball na faasafua atu ai le perisitua ma faamanuiaga o le malumalu i alii agavaa uma o le Ekalesia i le aso 8 o Iuni, 1978.10
Ua ou auauna faatasi ma le toatele o le Toasefululua sa i ai ma auai i le taimi na maua ai lena faaaliga taua. Sa faamautu mai e i latou taitoatasi, i talanoaga patino, le taitaiga mamana faaleagaga ma le autasi na latou oo i ai ma Peresitene Kimball. E toatele na fai mai o le faaaliga pito sili lea ona mamana na latou mauaina talu mai lena taimi.11
O i matou o loo auauna atu i le taimi nei i le Korama a Aposetolo e Toasefululua ua faamanuiaina i o matou aso a o oo mai faaaliga taua e ala mai i perofeta o i ai nei.12 Ua avea Peresitene Russell M. Nelson ma se sui tofia o le Alii aemaise e faatatau i faaaliga e fesoasoani ai i aiga ia fausia ni malutaga o le faatuatua i o latou fale, faapotopoto Isaraelu ua faataapeapeina i itu uma e lua o le veli, ma faamanuia tagata ua maua faaeega paia i mataupu tau i sauniga paia o le malumalu.
Ina ua faasilasila mai suiga taua ina ia faamanuia ai o tatou aiga i le konafesi aoao ia Oketopa 2018, ou te molimau atu “i fonotaga a le Aufono a le Au Peresitene Sili ma le Korama a Aposetolo e Toasefululua i totonu o le malumalu, … i le mavae ai ona aioi atu o lo tatou perofeta pele i le Alii mo se faaaliga … , sa maua ai se faamautinoaga mamana e uso uma.”13
I lena taimi, o isi faaaliga e fesootai i sauniga paia o le malumalu na mauaina ae sa le’i faasilasilaina pe faatinoina.14 O lenei taiala sa amatalia i faaaliga faaperofeta patino ia Peresitene Russell M. Nelson ma faamautinoaga agamalu ma mamana ia i latou e auai i le faagasologa. Sa faaauai patino e Peresitene Nelson ia tuafafine o loo pulefaamalumalu i faalapotopotoga a le Aualofa, Tamaitai Talavou, ma le Peraimeri. O le taiala faaiu, i totonu o le malumalu, i le Au Peresitene Sili ma le Korama a Aposetolo e Toasefululua sa matua faaleagaga ma mamana. Sa iloa e i matou taitoatasi sa matou mauaina le mafaufau, finagalo, ma le siufofoga o le Alii.15
Ou te tautino atu ma le paia atoa o faaaliga faifai pea ua maua ma o loo maua pea e ala mai i auala ua faavaeina e le Alii. Ou te molimau atu o le folafolaga fou na fofogaina e Peresitene Nelson i lenei taeao o se faaaliga e manuia ai tagata uma.
Matou te Tuu Atu se Valaaulia i Tagata Uma ia Taumamafa i le La’o’ai o le Alii
Matou te tautino atu foi lo matou naunautaiga faamaoni ina ia toe faatasia ma i latou o ē o loo tauivi ma a latou molimau, ua le toaaga, pe ua aveesea foi o latou suafa mai faamaumauga a le Ekalesia. Matou te mananao ia taumamafa faatasi ma outou, “i afioga a Keriso,” i le la’o’ai o le Alii, ia a’oa’o i mea e tatau ona faia e i tatou uma.16 Matou te manaomia outou! E manaomia outou e le Ekalesia! E manaomia outou e le Alii! O le matou tatalo faamaoni ia outou auai faatasi ma i matou i tapuaiga i le Faaola o le lalolagi. Matou te iloa o nisi o outou atonu na faatiga i ai, agaleagaina, po o isi amioga e le FaaKeriso. Matou te iloa foi o nisi o loo i ai ni luitau i lo latou faatuatua atonu e le o talisapaiaina atoatoa, malamalama i ai, pe foiaina foi.
O nisi o o tatou tagata sili ona faamaoni ma faatuatua ua mafatia i se luitau i lo latou faatuatua mo se vaitau. Ou te fiafia i le tala moni ia W. W. Phelps, o le na tuua le Ekalesia ma molimau e faasagatau i le Perofeta o Iosefa Samita i se fale faamasino i Misuri. Ina ua salamo, sa ia tusi atu ia Iosefa, “Ua ou iloa le tulaga ua ou i ai, ua e iloaina, ma ua silafia e le Atua, ma ou te manao ia laveaiina a’u pe afai e fesoasoani mai a’u uo ia te a’u.”17 Sa faamagalo o ia e Iosefa, ma toe faafaigaluegaina o ia, ma tusi atu i ai ma le agaalofa, “O uo sa i ai muamua ua toe uo foi i le faaiuga.”18
Uso e ma tuafafine, po o a lava ou tulaga, faamolemole ia iloa o le a toe talileleia e le Ekalesia ma ona tagata oe!
Faaaliga Faaletagata Lava Ia e Taialaina ai o Tatou Olaga
O loo avanoa faaaliga faaletagata lava ia i tagata uma e saili atu ma le lotomaualalo i le taitaiga mai le Alii. E taua foi e pei o faaaliga faaperofeta. O faaaliga faaleagaga faaletagata lava ia mai le Agaga Paia ua mauaina ai e le faitau miliona le molimau e manaomia ina ia papatisoina ai ma faamauina o ni tagata o Le Ekalesia a Iesu Keriso o le Au Paia o Aso e Gata Ai.
O faaaliga faaletagata lava ia o le faamanuiaga loloto lea e maua pe a maea le papatisoga i le taimi e “faapaiaina [ai tatou] i le taliaina o le Agaga Paia.”19 Ou te manatua se faaaliga faaleagaga faapitoa ina ua 15 o’u tausaga. Sa saili atu e lo’u uso pele se taitaiga mai le Alii pe faapefea ona tali atu i lo ma tamā pele, sa le manao e auauna atu lo’u uso i se misiona. Sa ou tatalo foi ma se faamoemoega faamaoni ma maua ai se faaaliga faaletagata lava ia o le moni a’ia’i o le talalelei.
O le matafaioi a le Agaga Paia
O faaaliga faaletagata lava ia e fua i upumoni faaleagaga e maua mai le Agaga Paia.20 O le Agaga Paia o le na te faaali mai ma molimau mai i upumoni uma, aemaise le moni o le Faaola. A aunoa ma le Agaga Paia, e le mafai ona tatou iloa moni o Iesu o le Keriso. O lana matafaioi taua tele o le molimau mai lea i le Tama ma le Alo ma o La faalagiga ma lo La mamalu.
E mafai e le Agaga Paia ona faatosinaina tagata uma i se ala mamana.21 O lenei faatosinaga o le a le tumau vagana ua papatisoina se tasi ma mauaina le meaalofa o le Agaga Paia. E avea foi le Agaga Paia ma se sui e faamama [i tatou] i le faagasologa o le salamo ma le faamagaloga.
E fesootai mai le Agaga i auala ofoofogia. Na faaaoga e le Alii lenei faamatalaga matagofie:
“O le a ou faaali atu ia te oe i lou mafaufau ma lou loto i le Agaga Paia, e oo atu ia te oe ma o le a tumau i lou loto.
O lenei, faauta, o le agaga lenei o faaaliga.”22
E ui o ona aafiaga e mafai ona matua mamana tele, ae tele lava ina sau filemu o se leo filemu ma itiiti.23 Ua aofia i tusitusiga paia le tele o faataitaiga o le auala e faatosinaina ai e le Agaga o tatou mafaufau, e aofia ai le fetalai mai o le fielmu i o tatou mafaufau,24 afio i o tatou mafaufau,25 faamalamalamaina o o tatou mafaufau,26 po o se leo i o tatou mafaufau.27
O nisi o mataupu faavae e sauniaina i tatou e maua faaaliga ua aofia ai:
-
Tatalo mo le taitaiga faaleagaga. I le faaaloalo ma le lotomaualalo e manaomia ai ona tatou saili atu ma ole atu28 ma ia onosai ma usitai.29
-
Saunia mo musumusuga. O lenei mea e manaomia ai lo tatou ogatasi ma a’oa’oga a le Alii ma ia tausisi i Ana poloaiga.
-
Taumafa ma le agavaa i le faamanatuga. A tatou faia lenei mea, ua tatou molimau atu ma osifeagaiga ma le Atua tatou te ave i o tatou luga le suafa o Lona Alo Paia ma e tatou te manatua pea o Ia ma tausi i Ana poloaiga.
O nei mataupu faavae e sauniaina i tatou ia maua, iloa, ma mulimuli i uunaiga ma le taitaiga a le Agaga Paia. Ua aofia i lenei mea ia “mea filemu … e maua ai le olioli [ma le] … ola e faavavau.”30
O le a matua faaleleia a tatou sauniuniga faaleagaga pe a tatou suesue e le aunoa i tusitusiga paia ma upumoni o le talalelei ma mafaufau loloto i o tatou mafaufau le taitaiga tatou te sailia. Ae manatua ina ia onosai ma faalagolago i le taimi a le Alii. O le taitaiga e aumai e se Alii silisili ese pe a Ia “filifili ma le loto i ai e a’oa’o i tatou.”31
Faaaliga i o Tatou Valaauga ma Tofiga
O le a tuuina mai foi e le Agaga Paia faaaliga i o tatou valaauga ma tofiga. I lo’u aafiaga, o le taitaiga faaleagaga taua e tele ina oo mai pe a tatou taumafai e faamanuia isi i le faataunuuina o o tatou tiutetauave.
Ou te manatua a o avea ma se epikopo talavou le mauaina o se valaau faapopoleina mai se ulugalii ae toeitiiti pu’e la’u vaalele mo se fonotaga faapisinisi. Sa ou aioi atu i le Alii a o le’i taunuu mai i la’ua ia iloa pe faapefea ona ou faamanuiaina i la’ua. Sa faaali mai ia te a’u le natura o le faafitauli ma le tali e tatau ona ou avatu i ai. O lena taitaiga faafaaaliga na faatagaina a’u e faataunuu ia tiutetauave paia o lo’u valaauga o se epikopo e ui i se taimi itiiti sa avanoa ai. Ua tausoa uma foi e epikopo i le lalolagi atoa nei ituaiga o aafiaga e tasi faatasi ma a’u. I le avea ai ma se peresitene o le siteki, e le gata sa ou mauaina faaaliga taua ae sa maua foi ni faasa’oga patino ia na manaomia e faataunuu ai faamoemoega o le Alii.
Ou te faamautinoa atu ia te outou o le taitaiga faafaaaliga e mafai ona maua e i tatou taitoatasi pe a tatou galulue ma le lotomaualalo i le tovine a le Alii. O le tele o la tatou taitaiga e sau mai le Agaga Paia. O nisi taimi ma mo nisi o faamoemoega, e sau sa’o mai le Alii. Ou te molimau patino atu e moni lenei mea. O le taitaiga mo le Ekalesia atoa, e oo mai i le Peresitene ma le perofeta o le Ekalesia.
I le avea ai ma Aposetolo o onapo nei, ua matou maua le avanoa e galulue ma faimalaga faatasi ai ma lo tatou perofeta o i ai nei, Peresitene Nelson. Ou te toefaaupu atu le mea sa saunoa i ai Uilifoti Uitilafi e uiga i le Perofeta o Iosefa Samita; e tutusa lona moni ia Peresitene Nelson. Ua ou vaai “i galuega a le Agaga o le Atua ia te ia, atoa ai ma faaaliga a Iesu Keriso ia te ia ma le faataunuuina o na faaaliga.”32
O la’u aioiga faamaulalo i le asō ia taitoatasi i tatou ma saili i faaaliga faifai pea e taiala ai o tatou olaga ma mulimuli i le Agaga a o tatou tapuai atu i le Atua le Tama i le suafa o lo tatou Faaola, o Iesu Keriso, o lē ou te molimau atu ai i le suafa o Iesu Keriso, amene.