O Le Auala ua Faamanuiaina ai e le Perisitua le Autalavou

Ua ou faafetai lava i le i ai iinei. Ina ua ou muai iloa o le a ou maua le avanoa e lauga atu ai ia te outou i le asō, sa ou lagona le faagaeetia tele ae i le taimi lava e tasi ua faamaualaloina tele. Ua ou faaaluina le tele o le taimi e mafaufau ai e uiga i mea e mafai ona ou faasoa atua, ma ou te faamoemoe e fetalai tuusa’o atu le Agaga ia te outou e ala atu i la’u savali.

I le Tusi a Mamona, na avatu ai e Liae se faamanuiaga i ona atalii taitoatasi a o le’i maliu o ia lea na fesoasoani ai ia te i latou ia iloa o latou malosiaga ma gafatia e faavavau. O a’u le ui’i o le fanau e toavalu, ma o le tausaga na te’a nei sa na o a’u le tamaitiiti i le aiga mo le taimi muamua. O le le latalata mai o o’u tuagane ma uso ma le leai ai foi o se tasi e talanoa i ai i taimi uma sa faigata mo a’u. Sa i ai po sa ou lagona ai le matua tuuatoatasi. Ou te faafetai mo o’u matua, sa taumafai i le mea sili la te mafaia e fesoasoani ia te a’u. O se faataitaiga o lenei mea o le taimi sa ofo mai ai lo’u tama e aumai se faamanuiaga faaleperisitua o le mafanafana i se taimi sa patino le faigata. Ina ua mavae lana faamanuiaga, sa leai se mea na suia i lena taimi, ae sa mafai ona ou lagonaina le filemu ma le alofa mai lo’u Tama Faalelagi ma mai lo’u tama. Ou te lagona le faamanuiaina i le mauaina o se tama agavaa e mafai ona tuuina mai faamanuiaga faaleperisitua i soo se taimi ou te manaomia ai ma fesoasoani ia te a’u ia iloa o’u malosiaga ma le gafatia e faavavau, e pei ona faia e Liae ina ua ia faamanuiaina ana fanau.

Po o a lava ou tulaga, e mafai lava ona e maua le avanoa i faamanuiaga faaleperisitua. E ala i tagata o aiga, uo, tuagane o auaunaga, taitai perisitua, ma se Tama Faalelagi o ē o le a le faatoilaloina lava oe, e mafai ai ona e maua faamanuiaga o le perisitua. Sa saunoa Elder Neil L. Andersen: “O faamanuiaga o le perisitua ua mautinoa lava le sili atu nai lo le tagata lea ua talosagaina e faatautaia le meaalofa. … A tatou agavaa, o le a faaoaina e sauniga o le perisitua o tatou olaga.”¹

‘Aua ne’i faatuai e talosaga mo se faamanuiaga pe a e manaomia se isi taiala faaopoopo. O o tatou taimi faigata tatou te matua manaomia ai le Agaga e fesoasoani ia i tatou. E leai ma se tasi e atoatoa ma e tatou te oo uma lava i faigata. O nisi o i tatou atonu e mafatia i le popolevale, atuatuvale, o vaisu, po o lagona e le lava lo tatou lelei. E mafai e faamanuiaga faaleperisitua ona fesoasoani ia i tatou e faatoilalo nei luitau ma maua le filemu a o tatou agai i luma i le lumanai. Ou te faamoemoe tatou te tauivi ia ola agavaa e maua nei faamanuiaga.

O le isi auala e faamanuia ai i tatou e le perisitua e ala lea i faamanuiaga faapeteriaka. Ua ou aoao e liliu atu i lo’u faamanuiaga faapeteriaka i soo se taimi lava ou te lagona ai le faanoanoa po o le tuuatoatasi. E fesoasoani lo’u faamanuiaga ia te a’u ia iloa lo’u gafatia ma le fuafuaga patino ua i ai i le Atua mo a’u. Na te faamafanafanaina a’u ma fesoasoani ia te a’u ia vaai i tala atu o la’u vaaiga faalelalolagi. Na te faamanatu mai ia te a’u a’u meaalofa ma faamanuiaga o le a ou maua pe afai ou te ola agavaa. Ua ia fesoasoani foi ia te a’u ia manatua ma lagonaina le filemu faapea o le a tuuina mai e le Atua tali ma tatala faitotoa mo a’u i le taimi sa’o pe a ou matua manaomia ai.

E fesoasoani faamanuiaga faapeteriaka e saunia i tatou e toe foi atu e mau faatasi ma lo tatou Tama Faalelagi. Ou te iloa o faamanuiaga faapeteriaka e aumai mai le Atua ma e mafai ona fesoasoani ia i tatou e liliu o tatou vaivaiga i malosiaga. E le o ni feau nei mai ni faamatala miti; o nei faamanuiaga ua ta’u maia ia i tatou mea e manaomia ona tatou faalogo i ai. E pei lava o se Liahona mo i tatou taitoatasi. A tatou faamuamua le Atua ma faatuatua ia te Ia, o le a Ia taitaia i tatou i o tatou lava vao fitā.

E pei lava ona faamanuiaina e le Atua Iosefa Samita i le perisitua ina ia mafai ona toefuata’i mai faamanuiaga o le talalelei, e mafai foi ona tatou mauaina faamanuiaga o le talalelei i o tatou olaga e ala i le perisitua. O vaiaso taitasi tatou te maua ai le faamanuiaga ma le avanoa e aai ai i le faamanatuga. E ala i lenei sauniga faaleperisitua, e mafai ai ona tatou maua pea le Agaga e faatasi ma i tatou, lea e mafai ona faamamaina ma faapaiaina ai i tatou. Afai e te lagonaina le manaomia ona aveesea o se mea mai i lou olaga, ia aapa atu i se taitai faatuatuaina e mafai ona fesoasoani ia te oe ia toe foi atu i luga o le ala sa’o. E mafai ona fesoasoani atu ou taitai ia te oe ia maua le mana atoa o le Togiola a Iesu Keriso.

Faafetai i le perisitua, ua mafai ai foi ona tatou maua faamanuiaga o sauniga o le malumalu. Talu lava ona mafai ona ou ulu atu i le malumalu, ua ou faia ai lava se sini ma se faamuamua ia auai soo i ai. E ala i le faaalu o le taimi ma le faia o ni osigataulaga talafeagai ina ia latalata atili i lo’u Tama Faalelagi i totonu o Lona maota paia, ua faamanuiaina ai lava a’u i le mauaina o faaaliga ma uunaiga ua fesoasoani moni ia te a’u i lo’u olaga atoa.

E ala i le perisitua, e mafai ona siitiaina i tatou. E aumai e le perisitua le malamalama i lo tatou lalolagi. Sa saunoa mai Elder Robert D. Hales: “A aunoa ma le mana o le perisitua, ‘o le a faama’umauina atoa le lalolagi’ (tagai i le MF&F 2:1–3). O le a leai se malamalama, leai se faamoemoe—na o le pogisa.”²

O loo tapuai mai le Atua mo i tatou. E finagalo o Ia tatou te toefoi atu ia te Ia. E silafia e Ia i tatou taitoatasi. E silafia e Ia oe. E alofa o Ia ia i tatou. E silafia e Ia i tatou e le aunoa ma faamanuia i tatou e ui ina tatou lagona e le tatau mo i tatou. E silafia e Ia mea tatou te manaomia ma le taimi tatou te manaomiaina ai.

“Ia outou ōle atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou:

“Aua ai se ōle atu, e maua e ia; o lē saili foi, e iloa e ia; e toina foi i lē tu’itu’i atu” (Mataio 7:7–8).

Afai e te le’i mauaina lava se molimau e uiga i le perisitua, ou te uunaia oe ia tatalo ma ōle atu ia iloa mo oe lava ia e uiga i lona mana, ona faitau lea o tusitusiga paia e lagona ai le afioga a le Atua. Ou te iloa afai tatou te faia se taumafaiga e lagonaina ai le mana o le perisitua a le Atua i o tatou olaga, o le a faamanuiaina i tatou. I le suafa, o Iesu Keriso, amene.