Wóltaʼii 4
Diyin Yá Yáłtiʼí Joseph Smith díí diyingo bił ííshją́ą́ ályaa éí bizheʼé, Joseph Smith Sr. yee yił hodoolnih biniyé, éí Harmony, Pennsylvaniadi, Atsá Biyáázh 1829yę́ędą́ą́ʼ áhóótʼįįd.
1–4, Naanish hayóígo álʼínígíí éí Diyin Bóhólníihii bá nidaʼnitiní yisdábííʼeezh; 5–6, Diyin bá dahozhdísinígíí bikʼehgo naʼnitin baa dahiditʼaah; 7, Diyin God bitsʼą́ą́dóóígíí biká áhátʼį́į doo.
1 Áko shooh, diyingo naʼanish ayóóʼátʼéii nihokááʼ dineʼé baʼáłchíní bitʼahgóó kódoolnííł.
2 Ákohgo, O tʼáá háíshį́į́ Diyin God yá naalʼaʼí silį́įgo, tʼáá átʼée ńtʼę́ę́ʼ nijéí, bee ánítʼéhígíí, biniʼ dóó beʼadziil yee naalʼaʼ doo, áko beiníłką́ądi Diyin God bidááhdóó tʼáadoo bee bikʼíhótʼahígóó yidoohsįįł.
3 Éí bąą, Diyin God bá naashʼaʼ doo nohsingo éí naanish bee nihikʼih hodiiniiʼ;
4 Háálá áko shooh, daʼákʼeh tʼáá íídą́ą́ʼ diigai doolzhihgo; níníłʼį́, háida bee naʼálzhéhé yee tʼáá awołíbee naʼáshééhgo, anooʼ yiihyiniłgo doo dadootsxaał da, áko biiʼsizíinii yisdeidoolóos.
5 Áádóó oodląʼ, haʼólní, diyinkʼehgo ayóóʼóʼóní, dóó ayóó oʼóní, áádóó Diyin God biʼayóó átʼéíi tʼéiyá nélʼį́įgo, yee naanish yíneelʼą́ą doo.
6 Díídóʼ béédaałniih oodląʼ, aláahgo yáʼátʼééhii, ééhojísin, tʼáá áłtsojįʼ tʼah hwiindzin, haʼjólní, hakʼéí bichʼįʼ háʼáhwiinítʼį́, Diyin God jidósingo, diyinkʼehgo ayóóʼóʼóní, hojoobaʼ íízhnízingo, dóó tʼáá awołí ájítʼį́įgo.
7 Íínóhkeed, áko yínókeedígíí nihaadoolyééł, dáádílkał nánółtsʼin, áko nihá ąąʼádoolnííł. Amen.