Got u fithik’ daed

Napan kug lemnag e duwer ney, kug lemnag mornga’agen e pi missionary nib fel’yangren nu Meriken ni kar ayuweged ufithikdaed ko pi duw nem. Kar chew e na’un nib fel’ rogon nge yaen nga Germany—e nam rok e to’ogor roraed—ni kar pii athap nib thothup ngak e gidii rog. Dabi pufthin ngomed, fil, fa pii tamra’ ngomed. Kar pii’ e yafos roraed ni dar thapeged e ban’en, kemus ni yaed ba’adag ni ngar ayuweged bee’ me pire’eg e falfalaen’ nge gapas ni yaed manag.

Kug lemnag, gali mo’on nge ppin nib yangren e be machalbog. Sana bay e oloboch roraed, machane dab gu lemnag bay oloboch roraed. Guma lemnag mornga’agraed yaed ma ga’ ko yafos—fapi angel ko magal nge fal’ngin, tamachib ko t’uf, fel’ nge tin riyul’.

Napan bay bo’or e damomuw, dabun, nge rus, kug sug ko athap bachan e susun nge fil roraed pi chanem ni yangren. Machib ko gospel ni kar pii’ ma gaa’ nag ko politics, chep ni kakrom, damomuw, kirbaen’, nge tin ni ba’adag. Ma pii’ e fulweg nib thothup nifan e pi duwer kar thapeg ulan e ningyal’ nem nib momaw.

Milwol ney ni Got be fos nge ba’adagdaed, dariy fan e ngiyal’ nem nib kireb, balyangaen’, nge magawon. Nike m’ug ulan e ngiyal’ rodaed ni nge fulweg e gospel nge Galasia Rok. Nibe non ngak fapi profet bayay; ere Got be paer u fithik’ daed—nge manag e yafos rodaed me powi’iydaed e bitir Rok.

Bo’or banan rayag ni ngaed filed napan ni ngaed sapgaed nga kanawo’ ko thap rok Chitamangiy nu Tharimy, kanawo’ ko falfalaen’, nifan e Fak. Napan ngam thamiy yigo’ gur, chuwegdaed, nge pagtalindaed, ngaed filed ni Got de pagtalindaed; be riyul’, nibe pii’ ngodad e banan nib thabi fel’: ni ngaed manged “ke tay Got ni fen; ya fa’anra gadaed be un ko gafgow ni tay Kristus, ma ka gadaed ra un ko fla’ab rok.”²

Mang e bayip fan?

Ngaed ra fosgaed ko manemus, thapeg e falfalaen’ nib sug,³ nge ra ngaed “thapged tafen ko pilung, gil’ilungun, nam, nge gel.”⁴

Rib mangil ni nggu nang biney rayog ni nge buch—gathi bachan e gadaed machane bachan Got.

Fa’an ni ngaed nanged biney, urogon ni ngaed yoer, nonnon fa damomuw. Mangfan ni ngaed sap nga buut’ napan e pilung ko pilung be pinningdaed ni ngaed thapeg e falfalaen’ nib thothup?⁵

Bachan e t’uf rok Got nifan ngodaed nge maligach rok Yesus Kristus, pi denen rodaed—Ga’ nge achigchig—ra thang nge dabi puguran.⁶ Rayag ngaed sakiygaed nga powchan nib machalbog, mataw, nge be’ech.

Ke sug gum’ircha’eg ko falfalaen’ ngak e Chitamangig u Tharmiy. Gu manang ni de ba’adag e bitir rok ni nge dared ufithik e yafos ni dariy e athap ko yafos nib fel’ nge tamilang. Ke pii’ rogon ngodaed ma powi’iy nag daed ngak. Nge u lulukungun ko gubin biney i ir e Fak nib T’uf rok, Yesus Kristus,⁷ nge ngongol rok ke rrin nifan ngodaed.

Bayul rok Somoel be thilyeg e rogon ni ngaed lemniged mornga’agen e denen nge magawon rodaed. Dabi lemniged mornga’agen nge thamiy ni dabda thapeged fa dariy’ e athap, rangad filed ni fan binem nge thamiy e athap.⁸ Fare tawa’ath ko kalngaen’ ni ma be’ech nagdaed me pag e denen rodaed nge mang e bee’ nib be’ech.⁹

Bachan Yesus Kristus, fapi oloboch dabi fal’eg ngodaed. Rayog ni ngar gel nagdaed.

Woed bee’ nibe fil e tang, ra ngaed sap e oloboech, kireb rodaed, nge denen ni ir e rogon ningaed gaa’ nagdaed, thapeg e t’uf nib gel nifan reb e gidii, nge gelnag daed udakaen e kalngaen’.

Fa’an ngad kal gaed ngan’daed, pi magawon dad kirebnagdaed. Oloboech de kirebnag daed; binem ir e yang ko mon’og rodaed.

Gadaed e bitir ni be ta’areb nag ko fapi gidii’ nib thothup ra ngaed manged borran. Dariy bee’ be fil’ urogon ni nge gamanmaan, yaen u buut’ nge mil nge dariy e doel, mad’ad fa bech dow. Aram rogon min nang rogon.

Fa’andra ngaed ul’ul’ u guy rogon, fol e pi motochiyel rok Got, nge kalngaen’, guy rogon nge mada’ ko tomur, nge rrin’ e tin nibe filed, buchu’uw nge buchu’uw, ra ngaed thapeged e magal ulan e ya’el rodaed.¹⁰ Nge sana dabda nanged urngin e gelingdaed chiney, “Gadad manang, nap’an nra yib i m’ug [Kristus],” ra ngaed sapgaed ngak udakaen daed nge “ya bay da guyed ir nrogon.”¹¹

Aram a micheg nib ma’ang’ang!

Arrogon, e fayleng ma ke sug ko damomuw. Nge arrogon, bay e magawon rodaed. Machane dabda dabisiy nib mulmulaen’med, bachan ra ngaed pagaen’maed ngak’ Got, ra ngaed pagaen’maed ngak’ Fak, ni Yesus Kristus, nge ra ngaed thapeged fare tawa’ath ko Kan Thothup ni ra po’owiy daed ko yafos nima sug ko falfalaen’ nib thothup.¹²

Kug lemnag bo’or, Fa’anra fos Yesus e daba’ ma mang era fil fa rrin’?

Tomur ko Faskoyam’, Yesus ke fulweg e micheg rok ni nge yib ngak “boech e saaf” Rok.¹³

Fare Babyor ku Mormon: Reb e M’ag ku Yesus Kristus ma weliy mornga’agen e m’ag ney ngak e gidii’ u fapi nam nu Meriken. Bay e babyor ney nib fel’ ni ba m’ag mornga’agen e biney e murwel rok fare Tathapeg.

Fare gidii ulan e Babyor ku Mormon kar fos u barba’ ko fayleng—pi chepin, pi yalen nge pufthin e rib thil ko gidii’ ni machib nag Yesus ko ngiyal’ ni’i machib u fayleng. Machane ke fi’ ngodaed ni ta’ab rogon e pin’en nike fil ngak ulan e nam nib thothup.

Mangfan nike rin’ e binem?

Tathapeg ma fil e tin nib riyul’ ni manemus. Sor fan ngodaed ni gubin ni gubin ngiyal’.

Ba machib rok kafram nge daba’ i ir e machib ko athap—e m’ag ni Got ni Chitamangdaed nu Tharmiy dabi chew ko bitir Rok.

I Ir u fithik’ daed!

L’agruw miri’ay e duw kafram, Tathapeg ke sul nge Feylang bayay. Ir nge Got ni Chitamangdaed nu Tharmiy ni kar m’ug gow ngak Joseph Smith nib 14 duw rok nge thapeg fare Fulweg ko fare gospel nge fare Galasia rok Yesus Kristus. Napan e ngiyal’ nem nga m’on, ke mab e tharmiy, nge tamilwol nib thothup nibe yib. Magal nge ganop ke yib ngodaed.

Fare Somoel Yesus Kristus ke non ngak e Feylang bayay.

Mang e ke yoeg?

Bo’or e thin Rok ma paer ulan fare Doctrine nge Covenants—demtrug bee’ u dakean fare feylang ra ngar bi’eg nge fil ngak fa’an ni ba’adag. Ma dariy puluwon e pi thin ney nifan ngodaed daba!

Ma dabi’ balyangdaed ni Somoel e ke fil bayay e kengnin ko machib Rok: “Gimed e ngari adag dakaen e Somoel ni Got romed ni gubin e gum’ircha’med, gelingmed, lem, nge ayuw; ma u fithingan Yesus Kristus e ngarim pigpig riy.”¹⁴ Irma pii’ e athamgil ni ngaed sap ngak Got¹⁵ nge fagad udakaen e machib Rok nike dag ngak fapi pigpig rok, fare prophet.¹⁶

Ma fil ngodaed ni ngaed t’ufeged yaed¹⁷ nge ngaed be “sug ko adag e ba t’uf ngak gubin e gidii’en”¹⁸

Ma piningdad ni be mang e Pa’, ni ngad rin’ed e tin nib fel’.¹⁹ “Dabi par ni kemus ni thin nge welthin … bin riyul’ rogon nib t’uf Got nge girdi’ rodaed nma m’ug ko ngongol.”²⁰

Ir ba’adag ni ngad motoyil’ ngak pinning Rok’: ni t’uf, pii’, pinning urngin e gidii’ nge gospel nge Galasia Rok.²¹

Irma e chiyliy ngodaed ni ngaed toyed fapi temple nge dared ngalanggin min pigpig uram.²²

Ya ma fil ngodad ni ngad manged pi gachalpen Rok—gum’ircha’daed dabi ba’adag e gelingeg, salpiy, ba’adag fa gelnag reb bee’. Ma fil ngodaed ni ngaed “pag e tin nu biney e fayleng nge gay e tin nu falyeng nib fel’.”²³

Be chiyliy ngodaed be thapeg e falfalaen’, tamilang, gapas,²⁴ nge micheg ko dabi yim’ nge yafos nib manimus.²⁵

Mu lemniged biney. Sana Yesus ke yib nga ward romed, branch romed, fa na’un romed daba’. Uw rogon e biney nra buch?

Ir ra guy ulangin e gum’ircha’med. Dariy fan e ya’an romed. Ra ningem ko gur mini’. Ir ra nang e tin ni ba’adag e gum’ircha’med.

Gidii’ nib muding nge sobut’ Ir ra fek nga lang.

Ra golnag e m’ar ko gidii’.

Gidii’ ni be maerwaer Ir ra pii’ e mich nge gel’ngin ni ngar michuwunuy.

Ra fil’ ngodaed ni ngaed bing gum’ircha’daed ngak Got nge ayuweg reb e bee’.

Ra nang e pagan’uy rom, sobut’, riyul, mich, t’uf nge t’ufeg.

Napan ni ngaed sap Ngak ta’areb yay ni gadaed e dabi ta’abrogon boed umon. Ra ngaed thil ni gubinfen. Ma thilyeg bachan ni ngaed nanged, ni riyul’, Got u fithik’ daed.

Gube sap ngak ufithik e t’ufeg e gag nib pagal ufithik e duw ni kug ilal. Fa’an ni rayog, gube adag ni nggu yib ngak nge pii’ athamgil nge ul’ul’ ni nggu sap. Gub fith ngak ni nggu pinning ngak Yesus Kristus u langgin e yafos, bachan e Got Ir u fithik’ daed.

Ngomed, pi walageg nib t’uf rog, pi fagar rog, nge gubin daed ni ba sap ko e fulweg, nge ko falfalaen’, gube pi ta’ab rogon e fanow: Ul’ul’ ko sap romed udaken e mich nge gum’aen’.²⁷

Mu fith, nge ra ngam thap. Mu tugtuguyed, min bing ngomed.²⁸ Pagaen’ ngak Somol.²⁹

Ufithik e yafos rodaed rib ga’ fan nge rogon nib thothup ni ngaed mada’ ngak God.

Napan ni ngaed pag e uf’uf’ nge yib ngak e chiya ni gul’ilungun e lung Rok u fithik’ e m’ingaen’ nge kalngaen’,³⁰ Ir ra yib ngodaed.³¹

Napan ni guy rogon ni ngaed leaked Yesus Kristus nge ngaed thap gaed ko fachi pa’ i kanawo’ ko gachalpin, buchuw nge buchuw, ra yib e rran napan ni ngad thapeged e tawa’ath ko falfalaen’.

Pi fagar nib t’uf rog, Chitamangdaed nu Tharimy e ba tu’uf romed u fithik e adag ni tha’abi mangil. Ke dag e t’uf Rok nib bo’or rogon, ma bin th’abi tolang e rogon napan ke pii’ Fak ni Ma’agirag Rok’ ni fa ko maligach nge tawa’ath ngak e bitir Rok ni nge fal’eg e rogon ni ngaed sul ngak.

Gube micheg ni ba fss Chitamangdaed nu Tharimy, ni Yesus Kristus ma powi’iy e Galasia Rok, nge President Russell M. Nelson e profet Rok e daba’.

Gube pii’ e t’ufeg rog mug taw’athnogmed nap’an re ningyal’ ney ko Easter. Gube pii’ e tawa’ath rog ngomed biney e Easter ere yangam bing gum’ircha’med ngak e Tathapeg nge Tabiyul rodaed, ni dariy fan e magawon, gafgow, fa oloboch, ragnam nanged Ir e ba fos, ma t’ufmed, nge bachen Ir, gathi yigo’ gur.

Got u fithik’ daed.

Ko pin’ey ni gube micheg nge pii’ m’ag rog u dakean fithingan Yesus Kristus nib thothup, amen.