N’en ni Gadad be Fil ni Dariy Bi’id min Pagtilin
Garam sap ko yafos rom u fithik e meybil, mich u wun’ug ngay nrayag ni ngam guy rogon nike powi’iyem Somol ko pi rran ney nib momaw’.
Pi walageg ni pumo’on, ku falfalan’ ngay ko biney e mu’ulung ni ngad mada’ gad. Yan ntomur ni ted e mu’ulung ko priesthood ko general conference e napan e April 2019. Bo’or banan nike buch ulan l’agruw e biney e duw nike thumur! Boch i gimed e ke yim’ e gidii’ nib tu’uf rok. Ma boch e gidii’ e kan taleg ko murwel, fa tin nib tu’uf rok, fa yafos rok nike thil. Ma ku boch e gidii’ e darki thamiy e gapas fa pagan’ ko tin nga m’on banan. Be amith gum’ircha’eg ni fan ngomed ko pi gafgow ney fa ke yim’ be’ nib tu’uf romed. Gube meybil ni gubin ngiyal’ ni nge ayuwegmed Somol. Napan garam ul’ul’ ngam pigem nge milfam ngak Got e yafos rom, ma gu manang ni manang e tin bay nga m’on nib fal’ ngom.
Ndemuturug e tin nike chuw rodad, ya kabay boch banan ni kad peri’eged. Boch i gadad e ke piri’eg ni kan gel nag fare mich rok ngak e Chitamangiy nibay u Tharmiy nge fare Fak, ni Yesus Kristus. Bo’or i gidii’ e ke thil rogon nibe guy e yafos—nike guy nib manechubog rogon. Ma bay ni kam piri’eg nike gel fare tha’ rom ngak e pi gidii’ nib tu’uf rom nge Somol. Ma gu be athapeg nike mon’og ni gabe motoyil Ngak ma gabe thapeg fapi yi’iy ni be thogthog nag nifan ngom. Gafgow e ma yib ni nge ayuwegem ni ngam mon’og ndariy reb kanawo’en nra buch e biney.
Mu sap ko gali duw ney nike thumur. Uw rogon ni kam mon’og? Mang ni kam fil? Bay sana gaba’adag ni ngam sul ko 2019 ngam par u rom! Machane garam sap ko yafos rom u fithik e meybil, mich u wun’ug ngay nrayag ni ngam guy rogon nike powi’iyem Somol ko pi rran ney nib momaw’, ni be pi’ e athamgil ngom, me ayuwegnem ngam thil—ni ngam reb e gidii’ rok Got.
Gu manang ni Somol e bay rogon ni ke dugliy ni fandad ni rib mangil—ni fan ngodad nge gadad gubin. U fithik e murnguy nge gum’an, me ga’ar:
“Gimed e bugi bitir, ma dawrum nangfaned fapi tawa’ath nib fel’ ni ke tay e Chitamangiy nifan … ni ke ngongliy nifan ngom;
“Ma de yog ni ngam nangfan e pin’ey ni gubin chiney; machane, mu falfalan’, ya gu ra powi’iyem iyaen.”1
Pi walageg ni pumo’on, gu be micheg ni be rrin’ e pin’ey, ma ka amorogon, ni be powi’iydad, napan ni gadad be motoyil Ngak. Ba’adag ni ngan fil min mon’og, ni ku ta’ab rogon—ni wod lumel ni be yib rok—mo’oniyan’.
Mo’oniyan’ e reb e sensey ni th’abi mangil. Mang e kam fil ulan e gali duw ney ni gaba’adag ni nge par ko tafney rom ni gubin ngiyal’? Fulweg rom e bthilthil ngak gubin e gidii’, machane nggog aningeg e lesson ni gu be athapeg ni kad filed ma dariy bi’id min pagtilin.
Lesson 1: Fare Tabinaw e Lukungun e gin ni bay e Mich nge Liyoer riy.
Baga’ napan nra ta’amagaran Somol ngodad e tin ni be buch ko pi rran ney ntomur, me mulwol ngodad ni ngan: “Sak’iy u lan fa gin’en nib thothup, ma dabin mithmith.”2 Gi n’ey “nib thothup” e be yip fan fapi tempel rok Somol nge fapi galasia rok. Machane mu’ulung rodad ko yungi n’ey ni gadad ma mada’ riy e ke thil, ma kad filed ni tabinaw rodad e biyang ni bay e thothup riy nib gel u dakean e fayleng—aragon, fare tabinaw rom.
Pi walageg ni pumo’on, bay rom fare priesthood rok Got. “Fare motwon fare priesthood ni bay rom e ba peth gelngin nga tharmiy.”3 I gur nge tabinaw rom e kam thapegned fapi gam’ing ko priesthood. Ko fapi “gam’ing [ko priesthood ni] bay gelngin e tirok Somol riy e bay ndag nge m’ug.”4 Biney e gelngin e bay ni fan ngom nge tabinaw rom ulan e tabinaw rom ko ngiyal’ ni ga be fol ko fapi motochiyel ni kam fal’ag.5
185 dew kafram, u ta’abrogon e rran daba’, April 3, 1836, Ke fulweg Elijah fapi kiy ko priesthood ni pii’ ngodad e rogon ni ngad m’ag e tabinow rodad uta’abang ko manimus. Ireray ni ngad thamiy nib mangil u napan ni kam pi’ fare sacrament ulan e tabinaw rom. Uw rogon ni ke guyem gathon e tabinaw rom, ni gur e fare chitamangin, fare tutuw, fare figirngin, fare pagal ni fak, fa walagey ni pagal, ni ke pi’ e biney e gam’ing nib thothup? Mang e ngam rrin’ ni ke par e biney nib thothup ulan e tabinaw rom?
Bay nrayag ni ngam thamiy nib tu’uf ni ngam rrin’ boch banan ni nge fal’ag rogon e tabinaw rom ni nge par nibay e re mich ney riy. Fa’anra bay, wenig mu rrin’! Fa’anra kam mabgol, mu puruy’ gow le’ngim ni gamew ta’areb ko biney e murwel nib ga’fan. Ri’in e banan e bay nib ga’fan ko biney. Thilin e ngiyal’ e chiney nge ngiyal’ ni bay i yib Somol biyay, btu’uf ni nge par e tabinaw rodad ni yibe yiroriy ma yibe ayuweg.6
Ngongol nge tin ni yibe rrin’ nra pining fare Thothup e ra gel nag e thothup ulan e tabinaw rom. Yi manang nra chuw fare thothup ni fa’anra bay e ngongol ni be tuluf fare Kan ni Thothup nga orel, ya ka aram rogon “nra chuweg fare tharmiy ir.”7
Gama tafney nag ko mangfan ni ba’adag Somol ni ngad ted fare tabinaw rodad ni lukungun e gin ni ngan fil fare gospel riy nge rogon ni ngan fol ko fapi gospel? Gathi kemus ni be fal’ag rogondad ko, fa ayuwegdad ko, m’ar. Ya mukun nge ta’abang ndabiyag ni ngan rrin’ e chiney e bay ni talag. Machane, rogon ni ngam ayuweg e tabinaw rom ni nge par ni tigil’ e mich e susun ndariy bi’id me tal. Napan ni be buchu’uw ma be achig e mich u dakean e fayleng, mara tu’uf ni ngari gel e thothup ko yungi n’ey. Gu be yog ngomed ni ngam ul’ul’ gad ngam ted ni tabinaw romed e nge par ni bay e thothup riy “ma dabin mithmith nag”8 nde muturug rogon.
Lesson 2: Gadad Btu’uf Rodad
Got e ba’adag ni ngad murwel gad u ta’abang ma gadad ayuweg dad. Ireray fan ni ke pi’ dad nga fayleng ni bay e tabinaw rodad ma ke yarmiy dad ulan fapi ward nge stake. Ireray fan ni nge fith ngodad ni ngad pigpiggad ma gadad machib niged gadad. Ireray fan ni ke fith ngodad ni ngad pired u roy u fayleng machane gathi ni bod e girdi’ nu fayleng.9 Bo’or banan nrayag ni ngad rrin’ed u ta’abang ko bin ba’aray ni yigo gur.10 Tonom rok Got nifan e falfalan’ e ra kireb ni fa’anra fapi bitir ni fak e yadra par ni yigo giyed.
Biney e m’ar ni ke buch u fayleng e ke rrin’ e biney ni ke palog nag e gidii’ u but’. Wod boch e gidii’ e ba gel e gafgow rorad ngak boch e gidii’, machane gadad gubin kad gafgow gad. Bachan e biney, gafgow ni gadad be tay e rayag ni ngan ayuwegey ni ngan ta’areb nag e bitir ni fak Got. Ere, nggu fith, biney e gafgow e ke chugur nigem ngak e bugiliyiror rom—ngak pi walagem ni be par u chirem nge tin ni bay u fayleng?
Bachan e biney, fagli motochiyel ni th’abi ga’ e rayag ni nge powi’iy dad: ni bin som’on, e Thangri t’uf rom Somol nge, bin l’agruw, t’uf rom e en ni ir e bmigid ngom.11 Ngad daged e tu’ufeg rodad u fithik e pigpig.
Fa’anra ga manang be’ ni yigo ir, mu non ngak—ndemuturug ko ga be thamiy ni yigo gur rom! Dani tu’uf ni nga fani yib fan fa reb e mulwol fin aram e ngiyal’ ni ngan non ngak be’. Mag yog e mogethin mag dag e tu’ufeg rom. Technology e bay nrayag ni nge ayuweg nem. M’ar ni ke garar u fayleng fa danga’, gubin fapi bitir nib tu’uf rok Got e btu’uf ni ngar nanged ni gathi yigo ir rok!
Lesson 3: Priesthood Quorum Rom e Gathi Kemus nifan e Mu’ulung
Napan e biney e m’ar ni be garer u fayleng, fare mu’ulung ko quorum e ni talag. Boch fapi quorum e rayag ni ngan mada’ riy u online. Machane, fare murwel rok Somol ni pi’ ngak fapi quorum ko priesthood e gathi kemus ni ngan mu’ulung nag. Ya mu’ulung e karimus ni biyang nib achig ko fare quorum nge n’en nrayg ni nge rrin’.
Pi walageg ko Aronic Priesthood nge fapi quorum ko elders, mu ga’nag e man’ay rom ko mangfan ni bay e pi quorum ney. Uw rogon ni ba’adag Somol ni ngam fanay fare quorum ni rrin’ e pi murwel Rok e—chiney? Mu guy ni nge thogthog nag Somol ngom. Mu sobutan’ nigem! Ning! Motoyil! Fa’anra kan piningem ni ngam gagiyeg nag, mu’ulung gad fapi presidency nge fapi gidii’ ko quorum. Demuturug e liw rom ko priesthood fa gin ni ngam pigpig riy, mu pag e yafos rom nge mil fam ngak Got ko rogon e pi pigpig rom. Garam thamiy e falfalan’ u napan ni “garam un ngam pi’ e ayuw ko tin nib ga’fan banan.”12 Fapi quorum e yad e bay ra kunuyed fapi gidii’ nu Isreal ulan l’agruw ruba’ fare veil.
Lesson 4: Rayag ni ngan Rung’ag Yesus Kristus ko Ngiyal’ ni Gadad Pasalog
Gadad be par ko ba ngiyal’ ni un profacy nag ni kakrom, ni ke “yo’or e kireb riy; ma, bayi thil gum’ircha’en e gidii’; ya bay i yib e murus nga dakean rad.”13 Biney e rib riyul’ ko ngiyal’ ni yib fare m’ar, ma kara buch u tomuren. Kireb u fayleng e bay i ul’ul’ nge gel. Ni gathi bod, ya lam rok Somol e gathi “ba lam nib tomgin, machane … ya [ba] lam, ni [bod] e kathkath, ni [kuruf] raed ni poloʼ.”14 Ra ngan rung’ag e biney e lam ni bod e kathkath, ma thingar mu pasolag nigem!15
Bay bangiyal’, ni biney e m’ar e talag dad ko pi gosgos nike suguy lan e yafos rodad. Dabi n’uw napan ma bay kud suled ngad suguyed e yafos rodad ko tiney e lam nge pi kireb u fayleng. Fa krayag ni ngad fnayed e ngiyal’ ney ni ngan motoyil ngak Somol ni be kathkath nag ngodad e tin ni be powi’iy nag ngodad, ayuweg dad riy, nge gapas ni be pi’ ngodad. Ngiyal’ ni dariy lingay e ngiyal’ nib thothup—tiney e ngiyal’ e re thogthog nag ngodad e gapas nge yi’iy.
Mu fanow nigem ni ngam par ko ba ngiyal’ ni yigo gur nge pi gidii’ nib tu’uf ngom. Mu bing gum’ircha’em ngak Got u fithik e meybil. Mu pigem ngam be’eg fapi thin nib thothup mag un ko pigpig ulan e tempel.
Pi walageg ni pumo’on, bo’or banan ni ba’adag Somol ni ngad filed ko ngiyal’ ney nibay e biney e m’ar u fayleng. Kemus nri aningeg e kug yoloy nga but’. Gu be pining med ni ngam yoloyed e biromed nga but’, mag tafney niged u fithik e nangan’, ma ga yog ngak e gidii’ nib tu’uf rom.
Bo’or e tin nib fel’ ni bay nga m’on ni fan ngak pifak Got ni yad be fol ko fapi motochiyel.16 Somol e bay i pining fapi tapigpig rok ni yad be fol ni bay fare priesthood rorad ni ngar yibliyed, mi yad pi’ e ayuw, mi yad gelnag e gidii’ mi yad ayuweg e gidii’ nu fayleng ko fare bin Migid e Wub Rok. Gadad gubin ni bay e murwel rodad ko fapi m’ag nib thothup ni kad thapagned. Rayog ni ngad rrin’ed e biney! Gube micheg, ko tu’ufeg rog ngomed ni gubin, pi walageg nib t’uf rog, u dakean fithingan Yesus Kristus nib thothup, amen.