Fare Milekag Rok fare Tir ku Got
Gadad pi fak Got ni gadad bay u tan fare m’ag, e ngad tu’ufeged, min chuwadliy, min ayuweg, fapi bitir ni be chuw ulan fare fayleng th’abi som’on.
Gadad gubin ni ke gafgow nagdad fare m’ar ni ke garar u dakean e fayleng, ni wod e tabinaw nge tafagar ni ke pagdad ko biney e yafos u fayleng. Nggog dalip ni’ be tawring nib ga’, ni be yipfan e pi’in nib tu’uf rodaed.
Ireray Brother Philippe nge Sister Germaine Nsondi. Brother Nsondi ke pigpig ni’ir fare patriarch ko fare Stake nu Brazzaville Republic nu Congo fini ke yim’. Ir e be’ nib togta ni ma fanay e tin nib salap riy nge pi’ e ayuw ngak e gidii’.1
Ireray Sister Clara Ruano de Villareal ni be’ nu Tulcán, Ecuador. Un ko gospel nib fulweg napan e 34 e duw rok ma reb e tiyugang’ nib tu’uf ko gidii’. Gathon e tabinaw rok e ra yon’ed fare tang ko fingich nri ba’adag, “I Know That My Redeemer Lives.”2
Ireray Brother Ray Tuineau ni be’ u Utah, ya’an nge gathon e tabinaw rok. Le’ngin ni ka nog i, Juliet ngak, e ga’ar, “Gu ba’adag ni fapi [pagal rog] e ngar [ted u wun’rad ni chitamanginrad] e gubin ngiyal’ ma gay rogon ni nge tay ni Got e som’on.”3
Ke yog Somol, “Thingar mu pired u fithik e tu’ufeg, ni ku wod ni gamed ra yor nag e pi’in ni ke yim’ fa ke chuw romed.”4
Ma ngiyal’ ni gadad be yor, ma thingar da falfalan’ gad ko fare Foskoyam’ ni tay fare Tathapeg rodad. Ya bachan Ir, ma fapi gidii’ nib tu’uf rodad nge pi tafagar rodad e kabay ra ul’ul’ niged fare milekag rorad nib manechubog. Wod rogon ni weliy President Joseph F. Smith: “Dabyag ni ngad pagtalined rad; ma darda talgad i lemnag rad. … Kar mon’og gad; ma kagdad be mon’og.”5 President Russell M. Nelson e ke yog, “Pi lu’ ko kirban’ rodad … e bayni pilyeg nge mang lu’ ko tin ni yibe athapeg.”6
Gadad ma Nang marunga’agen Yafos U’mon Gargeleg
Leam rodad ko tin nib manechubog e gathi kemus nikan ga’nag e llowaen’ rodad ko gidii’ ni be ul’ul’ nge milekag u tomuren ni kar piged e fayleng machane kan ga’nag e llowaen’ rodad ko pi gidii’ ni yad m’on ko fare milekag nge tin nifin nibe yib nga fayleng.
Uringin be’ nra yib ngalan e fayleng e reb fapi bitir rok Got.7 Milekag rodad e dani tabab ko ngiyal’ nin gargelegey. U m’on nin gargelegdad, ud moyed u reb e fayleng ni gadad be fal’ag rogoy ni ngan “thapeg [ged] e bin som’on e machib ulan fare tofen e ya’al.”8 Jehovah e yog ku Jeremiah, “Gu mel’egem u m’on ndawor mu sum nga mayal, mu m’on ni ngan gargelegem mu gu duwgiliy ni ngam mang profet ngak e pi nam.”9
Boch e gidii’ e bayra deri’iyed ni yafos e ma tabab ko ngiyal’ ni sum’ fare tir u mayal, fa ma ke tab gumi’ircha’en ni be mithmith, fa ngiyal’ nikan gargeleg fare tir, machane gadad, e dardma deri’iyed fapi ya’al ni fak Got ni yad be tabab nag fare milekag rorad ni yad be yib nga fayleng ni ngar thapeged fare dowef nge biney e yafos.
Gadad pi fak Got ni gadad bay u tan fare m’ag, e ngad tu’ufeged, min chuwadliy, min ayuweg, fapi bitir ni be chuw ulan fare fayleng th’abi som’on.
Fare Muruwel nib Mangil ko pi Ppin
Pi’in ni bpin, fakay e bitir ab gel e momaw’ riy ko dogur, amith, nge tin nra tu’uf rok fare tir. Btu’uf ma gamad be tayfan fapi bpin nib mangil ko re Galasia ney. Fithik e nangfan nge ganop, I gur e gama ayuweg gathon e tabinaw rom. Btu’uf rom. Pigpig rom. Maligach rom. Gur e gama pi’ gelngin e mich, machib ngak e pi’in nike gafgow nge be pi’ e ayuw ko gidii’ ko binaw.
Re Muruwel ni Ngan Tayfan Yafos
Boch e duw kafram, ni’i m’agfan’uy ko mili’ bitir u fayleng, me non President Gordon B. Hinckley ngak fapi bpin ko Galasia ea ga’ fan ngodad daba’. Keyoeg: “I gur ni gimed e pi’in ni bpin ni mitin ma le’ngin e gamed e fapi yuluy ko tabinaw romed. I gur e rayag ni ngam fakiyed e bitir. Baga’ e re murwel ney nikan tay nga dakeanmed. … Mang e ke buch ko fayleng ni daknur tayfan e yafos ko gidii’? Mili’ bitir e rib kireb, ma rib togon e biney e ngongol, ni be suguy dakean e fayleng. Gube wenig nag ngak fapi bpin ko Galasia ni ngar tulufed e biney, miyad sak’iy ngar gelgad ko biney e ngongol, min palog nigey ko pi ngongol nra mom nag e biney e lumel. Bay ni karimus nri’in fan nran pag e biney ni nge buch, machane bay rogon ni yira tafney nag ni rib ga’fan.”10 … Gamed e chitiningin ko pifak Got nib pumo’on nge ppin, ni yafos roraed e be thothup. Chuwadliyrad e ba murwel nib thothup ma thingar ni tin’uy ngay.”11
Elder Marcus B. Nash e weliy ngog mornga’agen be’ nib bpin ni 84 e duw rok ni, napan ni yibe deriy’ ko mornga’agen e tawfe rok “me yog ni ke rrin e mili’ bitir [ko bo’or e duw kafram].” U fithik e kirbaen’, me ga’ar: “Kug fek tomalngin e biney ni kug mili’ bitir ni gubin e uran ko yafos rog ni ke gaman aningeg i ragag nge nel’ e duw ngay. … Dariy banan ni kug rrin’ nike chuweg e biney e amith nike tomal nigeg. Ke m’ay e athap rog nge mada’ ko ngiyal’ ni kug fil fare gospel rok Yesus Kristus. Kug fil rogon ni nggu kalngan’ … me wod ni kan suguyed ko athap. Ma aram fa nug nang ni rayag ni ngan n’agfan rog ni fa’an gura kalngan’ ko pi denen rog.”12
Ri gadad ba tawa’ath ko fare tawa’ath nib thothup ko kalngan’uy nge min’agfan.
Mang e Rayog ni Ngad Rin’ed?
Mang e murwel rodad ni gadad pi gidii’en gachalpen Yesus Kristus? Ngad pired ni gadad be tayfan fapi motochiyel rok Got, min fil ngak pi fakdad, ma gadad fil ngak e pi gidii’ ni yad ba’adag ni ngar motoyilgad ngay.13 Ngad weliyed e tin ni gadad be thamiy nifan e yafos nib thothup ngak e gidii’ nib ga’ lungun ko nam. Sana dabra adaged e tin nib michuwan’dad ngay, machane ngad meybil gad ni ngeyag ni ngar nangfaned fan, fan ngodad, tiney e bani pag nge mil fan ngak facha’ nge yafos rok.
Fa’anra bay ni diyen nag bitir ndan lemnag ni ngan fakay, thingar daged e tu’ufeg, min pi’ e athamgil, ma, ngiyal’ nike tu’uf, min pi’ e ayuw ko salpiy, min pi’ gelngin fare mitin ni nge gargeleg fare tir ni nge yib nge ul’ul’ nag e yafos rok u fayleng.14
Ke Fel’ Usun Poef
Ulan e tabinaw romad, kan tawa’ath nagmad go napan riliw’ e duw kafram, ni reb e fal’yangren ni 16 e duw rok e yib i diyen. Ir nge fare chitamangin fare tir e daw ra mabgol gow, ma dar nangew rogon ni ngar ul’ul’ gow i yan nga m’on. Michuwan’ fare bpin ngay ni fare tir ni bay u mayal rok ab tawa’ath nib mangil. Diyen nag fare tir ni buchi buliyol me pag ba tabinaw ni nge poef fare tir ngar fakiyed. Chi buliyol ney e ba tawa’ath ko meybil rok, Bryce nge Jolinne. Kar tunguyew fithngan ni Emily ma kar filew ngak ni nge pagan’ ngak e Chitamangin nibay u Tharmiy nge fare Fak, ni Yesus Kristus.
Ke ilal Emily. Ma ke falfalan’ mad ngay ni Emily e ke lang’iy fak reb e bitir romow, Christian, ni kar mabgol gow ulan fare nu’un rok Somol. Emily nge Christian e bay buchreb e buliyol ni fak row e chiney.
Ke yoloy Emily: “Napan e ra mereb i pul ney ni gub diyen, kug tafney nag e ngiyal’ [nin] gargelegeg. Kug tafiney nag e chitiningig, ni 16 e duw rok. Napan ni gub diyen ma gube thamiy e amith nge tin ni be thil ko dowef rog, ma danki yag ma ug lemnag be’ nike diyen ni 16 e duw rok. … Gu ma yor napan ni gura tafney nag e chitiningig ni gargelegeg, ni manang ni dabiyag rok ni nge pi ngog e bin yafos [ni ba’adag ngog me pigeg ngan pofeg]. Dabyag ni nggu nangfan gubin e tin ni’i thamiy e chitingig ko re meruk i pul nem nib diyen rog—ni bay e gidii’ ni be pufthin nag ko napan ni be thil downgin, nge yafos rok ko napan ni kab fal’yangren ni thil, ni manang nra gargeleg e re tir ney nib tu’uf rok, ma nge pi’ ni nge poef be’. Gu be og nag e magar ngak ko n’en ni ke rrin’, nike mel’eg nike turguy ni dabin dang e yafos rog.” Mu’ nag Emily e thin rok, “Gu be og nag e magar ngak e Chitamangiy nibay u Tharmiy ko fare tonom rok nib thothup, nifan e galibthir rog [nra ayuwegew] gag, nge tempel nrayag ni ngan m’ag pa’ay riy ni nge par e tabinaw rodad ni manechubog.”15
Fare Tathapeg ni “fek bochi tir nge sak’iynag u p’eowcherad: Me longobiy pa’ ngak fachi tir me ga’ar ngorad, En nra ayuweg reb e pi bitir ney ni bochag e ke ayuwegneg”16
Fini Dowriy Yib pi Athap nib Mataw
Bay e tu’ufeg nge murnguy rog ngak e mabgol ndabiyag ni nge fakay e bitir nge pi’in ni bpin nge pumo’on ndawri yag ni ngar mabgol gad ni wod rogon fare motochiyel rok Got. Momaw’ ni ngan nangfan fan e biney e yafos ni fa’anra yibe sap ngay ni wod rogon ni be sap e fayleng ngay. I gag ni ta pigpig rok Somol, gube micheg ngom ni yul’yul’ rom ngak Yesus Kristus nge fapi m’ag rom, e ra fal’ag wa’atham ko biney e yafos nge tin ni gaba’adag nib mat’aw ko fare ngiyal’ rok Somol nib manechubog.17 Bay e falfalan’ ko milekag u roy u fayleng ndemuturug ni tin ni gadad be athapeg nib mat’aw e danir guy.18
Tomuren nikan gargel, fapi bitir e btu’uf ni ngan ul’ul’ ngan ayuwegrad. Boch e rib tu’uf e ayuw rorad nib gel. Gubin e duw ni be pi’ fapi bishof e ayuw nge gur ni gabe pi’ fare mukun salpiy ko fast offering nge ayuw ni bay nifan e gidii’ nike gafgow, miri’ay nge miri’ay e bitir ni kan tawa’ath nag e yafos rorad ni bachan e tiney e ayuw. Fare bin Somm’on e Presidency e karoged ni bayra pi’ed 20 million dolla ngak e UNICEF ni ngar ngongliyed l’agruw billion e tusha riy.19 Got e btu’uf fapi bitiri Rok.
Mel’eg nib Mataw ni ngan Gargelg Bitir
M’agfan’uy ngay ni yu yang u fayleng nib gel e mon’og nge fla’ab riy, e ri’in e bitir riy ni kan gargeleg.20 “Motochiyel rok Got ngak pi fak e ngar diyen gad miyed suguy dakean e fayleng.”21 Ngiyal’ ni ngan fakay e bitir fa urngin e bitir ni ngan fakay e kemus ni ban’an ni ngan dugliy u thilin e mabgol rom nge Somol. Nib mu’un e meybil nge mich ngay, biney ni ngan dugliy e ban’an nib fel’, nran thogthog nag ngom rogon.22
Gube weliy mornga’agen ba tabinaw rok Laing ni gidii’ nu Southern California. Yoloy Sister Rebecca Laing:
“Napan e summer ko 2011, rib fel’ rogon e tabinaw romad. Mabgol gow ni bay aningeg e bitir ni fakmow—duw rorad e 9, 7, 5, nge 3. …
“Diyen rog e [bgel] e m’ar riy … [ma] kug thamiyew nikan tawa’ath nagmow [ni rib gel] ni bay aningeg e bitir ni fakmow, [tafney nigew] nike polo’ gathon fare tabinaw romow. Napan e October ni gamed be motoyil ko general conference, kug thamiy ni kubay reb e bitir ni gamow ra fakay. Napan ni gu tafney nigew LeGrand e biney ma gamow meybil nag, … ku nangew ni bay reb e kanawo’ nib thil nike fal’ag Got nifan ngomow nib thil ko n’en ni kug tafney nigew.
“Tomuren reb e diyen nge gargel ni rib gel e momaw’ riy, kan tawa’ath nagmow ko buchreb e buliyol ni rib pidorang. Ku tunguyew fithingan ni Brielle. Btir nib ma’ang’ang. De n’uw napan ni kug diyen nag, ni kug bay ulan [fare singgil ko diyen], mug rung’ag laman e Thothup: ‘Kabay reb.’
“Dalip e duw nga tomuren, ma ki yib reb e ma’ang’ang, Mia. Brielle nge Mia e fagli falfalan’ ko tabinaw romad.” Mu’ nag e thin rok, “Bing owchey min leak u rogon nike dugliy Somol nifan ngodad e gubin ngiyal’ nra pi’ e falfalan’ ngodad ko bin ba’aray … ni ngan tagay ko tin ni gadad manang banan.”23
Somoel ma t’ufeg urngin e bitir nib t’uf riy’.
“Me fek e pi bitir roraed, ni tataʼareb, nge yibliy raed. …
“Ma napan… ni kar sap gaed nga tharmiy, … mar guyed e angel ni karbaed nga butʼ u tharmiy … ni gowa bilyeg raed e nifiy; me yib [fapi angel] … ngar chalongbiyed fapi bitir, … me machib fapi angel ngoraed.”24
Gube micheg ni fare milekag rok fare tir ku Got e dani tabab ko ngiyal’ ni yib nga fayleng ngabi fek e nifeng, ma darma mus ko ngiyal’ ni bay i yim’ u fayleng.
Thingar da ted u wun’dad ni gubin fapi bitir rok Got nib thothup e be yib nga fayleng ni nge tabab nag e birok e milekag.25 Thingar da piningrad ngar bad, min ayuwegrad, min tu’ufeg rad. Napan ni garam thapeg e pi bitir ney u dakean fithngan fare Tathapeg mag ayuwegrad ko milekag rorad nib manechubog, gube micheg nag ngom ni ra tawa’ath nigem Somol ma ra lukuyem ko tu’ufeg rok me adagem. U dakean fithngan Yesus Kristus, amen.