Guba Adag ni Ngguy fare Temple

Pi walageg nib tu’uf rog, gub falfalaen’ ni gadaed ba bay u ta’abang ko ra bin somm’on e mu’ulung ney ko general conference. Fapi tanon, pi tang, nge meybil kar fekdaed fare Kan Thothup—nge pi thamey ko magal nge athap.

Thamey ney kiyib pug uran ngog bin somm’on yay Kug waen ulan e Salt Lake Temple. Napan ni ku gub pagal. Gallabthir rog kar un’ew ngog. Ulan, kar talgow ni ngar mada’ nag fapi tamuruwel ko Temple. Kug waen nga m’on ngorow, ni kemus gag ko buchew e ngiyal’.

Kug mada’ ngak e ppin nib labthir ba’ piy nib wechwech ni bay e mad ko Temple nib wechwech. Ke sap ngog ke sminmin me yog nib achig laman, “Kammagr ni kam mub nga Temple, Brother Eyring.” Kug lemnag ni ir e angel bachane nike nang e fithingag. Kug pagtalin ni bay e babyor nga dakaen e mad rog ni bay fithingag riy.

Kug waen nga m’on mug tal. Sug sap nga lang ko p’eataayuw nib wechwech nib ga’ magal ni kug thamiy ni woed ke bing ko lanelang. U ngiyal’ ney, biney e pithin nike yib ulan e tafney rog ni: “Kug paer ura’ kafram.” Machane ni rib papay ke yib ulan e tafney rog, gathi thin rog, pi thin ney: “Danga’, dabmu paer ura’ kafram.” Gabe leam nag e ngiyal’ u m’on nikan gargalegem. Um moy u bang ni boed e biney.”

Wuru’ u doew ko pi Temple rodaed, gadaed ma tay e thin riy nibe ga’ar, “Thothup ngak Somoel.” Gu manang nifan ngog fapi thin ney e ba riyul’. Fare Temple e tafen nib thothup ni ma yib nib moem e yi’iy ngodaed fa’an ra bing e gum’ircha’dead nge gadaed be mat’aw.

Borran, Kug thamey ta’abrogon e Ya’al. Boch e thin ulan e gam’ing ko Temple ke fek ngog e thamey ni be yik e gum’ircha’eg, nike micheg gubin pinen kug guy e be riyul’ ni mornga’agen e yafos rog. N’en ni gu thamiy e be yipfan e yafos rog nga m’on, nri buch ni 40 e duw nga tomuren napan nin piningeg Somoel ni nggu pigpig.

Kug thamey ta’abrogon pi’nen napan kug mabgol u lane Logan Utah Temple. President Spencer W. Kimball ke rin’ e gam’ing ko mabgol. Ulan boch e thin rok ke yog, ku pii’ e fanow ney, “Hal nge Kathy, mu fasgow ulan e rogon napan ra yib e pinning ngom, rangam marow nib moem rogon.”

Napan ke yog pi thin ney, kug sap u dakean e tafney rog ni rib fel’, e farengi falang nib tolang nge kanawo’ me yaen nga dakean ko farengi falang. Bay e yoror nib wechwech ma paer u gilaey’ ko kanawo’ nge yib ulangin boech e gakiy’ u dakean e farengi falang. Bay e na’un nib wechwech ma paer ufithik fapi gakiy’.

Bin migid e duw, kug guy e farengi falang napan e chitamangin e ppin rog ke drive nag a karo rok ko fare pi’ i kanawo’. Ni ta’abrogon ko pi’nen kug sap napan President Kimball ke pii’ e fanow rok ulan fare Temple.

Napan kug wared nga dakean farengi falang, chitamangin e ppin rog ke tal’eg chuchugur ko na’un nib wechwech. Ke yog ngomow kar ba’adag ni ngar chuwi’iy e na’un ney nge yow ba’adag e fak ni ppin nge gag ni nggu paer ulan e na’un nib achigchig. Kar paered ulane na’un, ni chuchugur ngak. Ere, ulan ragag e duw, ku pirew ulan e re na’un ney nib fel’ ko tabinaew rog, ppin rog ra yoeg gubin e rran ni, “Thingari ba’adag biney, machane dabi paerew ura’ nib n’uw napan.”

Yib ba kol ko fare Church Commissionner ko Education, Neal A. Maxwell. Pi mulwol rok President Kimball ni nggu “marow nib moem rogon” e buch. Pinning ney bay yipfan ni nggu pag e yafos nib fel’ rogon ni nggu pigpig ulan e nam ni dabgu nang. Tabinaew rog be fel’ rogon ni nggu pag e yafos ney nib fel bachane e profet, ulan e Temple nib thothup, e tafen ko yi’iy, ke sap e pi’nen ni dabi buch ni ke ta’ermadliy ngomow.

Guma nang ni pi Temple rok Somoel e be tafen nib thothup. Fan rog ni nggu non mornga’agen e pi Temple niba gelnag e ba’adag rodaed ni ngaed mang nib mat’aw nifan boch i pi’nen ni ra buch ngodaed ulan fare Temple.

Ni fan ngog, ga’fan e athamgil ngog ni nggu mang nib mat’aw ko gam’ing ko fare Temple bachane ke yog Somoel nifan pi na’un Rok nib thothup.

“Fa’an e gidii’ rog ra toyed e na’un nifan ngog ulan fithingan fare Somoel, nge tal’ pi’nen nib alit ni de yib ulangin, de kireb nag, fal’ngin rog ra paer u dakean;

“Arragon, gube paer riy, machane gura yib ulangin, nge pi’in nib machalbog gum’ircha’raed ma ranod ulanggin nge guy Got.

“Machane fa’an ni ngam kireb nag dab gu yib ulan, nge fal’ngin rog dabi paer ura’; bachane dabgu yib ulan e Temple nib kireb.”¹

President Russell M. Nelson ke weliy ngodaed ni ngaed “sap” fare Tathapeg ulan fare Temple ni woed rogon ni gadaed manag Ir. Keyog President Nelson: “Gadaed mang Ir. Gadaed manang e murwel nge gul’il’ungun. Nge gadaed ma thamey e gelingin nifan e yafos Rok.”²

Fa’an gur fa gag ra yaen nga Temple ni dabda buchuw machalbog, ma dabiyog ni ngad sap, u dakean e gelingin fare Kan Thothup, pi fil mornga’agen fare Tathapeg ulan fare Temple.

Fa’an gadaed be mat’aw ningaed thapeg e fil ney, ura’ rangaed ga’ nag e athap, falfalaen’ nge ba’adag rodad u fithik e ngiyal’ ulan e Temple ufithik e yafos rodaed. Binem e athap, falfalaen’ nge ba’adag rodaed rangam thapeg u dakean e pi gam’ing ulan fare Temple nib thothup. Ulan fare Temple rangad thapeg e pagaen’ rodaed ko tha’ ko tabinaew rodaed ra ul’ul’ tomuren e yam’ nge gonpon ni manimus.

Bo’or e duw faram, napan kug pigpig ko bisof, ta’areb e pagal dabug e pinning rog ni nge fel’ rogon e yafos rok ni nge paer ko tabinaw ko gubin fen. Ke weliy ngog marunga’agen e ngiyal’ nib falfalaen’ ko pi fagar rok. Kug ba’adag ni nge non ngog. Ke non ngog mornga’agen ta’areb e madnam rok, u fithik gubin ni ga’ lam ko pi’nen, ni ke thamey ni yigo’ ir rok. Kug fith ngak mang ke buch. Ke yog ni ke puguran e ngiyal’ napan e bitir, ke paer nga but’ u dakean aay e chitinngin, nge pa’ ni be nglobiyeg. Nap’an ni ke yoeg fare ya’ar nem, ke maap luwan. Kugog ngak e tin nib riyul ni gumanang: “Kemus rogon rayog ni ngam thapeg e thamey nem ko tabinaew nbi manemus ni fa’an gara mang nib mat’aw nge ayuweg reb e gidii’ nira thapeg fapi gam’ing ko fare Temple.”

Dabda nanged gubin e ganop ko e tha’ ko tabinaew ulan fare tafen ko ya’el fa mang gara buch napan ni ngaed fasgad ko yam’. Machane gadaed manang ni fare profet Elijah ke yib woed ni ke micheg ni ngan ma’ag fapi gum’ircha’en fapi chitimangiy ko fapi fak, ng ku fapi fak ko fapi chitimangiy.³ Gadaed ma nang e falfalaen’ nib manimus rodaed ba t’uf ni ngaed guyed rogon nib gel ni ngaed ayuweg yo’or e gidii’ ma thapeged ta’abrogon e falfalaen’.

Gube’adag ni nggu pinning e tabinaew rog ni ngaed manged nib mat’aw ni ngar thapeged fapi gam’ing ko fare Temple. Ireray e yang ko e micheg ko ta’abang ni tay piyu Israel ulan e bin somm’on e rran ni l’agruw u barba’ fare veil.

Rib ga’ e ngiyal’ ni fan ney e napan e chonngin ko tabinaew ni bay yangren. Yaed e kan gargel nagraed nibay fare tomilang rok’ Kristus roraed. Be pii’ rogon ngoraed ni ngar thameyed e tin ni mat’aw nge kireb. Bachan e biney, fa’an ni ngar sap e sasing ko Temple ra pii’ ngoraed e ba’adag ni ngar baed ulan reb e rran.

Ra yib a rran napan, ni yangren, ra ngar thapeg e recommend ko Temple ni ngar rrin’ed e tawfe nifan e gidii kar m’aed ulan fare Temple. U ngiyal’ ney, ra gel’nag e thamey roraed ni gubin e gam’ing ulan fare Temple ra yip’ nga Tathapeg nge Bayul Rok. Napan ni ngar nanged kar ayuweg e gidii ulan e tafen ko ya’el ni ngar thag e denen roraed, tham roraed ra gel nag nifan e pigpig ngak Tathapeg ulan e muruwel nib thothup Rok ni ayuweg e fak nu Chitimangdaed nu tharmiy.

Kug guy biney e gelingin ni ke thilyeg e yafos rok be’ nib fal’yangren. Bo’or e duw faram, kug fek fakag nib ppin nga Temple. Ir e bin tomur ni tawfe ni fan ngak be’ nike yim’ ko ga gin ni yima tawfe riy. Ke fith ngak e fakag nib ppin fa’an rayog ni nge paer boech ere ni ngar rrin’ gubin e gam’ing nifan ko urngin’ e pi fithingraed ni kar fal’eg. Ke yog nrayag.

Ere, kug sap napan fakag nib ppin ni ke yaen nga font ko tawfe. Me tabab e gam’ing ko tawfe. Raen ni ke yaen nga dakean e owchen fakag gubin yay ni ke yib lane lang ko raen ney. Ke fith ngak bayay nge bayay, “Rangam rrin’ boch reb?” Urngin yay make fulweg rayag.

Ke magafaen’ an’ug, kug lemnag ni ra tal ko reb e gam’ing ney. Machane rayog ni nggu pugraen miyuluy rok napan ke fith ngak fan rayog ni nge rrin’ boch reb nge me fulweg u dakean e lam nib achichig ni, “Rayag.” Ke rrin’ mada’ ko urngin e be’ u dakaan e babyor kar thapeged e tawa’ath ko tawfe u fithngan Yesus Kristus.

Napan kug waen u wuru’ e Temple biney e neap’, kug lemnag mornga’agen mang ni kug sap. E bitir ni ke lane lang nge thilyeg u mo’on ngog napan ni ke pigpig fare Somoel ulan e na’un Rok. Gube pugraen e thamtham ko magal nge gapas napan kug warow u wuru’ fare Temple.

Yo’or e duw ke buch. De tal’ ni nge fulweg e rayag nifan e duwer rok Somoel fa’an ni ra rrin’ boch reb nifan Ngak dariy fan ni mo’omaw’. Ireray e pigpig ko Temple ra rrin ni nge thilyeg nge fek daed ngalang. Ireray e athap rog nifan ngomed nge tabinaew romed nira ga’ nag e ba’adag ni be mang nib mat’aw ni ngam maroed ulan fare na’un rok Somoel bo’or yay.

Ba’adag ni nge pinningmed uram. Gube meybil ni ngam gelnag e ba’adag roraed ulan gum’ircha’raed pi bitir ko Chitimangiy nu Tharmiy ni ngar ranoed uram, ni ngar thamiyed chuchugur Ngak, ni nge yag ni ngam pining fapi gidii’ rom ni kakrom ni ngar bad Ngak nge ngom ni manechubog.

Pi thin ney e fan ngodaed:

Gube micheg ni gadaed e pifak e Chitamangiy nu Tharmiy nib sug ko tu’ufeg. Ke mel’eg Fak nib Tu’uf Rok, ni Yesus Kristus, ni nge mang e Tathapeg nge Tabiyul rodaed. Kemus a rogon nrayog ni ngad suled Ngorow nge tabinaew rodaed ni u dakean e pi gam’ing ko fare Temple nib thothup. Gube micheg ni President Russel M. Nelson e bay urngin fapi key ko priesthood ni ma fal’eg rogon e yafos nib manemus nifan ngak gubin e bitir ku Got. Gube micheg u dakean fithngan Yesus Kristus nib thothup, amen.