Wanem we Yumi Gat we I Moa Bigwan

Ol skripja oli stap tokbaot wan yang rij rula, we i ron long Jisas, i nildaon long leg blong Hem, mo wetem tru tingting mo hat, i askem Masta: “?Bae mi mekem wanem blong kasem laef we i no save finis?” Afta we Hem i luklukbak long wan longfala lis blong ol komanmen we yangfala ia i bin fetful blong folem, Jisas i talem long man ia blong hem i salem wanem we hem i gat, givim mane i go long ol puaman, tekem kros blong hem mo biaen long Jisas. Tok stret blong Jisas i mekem se yang rula ia—nomata hem i werem ol sus we i sas—blong leg blong hem i kolkol, mo hem i gowe, i harem nogud, from se, olsem we skripja i talem: “hem i gat plante samting.”¹

I klia we, hemia i wan stori wetem woning abaot fasin blong yusum ol rij o plante samting we yumi gat, mo nid blong ol puaman. Be long en, hem i wan stori abaot fasin blong givim evri samting wetem hat mo tingting long tabu responsabiliti we yumi kasem. Wetem o witaot ol rij samting, wanwan long yumi i kam go long Kraes wetem semfala komitmen ia we i no gat kondisen long hem, long Gospel ia, olsem we Hem i bin wantem luk long yang man ia. Long lanwis blong ol yut blong tedei, yumi mas talem se yumi “insaed fulwan.”²

Long gudfala toktok blong hem, C. S. Lewis i stap mekemap tingting blong hem se Lod i stap talem wan samting olsem: “Mi no wantem taem blong yu, o mane blong yu, o wok blong yu, be moa nao, mi wantem YU. [Tri ia we yu stap katem klinim.] Mi no wantem katem wan branj long ples ia mo wan branj longwe, mi wantem katemaot ful tri. Mo tut ia. Mi no wantem drilim hol l’hem, o putum gol, o fulumap. Mi wantem pulumaot fulwan. Mo wanem i stap, i we, mi wantem yu blong givim mi ful yu we i folem fasin blong wol. … Mo bae mi givim yu wan niu yu. I tru, bae mi givim Miwan long yu: tingting blong mi bae i kam tingting blong yu.³

Olgeta evriwan we oli toktok long jeneral konfrens ia, evriwan bae i talem, long defdefren wei, wanem we Kraes i bin talem long rijman ia: “Kam long Sevya blong yu.” Kam fulwan mo wetem ful hat blong yu. Tekem kros blong yu, nomata se hem i hevi hamas, mo folem Hem.”⁴ Bae oli talem samting ia, we oli save se, insaed long kingdom blong God, i no gat ol hafhaf samting, i no gat stat, i no gat stop, i no gat blong tanem gobak. Olgeta we oli bin askem raet blong berem wan papa o mama we i ded, o talem tata long ol nara memba blong famli, ansa blong Jisas i strong mo i klia: “Lego hemia long ol narawan oli wokem,” Hem i talem. “Man we i stap holem stia blong bot, be oltaem i stap lukluk biaen, hem i no naf blong kam we God i King blong hem.”⁵ Taem Lod i askem ol had samting blong yumi mekem, iven ol samting we oli agensem wanem hat blong yumi i wantem, tingbaot se tru promes we yumi mekem long wok blong Kraes, i mas kam antap evriwan long laef blong yumi. Nomata we Aesea i talem gud long yumi se hemia i stap, from we i no gat mane naf blong pem o i no gat praes blong hem,⁶—mo from hemia—yumi mas rere, olsem T. S Eliot i talem, blong yumi pem “wetem evri samting, i no haf.⁷

I tru. Yumi evriwan i gat sam strong nogud fasin, o samting we yumi no strong long hem, o gat wan histri we bae i holemtaet yumi blong draon fulwan long wok ia. Be God, i Papa blong yumi, mo Hem i gud tumas, we i save fogiv, mo fogetem ol sin we yumi lego fogud, maet from se yumi givim Hem plante janis blong Hem i praktisim hemia. Long eni kes, i gat tabu help i kam long evriwan long yumi, long eni aoa we yumi filim blong mekem wan jenis long fasin blong yumi. God i givim wan nara hat long Sol.⁸ Esikel i bin askem strong long Isrel blong bifo blong i sakemaot laef blong olgeta bifo mo mekem wan niu hat mo wan niu spirit.⁹ Alma i singaotem evriwan blong gat “wan bigfala jenis insaed long hat”¹⁰ we bae i mekem sol blong yumi i kam antap moa, mo Jisas Hemwan i bin tijim se sapos wan man i no bon bakegen, bambae hem i no save luk kingdom blong God.¹¹ I klia se, rod ia blong save jenis, mo fasin blong laef long wan moa hae level, i oltaem stap olsem wan long ol presen we God i givim long olgeta we oli lukaotem.

Ol fren. Long taem naoia, yumi faenem eni kaen seraot, mo smol seraot, ol set mo ol smol set, ol dijitol traeb, ol politik aedentiti, wetem plante moa nogud samting raon long yumi. ?Bae yumi askem yumiwan sapos “wan hae mo moa tabu”¹² laef, folem toktok blong Presiden Nelson, i wan samting we yumi stap lukaotem, o no? Taem yumi mekem olsem, bae i gud blong yumi tingbaot gudfala pat ia long Buk blong Momon we i tokbaot ol pipol ia we oli bin askem mo oli bin ansa kwestin ia wetem wan yes.

“Mo i bin hapen se i no gat eni rao long graon, … from lav blong God we i bin stap insaed long hat blong ol pipol.

“Mo i no bin gat ol tingting blong wantem samting blong narafala man, o ol rao, o ol faet, o … eni kaen fasin blong gat rabis tingting; mo i tru we i no save gat wan pipol we i moa hapi long medel blong evri pipol we han blong God i mekem olgeta.

“I no bin gat stilman, o ol man blong kilim man i ded, mo tu, i no bin gat Ol Man blong Leman, o eni kaen pipol we oli singaotem Ol Man blong _; be oli bin stap wan; oli ol pikinini blong Kraes, mo oli gat raet long kingdom blong God.

“!Mo hamas nao oli bin kasem blesing!¹³

?Wanem hem i ki blong hapines mo hapi laef ia? I stap insaed long toktok ia: “Lav blong God … i bin stap insaed long hat blong ol pipol.”¹⁴ Taem we lav blong God i givim stret tiun insaed long laef blong yumi, ol rilesensip blong yumi wetem ol narawan, mo long en, i givim tiun blong filing blong yumi long evri kaen man, nao bae ol olfala lukluk, nem, mo seraot bae oli stat blong lus, mo pis i kam antap. Hemia stret wanem i bin hapen long eksampol ia long Buk blong Momon. I nomo gat Ol Man blong Leman, o blong Jekob, o blong Josef, o blong Soram. I nomo gat ol “Man blong-.” Ol pipol oli bin tekem wan ful aedentiti we i katemaot ol narawan. I talem se, evriwan i “ol pikinini blong Kraes.”¹⁵

Yes. Yumi stap tokbaot fasfala hae komanmen we oli givim long famli blong man—we i blong lavem God wetem ful hat, we yumi no holemtaet yumi, o putum kondisen long hem, be wetem ful hat, paoa blong bodi, maen mo paoa.¹⁶ Lav ia blong God i fasfala hae komanmen long yunives. Be fasfala bigfala trutok long yunives, i we, God i lavem yumi long semfala wei ia– wetem ful hat, we Hem i no holembak Hem, o mekem dil, be wetem ful hat, paoa long bodi, maen mo paoa long tingting blong Hem. Mo taem we ol bigfala fos blong hat blong Hem i mitim hemia blong yumi we yumi no blokem olgeta, wan bigfala paoa blong spirit mo gud fasin i faerap. Nao, olsem Teilhard de Chardin i raetem: “blong wan nambatu taem long histri blong wol, bae man i faenem faea.”¹⁷

Long tetaem ia, mo long tetaem ia nomo, bae yumi kam gud blong holem nambatu hae komanmen long sam wei we yumi no giaman, o yumi no tru. Sapos yumi lavem God inaf blong traem stap fetful long Hem, bambae Hem i givim yumi paoa ia, wei ia, mo strong tingting ia blong wantem mekem, mo wei blong lavem neba o yumiwan bakegen. Maet long tetaem ia bae yumi save talem bakegen: “i tru we i no save gat wan pipol we i moa hapi long medel blong evri pipol we han blong God i mekem olgeta.”¹⁸

Ol brata mo sista. Mi prea se bae yumi win long ples ia we yang rij man ia i mestem; se bae yumi tekem kros blong Kraes long yumi, nomata i had hamas, mo nomata wanem i problem, mo nomata praes blong hem. Mi witnes se, taem yumi mekem tabu promes blong folem Hem, rod ia, bae long wan wei o nara wei, i pasem wan hat blong ropnil, mo wan kros blong Ol Man Rom. I nomata hamas mane o samting hem i bin gat, yangfala ia i no rij inaf blong pem rod blong hem aot long ol apoenmen wetem ol simbol ia, mo yumi tu i semmak. Blong kasem blesing ia blong stap kasem samting we i moa hae long evri samting we bae yumi save gat—we i presen blong laef we i no save finis—i wan smol samting we Hem i askem yumi, blong stap strong long rod ia blong stap folem Hae Pris blong Bigfala Wok blong yumi, Hae Sta blong tedei, Loya mo King blong yumi. Mi testifae wetem olfala Amalekae we yumi no andastanem gud tumas, se wanwan long yumi i mas “givim ful sol blong yumi olsem wan ofring long Hem.”¹⁹ Abaot kaen strong tingting mo fasin ia, yumi sing olsem:

Long tabu nem blong Jisas Kraes, amen.