Blong Stap Wan Man blong Folem Kraes

Long skripja stadi blong miwan, mi sapraes long jenis blong laef blong Sol blong Tasas, we afta, oli save hem olsem Pol, olsem we oli tokbaot long Baebol.

Pol i wan man we i wok strong blong spolem Jos mo ol Kristin man. Be from paoa blong heven mo Atonmen blong Jisas Kraes, Hem i bin jenis fulwan, mo hem i kam wan long ol nambawan wokman blong God. Eksampol we hem I folem long laef, i Sevya Jisas Kraes.

Long wan long ol tijing blong Pol i go long Ol Man Korin, hem i invaetem olgeta blong oli folem hem olsem we hem i wan we i stap folem Kraes (luk long 1 Korin 11:1). Hemia i wan tru invitesen, we i laef long taem blong Pol kasem tedei: blong stap wan man blong folem Kraes.

Mi stat blong stap tingting long wanem i minim blong kam wan man blong folem Kraes. Mo moa impoten, mi stat blong askem: “?Long wanem wei nao mi mas folem Hem?”

Blong stap olsem wan man blong folem Kraes i blong traem blong mekem ol aksen, ol fasin, mo laef blong yumi i semmak olsem hemia blong Sevya. Hem i blong developem ol klin fasin. Hem i blong stap olsem wan tru disaepol blong Jisas Kraes.

Mi bin stadi long sam pat blong laef blong Sevya, mo mi holemtaet, olsem pat blong mesej blong mi tedei, fo long ol kwaliti blong Hem we mi traem blong folem, mo bae mi serem wetem yufala tedei.

Fasfala kwaliti blong Sevya i fasin blong gat tingting i stap daon. Jisas Kraes i putum tingting i stap daon long taem blong laef bifo laef long wol ia. Long Kaonsel long Heven, Hem i luksave mo i letem tingting blong God blong i win insaed long plan blong sevem evri man. Hem i talem, “Papa, bae mi mekem folem tingting blong yu, mo glori bae i blong yu blong oltaem” (Moses 4:2).

Yumi save se Jisas Kraes i tijim abaot fasin blong putum tingting i stap daon mo i putum Hemwan i stap daon blong mekem wok blong Papa blong Hem.

Bae yumi laef folem fasin blong putum tingting i stap daon from se bae i karem pis i kam (luk long Doktrin mo Ol Kavenan 19:23). Fasin blong putum tingting i stap daon i kam bifo glori, mo i karem wanem we God i laekem long yumi: “Yufala i mas mekem tingting blong yufala i stap daon. Nao long fasin ya, yufala i save givhan gud long yufala [“God i agensem olgeta we oli praod, be olgeta we tingting blong olgeta i stap daon, hem i stap givhan long olgeta long gladhat blong hem” (1 Pita 5:5). Fasin blong putum tingting i stap daon i karem ol ansa we i kwaet. Hem i stamba blong stret moa gud fasin.

Elda Dale G. Renlund i bin tijim:

“Ol pipol we oli wokbaot wetem God wetem tingting we i stap daon, oli tingbaot wanem we Papa long Heven mo Jisas Kraes i bin mekem blong olgeta.”

“Yumi mekem samting wetem ona long God taem yumi wokbaot wetem Hem wetem tingting i stap daon.” (“Mekem Stret mo Gud Fasin, Lavem Ol Man Tumas, mo Wokabaot wetem God wetem Tingting I Stap Daon,” Liahona, Novemba 2020, 111, 109).

Nambatu kwaliti blong Sevya i fasin blong gat strong paoa long tingting. Taem we mi tingbaot Jisas Kraes taem hem i gat 12 yia, hem i stap sidaon long tempol blong God wetem ol tija blong loa mo i stap tijim olgeta abaot ol tabu samting, mi luksave se hem i bin gat finis, long stat blong yang laef blong hem, wan strong paoa long strong tingting, wan spesel strong paoa long tingting. Bae yumi ting se ol dokta blong loa oli tijim yang boe ia, be hem nao i stap tijim olgeta taem “oli stap lisin mo askem Hem kwestin” (Josef Smit Translesen, Luk 2:46 [insaed long Luke 2:46, futnot c]).

Mitufala i wok long wan fultaem misin long Demokratik Ripablik blong Kongo Mbuji‑Mayi Misin long 2016 kasem 2019. Rod blong travel long misin blong go long wan son i go long narafala son, hem i blong draev long rod. Wan faet i bin hapen long eria ia, wetem ol grup blong ol rabis man we oli karem naef blong olgeta mo stanap long rod mo stap stopem ol man we oli travel.

Faef misinari i travel long wan son olsem pat blong transfea oli ol viktim blong smol faet we i brokaot. From mifala I fesem kaen hadtaem ia finis, mifala i stat blong fraet from laef mo sefti blong mifala, iven mifala i gat tu tingting blong travel long rod ia blong visitim ol misinari mo gat ol son konfrens. Mifala i no save wetaem bae ol faet ia bae i stop. Mi raetem wan ripot, mo sendem i go long Eria Presidensi mo talemaot ol filing blong fraet blong mifala blong gogohed blong stap travel long rod ia we hem i wan rod ia nomo blong save kasem ol misinari.

Long ansa blong hem, Elda Kevin Hamilton, we hem i Presiden blong Eria long Saot Is blong Afrika, i raet long mi: “Kaonsel blong mi long yu, hem i blong mekem wanem yu save mekem. Stap waes mo stap prea oltaem. No putum yuwan o ol misinari blong yu long denja, be long semtaem go fored wetem fet. ‘Spirit we God i givim long yumi, i no blong mekem yumi fraet… i blong mekem yumi gat paoa, blong mekem yumi lavem man, mo i blong mekem yumi naf blong blokem [ol nogud tingting].’ (2 Timoti 1:7).”

Toktok ia we i kam wetem paoa, i bin leftemap mifala mo i letem mifala blong gohed blong travel mo blong givim seves wetem strong tingting kasem long en blong misin blong mifala from se mifala i harem daereksen blong Papa blong mifala long Heven tru long skripja ia.

Long ol skripja blong tedei, yumi ridim ol toktok blong insperesen we i kam tru long Profet Josef Smit we i stap luklukbak toktok blong Lod blong leftemap tingting blong yumi: “Ol brata. ?Olsem wanem? ?Bae yumi no gohed long wan bigfala wok olsem? Go fored be i no biaen. !Gat strong paoa long tingting ol brata, mo gohed, go fored kasem viktri! (Doktrin mo Ol Kavenan 128:22).

Bae yumi gat strong paoa long tingting blong mekem wanem i raet, iven sapos I no popula—gat strong paoa ia long tingting blong difendem bilif blong yumi mo tekem aksen folem. Bae yumi gat strong paoa long tingting blong sakem sin evri dei, gat strong paoa long tingting blong akseptem tingting blong God mo obei ol komanmen blong Hem. Bae yumi gat strong paoa long tingting blong laef folem wan stret mo gud laef, mo mekem wanem yumi sapos blong mekem long ol defren responsabiliti mo posisen we yumi gat.

Nambatri kwaliti blong Sevya hem i fogivnes. Long taem blong seves blong Hem long wol ia, Sevya i sevem wan woman we i komitim adaltri mo oli wantem stonem hem. Hem i talem long woman ia “go hom mo yu nomo mekem sin bakegen” (Jon 8:11). Hemia i pusum woman ia blong i sakem sin mo i kasem fogivnes, olsem we skripja i raetem, “woman ia i givim glori i go long God long aoa ia mo i bilif long nem blong Hem” (Josef Smit Translesen, Jon 8:11 [long John 8:11, futnot c]).

Long taem blong wan Krismes divosen long Disemba 2018 profet blong yumi Presiden Russell M. Nelson i tokbaot fofala presen we yumi kasem long Sevya. Wan long ol presen ia, we Sevya i givim long yu, i paoa ia blong fogiv:

“Tru long bigfala Atonmen blong Hem, yu save fogivim olgeta we oli mekem nogud long yu, mo oli neva akseptem responsabiliti ia se oli mekem nogud tumas long yu.

“Plante taem, i isi blong fogivim wan we i tru mo i putum tingting i stap daon blong askem fogivnes. Be Sevya bae i givim yu paoa blong fogivim eniwan we i mekem nogud yu long eni wei” (“Four Gifts That Jesus Christ Offers to You”[ Presidensi Krismes Divosen, 2 Dis 2018], broadcasts.ChurchofJesusChrist.org).

Bae yumi fogivim wanwan long yumi, blong Papa i save fogivim yumi. Blong fogivim wan i mekem yumi kam fri, mo i mekem yumi kam klin inaf blong yumi tekem mo kakae sakramen evri Sandei. Fogivnes i askem yumi blong stap tru disaepol blong Jisas Kraes.

Nambafo kwaliti blong Sevya, hem i sakrifaes. Hemia i pat blong gospel blong Jisas Kraes. Sevya i givim olsem bigfala sakrifaes, laef blong Hem, blong Hem I pemaot yumi. Taem Hem i harem sobodi from sakrifaes ia, Hem i askem Papa blong Hem blong karemaot kap ia long Hem, be Hem i komplitim sakrifaes ia we I no save finis Hemia nao Atonmen blong Jisas Kraes.

Presiden M. Russell Ballard i tijim hemia: “Sakrifaes i soemaot stret lav [ia]. Mak blong lav we yumi gat long Lod, long gospel, mo long ol brata mo ol sista blong yumi, yumi makemaot wetem wanem yumi glad blong givim olsem sakrifaes.” (“The Blessings of Sacrifice,” Ensign, May 1992, 76).

Yumi save sakrifaesem taem blong yumi blong mekem wok blong givhan, blong givim seves long ol narafalawan, blong mekem famli histri wok, mo blong mekem ol koling blong yumi long Jos.

Yumi save givim ol mane blong yumi taem yumi pem taeting, ol fas ofring mo ol narafala donesen blong bildim kingdom blong God long wol ia. Yumi nidim blong mekem sakrifaes blong kipim ol kavenan we yumi mekem wetem Sevya.

Prea blong mi se, taem yumi folem Jisas Kraes mo yusum ol blesing blong Atonmen blong Hem, bae yumi putum tingting blong yumi i stap daon moa, yumi gat moa strong paoa long tingting, yumi save fogiv oltaem mo oltaem, mo yumi givim moa sakrifaes from kingdom blong Hem.

Mi testifae se Papa blong yumi long Heven i laef mo Hem i save wanwan long yumi, se Jisas Hem i Kraes, se Presiden Russell M. Nelson i profet blong God blong tedei. Mi testifae se Jos Ia blong Jisas Kraes blong Ol Lata-dei Sent i kingdom blong God long wol ia, mo Buk blong Momon i tru. Long nem blong Jisas Kraes, Ridima blong yumi, amen.