Pis blong Kraes I Katemaot Nogud Filing Agensem Man

Ol dia brata mo sista. Long taem blong wan tes blong eksasaes, hat i wok fulap moa. Hat we i save handelem man i wokbaot, maet i save gat hadtaem blong sapotem man we i ron i go antap long hil. Long wei ia, eksasaes tes i save soemaot ol sik we oli haed, we man i no save luk. Eni problem we oli save faenem, bae oli save tritim bifo i mekem ol bigfala problem long evri dei laef.

!KOVID 19 wol sik i bin mekem plante long wol oli gat wan eksasaes tes! Tes ia i soem ol defdefren risal. Oli mekem ol stik meresin we oli sef mo oli wok.¹ Ol profesonol long helt, ol tija, ol kea wokman, mo ol narawan oli sakrifaesem laef—mo gohed blong mekem. Plante pipol oli soem bigfala hat mo fasin we i kaen—mo gohed olsem. Be yet, sam samting i no stret gud yet. Sam grup blong pipol oli bin safa—mo gohed blong safa. Olgeta we oli wok blong stretem ol samting we oli no stret, yumi leftemap tingting blong ol mo talem tangkyu long olgeta.

Wol sik ia i wan eksasaes tes blong spirit long Jos blong Sevya mo ol memba blong hem Ol risal ia tu oli defdefren. Laef blong yumi i kasem blesing tru long wok blong givhan long wan “wei we i moa hae mo moa tabu,”² wetem Kam Folem Mi kurikulom, mo fasin blong lanem gospel long hom we i senta mo Jos i sapotem. Plante oli givim help wetem lav mo sore, mo oli givim kamfot long ol taem ia we oli had, mo oli gohed blong mekem.³

Yet, long sam kes, ol eksasaes tes blong spirit ia oli soem se sam oli stap lei long saed blong raorao mo fasin blong seraot. Hemia i minim se yumi gat wan wok blong mekem blong jenisim hat blong yumi mo kam wan moa olsem ol tru disaepol blong Sevya. Hemia i no wan niu jalenj, be i wan impoten wan.⁴

Taem we Sevya i visitim Ol Man blong Nifae, Hem i tijim: “Bae i no gat eni rao long medel blong yufala. … Hem we i gat spirit blong raorao i no blong mi, be hem i blong devel, we i papa blong raorao, mo hem i tantanem hat blong ol man blong raorao wetem kros, wan wetem narawan.”⁵ Taem yumi raorao wetem wanwan long yumi wetem kros, Setan i laf, mo God blong heven i stap krae.⁶

Setan i laf mo God i krae from tufala risen ia. Faswan, raorao i daonem paoa blong yumi olsem ol witnes long wol blong Jisas Kraes, mo fasin blong pemaot man ia we i kam tru long “ol gudfala wok, mo sore, mo gladhat” blong Hem.⁷ Sevya i talem: “Wan niufala komanmen mi givim long yufala, blong yufala i lavlavem yufala … “Nao from we yufala i stap lavlavem yufala, bambae olgeta man oli luksave se yufala i man blong mi.”⁸ Narasaed blong hemia tu i tru—evriwan i save se yumi no man blong Hem taem yumi no lavlavem wanwan long yumi. Lata-dei wok blong Hem i no go gud taem raorao mo nogud filing agensem man⁹ i stap long medel blong ol disaepol blong Hem.¹⁰ Nambatu, raorao i no helti long spirit blong yumi, wanwan man mo woman. Hem i stilim pis, glad, mo spel, mo paoa blong yumi blong filim Spirit i slodaon.

Jisas Kraes i eksplenem se doktrin blong Hem, i no blong “tantanem hat blong ol man blong raorao wetem kros, wan wetem narawan, be hemia i doktrin blong [hem], se ol samting olsem oli mas stop.”¹¹ Sapos mi kwik blong mi harem nogud, o fesem ol defren kaen tingting blong man wetem kros o jajmen, mi “no pasem” eksasaes tes blong spirit. Tes ia we mi no pasem, i no minim se bae mi no gat hop. Be i poenemaot nomo se mi nid blong jenis. Mo hemia i gud blong save.

Afta long visit blong Sevya long Ol Amerika, ol pipol oli bin stap wan; “I no bin gat raorao long graon.”¹² ?Yu yu ting se ol pipol oli bin stap wan from evriwan i bin semmak, o from se oli no gat ol defren kaen tingting? Mi no ting. Be, raorao mo nogud filing agensem man i bin lus from se oli putum fasin blong stap olsem disaepol blong Sevya i kam faswan antap long evri samting. Ol samting we oli defren bitwin olgeta i no kasem mak ia blong lav long Sevya we oli bin gat, mo oli “oli gat raet long kingdom blong God.”¹³ Risal i we, “i no save gat wan pipol we i moa hapi … we han blong God i mekem olgeta.”¹⁴

Yuniti, i nidim plante hadwok.¹⁵ Hem i kam antap taem yumi stap fidim lav long God insaed long hat blong yumi¹⁶ mo yumi lukluk nomo long fiuja blong yumi we i no save finis.¹⁷ Yumi kam wan from yumi evriwan i gat wan semmak aedentiti olsem pikinini blong God¹⁸ mo semmak komitmen long ol trutok blong gospel we i kambak. Long nara wei raon, lav blong yumi long God mo blong stap olsem disaepol blong Jisas Kraes, i mekem se yumi gat tru wari long ol narawan. Yumi tekem se i impoten blong gat ol pipol wetem nara fasin, lukluk, mo talen.¹⁹ Sapos yumi no save putum fasin blong stap olsem disaepol blong Jisas Kraes i go antap long intres mo wei blong lukluk blong yumi, nao yumi mas luklukbak long wanem i kam faswan long laef mo jenisim.

Maet bae yumi save talem: “Yes, yumi save stap wan—!sapos yu agri nomo wetem mi!” Wan moa gud wei i blong askem: “?Wanem nao mi save mekem blong pusum yuniti i go? ?Olsem wanem nao mi save mekem blong helpem man o woman ia blong kam kolosap moa long Kraes? ?Wanem nao mi save mekem blong daonem raorao mo bildim wan Jos komuniti we i gat lav mo sore mo i kea?

Taem lav blong Kraes i kavremap laef blong yumi²⁰ yumi fesem ol samting we yumi no agri long ol wetem fasin blong no stap flas, longfala tingting mo fasin we i kaen.²¹ Yumi no stap wari tumas abaot ol filing blong yumi, be moa abaot hemia blong neba blong yumi. Yumi lukaot blong skelem gud yumi mo stap wan.²² Yumi no go joenem “ol raorao,” jajem olgeta we yumi no agri wetem, o traem blong mekem olgeta oli kikim ston.²³ Be, yumi tekem se olgeta we yumi no agri wetem olgeta oli traem bes we oli save mekem wetem ol eksperiens blong laef we oli gat.

Waef blong mi i bin loya blong 20 yia. Olsem wan loya, plante taem hem i wok wetem ol narawan we oli difendem ol tingting we i agens. Be hem i bin lanem blong no agri, be long wan stret fasin mo no kros. Maet bae i talem long nara loya, “mi save luk se bae yumitu no agri long poen ia. Mi laekem yu. Mi respektem tingting blong yu. Mi hop se bae, yu tu, yu mekem semmak long mi”. Plante taem, hemia i letem wanwan blong gat respek, mo iven kam fren nomata ol samting we oli no semmak i stap.

Iven ol foma enemi, oli save kam wan long fasin blong stap olsem disaepol blong Sevya.²⁴ Long 2006, mi bin go long dedikesen blong Helsinki Finlan Tempol blong givim ona long papa mo bubu blong mi we oli bin ol fas konvet long Jos long Finlan. Ol Man Finlan, wetem papa blong mi, i drim blong gat wan tempol long Finlan blong plante yia. Long tetaem ia, tempol distrik bae i kavremap Finlan, Estonia, Latvia, Lituania, Belarus mo Rasia.

Long dedikesen, mi lanem wan sapraes samting. Fas dei blong jeneral operesen, oli bin holemtaet blong ol memba blong Rasia blong mekem ol tempol odinens. Hem i had blong traem eksplenem from wanem mi sapraes tumas long hemia. Rasia mo Finlan, tufala i gat wo ova long plante handred yia. Papa blong mi i no trastem mo i no laekem Rasia be Ol Man Rasia tu. Hem i talem gud ol filing blong hem, mo ol filing blong hem i blong wan Man Finlan we i agensem Rasia. Hem i bin lanem baehat ol poem we oli bin raetem abaot namba 19 senturi wo bitwin Finlan mo Rasia. Ol eksperiens blong hem long taem blong Wol Wo 2, taem Finlan mo Rasia oli agensem tufala, i no jenisim tingting blong hem.

Wan yia bifo long dedikesen blong Helsinki Finlan Tempol, tempol komiti, we insaed i gat nomo ol memba blong Finlan, oli mit blong tokbaot ol plan blong dedikesen. Long taem blong miting, wan i poenemaot se Ol Sent blong Rasia bae oli travel plante dei blong kam long dedikesen, mo maet bae oli hop blong kasem tempol blesing blong olgeta bifo oli gobak hom. Komiti jeaman, Brata Sven Eklund, i talem se Ol Man Finlan oli save wet smol taem moa, se Ol Man Rasia oli mas ol fas memba blong mekem ol tempol odinens insaed long Tempol. Evri memba blong komiti oli agri. Ol fetful Ol Lata-dei Sent blong Finlan oli pusumbak ol tempol blesing blong olgeta blong mekem gud Ol Sent blong Rasia.

Eria Presiden, we i bin stap long tempol komiti miting ia, Elda Dennis B. Neuenschwander, i bin raetem afta: “Bae mi no save praod moa long Ol Man Finlan bitim stret taem ia. Strong histri blong Finlan wetem Is neba blong hem, mo gladglad blong olgeta blong gat wan tempol long stret ples blong olgeta, i pusum evri samting i kamaot. Blong letem Ol Man Rasia oli go insaed long tempol faswan, i wan aksen blong lav mo sakrifaes.²⁵

Taem mi talemaot kaen fasin ia long papa blong mi, hat blong hem i kam sofsof mo hem i krae, we i no hapen oltaem long strong man Finlan ia. Stat long tetaem ia kasem hem i ded tri yia afta, hem i neva talem wan nogud toktok abaot Rasia. Ol nara Man Finlan i givim insperesen long hem, mo papa i jusum blong putum fasin blong hem olsem disaepol blong Jisas Kraes i kam faswan long evri samting. Ol Man Finlan, oli stap olsem Ol Man Finlan; Ol Man Rasia oli stap olsem Ol Man Rasia; i no gat wan grup i lego kalja, histri o eksperiens blong hem blong sakemaot ol nogud filing blong agens. Oli no nid blong mekem. Be, oli jusum blong putum fasin blong stap olsem disaepol blong Jisas Kraes i kam faswan.²⁶

Sapos oli bin save mekem, yumi tu i save mekem. Yumi save tekem wanem ol bubu oli lego, kalja mo ol eksperiens blong yumi oli kam long Jos Ia blong Jisas Kraes. Samuel i no bin sakemaot histri blong hem olsem wan Man blong Leman,²⁷ mo Momon i no sakemaot histri blong hem olsem wan Man blong Nifae.²⁸ Be wanwan i putum fasin blong stap disaepol blong Sevya i kam faswan.

Sapos yumi no wan, yumi no blong Hem.²⁹ Invitesen blong mi, i blong yumi stap strong blong putum lav blong yumi long God mo fasin blong stap disaepol blong Sevya oli kam faswan, antap long evri nara samting.³⁰ Bae yumi holem antap, kavenan ia we i kam wetem fasin blong stap olsem disaepol—kavenan ia blong stap wan.

Bae yumi folem eksampol blong Ol Sent raon long wol we oli gat sakses blong stap kam ol disaepol blong Kraes. Yumi save dipen long Jisas Kraes, we i “mekem we yumi gat pis, i brekemaot fasin ya we i olsem bigfala stonwol, we bifo i stap mekem yumi seraot long tu kampani; long bodi blong hem, hem i tekemaot fasin ya we tufala kampani ya blong yumi i enemi long tufala.”³¹ Witnes blong yumi i go long wol abaot Jisas Kraes, bae i kam strong moa, mo bae yumi stap helti long saed blong spirit.³² Mi testifae se, taem bae yumi katemdaon fasin blong raorao, mo kam ol pipol we oli gat sem maen olsem hemia blong Lod, we yumi gat lav mo stap wan wetem Hem long fet,” bae pis blong Hem i blong yumi.³³ Long nem blong Jisas Kraes, amen.