Jeneral Konfrens
Pis blong Miwan long Ol Taem blong Jalenj
Oktoba 2021 jeneral konfrens

Pis blong Miwan long Ol Taem blong Jalenj

I Kam long Elda Quentin L. Cook

Blong Kworom blong Olgeta Twelef Aposol

I neva bin moa impoten blong stap lukaotem pis blong yumiwan.

I no longtaem i pas, oli givim wok long mi blong dediketem wan pat blong Nauvu. Olsem pat blong wok ia, mi bin save visitim Libeti Kalabus long Misuri. Taem mi lukluk long kalabus ia, mi tingting i gobak long ol samting we i hapen we i mekem se i wan impoten pat blong histri blong Jos. Laef blong Ol Sent i stap long denja, from se i gat wan oda blong kilimded evriwan, we gavna blong Misuri i putumaot. Antap long hemia, oli bin sarem Profet Josef mo sam moa man blong hem, long kalabus long Libeti Kalabus. Wan long ol risen blong strong agens ia agensem ol memba, i we, plante long olgeta oli agensem fasin blong mekem man i slef.1 Bigfala wok agensem Josef Smit mo ol man blong hem i stap olsem wan bigfala eksampol blong rong fasin blong fridom blong mekem joes, we i save tajem ol stret mo gud pipol. Taem blong Josef long Libeti Kalabus i soemaot se wanem i kam agens i no pruf we Lod i no agri, o i karemaot ol blesing blong Hem.

I tajem mi tumas taem mi ridim se Profet Josef Smit i bin talem, taem hem i stap long Libeti Kalabus: “O God, ?Yu Yu stap wea?” Mo ?wehem nao bigfala tapolen we i kavremap ples we yu stap haed long hem?”2 Josef i bin askem se kasem wetaem nao ol pipol blong Lod bae oli safa ol strong agens ia we oli rong mo no folem loa.”3

Pikja
Elda Cook i visitim Libeti Kalabus

Taem mi stanap long Libeti Kalabus, i tajem mi taem mi bin ridim ansa blong Lod: “Boe blong mi, bae pis i stap long sol blong yu; ol samting we oli kam agensem yu mo ol hadtaem blong yu, oli blong smol taem nomo; Mo afta, sapos yu mekem gud blong stap strong, God bae i leftemap nem blong yu long heven; mo bae yu win ova long evri enemi blong yu.”4 Hem i klia se wanem samting i save kam agens i save smutum yumi blong kasem wan selestial fiuja we i no save finis.5

Ol gudfala toktok ia blong Sevya: “Boe blong mi, bae pis i stap long sol blong yu”6 oli ring insaed long miwan, mo oli gat bigfala mining long taem blong yumi tedei. Oli mekem mi tingbaot ol tijing blong Hem long ol disaepol blong Hem long taem blong seves blong Hem long wol ia.

Bifo Kraes i safa long Garen blong Getsemane mo antap long kros, Hem i bin givim oda long ol Aposol blong Hem blong “oli mas lavlavem olgeta olsem we hem i lavem olgeta,”7 mo afta, Hem i givim kamfot long olgeta wetem ol toktok ia: “Mi putum pis blong mi i stap wetem yufala. Mi nomo mi givim pis ya long yufala. Mo pis ya we mi mi givim i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”8

Wan long ol taetol blong Lod mo Sevya blong yumi, Jisas Kraes we yumi laekem tumas, hem i “Prins blong Pis.”9 Long en, bae kingdom blong Hem i stanap, bae i gat pis mo lav.10 Yumi luk fored i go long rul blong Mesaea long Mileniom.

I nomata long visen ia blong wan taosen yia rul, yumi save se pis mo gudlaef ia, i no stap yet long tedei.11 Long laeftaem blong mi, mi neva luk wan taem olsem we man i no gat gud fasin. Oli atakem yumi wetem lanwis we i gat kros, i rao, mo i laetem faea, mo ol aksen we oli prapa spolem pis mo kwaet blong man.

Pis long wol, bae i no save kam o stap kasem Seken Kaming blong Jisas Kraes. Sevya i givim instraksen long Olgeta Twelef Aposol blong Hem, mo talem se misin blong Hem long wol ia, bae i no givim pis long wol. Hem i tijim: “I nogud yufala i ting se mi mi kam blong mekem olgeta man long wol oli stap kwaet.”12 Pis long wol i no bin pat blong fas seves blong Sevya long wol ia. Pis long wol i no stap tedei.

Be, pis blong yuwan, yu save kasem nomata long kros, ol raorao, mo ol seraot we oli stap laetem mo koraptem wol blong yumi tedei. I neva bin moa impoten blong stap lukaotem pis blong yumiwan. Wan naes niu hym we yumi laekem we i blong ol yut tedei, we Brata Nik Day i raetem, “Pis long Kraes” i talem: “Taem i no gat pis long wol, i gat pis long Kraes.”13 Yumi bin gat blesing blong gat hym ia jes bifo KOVID-19 wol sik ia.

Hym ia i soemaot, long wan niu wei, we yumi wantem pis mo talemaot gud se pis ia i fas long laef mo misin blong Jisas Kraes. Presiden Joseph F. Smith i bin tijim: “Spirit ia blong pis mo lav bae i neva kam long wol kasem taem we ol man bae oli kasem trutok blong God mo mesej blong God, mo kasem oli luksave paoa mo atoriti blong Hem we i tabu tumas.”14

Bae yumi neva stop blong wok blong kasem pis long wol, be yumi kasem stret save se yumi save gat pis long yumiwan olsem we Kraes i stap tijim. Prinsipol ia i stap long Doktrin mo Ol Kavenan: “Be yufala i mas lanem se hem we i mekem ol wok long stret mo gud fasin bae i kasem praes blong hem, we i pis long wol ia, mo laef we i no save finis long wol we bae i kam.”15

?Wanem nao sam wok blong stret mo gud fasin we bae i helpem yumi stretem ol strong tok blong agens, mo daonem ol raorao mo faenem pis long wol ia? Evri tijing blong Kraes oli poen i go long daereksen ia. Bae mi tokbaot sam we mi biliv se oli impoten tumas.

Faswan: Lavem God, Laef Folem Ol Komanmen blong Hem, mo Fogivim Evriwan

Presiden George Albert Smith i kam Presiden blong Jos long 1945. Taem hem i stap olsem wan Aposol, oli save hem se hem i wan lida we i lavem pis. Long ol 15 yia bifo hem i kam Presiden, ol jalenj mo ol tes blong wan wol ekonomi trabol, folem wetem ded mo ol nogud samting blong Wol Wo 2, i mekem se i no gat pis nating.

Long en blong Wol Wo 2, long taem blong fas jeneral konfrens olsem presiden long Oktoba 1945, Presiden Smit i rimaenem Ol Sent long saed blong invitesen blong Sevya blong lavem ol neba blong olgeta mo fogivim ol enemi, mo afta i tijim: “Hemia i spirit we evri Lata-dei Sent oli mas lukaotem blong gat sapos oli hop, sam dei, blong stanap long ples we Hem i stap long hem, mo kasem long han blong Hem, wan glori welkam hom.”16

Sekenwan: Lukaotem Ol Frut blong Spirit

Aposol Pol, long leta blong hem i go long Ol Man Galesia, i putum wanem i defren bitwin ol wok blong stret mo gud fasin we i mekem yumi kwalifae blong kasem kingdom blong God mo ol wok we, sapos yumi no sakem sin, oli mekem yumi no kwalifae. Long medel blong olgeta ia we oli mekem yumi kwalifae, oli ol frut blong spirit, “lav, glad, pis, stap strong longtaem, kaen fasin, gud fasin, fet, no stap flas [mo] kontrol long filing.”17 Pol i talem tu blong tekem hevi trabol blong wanwan long yumi, mo no stap taed blong mekem gud samting.18 Long medel blong ol wok ia, we oli no stret mo gud, hem i putum jalus, kros, mo leftemap olgeta.19

Wan long ol bigfala lesen blong taem blong OlTesteman, i tokbaot Papa Ebraham. Ebraham mo Lot, nefiu blong hem, tufala i rij, be tufala i no save laef tugeta long wan ples. Blong mekem se tufala i no faet, Ebraham i letem Lot i jusum graon ia we hem i wantem. Lot i jusum ol flat ples long Jodan, we i gat gudfala wota long hem mo i naes. Ebraham i tekem graon ia we i no gudgud tumas, Mamre. Skripja i talem se Ebraham i putum tenet blong hem mo i bildim wan olta long Lod.20 Lot, long nara saed, i stanemap tenet blong hem i fesem Sodom.21 Blong gat ol rilesensip we i gat pis long hem, lesen ia i klia: yumi mas wantem blong daonem mo stopem faet long saed blong ol samting we i no gat stret mo gud fasin. Olsem we King Benjamin i tijim: “i no gat wan tingting blong givim kil long wanwan long yufala, be blong stap long pis.”22 Be long saed blong fasin o aksen blong yumi long saed blong stret mo gud fasin, mo ol mas blong doktrin, yumi nid blong gohed blong stanap strong mo gohed.

Sapos yumi wantem pis we i kamaot long ol stret mo gud wok, bambae yumi no stanemap tenet blong yumi i go fesem wol. Yumi stanemap tenet blong yumi i go fesem tempol.

Nambatri: Praktisim Fridom blong Mekem Joes blong Jusum Stret mo Gud Fasin

Pis mo fridom blong mekem joes, oli joen tugeta olsem ol stamba pat blong plan blong fasin blong sevem man. Olsem we oli tokbaot long gospel topik long “Fridom blong Mekem Joes mo Fasin Stap Akaontebol,” “Fridom blong mekem joes i paoa mo spesel janis we God i givim long ol pipol blong jusum samting mo tekem aksen blong olgetawan.”23 Long wei ia, fridom blong mekem joes i stamba blong yumi groap mo gat ol eksperiens we oli blesem yumi taem yumi stap folem Sevya.24

Fridom blong mekem joes i wan stamba poen long “Kaonsel long Heven long fasfala laef,” mo raorao bitwin olgeta ia we oli bin jusum blong folem Kraes mo olgeta we oli bin folem Setan.25 Blong lego hae tingting mo kontrol, mo jusum Sevya bae i letem yumi gat laef blong Hem mo pis blong Hem. Be pis blong yumiwan, bae i kasem jalenj taem ol pipol oli praktisim fridom blong olgeta blong mekem joes long ol wei we i spolem man.

Mi mi save se kwaet pis we yumi bin filim insaed long hat blong yumi, i kam strong moa tru long save ia we yumi gat abaot wanem Sevya blong wol bae i mekem long bihaf blong yumi. Hemia i kamaot klia long Prijim Gospel blong Mi: “Taem yumi dipen long Atonmen blong Jisas Kraes, Hem i save helpem yumi gotru long ol tes, ol sik, mo sobodi blong yumi. Yumi save fulap wetem glad, pis, mo gud toktok. Evri samting we i no stret tumas abaot laef, i save kam raet tru long Atonmen blong Jisas Kraes.”26

Nambafo: Bildim Saeon Insaed long Hat mo Hom blong Yumi

Yumi ol pikinini blong God mo pat blong famli yumi. Yumi tu yumi pat blong famli ia we yumi bon i kam insaed long hem. Famli i fandesen blong tugeta samting ia, hapines mo pis. Presiden Russell M. Nelson i tijim yumi, mo tu, long taem blong wol sik ia, yumi bin lanem se fasin blong gat hom i senta blong relijin mo Jos i sapotem, i save openem doa blong paoa blong famli blong tanem hom blong yumi i kam wan tabu ples blong fet.27 Sapos yumi stap gat relijin fasin ia insaed long ol hom blong yumi, bambae yumi gat pis blong Sevya tu.28 Mifala i save se plante long yufala i no gat ol blesing blong wan stret mo gud hom mo stap raorao oltaem wetem olgeta we oli jusum fasin we i no stret mo i no gud. Sevya i save givim proteksen mo pis blong lidim yu long wan sef ples mo ples blong haed long ol strong win blong laef.

Mi save talem stret se, glad, lav, mo gudlaef we oli save gotru long hem insaed long ol stret mo gud famli we oli gat lav, bae i save givim pis mo hapines Lav mo kaen fasin oli stap long senta blong gat Saeon insaed long hat mo hom blong yumi.29

Nambafaef: Folem Ol Woning blong Tedei we Profet I Talem

Pis blong yumi bae i kam bigwan moa taem yumi folem profet blong Lod, Presiden Russell M. Nelson. Bae yumi gat wan janis, i no longtaem blong harem hem. Oli bin mekem hem i rere bifo hem i kam long wol ia, blong holem koling ia. Hao hem i stap rere hemwan, i bin gud tumas.30

Hem i bin tijim yumi se yumi save filim pis mo glad ia we i gogohed, iven long ol taem blong trabol,31taem yumi stap traehad blong kam moa olsem Sevya, Jisas Kraes. Hem i givim kaonsel long yumi blong sakem sin evri dei, blong mekem Lod i klinim yumi, i hilim yumi mo givim paoa we i mekem yumi kam strong moa.32 Mi mi wan witnes se profet i stap kasem revelesen mo i gohed blong kasem long heven.

Taem yumi stap givim ona mo sastenem hem olsem profet blong yumi, yumi stap wosipim Papa long Heven mo Sevya blong yumi, Jisas Kraes. Tabu Spirit i stap givhan mo tijim yumi.

Mi testifae mo givim witnes blong mi olsem wan Aposol se Jisas Kraes, Sevya mo Ridima ia blong wol, i stap lidim mo gaedem Jos blong Hem we i kambak. Laef blong Hem mo misin blong Hem we i pem praes, oli ol tru ples blong kasem pis. Hem i Prins ia blong Pis. Mi talem sua mo tabu witnes blong mi se Hem i stap laef. Long nem blong Jisas Kraes, amen.

Ol Not

  1. “Ol pipol long Indipendens oli no laekem se Ol Sent oli go prij long Ol Indian blong Amerika, mo oli no glad se oli stap olsem ol slef.” (Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 172).

  2. Doktrin mo Ol Kavenan 121:1.

  3. Doctrine and Covenants 121:3.

  4. Doktrin mo Ol Kavenan 121:7–8.

  5. Luk long 2 Nifae 2:11–15.

  6. Doctrine and Covenants 121:7.

  7. Jon 13:34.

  8. Jon 14:27.

  9. Aesea 9:6; 2 Nifae 19:6. Sevya, insaed long Ol Eit Tabu Tijing blong Hem, i bin tijim se “olgeta evriwan we oli mekem pis bae oli kasem blesing from bae oli singaotem olgeta ol pikinini blong God” (Matiu 5:9).

  10. “Wetem jajmen mo wetem jastis … blong oltaem” (luk long Aesea 9:6–7; 2 Nifae 19:6–7; luk tu long Galesia 5:22).

  11. Luk long Doktrin mo Ol Kavenan 1:35. Presiden Wilford Woodruff i talemaot hemia long 1894, mo bakegen long 1896 (luk long The Discourses of Wilford Woodruff, sel. G. Homer Durham [1946], 251–52; luk tu long Marion G. Romney, insaed long Conference Report, Apr. 1967, 79–82; Ezra Taft Benson, “The Power of the Word,” Ensign, May 1986, 79–80; Dallin H. Oaks, “Preparation for the Second Coming,” Liahona, May 2004, 9).

  12. Matiu 10:34.

  13. Nik Day, “Peace in Christ,” 2018 Stamba Toktok Singsing blong Miutuol, Liahona, Jenuware 2018, 54–55  . Hym ia, “Pis long Kraes: i stap tijim se:

    Taem yumi stap laef folem wei we Hem i bin laef folem,

    I gat pis long Kraes.

    Hem i givim hop

    Taem hop i lus.

    Hem i givim paoa

    Taem yumi nomo muv.

    Hem i givim selta

    Long taem blong trabol.

    Taem i no gat pis long wol,

    I gat pis long Kraes.

  14. Teachings of Presidents of the Church: Joseph F. Smith (1998), 400.

  15. Doktrin mo Ol Kavenan 59:23.

  16. Luk long George Albert Smith, insaed long Conference Report, Oct. 1945, 169–70.

  17. Galesia 5:22–23.

  18. Luk long Galesia 6:2, 9.

  19. Luk long Galesia 5:20.

  20. Jenesis 13:18.

  21. Jenesis 13:12.

  22. Mosaea 4:13.

  23. Gaed long Skripja, “Fridom blong Mekem Joes mo Fasin Stap Akaontebol,” olskripja.ChurchofJesusChrist.org.

  24. Yumi “fri blong jusum fridom mo laef we i no save finis tru long Medieta blong evri man” (2 Nifae 2:27). Fridom blong mekem joes i letem evri nogud joes blong ol nara man blong givim soa, mo safaring mo samtaem ded. Ol skripja oli mekem i klia se Lod God i givim fridom blong mekem joes blong mekem se man i save jusum gud o nogud (luk long 2 Nifae 2:16).

  25. Gaed long Skripja, “Fridom blong Mekem Joes mo Fasin Stap Akaontebol,” olskripja.ChurchofJesusChrist.org.

  26. Preach My Gospel: A Guide to Missionary Service (2019), 52, ChurchofJesusChrist.org; oli ademap italik.

  27. Russell M. Nelson, “Blong Kam Ol Lata-dei Sent we I Givim Eksampol,” Liahona, Novemba 2018, 113.

  28. Luk long Doktrin mo Ol Kavenan 19:23.

  29. Mi bin laki blong groap insaed long wan hom we pis i win oltaem. Hemia i stap olsem from paoa blong mama blong mifala, we i bin wan fetful memba blong Jos. Papa blong mi i bin gud long evri saed be hem i no aktiv long Jos. Mama i givim ona long papa, mo i traem blong no raorao. Hem i tijim mifala, ol pikinini, blong prea mo go long Jos. Hem i tijim mifala tu blong lavem ol man mo givim seves long ol narawan (luk long Mosaea 4:14–15). From se mi groap long wan kaen hom olsem, i givim pis long mi mo i bin wan bigfala blesing insaed long laef blong mi.

  30. Russell M. Nelson i bin graduet long Yunivesiti blong Yuta Medikol Skul, i faswan long klas blong hem, mo hem i bin gat 22 yia. Hem i bin wantem tumas blong kam dokta blong katem man mo i kasem bes trening we i stap long ol bigfala medikol skul. Hem i bin fetful blong mekem diuti blong hem long ami long Koria mo Japan. Blong plante yia, hem i bin paeonia long open hat operesen mo wol i bin luksave hem. Nomata se oli bin mekem hem i rere blong blesem ol pipol raon long wol wetem medikol skil blong hem, Presiden Nelson i bin rere long saed blong spirit tu, mo hemia nao i impoten moa. Hem i papa blong wan bigfala famli blong ol pikinini, ol apupikinini, mo ol smol apupikinini. Hem i bin fetful blong wok blong famli blong hem mo blong Jos truaot long laef blong hem.

  31. Luk long Russell M. Nelson, “Opening Mesej,” Liahona, Mei 2020, 7; luk tu long Russell M. Nelson, “Joy and Spiritual Survival,” Liahona, Nov. 2016, 82–84.

  32. Russell M. Nelson, “Opening Mesej,” 6.