Leftemap Laet blong Yufala

Yu luk, yu mo mi i save se yumi bin laef olsem ol pikinini blong Papa long Heven blong yumi long heven bifo yumi bin kam long wol ia,⁴ mo stamba tingting blong kriesen blong wol ia, i blong givim wanwan, janis ia blong kasem wan bodi, kasem eksperiens, lanem samting mo groap blong save kasem laef we i no save finis—we i laef blong God.⁵ Papa long Heven i save se bae yumi safa mo mekem sin long wol mekem se Hem sendem Pikinini blong Hem we “laef blong Hem i bitim eni narafala laef”⁶ mo atonmen mo sakrifaes blong Hem we i no gat en⁷ mekem se yumi save kasem fogivnes, kam oraet mo kam klin.⁸

!Taem yu save ol trutok ia, i stap jenisim laef! Taem wan man i stap lanem abaot stamba tingting blong laef we i gud tumas, i andastanem se Kraes i stap fogivim mo helpem olgeta we oli folem Hem, mo afta jusum blong folem Kraes, blong go daon long wota blong baptaes, nao laef i jenis blong kam moa gud—iven taem ol longlongfala situesen blong laef i no letem.

Wan hapi sista we mi bin mitim long Onitsa, Naejeria, i bin talem long mi se long taem hem i lanem gospel mo kasem baptaes, (mo naoia mi yusum ol stret toktok blong hem), “evri samting i gud long mi. Mi mi hapi. Mi mi stap long heven.”⁹ Blong stap serem gospel, i laetem glad mo hop long evri sol, blong tugeta, man we i givim mo man we i kasem gospel ia. !I tru, “bambae glad blong yutufala i bigwan”¹⁰ taem bae yu serem gospel! Blong stap serem gospel i blong glad folem glad, gat hop folem nara hop.¹¹

Taem yumi bin kasem baptaes, wanwan long yumi i kam insaed long kavenan we i no gat en¹² wetem God, blong givim “seves long hem mo obei ol komanmen blong hem,”¹³ we i tekem tu blong “stanap olsem wan witnes blong [Hem] blong oltaem, long evri samting mo long evri ples.”¹⁴ Taem yumi stap “folem” Hem taem yumi stap obei kavenan ia, tabu paoa olsem hemia blong God we i fulumap yumi wetem sapot, i kam insaed long laef blong yumi tru long Kraes, olsem wan branj i kasem kaekae tru long ol rop we i gro raonem branj ia.¹⁵

Lod i givim komanmen ia long yumi blong:

“Leftemap laet blong yufala blong mekem se i save saen long wol. Luk mi mi laet we yufala i mas leftemap—ol samting we yufala i bin luk mi mi mekem. …

“… mi bin givim oda se … yufala i mas kam long mi, blong mekem se yufala i save filim mo luk; we bae yufala i mekem semmak olsem long wol; mo eni man we i brekem komanmen ia i letem hemwan blong Setan i lidim hem i go long temtesen.”¹⁶

Blong stap jusum blong no leftemap laet blong gospel, i pusum yumi i go long sado, long ples ia i isi blong kasem temtesen. Wanem we i impoten, i we, storian ia i tru: blong stap jusum blong leftemap laet blong gospel, i tekem yumi i kam moa fulwan long laet ia mo proteksen we i givim agensem temtesen. !Hemia wan bigfala blesing long wol blong yumi tedei!

Sista Tiffany Myloan i bin akseptem invitesen blong sapotem ol misinari nomata ol bigfala hadtaem we hemwan i stap fesem, we i gat tu ol kwestin abaot bilif blong hem. I no longtaem i pas hem i talem long se, blong sapotem ol misinari, i bin mekem fet blong hem i kam niu mo gat wan filing blong wan gud laef. Ol toktok blong hem, “Misinari wok i save hilim man.”¹⁷

Glad. Hop. Paoa blong God we i givhan. Protektem man long temtesen. Hiling. Evri samting ia—mo plante moa (mo tu, fasin blong fogivim ol sin)¹⁸oli kam slo mo kwaet insaed long sol blong yumi we i kam long heven, taem yumi serem gospel.

Ol brata mo sista. “I gat plante long medel … blong ol brekawe grup, ol pati, mo ol grup blong relijin … we oli no save faenem trutok from nomo oli no save weaples blong faenem trutok.”¹⁹ Nid ia blong leftemap laet blong yumi, i neva bin bigwan moa olsem hemia long histri blong man. Mo trutok i isi blong kasem bitim bifo.

Jimmy Ton, we i bin groap olsem wan Budis, hem i bin glad tumas long wan famli we oli bin serem stori blong laef blong olgeta long YouTube. Taem hem i lanem se oli ol memba blong Jos Ia blong Jisas Kraes blong Ol Lata-dei Sent, hem i stadi long gospel onlaen, i ridim Buk blong Momon long ap mo i bin kasem baptaes, afta we hem i mit wetem ol misinari long kolej.²⁰ Elda Ton, naoia, i wan fultaem misinari hemwan.

Hem mo ol misinari fren blong hem raon long wol oli ami blong Lod— kwotem toktok blong profet blong yumi.²¹ Ol misinari ia oli mekem wan jenis long wol: be sevei i ripot se Gen Z i stap tanem hem longwe long God,²² ol strong soldia blong yumi²³ ol elda mo ol sista oli stap tanem ol pipol i go long God. Wan bigfala namba blong ol memba blong Jos oli stap kam tugeta blong wok wan wetem ol misinari, blong stap serem gospel, blong helpem plante mo plante moa fren blong kam long Kraes mo Jos blong Hem.

Ol Lata-dei Sent blong yumi long Liberia oli bin helpem 507 fren blong go insaed long wota blong baptaes long ol 10 manis taem we, long ples ia, i no bin gat ol fultaem misinari we oli stap givim seves long kantri blong olgeta. Taem we wan long ol stek presiden blong mifala long ples ia oli bin harem se ol fultaem misinari maet oli stap kambak, hem i talem: “O gud, naoia oli save helpem yumi long wok blong yumi.”

Hem i talem tru: kam tugeta blong Isrel—bigfala wok long wol ia²⁴—hem i kavenan responsabiliti blong yumi. !Mo hemia i taem blong yumi! Invitesen blong mi tedei i simpol: serem gospel. Stap yu mo leftemap laet. Prea from help blong heven mo folem ol kwaet smol voes blong Spirit. Serem nomol laef blong yu long wan nomol wei, mo invaetem wan narafala man blong kam mo luk, blong kam mo help, mo blong kam pat wetem ol narawan.²⁵ Mo afta, stap glad taem yu mo olgeta we yu lavem, yufala i kasem ol promes blesing.

Mi save se long Kraes, ol gudfala nius ia oli stap prijim i go long olgeta we oli no stap flas; tru long Kraes, olgeta we hat blong olgeta i brokbrok, oli kam tugeta; tru long Kraes, oli talemaot fridom i go long ol prisena, mo tru long Kraes, mo tru long Kraes nomo, olgeta we oli stap harem nogud, oli kasem naesfala samting aot long ol asis.²⁶ !So, i gat bigfala nid blong mekem ol samting ia i go long evriwan!²⁷

Mi testifae se Jisas Kraes, Hem i man we bae i raetem stat mo en blong bilif blong yumi.²⁸ Hem bae i finisim, Hem bae i komplitim, praktis blong bilif blong yumi—nomata bilif i no fulwan—blong leftemap laet blong gospel. Hem bae i wokem ol merikel insaed long laef blong yumi, mo long laef blong evriwan we Hem i karem oli kam tugeta, from Hem i God blong ol merikel.²⁹ Long hae nem blong Jisas Kraes, amen.