Blong Stap Klin Inaf I No Minim se Yu Mas Klin Evriwan

Long wan taem, mi sendem wan mesej i go long gel blong mi mo man blong hem, mo yusum voes teks mesej long fon blong mi. Mi talem: “Ei tufala. Lavem yutufala.” Tufala i kasem: “No laekem yutufala. Mas lavem yutufala.” Luk hao wan gudfala mesej wetem gud tingting i kam wan defren kaen mesej. Hemia i wanem i hapen samtaem wetem ol mesej blong God long saed blong fasin blong sakem sin mo blong stap klin inaf.

Sam oli mekem mistek mo ting se oli kasem mesej ia se, fasin blong sakem sin mo jenisim laef, i no nid. Mesej blong God, i we, tufala ia i wan mas.¹ ?Be weswe? ?God i no lavem yumi sapos yumi gat rong samting i stap? !Si! Hem i lavem yumi, fulwan. Mi lavem ol apupikinini blong mi, ol samting we oli no stret mo evri samting, be hemia i no minim se mi no wantem olgeta blong kam gud moa mo kasem ful paoa ia we oli save kasem. God i lavem yumi olsem we yumi stap, be tu, Hem i lavem yumi tumas blong lego yumi olsem we yumi stap.² Blong stap groap wetem Lod, i ful stamba tingting blong laef long wol ia.³ Blong jenis, i ful stamba tingting blong Atonmen blong Kraes. Kraes, Hem i save laef bakegen long ded, i save tok gud, mo hilim yumi, be antap long evri samting, Hem i save tanem yumi i kam moa olsem Hem.⁴

Sam oli mekem mistek mo kasem mesej ia se, fasin blong sakem sin i hapen wan taem nomo long laef. Mesej blong God, i we, olsem Presiden Russell M. Nelson i tijim: “Fasin blong sakem sin … i wan rod blong folfolem.”⁵ “Fasin blong sakem sin, i save tekem taem, mo hadwok we yumi ripripitim,”⁶ mekem se, blong lego sin fogud⁷ mo “nomo wantem blong mekem rabis fasin, be blong mekem gud oltaem”⁸ oli ol samting blong wok from long ful laef.⁹

Laef i olsem wan rod trip we i krosem ol bus. Yumi no save kasem ples blong go long hem wetem wan kontena blong fiul. Yumi mas fulumap fiul oltaem. Blong stap kakae sakramen i olsem blong saed long fiul stesen. Taem yumi stap sakem sin mo stap riniu ol kavenan blong yumi, yumi talem strong se yumi wantem obei ol komanmen, mo God mo Kraes oli blesem yumi wetem Tabu Spirit.¹⁰ Long sot toktok, yumi promes blong gohed fored long wokbaot blong yumi, mo God mo Kraes oli promes blong fulumap fiul bakegen.

Sam oli mekem mistek mo ting se mesej hem i we oli no klin inaf blong tekpat fulwan long gospel ia from we oli no fri fulwan long ol nogud strong fasin blong olgeta. Mesej blong God, i we, blong stap klin inaf i no minim se yu mas klin evriwan.¹¹ Blong stap klin inaf, hem i blong stap ones mo stap gohed blong traem. Yumi mas stap ones wetem God, ol prishud lida, mo ol narawan we oli lavem yumi,¹² mo yumi mas traehad blong stap obei long ol komanmen blong God mo neva givap iven sapos yumi glis smol.¹³ Elda Bruce C. Hafen i talem se, blong stap developem wan fasin olsem hemia blong Kraes “i nidim blong gat longfala tingting mo fasin blong gogohed, bitim blong stap stret evriwan.”¹⁴ Lod i talem se ol presen we oli kam long Spirit, Hem i “stap givim … blong gud blong olgeta we oli lavem [Hem], mo oli stap obei long evri komanmen blong [Hem], mo hem we i lukaotem blong mekem semmak.”¹⁵

Wan yang man, we bae mi singaotem Damon, i raetem: “Taem mi stap groap, mi gat hadtaem wetem ponografi. Oltaem mi filim se mi sem, mekem mi stap mekem ol rong samting.” Evri taem we Damon i glis, soa ia blong rigret i strong moa, mekem hem i jajem nogud hem, se hem i no naf blong kasem wan gladhat, fogivnes, o sam moa janis long God. Hem i talem: “Mi disaed se mi mi naf blong mi harem nogud nomo evri taem. Mi ting se, ating God i no laekem mi nating from mi mi save wok strong moa mo lego samting ia long wan taem nomo. Bae mi go gud wan wik, mo samtaem wan manis, be afta, bae mi foldaon bakegen mo tingting se: “Bae mi neva gud inaf, ?so wae nao bae mi traem bakegen?”

Long wan nogud taem olsem, Damon i talem long prishud lida blong hem se: “Ating bae mi stop blong kam long jos. Mi taet blong gat tu fes.”

Lida blong hem i ansa: “Yu no gat tu fes from se yu gat wan nogud fasin we yu stap traehad blong lego. Bae yu wan tufes sapos yu stap traem blong haedem, giaman from, o traem talem yuwan se Jos i gat wan problem blong gat ol hae standet olsem. Blong stap ones abaot ol aksen blong yu, mo blong tekem ol step blong muv fored, i no blong gat tu fes. Hem i blong stap wan disaepol.”¹⁶ Lida ia i kwotem Elda Richard G. Scott we i tijim se: “Lod i luk ol wiknes blong yu long wan ae we i defren long wei we Hem i luk fasin blong agens. … Taem we Lod i stap tokbaot ol wiknes, oltaem hem i mekem wetem sore.”¹⁷

Kaen lukluk ia i givim hop long Damon. Hem i luksave se God i no stap antap ia mo talem: “Saye, Damon i spolem bakegen.” Be, maet Hem i stap talem: “Luk, Damon i wokbaot longwe finis i kam.” Nao yang man ia i stop blong lukdaon wetem sem, o i stop blong luk long saed blong faenem eskius mo defren kaen tingting. Hem i lukluk i go antap blong kasem help we i kam long heven, mo hem i faenem help ia.¹⁸

Damon i talem: “Wan taem nomo we mi bin tanem mi long God long bifo, i blong askem fogivnes, be naoia, mi askem gladhat blong Hem—paoa blong Hem we i save mekem samting [Bible Dictionary, “Grace”]. Mi neva mekem hemia bifo. Naoia, mi no stap spendem taem blong mi blong no laekem miwan from ol samting we mi bin mekem, be mi stap lavem Jisas from wanem we Hem i bin mekem.”

Taem oli tingting long longfala taem we Damon i gat hadtaem, i no bin help mo i no gud blong papa, mama mo lida blong hem oli helpem hem sapos oli talem “neva bakegen” hariap tumas, o bae i strong blong putum sam standet blong lego fasin ia blong hem i save kam “klin inaf.” Be, oli stat wetem ol smol gol we hem i save mekem. Oli sakemaot tingting ia, se, evri samting o no gat samting, mo oli lukluk blong hem i groap sloslo, we i letem Damon blong bildimap ol smol sakses, be i no ol foldaon.¹⁹ Hem, semmak olsem ol pipol blong Limhae we oli prisena, i bin lanem se “hem i save kam antap gud smolsmol.”²⁰

Elda D. Todd Christofferson i talem se: “Blong fesem wan samting we i bigwan, maet yumi nid blong wok long hem, smolsmol i go, evri dei. … Blong tekem i kam insaed long fasin blong yumi, ol evri dei fasin we oli niu mo gud, o blong stap winim ol strong nogud fasin o adiksen, plante taem, i minim blong mekem wan traehad tedei, mo wan narawan tumoro, mo wan narawan bakegen, blong plante dei, manis mo yia. … Be yumi save mekem from se yumi singaot long God … blong askem help we yumi nidim evri dei.”²¹

Naoia, ol brata mo sista. Kovid 19 wol sik ia i no bin isi long eniwan, be blong stap yuwan from ol rul blong kwarantin i mekem se laef i had, speseli olgeta we oli gat hadtaem wetem ol strong nogud evri dei fasin. Tingbaot se i posibol blong jenis, fasin blong sakem sin i wan longfala rod, mo fasin blong stap klin inaf i no minim se yu mas stret evriwan. Moa impoten long hemia, tingbaot se God mo Kraes oli glad blong helpem yumi long ples ia mo naoia.²²

Sam oli mekem mistek mo kasem mesej ia se, God i glad blong help, afta nomo we yumi sakem sin. Mesej blong God, i we, bae Hem i helpem yumi semtaem we yumi stap sakem sin. Gladhat blong Hem i stap blong yumi yusum “i nomata weaples yumi stap long rod ia blong stap obei.”²³ Elda Dieter F. Uchtdorf i bin talem: “God i no nidim ol pipol we oli no gat samting i rong long olgeta. Hem i stap lukaotem olgeta we bae oli givim hat mo glad tingting blong olgeta [Doktrin mo Ol Kavenan 64:34], mo bambae Hem i mekem olgeta oli kam stret evriwan tru long Kraes” [Moronae 10:32–33].”²⁴

Sam oli harem nogud tumas from ol rilesensip we i brokbrok o i strong, mekem se i had blong oli biliv long lav mo sore blong God, mo blong stap strong longtaem. Oli gat hadtaem blong luk God olsem we Hem i stap—wan Papa we i gat lav we i lukluk long nid blong yumi²⁵ mo i save olsem wanem “blong givim ol gudfala samting long olgeta we oli askem hem.”²⁶ Gladhat blong Hem i no jes wan praes blong olgeta we oli klin inaf. Hem i “help we i kam long heven” we Hem i givim blong helpem yumi kam klin inaf. Hem i no jes wan praes blong olgeta we oli stret mo gud. Hem i “ paoa we Hem i kavremap yumi long hem” we i helpem yumi blong kam stret mo gud.²⁷ Yumi no jes stap wokbaot i go from God mo Kraes. Yumi stap wokbaot wetem Tufala.²⁸

Long ful Jos, ol yang pipol oli stap talem baehat Stamba Toktok blong Aronik Prishud Kworom mo blong Ol Yang Woman. Stat long Niu Silan i go kasem Spen, i go long Itiopia kasem Japan, ol yang woman oli talem: “Mi holemtaet strong presen ia we i fasin blong sakem sin.” Stat long Jile kasem Gwatemala, i go kasem Moronae long Yuta, ol yang man oli talem: “Taem mi stap traehad blong givim seves, praktisim fet, sakem sin, mo kam antap evri dei, bae mi kwalifae blong kasem ol blesing blong tempol mo blong kasem glad we i stap oltaem long gospel.”

Mi promes se ol blesing ia, mo glad oli ril, mi stap givim ol samting ia blong gud blong olgeta evriwan we oli stap obei long evri komanmen blong mi, mo “hem we i traem blong mekem olsem.”²⁹ Taem yu filim se yu mestem rod plante taem tumas blong stap gohed blong traem, tingbaot Atonmen blong Kraes, mo gladhat ia we i mekem hemia i posibol, oli ril i stap.³⁰ Ol han blong sore blong Hem, Hem i stretem i kam long yu.”³¹ Oli lavem yu—tedei, long 20 yia taem mo blong oltaem. Long nem blong Jisas Kraes, amen.