Kot el Mekreos el Kloklem

A chedaol llechukl a melekoi el kirel a ngeasek e merau el chad el merredel el rirurt el mo er a Jesus, e mlo outubaruach er a Ochil, e meral mla er ngii ra rengul, a uleker er a Mastang el kmo, “Ak mekera e mo nguu a diak a ulebengelel klengar?” A bocha lodengei a betok el llach el ngika el chad a kmal mla blak a rengul loltirakl, e a Jesus a dula er ngii el kmo bo moterau a rokui el kloklem, e mngai a cheral mesterir a remechebuul, e mnguu a chelngelem, e moltirakl er Ngak. Tial bleketakl el nger a rirelii ngika el ngeasek el merredel—el diak el iior er a iltetel—eng mlo moalech a rengul, e mirrael el ngara klengitelreng, le chedaol llechukl a kmo, “ng kmal mle ungil besul.” ¹

Ng bleketakl, el tia klou a belkul uleklatk el cheldecheduch el kirel a usbechellel a iilteet me a ngelsengesir a remechebuul. Engdi tia cheldecheduch el kirel a klou a rengul, diak le mengodch el klaumerang el mora chedaol ngerachel. A ometeet me a lak, e a dersta er kid a mei er a Kristo loba osisiu el diak a ngodechii el blakereng el kirel ebangkelio er Ngii el mle kirel ngika el ngeasek el chad lochotii. A dolekoi er ngii er chelecha el taem, e kede chotii el kmo “kid el rokui luldimukl.” ²

Ngara bleketakl el llechukl el tekoi ea, C. S. Lewis a melcheluches er a uldesuel a tekingel a Rubak el melekoi er kid el kmo: “Ng diak el soak … a temem … a [lechub] a ududem … a [lechub] a urerem, [ng kmal] di [soak] Kau. [Tia el kerrekar el moledaes er ngii.] Ng diak el soak el meluk a rechelel er tia me sei, Ng soak … a lemetuk el rokir el me riou. [E tia el uingel.] Ng diak el soak omomsibs er [ngii], a lechub e momesiich er ngii, a lechub e [molechudech] er ngii. [Ng di soak] a obedelii. [A mera er ngii, ng soak] a modersau el rokir el chad el [me er ngak]. … [E] ak mo meskau a beches el klechad. A mera er ngii, ak mo Odersak leko er kau: a … soak a obult el mo [sel soam].” ³

Tirke el mo mengedecheduch er kid er chelecha el klou el ongdibel a rokui el mo melekoi; lokiu a kekerous el teletael aikel le dilung a Kriso el mo er ngika el meteet el chad: “Mei er a Osobelem. Mui el mei e loba rengum el rokir. Mnguu a kerus er kau, loberaod ma lak, e moltirakl er Ngii.” ⁴ E tirke el rokui el medengei a mo kmo chelsel a rengedel a Dios, e ng diak a di odersii a tedobech, diak omuchel e kuk meterob, e diak obult. Mo er tirkel ullengit el mo mellakl er a mla mo smecher el chedil ma chedam malechub ete melmesumech er a tara chederir, sel dilii a Jesus a mle mesisiich e bleketakl. “Bo bechei a ilechang me boloruul a re bebil,” Ngii a dilung. “Diak a chad, el mla odersii chimal mo er a osib, e isngekl lomes ruriul, a sebechel mo er a rengedel a Dios.” ⁵ Se le mer kid a kerior, mo lmuut raikal tekoi el ngodech ra soal a rengud, e bo molatk el kmo sel blak er reng er kid el morsel moktek er a Kristo a kirel mo kot el ngarbab el omeruul er a klengar kid. Ng uaisei el Isaiah a milketeklii el me er kid el kmo “ng diak ludoud me a ka locheraol” ⁶ —ng kired el mo kldmokl, e ousbech er sel tekingel a T. S. Eliot’s el kmo “ng diak e lak a ututelel.” ⁷

Ng uaisei, el de rokui el nga er ngii a mekngit el kse er kid me a chelitechetud a lechub a chised el ngii a torbengid meng diak demui lulsiseb er tial ureor. Eng di a Dios a Demad e kmal imis el ungil lousubes e obes a kngtid el bla bo de iikr, le kid el locha blechoel meruul uaisei el mo er Ngii. Chelsel a ngii di el teletael, e nga er ngii a chedaol ngesou el mo er a dersta er kid er a ngii di el taem sel dolatk el mo melodech a blekerdeled. A Dios a milsa Paulus a “beches el klengar.” ⁸ A Ezekiel a ulemekedong er a rokir el Israel er a irechar el mo ikrii a mla memong er tir “e bo el kiei … er a beches el teletael er a klengar.” ⁹ A Alma millekoi el kirel a “mesisiich lomelodech” ¹⁰ el rulii a reng me ngobok, e a Jesus a Ngii a ulisechakl el kmo “a lak el luut el mechell a chad el beches, eng diak el sebechel mesa rengedel a Dios.” ¹¹ Ng bleketakl el techall er a omelodech me a mo kiei er a telkib el ngarbab el teletael a di mla ta er a sengk er a Dios el mo er tirkel losiik er ngii.

A re kausechelei, er chelechal taem a de betik a betok el kakerous me a klekakeakl er tir, a re nga er tiang mea re ngar sei, a re ruldak el ngara tal chelechad loku a melidul me a re kuk tang er a balatiks, lobengkel a betok el mekngit lomeruul iliuekl er kid. Me doker kid alsekum a “ngarbab e lmuut el chedaol” ¹² el klengar, me kuusbech er sel dilii a President Nelson, a teletael el kid a sebeched el osiik er ngii? A doruul el uaisei, e ngungil dolbedebek er a taem er a chelsel a Babier er a Mormon er a rechad luleker e mle bleketakl longer er tia el ker.

“Meng dimlak a ultok er a delongelir tirka el chad, er a beluu er rokir … leng beltikelreng er a Dios el mla er a cheslel a rengrir a rechad a uchul.

“Meng dimlak a chelechei, a lechub e luldikel, … a lechub e ngii di el mekngit lomeruul; meng meral dimlak a rechad el ngara deureng el uai tir er a chelsir a rokui el chad el mla obeob er a chimal a Dios.

“Ng dimlak a re merechorech, me a romekeuad, a lechub e le bla er ngii a re Lamanites, a lechub e ngii di el ko er a -ites, te bai mle tang, el ngelekel a Kristo, el telchull er a mo er a rengedel a Dios.

“Me te meral mle ngeltengat!” ¹³

Me ngera sel uchul tia el kltalreng, me a deureng el klengar? Ngellechukl er a chelsel tia el cheldecheduch el chimo el cherrungel tekoi: “A beltikereng er a Dios … a mle delalm er a chelsel a rengrir a rechad.” ¹⁴ Sel sekum a beltikereng er a Dios a dodai er a klengar kid, me a deleuill er a kid me a rebebil me a domelchesiu el kirir a rokui el chad, e a klekakerous, klekakeakl, me a blulak lomeleakl a mo diak, e a budech a mechisois. Tiaikid a kmal ngii a dilubech lokesiu er a chelsel a Babier er a Mormon. Ng mlo diak a re chedal a Laman, a lechub a rechedal a Jacob, a lechub a re chedal a Joseph, a lechub a rechedal a Zoram. Ng dimlak a ngii di el ko er a “-chedal a.” A rechad a siliseb er a di mle imong el teleteal er a klechad. Tir el rokui, ng melekoi, el mlo okedongall el “ngelekel a Kristo.” ¹⁵

Ng uaisei, el dosaod er a kot el ngarbab el llach el kirir a rokui el chad—el mo oubeltikereng er a Dios, el diak a ngera el dongreos, el oba rokir el rengud, klokled, uldesued, me a klisiched. ¹⁶ Sel beltik el reng el mo er a Dios a kot el ngarbab el llach er tial beluulechad. Engdi sel kot el ngarbab el merang el tekoi er a beluulechad a kmo Dios a betik a rengul er kid el di uaisei- el diak le mekreos e Ngii loba rengul, klisichel, ma uldeseuel rokir. Ea ika el klisiich lolab sel bo luldak er a klisiched el diak a torbengii, eng mekdebechii a kmal klou e mesisiich el chedaol, klisichel a chad. Seikid, eng ua ikel tekingel a Teilhard de Chardin el milluches el kmo, “ng [mocha] ongeru el taem er a reksi er a beluulechad, el chad a oremii a mesisiich el klisiich.” ¹⁷

Seikid, e kmal di seikid, e kid a sebeched el meral mo oltirakl er sel ongeru el llach el mo diak de ko er a di meruul a tekoi a lechub el lak a kmal belkul omerelled. A lsekum eng meral betik a rengud er a Dios e meral melasm el mo blak a rengud loumera er Ngii, e Ngii a mo meskid a duch er kid, techelled, me a blakereng er kid, me a rolel eng mo sebeched el mo betik a rengud er a odam er kid me a dirrek el kid. Seikid eng locha mo sebeched el muut el kmo, “Ng diak a re nga er a deureng el chad er a chelsir a rokui el chad el mla obeob er a chimal a Dios.” ¹⁸

Rodam ma rodos, nglunguchek me de ngoriakl er ngike el merau el ngeasek el chad, e denguu a chelngelel a Kristo, el diak el iior ra berredel, e diak el iior el kmo ngera ngklel a lechub a klungel. Ak sioning el kmo sel dodersid el mo oltirakl er Ngii, ea ngii di el, teletelel a rael a di mo kebekakl er sel techodulik el korona me a mekngit el kerus er a rechad ra Rom. Meng diak el iior er a iiltetel ngike el ngeasek el merredel, le ng dimlak el sebechel a iiltetel ngubetii er a cheliseksikd el klengar me kid me kede dirrek el uaisei. Sel klengeltengat el melai er sel kot el ngarbab er a rokui el daisang el ngii a—sengk er a diak a ulebengelel klengar—eng kmal kekerei a ongit el mei er kid el mo melemolem el mesisiich loltirakl er a Ngarbab el Prist er a Ureor el doruul, el Diched er a Llomes, Sebechekled, e King er kid. A kuuchais lobengkel a Amaleki er a recheuodel el kmo a dersta er kid bo doruul uaisei “lodersii a [rengud] el rokir el uldersed el mo er ngii.” ¹⁹ Tiaikid el blakereng, e diak el mesim el teletael, e kede mengitakl el kmo:

El ngara chedaol ngklel a Jesus Kristo, amen.