Bleketakl el Klebokel—Beot a Klebekelel
Me de becherei ebangkelio me le beot sel de kedmokl a ikal chedaol mla metutk el ngercheled.
Uchelel a omesodel
A kmal outkeu er a dersta er kemiu el teloi er tia el ongdibel.
Chelecha el sils e ak oureng me bol sebechek el smaod a eru el telengtengil a mla moluut el ebangkelio er a Jesus Kristo, lobengkel a kleua el kmal omeksemeriar a reng el cheldecheduch el mlara Uriul el klebesei el Santo er a beluulechad el meliuekl el olecholt a rellel aika el osisechakl. Sel kot el telengtengil a mla moluut el ebangkelio—urerel a Dios el kirel a mo suobel me a diak a ulebengelel deureng—a uldalm er a beot el cheledaol mla metutk el ngerachel. Sel ongerung el telengtengil a omeklatk er kid el kmo a ebangkelio a belektakl, mekreos, e beot.
Cheledaol Mla Metutk el Ngerachel
El mo uchul e kede nguu a diak a ulebengelel klengar, e ng kired el “mei er a Kristo, e mo cherrungel er ngii.” 1 Sel de me ra Kristo e dolengeseu er a rebebil el mo uaisei, e kede meruul er a urerel a Dios er a mo suobel me a nguu a diak a ulebengelel deureng, el nguu a ultab er a chedaol miltutk el ngerachel. 2 Aikal chedaol ngerachel a mo osisiu ngii ma ikel kisel a priesthood el mloluut lokiu a Moses, Elias, me a Elijah, el llechukl er a 110th bliongel er a Doctrine and Covenants, 3 me sel ongerul ngarbab el llach le bileskid a Jesus Kristo a mo ou beltik el reng el mora odam er kid el di uaia le betik a renguk er kid. 4 Kede metik er a aike el kot el eru el llel a babier er a mla mukbeches el General Handbook, el ngar er ngii el mo er a rokui el rechedal a ikelesia.
Omko eng morenges aika el tekoi el “General Handbook” me a “chedaol mla metutkt el ngerachel” a rullau el mo suebek a rengum er a ongisengsikd me a rrau el reng, kulengit melak. Aika el ngerachel a di beot, mengesuseu, omekduch a reng, e sebeched el kudmokl. Aika kid:
-
Oltirakl er a ebangkelio er a Jesus Kristo
-
Omekerreu el kirel tirkel lousbech a ngeseu
-
oleker er a rokui el monguu a ebangkelio
-
Mengideb er a Telungalek el mo er a diak a ulebengelel
Ke locha omes er ngii el uai ngak: el olechotel a rael el muut el mo er a oubeltik el reng el Demad er Babeluades.
A Ebangkelio a Bleketakl, Mekreos, e Beot
Ng mla muchais el kmo ebangkelio er a Jesus Kristo a “bleketakl el klebokel e beot a klebekelel.” 5 A beluulechad a diak. Ng cheliseksikd, e betok a chedechedelel, e mui er a ringel me a klautok. Kede mukngeltengat sel de kerekikl el merrob a ongisengsikd, el ngii a oumesingd er a beluulechad a ngarngii, e soiseb er a rael el mo nguu e oltirakl er a ebangkelio.
President Dallin H. Oaks a ulemtab: “Kid a mosisechakl a betok el mekekerei e di bleketakl el tekoi er a ebangkelio er a Jesus Kristo. Ng kired el mo muklatk el kmo a kekka er a cherengel a taem, er aike el uaia di blel mekekerei el tekoi el de kildmokl a mlocholt er ngii a ungil e meklou el tekoi.” 6 A Jesus Kristo a smodii el kmo a Loltekau a di a beot me a chelngellel a kebekakl. 7 Ng kired el rokui el melasm el meruul er a ebangkelio me ng di beot—er a chelsel a klengar, telungalek, klas me a cheldebechel, dirrek el chelsel a ward me a stakes er kid.
Sel bo morrenges aika el beldukl el cheldecheduch el bo kuuchais er kemiu, e momtab el kmo ngellitel el mo omekellomes er a bitang e mellach er a bitang. Aika el blekerdelir tirka el Uriul-klebesei el Santo a mei el olechotel el mera derta er kid el oltirakl el meruul er a ebangkelio er a di bleketakl, mekreos, e beot el teletael e dirk kudmokl a chedaol mla metutk el ngerchelel a tang.
Oltirakl er a Ebangkelio er a Jesus Kristo
Kot, Oltirakl er a Ebangkelio er a Jesus Kristo. Jens er a Denmark a meluluuch er a bek el sils el mo kiei el oltirakl er a ebangkelio e omtab a ultebengel a Chedaol Reng. Ng mla mesuub el di mereched el oltirakl el remuul sel lolechesuar er a Chedaol Reng lomekrael er ngii.
Jens a uluuchais er tiang:
“Aki kiliei er a oumesingd el blai el kerekar, a kbekbel a toechel a chedeuel, er a belngel a beluu, el kmeed er a omoachel.
“Tia el kebesengei er a kmal klebokel el sils er a Danish e tokubets el ungil a eanged, el chesimer me a mado a blok, e a rokui a mle budech e chelellakl. Ele uchul a klebokel e kemanget el mellomes sel le kebesengi er a belumam, eng dimlak kurreched el mo omtechei er a mla mad el tama er a dengki er a ta er a delmerab er a blimam.
“E di mle kiul me er ngak a klou el ongesuseu el mo oidii er a di mereched el taem! Osisiu el taem, e ak rongesii a bechik er a, Mariann, el omekedong er ngak me a rengelekam el mo melebal chimomam e le ng mla mo temel a belsoil!
“Ak mla bechiil el meketeket el taem el medengei el kmo tia a dimlak el ungil el taem el kuruul a ngidi el ngerang el diak el omelbal chimak, e ng di ak rirengesak el melekoi er a Mariann el kmo ak di mereched el mora stoang el mo omechar er a beches el tama er a dengki. Ak ulmechesiu er a klou el ongesuseu el kirek el orreched.
“A stoang a di mlar sel kuk bitang er a omoachel. Aki blechoel el merael, e ng di chelechang e ak ngiluu a rrat er ngak. Me a kurael el engelakl er tia el omoachel, e a kemril osengek milsa a kekerei el ngalek el sechal, el locha eru rekil, el di ngii el tang el merael, er a tkul tia el omoachel, el kmal kmeed er a ralm—e sola e rirebet er a chelsel! A ta el bung e ng mla er sei—e a ongerung eng mlo dibus!
“Ng dimlak a ngidi el chad el mesang ng di mle ta el ngak. Ak chilitii a rrat er ngak, e rirurt, el suchesokl er tia el di kirel a sengchek el omoachel. A bebul tia el ralm a kmal di mle mereched el mo cherrechar er a iumd, el rulii meng meringel a domes er a chelsel tia el ralm. E sola ak miltebengar a mengitengtik er a bitang. Ak dililch a chimak er a chelsel tia el ralm, e urekedii a chelechedal a bail, e ultemetii ngika el kekerei el buik el me er bab. Ng mocha omdechem a telil, oklukl, e longelang. A uriul er isei e ngika el buik a mlo er a rechad er a blil.”
A Odam el Jens sel loluluuch er a bek el tutau er a ngesou el mo omtab a ongetikaik er a Chedaol Reng, el mo lmuut er a diak de blechoel meruul tekoi el uaia ruoll el mo omtechei er a tama er a dengki, ngii a dirrek el miluluuch me bol sebechel el dongu el mo omekngeltengat er a rengelekel a Dios. Jens a kiei loltirakl er a ebangkelio el osiik a chedaol ulekrael er a bek el sils, el melasm el mo klikiid, e meruul el ngara tkul er bab el sebechel loltirakl sel lemei.
Omekerreu el kirir Tirkel Lousbech a Ngeseu
Tiakid a okesiul a omekerreu el kirir tirkel ousbech a ngesou. A ta er a klebesei e a merredel er a ward er a Cúcuta stake er a Colombia a ulbengkel a Merreder er a Rengeasek el Redil el mo oldingel er a reteru el ngeasek el redil—me a dirrek el klou el ngeasek el ochederir—el tir a mle chemau a betok el ringel. Ng dimlak el meketeket e a demerir a mlo smecher, me a derrir meng dirrek el mlad er a rak ruchei. Tirka el tedei el ochad a mocha di tir el kiei er tia el kekeriei, el mechetechut el blirir. A kbekbel a mle ruul er a teliot el kerrekar el lechotel er a tutuu, e a beached el chedeuel a di milekedek er sel basio el bechiuaiu er ngii.
Uriul er tial odngelir, e tirkal merredel a mlo medngei el kmo tirka ousbech a ngesou. Okiu a derdellel a ward, e a uldasu el mo olngeseu er tir a ulemuchel. Merredelel a ward me a stake—Cheldebechel er a Rolngeseu, cheldebechel er a quorum, Rengeasek el Sechal, Rengeasek el Redil,— me a betok el telungalek el tir el rokui a mlo olengeseu el omekngeltengat er tia el telungalek.
A chelechad er a ward a ulemekedong el mo er a rebebil er a rechedal a ward el tir a oureor el daiksang. A rebebil a ulngeseu el meruul er a katelngel me a stelel, bebil a chiloit a temir e mle meringel loureor, a rebebil a milruul a kall, me a rekuk di mle olengeseu er a sairio me a usbechall el klekedall.
Tia er a bol merek a okedecherul tia el blai, e ng mle klou el deureng er tirke el rokui el ulngeseu me a dirrek er tirka el ngeasek el chedal a ward. Tirka el mla melakl a rechad er a blirir el ochad a mlo melechesuar er a beltkil a rengrir me a ulekerreu er a telungalek er a ward el kirir el kmo te diak el di el tir e a Dios a blechoel el ngar er ngii el kirir. Tirke el tir a ulngeseu a mlo melechesuar er a beltkil a rengul a Osobel el mo er tirka el telungalek e mle dongu er a Chimal el mesiou er tir.
Siotai er a Rokui el Monguu a Ebangkelio
A kumdasu eng mo soam tial okesiul a siotai ra rokui el mo nguu a ebangkelio. A ongeteruich me a euid a rekil el Cleiton er a Cape Verde a dimlak a kangkester er ngii er a kmo sel tekoi el duubech el uchul a omerollel mo er a seminary er a ward er a ta er a klebesei. E ng di a klengar er ngii me a klengar er a rebebil a mengodech e le ngii a uchul.
Cleiton, lobengkel a delal me a obekul, a mla metecholb er a Ikelesia er a diak el meketeket, e ng di tirka el ongalek a mlo diak lomais el mera ikelesia. Tia el di tang el omerellel el omais el ngara seminary a mlo chemolt el orkedellel a telungalek er tir.
A rebebil er a rengeasek er a seminary a kmal mle ungil e ulemekerreu. Te rirellii a Cleiton me ng melechesuar el ngara blil e milngesuseu er ngii el mo teloi er a bebil er a klekool. Ng mlong e mocha omuchel el teloi er a bebil er a miting er a Ikelesia. A mellomes el bisop a milsa chedaol ultekllel a Cleiton e milngemedaol er ngii el mo oderchelel. “Seikid el taem el melemolem,” e Bisob el Cruz a melekoi, “A Cleiton a mlo okesiu e milengodech er a rebebil er a rengeasek el chad.”
A kot el chad el Cleiton a milngemedaol er ngii el muut el mera ikelesia a mle delal, e mocha obekul. E ngii a mocha omerk el me er a resechelil. A ta er a resechelil a mle ngeasek el sechal el di mle ua klungel, el Wilson. Di mle sel kot el miting er ngii el obengterir a remisionari, e a Wilson a uluuchais er a urungulel soal mo metecholb. A remisionari a kmal chilat e mlo mechas a rengrir el kirel aike el ngii a Cleiton a mla ouchais el obengkel a Wilson.
A omelasem er a Cleiton a dimlak di borsei e lemerkong. Ngii a ulengeseu er a rebebil er a diak el sal mesisiich er a ikelesia el muut el mei, osisiu el taem e ng uluuchais er a ebangkelio el mo er a resechelil er a bebil er a klechelid. Chelecha el sils e a ward a ngar er ngii a Okedei me a reteim el mesisiich loumerang el ngeasek, el obengkel a mesisiich el prokuram er a seminary, el sulel sel omelasem er a Cleiton el oubeltikelreng, omerek, e mengemedaol. Cleiton, me a obekul, el Cléber, tir el terung a mengedmokl er tir el mo mesiou el chad er a misionari.
Mengideb er a Telungalek el mo er a Diak a Ulebengelel
Ea ulebongel, e me mekuuchais a okesiul a mengideb er a telungalek el mo er a diak a ulebengelel. Lydia er a Kharkiv, Ukraine, a mle kot e ng milsuub el kirel a templo el mla er a remisionari. Di mle mereched, a Lydia a ulemechesiu er a urungulel soal el mo er a templo, e a uriul er a telcholbechelid er ngii, e ng mocha omuchel el mengedmokl er ngii el mo nguu a babier er ngii el mo soiseb er a templo.
Lydia a mlo er a Freiberg Germany Temple el mo nguu a klengeltengat e chiloit a telal klebesei el meruul a ureor el omtechei risei. Uriul er a oterkeklel a Kyiv Ukraine Temple, a Lydia a mlo blechoel el omais el mora templo. Ngii me a bechil, Anatoly, a mlo moak risei e a uriul e te mlokedong el mo mesiou el misonari er a templo. Delongelir el terung e te mla metik er a betok er a teruich me a eim el telael a idisir el rebladek e mla oureor el meruul a chedaol ruoll er a templo el kirir.
Sel loker er ngii el kirel a cheberdil a rengul er a tekoi er a ureor er a templo, a Lydia onger, “Ngera a blek nguu er a templo? Ak mla rullii a beches el chedaol telbilek lobengkel a Dios. A olechotel a klaumerang er ngak a mla mo mesisiich. E ak mla subii el nguu a ocholt er ngak. Ng mla mo sebechek el meruul a olsobel el chedaol ruoll el mo er a re mla mad el rebeldekek. E sebechek el oubeltik el reng e mesiou er a rebebil.” Ng milngesimer el oba tia el kmal klemerang el tekoi: “A Rubak a soal mesekid el blechoel ngara templo.”
Ulebongel
Ng mechas a renguk er a klungiolir tirka el Uriul-klebesei el Santo, el dersta er tir el kmal kakerous e ngodech a le ble er ngii, e ng di te uldalm er a ika el eua el cheldecheduch. Ng betok a sebeched el smuub er a ongasireng el duubech el uchul aika el beot el omerellel a bleketakl el osisicheklel a ebangkelio. A rokui el leriruul a dirrek el ngara chereuel a chimad.
Mei me dolemolem el rullii me a ebangkelio dil beot el dotekau a chedaol mla metutk el ngercheled: El mo oltirakl er a ebangkelio er a Jesus Kristo e mo biusech el kirel a ongelulau el uaia Jens er a Denmark. El mo omekerreu er tirke el ngesool, el mucholt er tirke el rechedal a Cúcuta stake er a Colombia el omekedechor er a blirir tirke el mla mad a rechad er a blirir el rechedal a ikelesia. E mo mengemedaol er a rokui el mo nguu a ebangkelio, el uaia ike el riruul a Cleiton er a beluu er a Africa er a Cape Verde el mo er a resechelil me a telungalek er ngii. A ulebongel, mo mengideb er a telungalek el mo er a diak a ulebengelel, el mlucholt er a Odos el Lydia er a Ukraine, el okiu a chedaol ruoll el ngerchelel er a templo, omelasm er ngii er a tekoi er a reksi er a telungalek, me a dirrek el omesiou er a templo.
Sel bo doruul el uaisei e ng mo uchul a deureng me a budech. A ikang ak yaksok e olecholt er a klaumerang er ngak—me a Jesus Kristo a Osobeled e Olsobel—el ngara ngklel a Jesus Kristo, amen.