A Usbechel a Ikelesia
A chedaol llechukl a bleketakl lolsisechakl er a uchelel me a usbechel a Ikelesia el ulekrael loba klisichel a Rubak er kid, el Jesus Kristo.
Betok el rrak ra mla memong, ea Elder Mark E. Petersen, el chedal a Chelchad er a Teruich me terung el Apostol, a ulemuchel ra tekingel loba tial okesiu.
“A Kenneth me a bechil, ra Lucille, a ungil chad, te diak el cheblad e melmalt. Te diak el ngara ikelesia, meng uaisei, le tomelchesiu er tir el di ungil selbechakl el diak a usbechir er ngii. Te olsisechakl ra re ngelekir ra llemalt ma kldung e ruul ra uldesuir el kmo ngdi ikaikid ea sebechel a Ikelesia el kutmokl el kirir.
“Me a, tir a tekangel el sorir lousbech a ikel ulengull el sils el dmak el milil longalk… [e] a mora ikelesia a mo ongesang.” 1
Chelechal sils, ea tekingek a kirel tirkaikid lungil el chedal a chelid el mla mo diak el ngara ikelesia malechub e te mesiou ra ikelesia er tir. 2 Sel kdul kmo “ikelesia,” e ak mesaod a blil ongdibel, blil a nglunguuch, malechub eng bebil ra cheldebechel ra klechelid. Aki bekikl le ildisir a rechd el mora ikelesia ra ikal basio a mla meriou el imis, er a beluu el rokir. 3 Alsekum eng dikea belkul a ikelesia el mer kid leng kmo ngera uchul, e ke de tomelii a chedaol klengar er kid, e betok el chad a mla oriditerir ra Dios me te mla osengesii a klengeltengat lomeskid el mei er a beluad.
A bised me a ngara tekingel a ikelesia a ngosukid e lmuut el mo ungil chad e moungil mengitikaik ra klengar ra re bebil ra rechad. A ikelesia a osisecheklid el kmo kede mekerang a doltirakl a doumerang el llach. Kede kausisechakl. A ungil okesiu a lmuut el mesisiich er a dosaod a tekingel a Chelid. Kede mo mesisiich a dedak el obengterir tirkel losisiu a uldesued. A de ngara ikelesia e doruul a ureor, e a rengud, el Bibilia a mla meketeklii, “a ungil dmak el kaubeltik el reng.”
I.
A chedaol llechukl el Dios a ngiluu mesterir a re Kristiano er a Bibilia me a chelechal taem a ocholt a ungil lolsisechakl el usbechall er a ikelesia. A ikang a diul ochotii el kmo a Jesus Kristo a tilketekii a ikelesia e milsang el kmo ngarngii a ikelesia el mo melmolm er a urelel ruriul er Ngii. Ngii a ulemekedong ra re Teruich me a terung el Apostol e mesterir a klisiich me a kiis el mo omtebechel er ngii. A Bibilia a olsisechakl el kmo a Jesus a “btelul a ikelesia” 5 ea re mo menguteling er ngii a mlodars “el mengerrungel ra re santo, ma ureor ra omesiou, el mo mesisiich lokiu a bedengel a Kristo.” 6 Ngultebechel el Bibilia a bleketakl er sel uchelel a ikelesia ma usbechel er chelechang.
A re bebil a melekoi el kmo a le ngara ikelesia ra ikal miting a diak el ngosuterir. A re bebil a melekoi el kmo, “Dimlak a ngerang el ksubii er chelechal sils” malechub “Ng dimlak a chad lungil me rengak” malechub “Ak ngilasech a renguk.” A ikel melichekl a rengud el tekoi a diak el kirel mo torebengid ra ikel llechul a Kristo, el ngii a ulsisecheklid el mo mesiou, e diak desiungel. 7 Ke de kora omdasu er tiang, e a tara chedal a ikelesia a milsaod er a lomes ngii el kirel a omerolel el mora Ikelesia.
“Betok el rak ra mla memong, e ak milngodech a renguk ra mora ikelesia. Ng diak kluut el mora ikelesia el di kirek, ngdi ak bai momdasu ra re bebil. Mak rirelii ra renguk loutkeu ra rechad el di tiltang el dengchokl, mo outekeu ra mle oldingel, …e mo olngeseu el mesiou. …
“Meng uaisei, ak mora ikelesia ra bek el sandei el delalem ra renguk el mobang a blak el reng, e diak morimel, e meruul a ikel mo sumechokl ra moungil er a klengar ra rechad.” 8
A President Spencer W. Kimball a ulsisechakl el kmo “kid a diak domais el mora miting sel Chedaol Sils el mo milil malechub el mong el mo mosisechakl. Kede mong el mo oldanges er a Rubak. Ng ngerechelel a derta el chad. … Alsekum ea omesiou a diak lungil el kirem, e kau a dikea mngoriakl. Ngdiak a chad el sebechel mo oldanges el kirem; ng kirel di kau losiik er a Rubak.” 9
A mora Ikelesia a sebechel mok a rengud e chemedolid.
Chelsels a ikelesia eng diak el di el kid el tang el mesiou malechub e dolilt er sel soad malechub eng sel ungil besul er kid. Kede blechoel el dmak el mesiou. Sel dosiou e kede ngmai a ikel techall el ngara babeluades el mei me kede ngoriakl el morbab er ngkel chad el di osiik ra dimo klungiolel. A ike lomesiou el meketmokl ra Ikelesia a ngosukid el mo mesisiich er a ikel kldidai el reng el delalem ra rengud el sebechel oitechetur sel ukurulel a reng.
Ngarngii a bebil lorechudel e ungil de desaod, el di mereched. A de ngara ikelesia e kede obengterir a rungil chad el melasem el mesiou ra Dios. Tiang a uleklatk el kmo kid a diak el dil kid el tang el meruul a ureor er a ikelesia. Kede bek el chad lousbech er a re rebebill, e a delongeled me a rebebil er a ikelesia a tara kot lungil bo dolchesuar er ngii, el kired ma re bechid ma re ngeleked. Sel sekum meng diak a ikaikid el chelechad, tokuni ra delongelir a rengalk ma roba blak el reng el chad ra blirir, ea omesuub ochotii el merael mo meringel ra roungalk lomekeroul ra rengelekir er sel klechelid er tir. 10
II.
Me ak, mla smodii a kirel a ikelesia. Chelechang e ak mo mengedecheduch el kirel sel tokubets el belkul a chedal a ikelesia, ngara ikelesia, e meruul a ureor ra mla moluut el Ikelesia ra Jesus Krito ra Uriul-klebesei el Santo.
Kid, a ungil medengei, e olterkokl el kmo a chedaol llechukl, uodel ma beches, a bleketakl lolsichakl er sel uchelel ma sel usbechel a Ikelesia el ulekrael loba a klisichel a Rubak er kid, el Jesus Kristo. Aki dirrek e louchais el kmo a mla moluut el Ikelesia ra Jesus Kristo a milketmokl el mo olsisechakl er sel mui el llechul e mo mtebechel e obang sel klisichel a kle priesthood er Ngii el mengetmokl a ikal chedaol ruoll el ulsbechall er a osisebelled er a rengedel a Dios. 11 A rechedal a Ikelesia el diak el ngara ongdibel e di ultuil ra di rengrir a orideterir er a ikal ulsbechall el tekingel a ebangkelio: me a sel klisichel ma klengeltengat ra priesthood, me a sel mui el mla moluut el llach, me a ikel longitikaik ma techall el loltaut er seikid el llach. Tir a torbengii sel techall el mo ngara telungalek el mo cherechar.
Sel tara ungil teachall el ngartial mla moluut el Ikelesia a ngosukid el mukeroul ra reng. A ulekeroul a belkul a mo mengodech. Sel belkul ra kuk reng eng kle ouchel el reng e osiik el mo kmeed ra Rubak. A chelsel tial mla moluut el Ikelesia e ngarngii a llach, teletelel a ureor, me tirkel ulekrael el olngeseu er kid el mo ouchel a rengud. A moktek er tir, molmuut er tirkel merritel el mengeteklel a ikelesia, a diak longelbus, el uai a ikel kerkeriil. A re omtebechel er kid er a Ikelesia a oba beltikelreng lolengeseu er kid meng sebeched el nguu sel klechubechub er a klausubes el meketmokl lokiu a Tngakireng er a Jesus Kristo.
A reng ra dertal chad a diak el sal sebechel msang sel ongitikaik ma omengederoder er a ungil omesiou el ngii a mengai er tial mla moluut el Ikelesia. A ungil okesiul tiang a tirkel ngeasek el sechal ma redil ma re meklou el chad el mla cheuekl a tekoi ra skuul malechub a ikel sorir el mo meruul leng merko klsel a ureor e kongei el mo mesiou el misionari. Toureor el mesiou el mora re diak lodengterir el chad el ngara ngodech el basio el dimlak el tir a ngileltii. Ng diosisiu el mor tirkel mekedung el chedal a ikelesia el lungil mesiou ra ikel domekedong el kmo“ngureor ra templo.” Ngdiak a di imo ra ikel lureor ra omesiou el mo tekoi a lak el Ikelesia lolngeseu, mengederodel, e omtebechel a ikal lureor.
A klaumerang ra chedal a ikelesia ra tekingel a klechelid ma Ikelesia ra omesiou a mla osisechekelterir el kmo te mekerang a loureor el dmak el kirel a klungiolel a buai. Seikid el teletael ra duch ma ulekeroul a diak el dubech el mora dertal chad el ngii a kmal mla berk ra omeruul ra chelsel a beluu er chelechal taem. A chelsel tial klou el chelechad ra ikal rechelel a ikelesia, e kede dmak e oureor lobengterir a rechad el dimlak dolilt er tir, ngdi te chad losisecheklid e omekrael er kid.
Meng diak el dil lolngeseu er kid el mesuub a ungil tekingel a reng el ua beltik el reng, klubechub, klausubes, ma kllou el reng, tiang a meskid sel techall el mesuub loureor lobengterir a rechad el kmal ngodech a klechad er tir ma sorir. Tia ungil leng ngosuterir a re betok el chedal a ikelesia, ma betok el chelechad el mai a klengeltengat er a urerir. A re Uriul-klebesei el Santo a lodengterir el sebecherir el mengetakl e dmak el kaingeseu el oureor. Tial siukang a le bilchelii tirkel meduch a rengirir el mle kot el chedal a ikelesia el kiliei ra Inermountain West meng mildalem sel mesisiich el siukang lolengeseu el kirel a ikel moungil ra rebek el chad.
Ngoumesind ra ike lureor me a ngeseu el kirir a rechad a kirel meketmokl leng ngulekiu ra mlodars el ngeseu el mlara re dertal chad el ngii a kmal betok. Tial mloluut el Ikelesia a meruul er tiang el ngarsel klou lureorer ra ngesou el mora rechad el meliuekl er a beluulechad. A ikang a uldimukl ra tekoi ra skuul ma ukeruul, omekang ra re songerengel, omekerreu er a re meluaoch, olngeseu el melubet ra melai a mekngit el kar, ma lmuut el betok. A rechedad ra Ikelesia a lodengterir el kirel sel Helping Hands el lureor ra ikel tekoi ra telmellel a beluu. Tial chedal a Ikelesia a meskid a techall el ngara ikal meklou lureor. A rechad ra ikelesia a dirrek el melnget a udoud lolngeseu ra re mechebuul el ngara delongelir.
Meng diak el dil sel lolchesuar ra budech ma deurreng lokiu a keldemir ra Reng, a rechedad lomais el ngara Ikelesia a dmeu a rengrir el kiei el ngara ebangkelio, el uai ikel klengeltengat sel loltirakl er sel Llechul a Ulekereuil a Bedenged, ma klengeltengat el le ngai el bedengel a klalou ma mesisich el chedaol klengar lokiu sel telbiil a le kiei loltirakl er sel llechul ongeltacher. Kede dirrek loba sel klengeltengat er a uleklatk el de nguu ra rulekrael el mengetekled.
E sel mo mengebkall a ikal rokui a ikel chedaol ruoll er a priesthood el kirel a diak a ulebengelel klengar, luldimukl er a chedaol belsoil el dolai er ngii sel bek el Chedaol Sils. Ea kot el ngarbab lureor er tial mla moluut el Ikelesia sel diak a ulebengelel telbiil ra chebechiil, el rullii meng sebechel melmolm a re telungalk el dmak el ngara mui el klebkellel a deleuill. President Russell M. Nelson a ulsisechakl er tial llach el diak dobes er ngii. Ng dilu el kmo: “Ng diak el sebeched el di oureng er a roled el mor sel le ngarngii a Dios. Ng kired loltirakl a ikel llach lultuil [er sel klengeltengat el] teluutk el kirel.” 12
A tara ikel llach a mo ngara omengull er a ikelesia sel bek el Chedaol Sils. 13 A odengesed ma doltaut el llach er a diak a lulebengelel klengar a ngoikid el mo kmeed ra Dios e oisisii e mesichii a klisiched lou beltik el reng. A Parley P. Pratt, el tara mle kot el Apostol er chelechal taem, a silodii a lomelchesuar er sera Profet Joseph Smith ra losaod a ikal llach: “Ak milchesuar el kmo a Dios a Demak e ra Babeluades meng uaisei; ea Jesus a ta er ngak, ea bechik el ngara renguk a melmolm el ngar, el mora ulebongel: el ngii a chubechub el anghel, el mlei er ngak el chelodek, e kerone er a klebkall el diak a ulebengelel el taem. A kedeb lomesodel, eng sebechek er chelechang lou beItik el reng loba reng ma dirrek el oba mui el klaudengei.” 14
Me ak mengesimer, e omeklatk ra rokui el chad el kmo kid a diak doumerang el kmo a ungil a diak el dil mektmokl lokiu a ikelesia. Ngileakl er a ikelesia, e kede mesterir a milion ra rechad lolngeseu e mengetmokl a obdoies lungil lureor. E a dertal chad, el Uriul-klebesei el Santo a meruul ngii lureor lobengterir. Kede mes a ikal lureor el ua lolchotel sel diak a ulebengelel klemerang el “Reng a msa llomes el mora ra bek el chad el mei ra beluulechad.” 15
Ma blo lungil urreor el sebechel meketmokl e diak lultuil ra ikelesia, sel cherrengelel a llach maikel telengtengil a llechul lolsobel ma nguu a diak a ulebengellel klengar a di de betik ra mloluut el Ikelesia. Lmuut el tang, bised el mora Ikelesia a meskid a klisiich e toketekii a klaumerang el ngii a mei sel dobengterir a re bebil ra roumerang e menguul el dmak lobengterir tirkel dirke melasem el ngar sel rael ra telbiil me te moungil mesiungel a Kristo. Ak meluluuch me kede rokui el diak de mesim er a ikal doruul ra Ikelesia sel dosiik er a diak a ulebengellel klengar, el kot el klou ra rokui el sengk ra Dios, loba ngklel a Jesus Kristo, amen.