“Ngelmuut el Betik a Rengum er a Ngak er a Ikang?”

Sera November 2019, e ngak me a sechelik a mlo oldingel er a Holy Land. Sera ki mngarisei, e a ki milsuub chedaol llechukl el kirel a klengar er a Jesus Kristo. A ta el tutau e a ki mle dechor el bedul a dilusechngebard er a Debel a Galilee el ngii a locha basio el Jesus a mlo kebetech Ngii me a rultirakl er ngii ruriul er a Okisel er a Kodall.

Uriul er a Okisel a Jesus er a Kodall, sel donguiu er a Johanes chapter 21, e a Petrus me a rebebil er a rultirakl a mla er a chei el ta el kesus e dimlak a chelderir. ¹ A bocha el tutau, e te milsa chad el dechor er a kederang e dilu er tir me lotengel a iebedir er a kuk bita er a bilas. Ng mlo mechas a rengir, le ng mlo mui a iebedir er a ngikel. ²

Te di mle mereched el dongchii ngika el chad el kmo ng Rubak, me te ulereched el mo outkeu er Ngii.

Sera longurs er a iebedir el me er a kederang, el mui er a ngikel, e a Jesus a dilu el kmo, “Mei e domengur.” ³ A Johanes a melekoi el kmo “sera bo el merek lomengur, e a Jesus a dilu er a Simon Petrus el kmo, Simon, el ngelekel a Jonas, ngelmuut el betik a rengum er ngak er a ikang?” ⁴

Me sera kdechor er a osisiu el kederang, e ak mlo mtebengar el kmo a keril Osobel a ta er a kot el klou a belkul ker el Ngii a locha mo oker ngii er ngak er a ta er a klebesei. Ng uaia di kurrenges er Ngii loker el kmo, “Russell, ngelmuut el betik a rengum er ngak er a ikang?”

Ko melbedebek el kmo a Jesus ngmillekoi el kirel a ngerang er sera loker er a Petrus el kmo, “Ngelmuut el betik a rengum er a ikang?”

A domekesiu er tial ker el me er kid er a chelecha el sils, e a Rubak a locha melekoi el kirel aikel betok el chelsengud me a ikel betok el ungil me a mekngit el tekoi el mengesang osenged me a temed. Ng locha mo oker er a dersta er kid el kmo ngelmuut el betik a rengud er Ngii er a kloklel a beluulechad. Tia locha ker el kirel aikel mekreos er a klengar kid el tekoi, me a techa doltirakl er ngii, e uangera osenged el kirel a rechedal a telungalek er kid me a retonari er kid. A lechub e Ngii oker el kmo ngera sel meral meskid a deureng.

A kloklel tia el beluulechad ng meskid a deureng, deuil a reng, me a budech el Osobel a milsterir tirkel lultirakl er Ngii e dirrek el Ngii a meskid? Ng di Ngii el tang a meskid a meral deureng, deuil a reng, me a budech lokiu beltkil a rengud el Kirel me a otirekled er a Osischeklel.

Ng mekera donger er a ker “Ngelmuut el betik a rengum er a ngak er a ikang?”

Sel debetik er a mui el belkul tial ker, e kid a sebeched el mo ungil chedal a telungalek, tonari, beluu, chedal a Ikelesia, e sechal me a redil ngelekel a Dios.

A rekik er a chelecha el taem, e ak mla ngara betok el kemeldiil. Ak medengei el kmo te betok er kemiu a mla mtab aikel bla kutab. Sel doutkeu er a klengar er a mla mad el chedal a telungalek a lechub eng sechelid, eng diak desal rongesii a chad el mesaod el kirel a klungel a blil, iidisel a mlil, a lechub e lududel el ngara bank. E dirrek el blechoel diak losaod el kirel a post er ngii er a social media. Oumesingd el kemeldiil el blak bo er ngii, e te mesaod el kirel a deleuill er ngii, omesiungel el mo er a rebebil, aike lesiluub me a riruul, me sel beltkil a rengul kirel a Jesus Kristo.

Lak bol rrau a rengmiu er a tekingek. Ng diak du el kmo a ungil blai a lechub a ungil mlai a mekngit a lechub a usbechellel a social media a mekngit. A kulekoi er ngii a kmo sel lulebongel, e a ikaikid el tekoi a diak a kmal belkul er sel beltikereng er kid el mo er a Osobel.

Sel lebetik a rengud e doltirakl er Ngii, e nga er ngii a klaumera er kid er Ngii. Kede ouchel a rengud. Kede oltirakl Okesiul e mo metecholb e nguu a Chedaol Reng. Kede outekangel el mo er a ulebongel e melemolem el ngara rolel a telbiil. Kede ousubes er a rechedal a telungalek me a retonari el diak dongemekl a ngasechereng el kirir. Kede meral melasm el mo oltirakl a llechul a Dios. Kede melasm el mo bekongesenges. Kede meruul e oltirakl a telbiil. Kede mengull er a redemad me a redelad. Kede mo mechei a mekngit el teletael er a beluulechad. Kede mengedmokl er kid el kirel Ongeru Lemei.

Sel “Ngar el Kristo: Chisir a Reapsotol,” e kede menguiu el kmo: “[A Jesus] a lmuut el mei er a beluulechad er a ta er a klebesei. … Ngii a mo mengedereder el King er a re King e Rubak er a rokui el Rubak, e a rebek el chad a mo mengull er Ngii. A dersta er kid a mo mukerkeriil er Ngii loltirakl a urered me a ikel soal a rengud.” ⁵

Ngak el ta er a Apostol el mle saing er sel babier el “Ngar el Kristo,” eak dmu el kmo sel klemedengei el kmo a Jesus a “llomes, e klengar, e urungulel a beluulechad” ⁶ a meskak a klemeriar reng el muut el mo oubeltikereng el mo er Ngii er a bek el sils.

A kuuchais el kmo a Chedam er a Babeluades me a Jesus Kristo a ngar. A kuuchais el kmo Tir a betik a rengrir er kid. A cheaol llechukl olisechakl el kmo “Beltkil a rengul a Dios a uchul, e nguldureklii a Di tal Ngelekel, me tirke el rokui el mo oumerang er ngii a diak bol riid e bai mo nguu a diak a ulebengelel klengar.” ⁷ E dirrek chedaol llechukl lolisechakl el kmo a Jesus “a kmal betik a rengul er a beluulechad me nguldersii a klengar ngii, me tirkel rokui el mo oumerang a mo ngelekel sechal [me a ngelekel redil] er a Dios.” ⁸

A Chedam er a Babeluades a kmal betik a rengul er kid meng kildmeklii a uldasu el kirel a mo suobel el Osobel a kot el klou a ultutelel er a chelsel. A Jesus el kmal betik a rengul er kid me sera Klou Longdibel er a Babeluades, e a Chedam er a Babeluades er a loker el kmo, “Ng techa kudureklii?” E a Jesus, el mle kot el mechell er a rokui el ngelekel a Chedam er a reng, a ulenger, “Ngak Tiang, modureklak.” ⁹ Ng dilu er a Chedam el kmo, “Chedam, sel soam, e a klebkall leko er kau el mo cherechar.” ¹⁰ A Jesus a kilengei el mo Osobeled e Olsobel er kid me bol sebeched el mo uai Tir e deluut el mo er a Rengedir.

Aika leru el bades a dirrek lolisechakl el kmo sel mo uchul e kede lmuut el mo soiseb er a Rengedir eng kired el mo oumerang. Ng kired el mo oumera er a Jesus me a moktek er a Dios el kirel a deureng. A mo oumerang eng kired loubeltikereng e oltirakl er a Osobel e oltirakl a llach, luldimukl a de nga er a chelsel ongarm me a ringel.

A beluulechad er a chelechal sils a chetituokel. Nga er ngii a ngasechereng, ultok, ringel, me a olibesongel.

A President Dallin H. Oaks, er a longedecheduch er sera 2017, eng dilu ikakid el tekoi: “Ng meringel el taem er a chelechang, el mui er a sebekreng: mekemad me a chisel a mekemad, techall er a mekngit el secher, bosech, iieleb, me a ngeldechel a kleald er a beluulechad.” ¹¹

Ng diak el sebeched el metom er sel beltikereng me a urunguled er a Jesus, luldimukl a dechelbangel a oberaod el ringel. A Chedam er a Babeluades me a Jesus a diak el sebechir lobes er kid. Ng betik a rengrir kid.

Tial mlomerek Longeteruich el buil, e a President Russell M. Nelson a ulisechakl er kid el kirel a klou el ultutelel a denguu a Chedam er a Babeluades me a Jesus Kristo el mo kot er a klengar kid. A President Nelson a ulisechakl er kid el kmo a ta er a belkul a tekoi el Israel a mo nguu a “Dios el mo ruchei.” ¹²

Ng uleker er a dersta er kid a ikakid el ker: “Ke kongei me a Dios a mo kot el ngaruchei er a klengar kau? Ngarngii er a rengum el nguu a Dios el mo kot el klou a ultutelel er a klengar kau? Ke mechei a Tekingel, Llechul, me a Telbilel meng mo omekrael er kau er a bek el sils? Ke kongei er a Ngerel meng mo klou a ultutelel er a rokui el tekoi? Ngarngii er a rengum el mo meruul aikel Ngii ousbech er kau e ngmai el mo ruchei er a rokui el tekoi? Ngarngii er a rengum el ngmai a soam el mo ruriul er sel Ngii a soal?” ¹³

Ng kired el blechoel melbedebek el kmo a meral deureng er kid a ultuil er a deleuill er kid lobengkel a Dios, me a Jesus Kristo, me a ta me a ta er kid.

A ta er a rolel e kede ochotii a beltkil a rengud a sel bodedak el telungalek, sechelei, retonari e doruul a mekekerei el tekoi el mesiou er a ta me a tang. Moruul aikel tekoi el rulii tial beluulechad el mo ungil basio.

Ngera el tekoi a sebechem el meruul er a klengar kau lochotii el kmo ng betik a rengum er a Rubak?

A dekerekikl loubeltikereng er a retonari er kid el uai Ngii el betik a rengul er tir, e kede meral mo oubeltikereng er tirkel ngara bita er kid. ¹⁴

Ak lmuut loker, ng mekera omonger er a keril Osobel “Ngelmuut el betik a rengum er a ngak er a ikang?”

Me sel momtab el kirel tial ker, el uai ngak, e nglunguchek me bo monger el uaia Petrus er a irechar, “Oi, Rubak; ke medengei el betik a renguk er kau,” ¹⁵ e mochotii lokiu a beltkil a rengum me a omesiungem el mo er a Dios me a rebebil.

A kuuchais el kmo kede ngeltengat loba ebangkelio er a Jesus Kristo el ngii omekrael a klengar kid me a omerelled el kirir a rebebil. Ngokiu Ngii, e kede mo metik el kmo a bek el ngelekel a Dios el sechal me a redil a kmal mekreos el mo er Ngii.

Ak ouchais el kmo a Jesus Kristo a betik er a rengud el Osobel. Ng Ditang el Ngelekel a Dios. E ngak a ouchais er tial klaumerang el oba ngariou el reng el ngara ngklel a Jesus Kristo, amen.