Tekoi er a Chelsel a Renguk
Ngera el tekoi a omomdasu el kirel? Ngera el tekoi a klou ultutelel er kau? Ngera el tekoi a ngara chelsel a rengum?
Rodam me a rodos, chelechal kluut el dechor tial Conference Center, ak dobedebekii a tekingel a Apostol Petrus: “Rubak, ngungil er kemam a kim ngar tiang.” 1
A uldesuek er chelchal sils a ultuil er a tekingel a profet Nephi, el ngii a milluches a rekord er a rechedal ruriul er a le mad a Demal er a Lehi. A Nephi a milluches, “Aikang a bokuluches aikel tekoi el ngara chelsel a renguk.” 2
Ak blechoel diak kunguiu er tial bades, le kumdasu el kmo a llechukl el tekoi a dimlak el sal klebokel a lechub eng chedaol, e diak le mesisiich el mo uaia “chelsel a renguk.” Engdi ak mla subii el kmo a llechukl el tekoi a erul telael ma edei el dart ma okeim ma kleuang a idisel ra chelsel a chedaol llechukl. 3 Okesiul tiang, ngara Moses: “Ngak a Uchelel e Ulebengelel, el Mesisiich el Dios; e okiu a di Chimol Ngelekel eak mileob aikal tekoi.” 4 Ma tekingel a Nephi a kmo: “Kamosang, a klou el deureng a me er a renguk el kirel a tekingel a Rubak; me a renguk a blechoel lomdasu el kirel a tekingel a Rubak el blak ues me a blak renges.” 5
Aikal tekingel a Nephi a uldersii a ker “Ngera el tekoi a molbedebek?” “Ngera el tekoi a klou ultutelel er kau?” “Ngera el tekoi a ngara chelsel a rengum?”
A tekoi er a chelsel a rengud a blechoel mo bleketakl e dmolech sel doker a ker.
A taem er tial omkodall el secher e ak mlo kebetech ngak ma rengeasek ra betok el miting er a beluulechad el rokir, meklou ma re mekekerei, lokiu a broadcast ma social media, e aki mesaod aikal ker er tir.
A teruich me a eua rekil el Joseph Smith a mlarngii a tmolech el ker er a chelsel a rengul, meng mlo er a Rubak. A President Russell-M. Nelson a mla meketeklii el kmo: “Mngai a kermiu el mo er a Rubak me tirkel tir a moumerar tir el chad. Mosuub loba blakereng el mo oumerang e lak molatk losiik a mekngit er a klengar er a profet a lechub eng cheleuid er a chedaol llechukl. Lak molechel a rraureng er kau e mosaod el mo er a … rebebil er a rrau a rengrir. Becherei a Rubak me lomekrael er kau er tia lomerollem el kirel a skel chedaol tekoi.” 6
A rengeasek a blechoel loker ngak el kmo ngera kuumerang e ngera ma kuumerang.
Ak lotkii loldingel lokiu a melidiul lobengkel a tara ngeasek el dil er a blil. A kuleker er ngii el kmo tiang ketengel taem el Apostol a mlei er a blil. Ng di mle mereched el mo oltelechel e onger, “Choi.” A keril mer ngak a mle ungil ker: “Ngera ikel meklou a ultutelel tekoi el kirek el mo medengei?”
A kulnger lolab a tekoi el ngara chelsel a renguk, aikel tekoi el mekrolak el morrenges a ulekrael el tekoi, el ngii a milok osengek el kirel a tekoi er a beluulechad, el meskak a moktek ra urerek er a ebangkelio me a klengar ngak.
Me kuuchais a bebil er a tekoi er a chelsel a renguk? Aikal tekoi a mo er tirkel rokui el losiik el moltirakl er a Jesus Kristo. A tacher a ungil ochur, ng cherrungel. Chelechang ak meskau euid lokiu sel klaumerang el kmo ke mo kudmeklii a eai, etiu, ma tacher lultuil ra ikel mla duubch leko er kau el tekoi.
A kot, bol betik a rengum er a Dios el Chedam me a Jesus Kristo, el Osebeled.
A Jesus a ultebedii sel kot el ngarbab el llach: “Bo le betik a rengum e ra Rubak el Dios loba rengum el rokir, ma klengar er kau el rokir, ma uldesuem el rokir.” 7
A President Nelson a ultebedii a blak el reng er ngii el mora Dios, el Diak a Ulebengelel Demad, me a Ngelekel, Jesus Kristo, se er a lemokedong el mo omekrael er a Ikelesia er a Rubak, el melekoi, “Ak Medengelterir, betik a renguk er Tir, e tibir el mo mesiou er Tir—me a Kau—el olab a rokui el medechel el telil a klengar er ngak.” 8
A leuaisei a kot, e moubeltikelreng el mo er a Chedam me a Ngalek.
Ongerung, “Bo el betik a rengum er a odam er kau.” 9
Tia diak di lungil uldasou; ng ongerung el ngarbab el llach. A odam er kau a bechim me a telungalek er kau, rechad er a ward, rechad el mdak loureor, rechad el mdak el kiei, tirkel diak el chedal a klechelid er kid, tirkel ousbech a ngesou, e a mera er ngii, ngii di el chad. A klou el ultutelel a “oubeltikelreng er a odam er kau” a nga er a chelitakl el “Bom Kaubeltikelreng.” 10
A President Nelson omeklatk er kid el kmo, “Sel doubeltiklereng er a Dios loba rengud el rokir, e Ngii a mult a rengud el mo bedul a rebebil.” 11
Ongedei, bol betik a rengum er kau.
Tia meringel er a rebetok el chad. Ng diak el ko er a ngodech el tekoi el oubeltikelreng er kid a uaia lolngesonges er a oubeltikelreng el mo er a rebebil? Eng di a Rubak a mla dmu el kmo,“Moubeltikelreng er a odam er kau el ua le betik a rengum er kau.” 12 Ngii a mengreos er sel chedaol klechad el dobang, meng kired el mo uaisei. Sel doberaod er a mekngit, ringel, telitur, klengitelreng, ngasechereng, a lechub a klengit, e a klisichel a Tngkaireng er a Osobel, a okiu a chedaol teletelel, el ta er a tekoi el sobechakl a rengud.
Ongeuang, moltirakl a llach.
A Rubak a mla meketeklii:: “A lskeum eng betik a rengum er ngak, e moltirakl a llechuk.” 13 Molasm er a bek el sils el mo telkib el meruul a ungil e molemolem el ngara llemalt.
Ongeim, bo blechoel klikiid el mo er a templo.
A kumekedong er ngii el kmo ng kengei er a Rubak. A omkeed el mo er a templo me a lak, ng di sel mklikiid er a babier el mo soiseb a rullau el mo mesisiich er a meklou a ultutelel tekoi, el rael er a telbiil.
Ongelolem, bo mngara deureng e lungil a rengum.
“Bom ngara deureng, e lak ko medakt,” 14 ng millekoi a Rubak. E le ngerang? E mekerang, sel de iliuekl er a ringel? Ngokiu a telbiil er a Jesus Kristo: “Ngak el Rubak a obengkemiu, e dechor bita er kemiu.” 15
A President Nelson a smodii a mla moluut el ebangkelio el kmo “ng klumech er a deureng!” 16 Ngii a smodii el kmo, “A deureng el domelechesuar a kekerei a ngerchelel el kirel aike el teletael el duubech er a klengar er kid me a rokui el tekoi a ultuil a klengar er kid er ngii.” 17
Ongeuid, moltirkal er a ngar el profet er a Dios.
Tia ongeuid er a ikel tekoi el kulab, eng di kot er a uldesuek leng klou a belkul er a chelechal sils.
Nga er ngii a profet er a Dios el ngara beluulechad er a chelechal sils! Lak bol ngodech a rengum el kirel a belkul tiang. Molbedebek er ngike el ngeasek el dil ruchei. Ng mle soal mo medengei el uase ngera el tekoi a meklou a belkul. “Moltirakl er a ngar el profet,” ak dillii e lmuut el dulii er chelechal sils.
Kede ngodech el Ikelesia lulekrael er a reprofet, chad er a ues, e chad er a chedaol ocholt el mla mokedong er a Dios el kirel chelechang. Ak yaksok el uase sel morrenges e moltirakl a tekingir, eng diak mtuchakl. Kmal diak!
Kede kiei er a taem el ka “desingd el mong me a ka desingd el mei,” 18 el chedaol tekoi, ungil tekoi, klemerang, me a omengull a loldechelakl. Ng kired el melilt. Kede rongesii a ngerel a Rubak lokiu a profet er Ngii el mo choroid a dekted e sobecheklid, le sel longedecheduch a President Nelson, eng mengedecheduch lomtechei er a Rubak.
Kede ngeltengat lolab chedaol llechukl me a osisechakl el mekletkid el kmo, a uldesuek a diak el uaia uldesuiu, me a urerek a diak el uaia ureriu, ng millekoi a Rubak.” 19
Ngosisiu el ua Naaman, el mesisiich el soldau er a Syria, e mle chebedes, e mlo medengei el uase a profet Elisha sebechel omekungil er ngii. A Elisha ulderechii oderchelel el mo dmu er a Naaman el mo melecholb er a Omeuachel er a Jordan el euid el taem e ngii a mo ungil. A Naaman a dimlak el soal. Ng mlarngii a lmuut el ungil omeuachel er a Jordan, e ngera me ngoldurch er a chad el mesiou e diak el Elisha, el profet el mo omekungil er ngii? A Naaman a mirrael, eng di ng mlorimel er a remesiungel: “A lsekum a profet a mla dmu er kau a tekoi, eng diak bai el kirem el mo meruul?” 20 A Naaman a mlo modulb el euid el taem er a Jordan e mlo ungil.
A cheldechedechal a Naaman a mekletkid er a ongarm sel sekum e kid a melilt aikel soad lorrenges el tekingel a profet, me a ikel dongerchir el tekoi, a lechub eng teletael er a beluulechad er chelechang. A profet er kid a melemolem lobekid el mo er a Omeuachel er a Jordan el mo omekungil er kid.
A meklou a belkul tekoi el sebeched el remenges, melbedebek, e oltirakl aikel mocholt lokiu a ngar el profet. Ak sioning el kmo ak mla dengchokl el mengedecheduch er a President Nelson el mesaod a oberaod el tekoi er a Ikelesia me a beluulechad, e mla mes chedaol ocholt el mei er ngii. Ngii a medengelii a Rubak, ng medengei a Teletelel, e soal a rokui el ngelekel a Dios a Rengesii, a Rubak el Jesus Kristo.
Ng mla mo betok el rak el eru er a tal rak el dorrenges er a profet er a klou el ongdibel. Eng di chetituokel el mondai er a chelechal sils, e a President Nelson a betok longedecheduch er a miting, 21 , social media, 22 devotionals, 23 me a dirrek el cheldecheduch er a buai. 24 Ak mla mesa el mengedmokl e ouchais a mesisiich el chedaol klumech lolecholt omereng el saul, me a uldekial a rokui el odam me a odos er a beluulechad el rokir, meleketek er a budech, oureng, deureng, klisichel a bedenged, me a omekungil a klengar kid.
A President Nelson a meduch el mengedecheduch, e lmuut el klou a belkul, ngii a profet er a Dios. Ng mengasireng sel domtab er ngii, eng di ng klou a belkul el bleketakl el tekingel a mo omecheliu er kid er a ongetikaik, blulak, me a teletael er a beluulechad el di meleketek er chelechal sils. 25
A tekingir a reprofet a rokui lultuil er a chedaol ocholt. “Oluut er a Cherrengelel Ebangkelio er a Jesus Kristo: Erul Dart el Rak el Chais el mo er a Beluulechad,” el mluchais er sera Klou el Ongdibel er a April 2020, a meketeklii el kmo a Rubak a omtebechel er tial ureor. Chelsel tial chais, e a First Presidency me a Chelechad er a Teruich me a terung el Apostol a kmo: “Ngungil a rengmam louchais el kmo a mla metib el Oluut a melemolem el merael bedul uchei lokiu chedaol ocholt. A beluulechad a diak el luut el mo osisiu, le Dios a mo “mengideb loldak a rokui el tekoi el mo tang el ngara Kristo’ (Efesus 1:10).” 26
“A rokui el tekoi a ngara Kristo” 27 e a “tekoi el ngara renguk” 28 a melutk el kirel tial Ikelesia, tial ebangkelio, me tirkal chad.
Ak mengesimer loba ongit el mora dersta er kemiu el mo omtab aika el euid el “tekoi el ngara renguk” el bla kuuchais er a chelechal sils el mo: oubeltikelreng er a Dios el Chedam me a Jesus Kristo, el Osobeled; mo oubeltikelreng er a odam er kau; mo beltik a rengum er kau; oltirakl a llach, e blechoel klikiid el mo er a templo; e mo ngara deureng e ungil a rengum; e oltirakl er a profet er a Dios. Ak siotai er kemiu el di kemiu el mo osiik er a ongeai, ongetiu, me a ongeteruich. Momtab a teletael el sebechem louchais aikel ngara rengum el “tekoi” lobengterir a rebebil e mengelechel er tir el mo meluluuch, melbedebek, e osiik a ulekrael er a Rubak.
A tekoi el ngara renguk a kmal mekreos er ngak el di uai kemiu. Aika el tekoi a smisichii a omesiunged er a Ikelesia me a rokui el tekoi er a klengar kid. Ng rullid el mo chemau a Jesus Kristo, e mekletkid er a telbiled, e ngosukid el mo selbechakl er a chimal a Rubak. A kuuchais el uase Ngii a soal kid a “lak deluut el mo songerenger a lechub eng meched a rengud, e bai mo mui ” 29 er a beltiklereng er Ngii sel dosiik el mo meral oltirakl er Ngii, el mo tang lobengkel el uai Ngii el tang lobengkel a Chedam. El ngara a ngklel a Jesus Kristo, amen.