Ewe Tutunapen Paska Emon E Oporousa

Meni oupwe chemeni ami rongorong ngeni echo toropwe seni ewe Aewin Presetensi ra anneani non ami wart ika pranch ekkoch wiik a no. Ena toropwe a esinei pwe non enan Raninfel epwe etto—Raninfelin Paska—meinisin wart me pranch repwe chok mwich ren ewe mwichen sakrament, repwe nikiti ekkoch pwan fansoun an famini repwe pwisin fen non imwer ar repwe achechema ei auchean holiday.¹

Noun ewe Aewin Presetensi we toropwe a efi ai ekiek, me a efisi ai upwe ekipwichi usun napanapen am we famini a kan apwapwai Paska non ekkewe ier. Nupwen a napeno ai ekiek usun am apwapwa, a pwan napeno ai pwisin oureki ika aua fori non am ause weweiti ewe ennetin wewen ei holiday, a nom nukanapan meinisin chon nuku Jises Kraist.

Ekkena ekiek ra efisi ai upwe ekipwichi sokofesenin nefinen ewe napanap aua apwapwai Kirisimas usun mi nonno ngeni Paska. Fansoun December, non ekkoch napanap aua tawengeni ne apachanong ewe apwapwan “Jingle Bells,” sitakin nenien niffang, me niffang fiti pwan ekkoch, ekkoch orenien tumun—usun ren tumunu ekkewe mi osupwang, konu konun Kirisimas sa sani me kon mi fel, me ewer ach suki ekkewe pukefel me anneani ewe tutunapen Kirisimas non Luke 2. Iteiten ier aua anneani ei tutunap seni eu watten Paipen minen nom, am we famini meni a fori met ami famini mi fofori—ufouf ren toun won mokurem me afarem me ufouf uf mi tam ne tupuni Joseph, Mary, me ekkewe chommong ra feito fel ngeni ewe Monukon Jises, aua sipaini ewe auchean tutunapen Kirisimas usun uputiwen ewe Chon Amanau.

An am we famini apwapwan Paska, inamo, a ekis sokkono. Ua mefi pwe am famini a chok anongonong won “feino fan” an epwe awora ewe kinikinin am anonga Kraist non Paska; iwe mwirin, ren am famini, aua chufengen ren am aupwe pwan fori ekkoch orenien Paska. Ua sani ai katon noum kewe iwe iei noun noum kewe ra kut sokunen Paska me chupeti ar kewe pasikitin Paska.

Nge noun ewe Aewin Presetensi toropwe a suki ai ekiek. Rese chok etiwa kich meinisin ach sipwe fokkun ekieki pwe ach apwapwan ewe mettoch mi kon auchea a fen fis won fonufan—ewe Achasefan me Manausefan an Jises Kraist—pachenong ewe ammafen me sufon a nomot ngeni ewe Samon, ngo ra pwan awora fansoun ngeni ach famini me chiechiach won Raninfen non Paska ach sipwe fori.

Sasing

Ewe Chon Amanau a manau sefan

Ekkei kapas an ewe Soufos Joseph Smith ra apachata ekkoch ekiek ngeni ewe auchean ekkewe mettoch mi fis fansoun Paska: “Ekkewe nongonongen ach namanam ir ekkewe kapasen pwarata an ekkewe Aposel me Soufos, usun Jises Kraist, pwe I a mano, a peias, me manausefan non ewe aunungatin ran, me feita nang; me meinisin pwan ekkoch mettoch minne mi wewe ngeni ach namanam ir chok kapachetan.”²

Lesa me ngang aua fen aporous usun ekkoch napanap am we famini a tongeni forochu atun ewe fansoun Paska. Meni ewe kapaseis sipwe pwisin eisini kich ina ew kich meinisin sipwe ekieki: Ifa usun sipwe anapanapa ewe osukunan me apwapwan ewe Manausefan an Jises Kraist, ewe tutunapen Paska, an epwe nonno ngeni, unusochun, me urenapen orenien namanam ren uputiwen Jises Kraist, ewe tutunapen Kirisimas?

Usun kich meinisin sia achocho ngeni. Ua kuna ew watten achocho nein Aramas mi Pin ngeni ew Paska mi kon anonga Kraist. Ei mi pachenong ew watten me ekiekochun esisinen ewe Palm Sunday me Good Friday pwe orenien ekkoch chiechiach mwichefen mi nuku Kraist. Sipwe pwan etiwa orenien Paska mi anonga Kraist mi pwa non ekkewe oreni me mwokutukutun fonuen fonufan.

N. T. Wright emon mi sinenap usun Testamen Sofo a pesei: “Sipwe fetan ngeni ach sipwe apwapwai Paska non ekkoch minafon napanap: non chunga, mak, non noun nouch semirit pekin urumot, uwokisin mak, kon, poruk, apwapwan namanam, bells, me auchean concert. … Iei ach apwapwan fansoun achechem mi nap. Oturano Kirisimas, iwe me non wewen paipen ka oturano ru sopwun nepoputan Matthew me Luke, ese pwan wor och mettoch. Oturano Paska, iwe ese wor ew Testamen Sofo; ese wor namanam mi nuku Kraist.”³

Sia aucheani ewe Paipen pokiten mettoch meinisin a aiti kich usun ewe uputiw, angangen afanafan, Irapenges, me Manausefan an Jises Kraist. Ese wor kapas a awora watten epinukunuk me pungun foffor esemuch ngeni aramas meinisin nap seni ekkewe kapas emon chon nang a apasa nesosorun Paska me ren ewe Nenien Peias: “A fen manaueta.”⁴ Sia ennetin kinisou ren ewe pukefel Testamen Sofo ewe a annomu ewe tutunapen Paska me an ewe Chon Amanau angangen Paska non Judea me Galilee.

Nupwen am me Lesa aua sopweno ne ekiek me kutta anen am aupwe awatteno am apwapwan Paska an epwe anonga Kraist, aua aporous fengen ren met oreni aupwe anneani seni ewe pukefel ngeni am famini—epwe nonno ngeni Luke 2 ren Paska.

Iwe mwirin a tori kem ei pwarata seni nang: Kapacheta ngeni ekkewe auchean uwokisin usun Paska non ewe Testamen Sofo, kich Aramas mi pin non Fansoun soponon sia feioch ren ew amararen niffangen Paska! Ew niffangen pwarata mi sokkono, pwan ew kapasen pwarata usun ewe manamanen Paska mi annomu uwokisin Paska mi nap amwararan me non meinisin namanam mi nuku Kraist. Ewer ua kapas usun ewe Puken Mormon me, wesen akkaewin, ngeni ewe uruon Jises Kraist an pwato ngeni chon ewe Minafon Fonufan non an ning mi manausefan.

Ewe Soufos Joseph Smith a awewei ewe Puken Mormon pwe a “unusen pung me nein puk meinisin,”⁵ me poputa seni 3 Nifai 11, a kapas usun ewe amwararen porous usun an ewe Kraist mi manausefan churi ekkewe Chon Nifai, an ewe Chon Amanau angangen Paska. Ekkei pukefelin Paska ra pwarata usun ewe Manausefan an ewe Samon Jises Kraist.

Non ekkei sopwun, Kraist a kokkori Engon me Ruemon Aposel, a asukun usun I a fori non An we Afanafan won ewe Chuk, esinei pwe I a ounusochuono ewe annukun Moses, me osini usun achufengenin Israel non fansoun soponon. A echikara mi semwen me iotek fan iten ekkewe aramas non och sokkun napanap mi amwarar minne “ese wor channaw a tongeni apasa, rese pwan tongeni makketiw me ren emon aramas, are netipen aramas rese pwan tongeni ekiekieta ekkei auchean me amwararen mettoch usun am aua kuna me rongrong Jises a apasa; me ese wor emon a tongeni chok ekiekieta ewe pwapwa minne a aurano ngunum atun ewe fansoun am aua rongorong ngeni i an iotek fan item ngeni ewe Sam.”⁶

Sasing

Jises Kraist a pwa ngeni ekkewe Chon Nifai

Ei Paska, am we famini epwe anonga ekkewe aewin 17 uwokisin 3 Nifai 11, ekkewe ami mi sinei usun. Oupwe chemeni ewe watten mwicheich unukun ewe tempel non ewe fonu Bountiful ekkewe ra rong mongungun Kot ewe Sam me kuna Jises Kraist an feitiw seni nang an epwe ngeni kich ewe tingoren Paska mi unusen ning:

“Uta me feito rei, … pwe oupwe pwan tongeni attapa nemon ekkewe chufon non pei me won pechei, pwe oupwe tongeni sinei pwe Ngang … ewe Koten ewe unusen fonufan, me ua fen ninnino fan iten tipisin ewe fonufan.

“Iwe … ewe mwicheich ra feino, … emon me emon … me ra kuna ren meser me ren pour, … me ra pwarata, pwe i ewe. …

“Iwe … ra puchor meinisin, ra apasa:

“Mwareiti! Feioch ewe iten ewe Kot mi Fokkun Tekia! Iwe ra chappetiw ren pechen Jises, me ra fel ngeni i.”⁷

Anchangei: ekkewe Chon Nifai ren ewe tempel ra wesewesen attapa poun ewe Samon mi manausefan! Sia aneanei pwe sipwe fori ekkei sopwun non 3 Nifai pwe repwe ew watten kinikinin ach orenien Paska usun Luke 2 ren ach orenien Kirisimas. Non ennetin, ewe Puken Mormon a aporousa ewe tutunapen Paska mi nap seni meinisin emon e oporousa. Sisap mut ngeni epwe tutunapen Paska mi nap an esap wor e oporousa.

Ua etiwa kemi pwe oupwe nengeni ewe Puken Mormon non eu minafon saram me ekieki ewe auchan an pwarata usun ewe ennetin Kraist mi manausefan me pwan ewe uren me anonnonun annukun Kraist.

Sipwe eis, Ifa usun ach aneani ekkewe uwokisin Puken Mormon non Paska epwe efeiochu manauach me ekkewe kich mi tonger non eu auchean napanap? Nap seni emon epwe fen sinei. Iteitan sia anneani me kaeo seni ewe Puken Mormon, sipwe esuku mettoch mi amwarar epwe fis.

Kukuto chok, am me Lesa aua fiti ewe meima an emon chiechiem achengicheng, emon fefin tupwon ewe manauan a mwuchuno pokiten samau. Aua chufengen me an famini me chiechiem, aua porous usun achecheman ei amwararen aramas ewe a amurinonoi manauem.

Nupwen aua uta ekis towaw seni ewe pwor, ne kakapas ngeni ekkoch, ua eteneki ruemon nengin ierin Primary ra feino ngeni ewe pwor me annangeta won outun pecher—meser a chok tikeri nesopun we—ar repwe ngeni ar saingonon kapong ngeni ar achengicheng aunt. Ren an ese wor emon mi nom unukum, Lesa a mareno me pworetiw unukur me awora ourur me osukun. A eisinir ifa usur me eis ika ir mi sinei ian ar we aunt a nom ia iei. Ra apasa ar netipechou, nge mwirin ekkei auchean nengin noun Kot, ren nuku a ureno ne meser, ra apasa pwe ar we aunt a pwapwa iei me a tongeni nom ren Jises.

Ren ei ukukun ier, ra kuna kinamwe non ewe watten kokkotun pwapwa me, non nikinikir pwisin semirit, ra pwarata usun ewe auchean ennetin me ningen ewe Manausefan an ewe Chon Amanau. Ra sinei ei non netiper pokiten ekiekochun afanafan an semer me iner, famini, me souemwenin Primary a fotuki foun nuku non Jises Kraist me manau esemuch. Mirit nap seni ierir, chommong me nein ekkewe ennet ekkei kukkun nengin ra weweiti a feito rech seni ewe porousen Paska me angangen afanafan an ewe Chon Amanau mi manausefan me ekkewe kapas an soufos usun a mak non ewe Puken Mormon.

Ua fen kuna pwe nupwen Preseten Russell M. Nelson a fangeno ew niffangen ewe Puken Mormon ngeni emon esap chon ach ei namanam, mi pachenong sou emwenin fonufan, a kan soun suki ngeni 3 Nifai me anneani usun pwaton ewe Kraist mi manausefan ngeni ekkewe Chon Nifai. Non an fori, ewe soufos mi manau a pwarata usun ewe Kraist mi manau.

Sise tongeni uta pwe chon pwarata usun Jises Kraist tori ach sipwe tongeni pwarata usun I. Ewe Puken Mormon pwan ew kapasen pwarata usun Jises Kraist pokiten non iteiten peichan mi pin, emon soufos mwirin pwan ese chok pwarata pwe Jises Kraist epwe feito nge I a fen feito.

Ua kamoch non pei ew kapin ewe aewin Puken Mormon a fen for. Ai fori a soun emokutu ei. Ren unusen manauen ai mwukono, ua kan ingeno, mwar, me kun ngeni met kukkun Joseph Smith a fori an epwe chiakuni me forano ei pukefel. Ekkewe manaman ra fen fis ra amwarar ach sipwe ekiekir.

Nge esap ina popun ei puk a emokutu ei. Pokiten ei puk, nap seni ekkoch mi foruno me won ei fonufan, a pwarata usun ewe manau, ewe angangen fanafan, ekkewe osukun, ewe Achasefan, me ewe Manausefan an Jises Kraist. Pwi me fefinei achengicheng, kaeo fansoun meinisin seni ei puk usun Jises Kraist epwe siwini manauom. Epwe suki mesom ngeni minafon tufich. Epwe anapano om epinukunuk me ourokono ren tong ennet. Akkaewin, epwe amari me apochokuna om nuku non Jises Kraist me efeiochuk ren ew ennetin mirit pwe I me Samach ir mi sineok, tongeok, me ra mochen kopwe kuna anom ngeni imwom nang, ren ew mese watte N.

Achengicheng pwii me fefinei, ewe fansoun a feito, osini me ren soufosun nom, “nupwen ewe miritin emon Chon Amanau epwe mereseno won unusen ekkewe muu, einang, sokopaten kapas, me aramas meinisin.”⁸ Sia kuna pwonutan ei osini me mwen mesach, seni ewe pwarata usun Jises Kraist a pwa me non ewe Puken Mormon.

Sasing

Ewe Samon Jises Kraist

Ese pwan wor puk epwe kon pwari ena:

• Pokiten Jises Kraist, mettoch meinisin a siwin.

• Pokiten I, mettoch meinisin a murino.

• Pokiten I, manau a mecheres—akkaewin ekkewe fansoun metek.

• Pokiten I, mettoch meinisin mi tufich.

An chuto usun emon Chon Amanau mi manausefan, a esinesin me ren Kot ewe Sam, ina ewe porousen Paska mi kon amwarar me apwapwa. Epwe anisi chochon ach famini ar repwe angei pwisin ar kapasen pwarata usun Jises Kraist pwe i ach Chon Amanau me Chon Angasano, ewe a mutti ekkewe senin mano.

Upwe osopwano ai kapasen pwarata usun ennetin ewe Puken Mormon me usun Jises Kraist pwe i ewe Noun ewe Kot mi manau. Non iten Jises Kraist, amen.