Chechemeni Met a Kon Namot

Nupwen sia chechemeni ei soponon wik an ewe Chon Amanau apwapwan an a tonong non Jerusalem ekis chok fansoun me mwen An osoren achasefan, Ua chemeni An kewe porousen epinukunuk me ourur: “Ngang ewe manausefan, o ewe manau: Ion a nuku non ngang, epwe manau, inamo ika a mano.”¹

Ua tongei I. Ua nuku I. Ua pwarata pwe I ewe Manausefan me ewe Manau.

Ei kapasen pwarata a ekinamwei me apochokuna ei non fansoun ekkewe ruanu esop ier a no nupwen punuwei ewe Barbara, a mano. Ua pwositi

Iteitan, uwa kan chemen sefani am ewe opupunu fochofoch me manauem fengen.

Uwa fen pin aporousa ifa ussun ai uwa karan churi Barbara me ifa ussun ena fansoun a aitiei ai upwe aea ewe tufichin “cheki sefan” ewe uwa kaeo me won ai we misin. Upwe mwitir chek sefan ren neminewe mwirin am ewe karan chufengen pokiten mi nioch, itefouno, me a fokkun chommong an fansoun echiechi ngeni aramas. Ua fokkun sani pokiten neminewe a fokkun mecheres ach sipwe kapas ngeni me a men chiechioch. Ua ingeiti murinon. Ua mefi pwe i me ngang am ouwa chok ew. Ussun nge mi fen mecheres me non ai ekiek.

Barbara me ngang am ouwa kan mwimwin, me nefinem ewe a poputa ne marino, nge i mi tiperueru pwe opupunu ngeni ei epwe murinno ngeni.

Ese naf ngeniei ai upwe sinei; A murinno an Barbara epwe sinei won pusin winikapan. Ua sinei pwe ika am ouwa echikefen me iotek fan iten nefinem ewe, Barbara a tongeni angei pungun seni nang.

Am ouwa awora ewe fansoun non ew soponon wik am ouse chufengen pwe am oupwe tongeni echikefen me iotek won en me an ren am oupwe sinei won winikapem. Ochun ngeniei, a pwan angei pungun ussun chok met uwa angei. Nge ren unusan, ussun met ra ura, met epwe fis mwirin epwe ew uruo.

Nupwen Barbara a mano, noum kewe semirit ra wata won simenin peiasan we ekkoch nesen Barbara a mochen repwe chechemeni. Ew me nein ekkei nesen iei “met a kon namot ina met a nomotam.”

Ikenai upwe aporousa ngenikemi seni netipei ekkoch memef me ekiek won met a kon namot.

Ewin, ew nefinach ngeni Samach won Nang me Noun we, ewe Samon Jises Kraist, a kon auchea. Ei nefinen chiechi ngeir a kon namot iei me feinfeino.

Oruan, chiechi nefinen famini pwan ir me nein ekkana mettoch ra kon namot.

Non unusen ai angangen afanafan, ua churi chommong aramas me famini a wor watten ar osukosuk ren watten kokotongawen non ei fonufan. Chommong ra suseni nenier, echik, me nuokus. Ra ani osupwangen aninisin safei, mongo me imwer.

Ra pwan mochen ar kewe famini.

Ua esina ekkoch meni rese angei ekkewe efeiochun kanefengenin famini, iwe uwa apachanong ar kewe ekkoch famini, chiechier, me pwan mwo faminien non wart pwe ir “famini.” Ekkei nefinen chiechi ra auchea ren memefin ekiek me pochokunen inis.

Ekkei nefinen chiechi ra tongeni pwan awora tong, meseik, pwapwa, me memefin pwe ir mi pachenong neir.

Tumunun ekkei auchean nefinen chiechi a ew angangen finata. Ew angangen finata epwe wor pochokunen mochen, tong, tipepos, porous fengen, me omusomus.² Mi tufich epwe wor fansoun sipwe ekieki mi sokkono seni pwan emon, nge kich mi tongeni sipwe fori pwe esap napanapen anini. Non fansoun an ruemon ra karan poputa ne sisinei fengenir me pupunu, sise tonong non tong ika tou seni tong ussun ita kich foun sikang ra mokut fetan won ewe papen sikang. Sia finata ach sipwe tong me apochokuna fengenikich. Sia fori pwan chok ena non ekkoch marar ren ekkoch famini me chiechier ekkewe ussun chok nge ir famini ngenikich.

Ewe esinesinen famini ngeni unusen fonufan a apasa pwe “ewe kokotun pwapwa a otufichi chiechi nefinen famini an epwe soposopono tori pekinon mano. Ekkewe angangepin me pwon mi pin a wor non ewe tempel mi pin a otufichi aramas ar repwe niwinsefan ngeni mwen mesen Kot me ren famini ar repwe chufengen feinfeino.”³

Pwan ew mettoch a pwan kon namot ach sipwe opuru amemefin ewe Ngun non ach kewe nefinen chiechi mi kon auchea me non ach achocho ngeni ne tongei chon oruch ussun pusin kich, pachenong ach monomonen me pwapwanon afanafan. Ua akkom kaeo ei nesen non manauei nupwen uwa wiseni ewe wis pisop.

Non ew kunionun mi patekichin atun snow, ua feino seni ai ewe ofesin pisop nupwen a wor ew pochokun memef ngeniei ai upwe churi emon chinap ese wor punuwan non ewe wart. Ua nengeni nei ewe kunok—a kunok 10:00 nepwin. Anongonong won pochokunen ekiek ua ekieki pwe a kon mang ai upwe awora ai upwe churi. Me nukun ena, mi pung snow. Ua ekieki pwe aewin mettoch upwe fori non ewe sorotan upwe churi nap seni ai upwe awosukosuka non ewe atun kunok. Ua sa ngeni imwei we won wai we me uwa mour nge kun me sokopen unusen ewe pwin pokiten ewe Ngun a chok omorokunuwei.

Nesosorusich ewe ew ran, ua sa ngeni imwen ewe fefin ese wor punuwan. Noun ewe nengin a suki ewe asam me fiti kechiw a apasa, “Oh, Pisop, kinisou ren om wareto. Inei we a mano ruu ouwa chok ano”—uwa kan nichippung. Ngang usap tongeni monuki ekkewe memefin netipei. Ua kechiw. Ion nap seni ei achengicheng ese wor punuwan ururun noun pisop epwe komoch poun, chachari, me ngeni an omuchunon efeioch? A turseniei ena tufich pokiten ua suseni ei pochokunen memef seni ewe Ngun.⁴

Pwi me fefinei, onuon me fopun, me semiritin Kinter, Ua pwarata pwe aponueta ekkewe memefin ewe Ngun ina ew me nein kewe mettoch ra kon namot non meinisin nefinach ngeni ekkoch.

Omuchunon, non ei omuchunon wik won ei Palm Sunday, ua pwarata pwe ach ekesiwin ngeni ewe Samon, ach apasata kapasen pwarata ussun I, me angang ngeni I pwan ikana me nein ekkewe mettoch ra pwan kon namot.

Nuku non Jises Kraist ina ewe nongonongun ach kapasen pwarata. Ew kapasen pwarata ew pwarata ika kopungunon ussun ennet ese much a pwano me non netipen me ngunun aramas seni ewe Ngun mi Fel. Ew kapasen pwarata ussun Jises Kraist, a kawor me apochokun seni ewe Ngun, a ekewisini manau—a ekewisini ach ekiek me ifa ussun ach nonnom. Ew kapasen pwarata a okunu kich ngeni Samach won Nang me Noun we achengicheng.

Alma a afanafana:

“Nengeni, ua pwarata ngenikemi pwe ua sinei pwe ekkei mettoch usun minne ua fen kapas usun ir mi ennet. Iwe ifa usun ami sinei pwe ua sinei ussun ennetir?

“Nengeni, ua apasa ngenikemi pwe ra pwato ngeniei me ren ewe Ngunun Kot. Nengeni, ua fen echikipin me iotek non chommong ran pwe upwe pwisin tongeni sinei usun ekkei mettoch. Iwe iei ua sinei won inisi pwe ir mi ennet; pun ewe Samon Kot a fen pwarir ngeniei me ren noun we Ngun mi Fel.”⁵

An wor ach chok kapasen pwarata ese naf. Ussun ach kapas ngeni Jises Kraist a marino, sia pusin mochen ne pwarata ussun I—An murino, tong, me kirekiroch.

Fan chommong non ach mwichen kapasen pwarata won Raninifenin echikipin, sia rong ei kukun kapas “Ua kinisou” me “ua tongei” napeseni ach rong ekkewe kapas “Ngang mi sinei” and “Ngang mi nuku.”

Ua tingor ngenikemi oupwe apasata ami kapasen pwarata ussun Jises Kraist iteitan. Awora kapasen pwarata ussun met oua sinei me nuku me met oua mefi, esap chok ren met oua kinisou ren. Pwarata ussun pusin om sinei ussun om ka sinei me tongei ewe Chon Amanau, ren om manaueni an kewe afanafan, me ren An amanauok me awora ewe manaman non manauom. Nupwen ka awora kapasen pwarata ussun met ka sinei, nuku, me mefi, ewe Ngun mi Fel epwe opungano ewe ennet ngeni ekkana ra rongorong ngeni om kapaen pwarata seni netiper. Repwe fori pokiten ra fen katon om ka winiti emon chon kinamwe ne tapweno mwirin Jises Kraist. Repwe kuna met wewen sa Noun chon kuno. Repwe pwan mefi mettoch rese mo mefi me akkom. Ew kapasen pwarata mi unusoch a feito seni ew netip mi ekesiwin me tongeni kekino seni ewe manamanen ewe Ngun mi Fel ngeni non netipen ekkoch ra suki ar repwe angei.

Ekkana ra mefi mettoch ussun pungun om kapasen pwarata repwe eisini ewe Samon non iotek an epwe apungano ennetin om kapasen pwarata. Iwe mwirin ra tongeni pusin sinei won inisir.

Pwi me fefinei, ua pwarata me pwarata ngenikemi pwe ua sinei pwe Jises Kraist i ewe Chon Amanau me Chon Angasano ewe fonufan. I mi manau. I ewe Noun Kot mi manau sefan, me iei An Mwichefen, a emwen seni noun kewe soufos me aposel. Ua iotek pwe ew ran nupwen ua no ngeni ewe pwan ew fonufan, upwe fori fiti ai kapasen pwarata mi saramaram me ngetinget.

Non ai fansoun fori angangen afanafan, ua fen kaeo met a kon namot ina ach chiechi ngeni Samach won Nang me Noun ewe Achengicheng, ach kewe famini, me chon oruch, me mut ngeni Ngunun ewe Samon epwe emweni kich non ekkana chiechi pwe sipwe tongeni pwarata ussun ekkei mettoch ra kon namot me nomotam. Non iten Jises Kraist, amen.