Mwichenapen Mwichefen
Ekkewe Afanafan an Jises Kraist
April 2023 mwichenap


Ekkewe Afanafan an Jises Kraist

Sia angei ekkewe pukefel pwe epwe emweni manauach Ai kapas ikenai a masoweni ew kinikinin ekkewe kapas an ach Chon Amanau—met I a apasa.

Sia nuku non Kraist. Ren chon Ewe Mwichefenin Jises Kraist ren Aramas mi Pin non Fansoun Soponon, sia pin ngeni I me tapweno mwirin An osukun non ekkewe pukefel.

Me mwen ewe Turutiw, Samach won Nang a pusin kapas ngeni Atam me If. Nge mwirin, ewe Sam a esinei usun Noun we Anamon mi Achengicheng, Jises Kraist, pwe ach Chon Amanau me Chon Angasano me anuku ngeni kich sipwe “ausening ngeni I.”1 Seni ei emwen sia asopwano pwe ekkewe rekotun kapas non ekkewe pukefel a kapas seni “Kot” ika ewe “Samon” napengeni ir chok kapas an Jehovah, ach Samon mi manau, Jises Kraist.2

Sia angei ekkewe pukefel pwe epwe emweni manauach Ina minne, ua apasa ngenikemi, kametip won ekkewe kapasen Kraist; pun nengeni, ekkewe kapasen Kraist repwe erenikemi mettoch meinisin met oupwe fori.”3 Napengeni kapasen ekkewe pukefel ra kapas usun an Jises afanafan won fonufan a tichikietiw usun I a fori. Ai kapas ikenai epwe anongonong won ekkewe kinikin usun an ach Chon Amanu kapas—usun I a apasa. Ikkei ekkewe kapas non ewe Testamen mi Fo (pachenong ekkewe mi kapachenong mi pesepes meren Joseph Smith) me non ewe Puken Mormon. Napengeni ekkei kinikin ra nom non ewe kinikin non minne ach Chon Amanau a kapas ussur.

“Ennet, ennet, Upwe apasa ngonuk, Pwe esap wor emon epwe tongeni tonong non ewe Muun Kot ika pwe ese upusefan ren konik o ren ewe Ngunupin.”4

“Feioch ekkewe … ir [minne] ra echik me kaka mwirin wenechar, pun repwe ureno ren ewe Ngun mi Fel.”5

“Ra feioch ir ekkewe mi angang fan asengesin kinamwe: pwe Kot epwe eita ngenir noun.”6

“Oua fen rong pwe ir mi fen apasa seni ewe fansoun nom, Kosapw nisou:

“Nge ua apasa ngenikemi, Pwe ion chok epwe nenengeni emon fefin, pwe epwe mocheniaiti, i a fen fori angangen nisou non netipan.”7

“Oua fen rong met a apasa, oupwe chok tongei chienemi, nge oupwe oput chon koum ngeni kemi.

“Nge ua apasa ngenikemi, Tongei chon oput ami, efeiochu ekkewe ra efeiengauakemi, foforoch ngeni ir ekkewe ra oputakemi, me iotek fan iter ekkewe ra nounoungaw ami, me efeiengawakemi;

“Pwe ami noun Sememi we non nang: ewe a fori noun akar epwe tota won ekkewe mi ngaw me ekkewe mi och, me opungatiw ran won ekkewe mi unusoch me ekkewe mi ter.”8

“Pun ika oupwe omusano aramas ren ar atai annuk, sememi non nang epwe pwan omusakemino:

“Nge ika ousap omusano aramas ren ar atai annuk Sememi we esap pwan omusano ami kewe atai annuk.”9

“Ika pwe ami seni ewe fonufan, ewe fonufan epwe pusin tongei an: nge pokiten esap ami seni ewe fonufan, pwe ua finikemi seni me non ewe fonufan, iwe ewe fonufan epwe oput ami.”10

“Iei minne, kuta ekkewe mettoch esap seni ei fonufan nge kopwe akom ne kuta om kopwe auweta ewe muun Kot, me auweta an we wenechar, me mettoch meinisin kopwe angei.”11

“Iei minne mettoch meinisin met chok oua mochen pwe aramas repwe fori ngenikemi, oupwe pwan fori ngeni ir: pun iei ewe annuk me ekkewe soufos.”12

“Oupwe tumunuoch seni soufos mi chofona, ekkewe repwe feito remi non fouten siip, nge non nenuker ir wonif mi echik.

“Oupwe sineiochur seni uwar. Aramas repwe ioni kreip seni kukkun ira mi fonufon, are fik seni panen ira mi fonufon?

“Pwan usun chok ira meinisin mi öch ra uwani foun ira mi öch; nge efoch ira mi ngaw a uwani foun ira mi ngaw.”13

“Esap aramas meinisin mi kan kori ngeni ei, Samon, Samon, repwe tonong non ewe Muun nang, nge ir ekkewe chok mi fori netipen Semei we non nang.”14

“Oupwe feito rei, ami meinisin mi pekus ren choun osemi o ngang upwe asoso kemi.

“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.

“Pun osei mi mecheres, me ai chourek mi pwas.”15

“Ika emon a mochen fiti ei, epwe fakkun ponuku ekiekin pwisin inisin, epwe mwarei an irapenges, iwe epwe tapweto muri.

“Me iei ren emon aramas epwe angei an irapenges, epwe amaam meinisin ekkewe mettoch mi ngaw, me sokkun mochenia, me aponueta ai kewe annuk.”16

“Nge nengeni, nikitano fonufan, nge tumunu ngunum; ren met emon epwe fori, ika epwe angei unusen ei fonufan, me nusuni ngunun? Ika met emon aramas epwe tongeni ekesiwini ngeni ngunun?”17

“Ika emon aramas epwe fori an angang, epwe sinei usun ekkewe annuk mi pin, mine epwe seni Kot, ika pwe met ua apasa won inisi.”18

“Me, Upwe apasa ngonu, Tingor, iwe epwe kawor ngenikemi; kutta, iwe oupwe kuna; fichifich, iwe epwe suk ngenikemi.

“Pun io mi tingor epwe angei o are emon epwe kutta epwe kuna o ewe asam epwe suk ngeni emon mi fichifich.”19

“Ekkoch nei siip, ir resap seni ei mwicheich: ir pwan upwe uweiir, pwe repwe rongorong neuwei; iwe epwe wor ew mwicheich, me emon chon masen siip.”20

“Jises a apasa ngeni neminewe, Ngang ewe manausefan, o ewe manau: Ion epwe nuku ei epwe manau, ina mo ika a mano, nge epwe chok manau:

“Me ion a nonom me nuku non ngang iwe esap tongeni epwe mano.”21

“[Ewe napen annuk me nein ekkwe annuk iei:] kopwe tongei ewe Samol om God ren unusen nenukom, ren unusen ngunum o ren nunusen om ekiek.

“Iei ewe aewin annuk a fokkun napanap o auchea.

“Ewe aruan annuk mi fakkun auchea ussun chok ewe aewin: ‘Kopwe tongei monun unukum ussun chok ka pwisin tongeok.

“Won ekkei ruu annuk ra anongonong won meinisin ekkewe annuk me ekkewe soufos.”22

“Ion a etiwa ai kewe annuk o aponueta, i ewe emon mi tongei ei. Semei epwe tongei ewe mi tongei ei. Iwe ngang upwe pwan tongei i o upwe pwarienino ngeni i.”23

“Upwe ngenikemi kinamwe, upwe fang ngeni kemi pwisin ai kinamwe: esap usun an fonufan fang ngenikemi. Ousap noninen are osukosuk, ousap pwan nuokus.”24

“Iei ai annuk, Oupwe tong fengen nefinemi, usun ai tongei kemi.”25

“Iwe nengeni pei me pechei, pwe ngang ei: atapa ei, me nengeni; ren emon ngun ese wor futukan me chuun, usun oua kuna mi wor rei.”26

“Iwe, oupwe feino ren aramas meinisin won fonufan o oupwe ewinireno pwe repwe nei chon kaeo: oupwe papataisir fan iten ewe Sam, ewe Nau me ewe Ngun mi Fel:

“Osukuner ar repwe nengen fichi mettoch meinisin mine ua annuku ngonuk: me, nengeni, ngang mi nonom remi iteitan, pwan tori nesoponon fonufan.”27

Mwirin An afanafan fetan non ewe Fonu mi Pin, Jises Kraist pwangeni ekkewe mi wenechar non ewe fonuwen Merika. Ikkei ekkoch ekkewe kapas A apasa ikewe:

“Nengeni, ngang Jises Kraist ewe Noun Kot. U forata ekkewe nang me ewe fonufan, me mettoch meinisin minne ra nom non ir. Ngang mi nom ren ewe Sam seni nepoputan. Ngang mi nom non ewe Sam, me ewe Sam mi nom non ngang; iwe non ngang ewe Sam a eningano itan.”28

“Ngang ewe saram me ewe manauen ewe fonufan. Ngang Aewin me Amuchunon, ewe nepoputan me ewe nesoponon.

“Iwe ousap chiwen asorata ngeniei ewe assukun cha; ewer ami asor me ami asoren kek repwe wesino, pun usap etiwa ew me nein ami kewe asor me ami asoren kek.

“Iwe oupwe asorata ew asor ngeniei ew asoren netipechou me netip niemam. Iwe ion chok epwe feito rei fiti ew netipechou me ew netip niemam, i upwe papataisei ren ekkei me ren ewe Ngun mi Fel. …

“Nengeni, ua fen feito ngeni ewe fonufan pwe upwe angasano chon ewe fonufan, pwe upwe tumunu ewe fonufan seni tipis.”29

“Iwe ua apasa ngenikemi sefan, oupwe fokkun aier, me oupwe papatais non itei, me winiti usun emon kukkun semirit, are esap ina iwe ese pwan wor ew aan an ami oupwe muuni ewe muun Kot.”30

“Iei minne ua mochen pwe oupwe unusoch usun chok ngang, are Sememi we mi nom non nang mi unusoch.”31

Ennet, ennet, ua apasa ngenikemi, pwe mi auchea oupwe mammasa me iotek fansoun meinisin, pwe ousap weri sossot me ren ewe tefin, me ina oupwe emwenino pwe chon fotek me ren.”32

“Ina minne, oupwe iotek fansoun meinsin ngeni ewe Sam fan itei.”33

“Ina minne, mettoch meinisin oupwe fori, oupwe fori non itei; pun nengeni oupwe eita ngeni ewe mwichefen itei.”34

“Nengeni ua fen ngenikemi ai we kapas allim, iwe iei ewe kapas allim minne ua fen ngenikemi—pwe ua wareto ngeni ewe fonufan pwe upwe fori mochenin Semei, pokiten Semei we a tinieito.

“Me semei a tinieito pwe upwe irapengesino won ewe irapenges; me mwirin ai irapengesino won ewe irapenges, pwe upwe uweiato aramas ngeni ei, … repwe kapung ren pungun ar foffor, ika pwe ir mi och o ika ir mi ngaw.”35

“Iwe iei ewe annuk: Aier, ami meinisin ekis meinisin non ewe fonufan, me feito rei me papatais non itei, pwe oupwe tongeni enimenimochuno me ren ketiwen ewe Ngun mi Fel, pwe oupwe tongeni uta non nimenimoch me mwei atun ewe ranin soponon.”36

Sia nuku non Kraist. Ua asopwano ren met A apasa ifa usun ach sipwe sinei me tapweno mwirin An kewe osukun:

“Nge ewe Chon Oururu, iei ewe Ngun mi Fel, i ewe Sam epwe tinato fan itei, epwe aiti ngeni kemi mettoch meinisin o epwe achema ngeni kemi mettoch meinisin minne ua fen ereni kemi.”37

Ua pwarata ennetin ekkei osukun non iten Jises Kraist, amen.