Ew non Kraist

Nupwen preseten Dallin H. Oaks a apasa, ikenai Palm Sunday, ewe poputan Wik mi Pin, esisinata apwapwan an ewe Samon ewe tonong non Jerusalem, An riaffou non Gethsemane me mano won ewe irapenges fitu chok ran mwirin, me An ewe amwararen Manausefan non Raninifenin Paska. Sipwene apungano sisap tongeni monnukano met Kraist a achocho ngeni ren an epwe angasa kich.¹ Me sisap tongeni poutano ewe wachimuken pwapwa sipwene pwan mefi sefani non Paska nupwen sia ekieki ussun An ewe okkufu ewe peias me ewe niffangen manausefan.

Ewe kunionun me mwen ekkewe sosot me irapengesino mi awitiwiti I, Jises a fiti Noun kewe Aposel non ew mongon Passover. Nesoponon ei Omuchunon Faf, non ew Iotekin tingor mi Pin, Jises a tingorei Saman we non ekkei kapas: Semei mi Pin, onnomur non itom [nei kewe apostel] ekkewe ka fen ngeniei, pwe repwe ew chok, ussun chok kich.²

Mwirin, fiti kirekiroch, ewe Chon Amanau a anapano An ewe tingor ne apachanong meinisin chon nuku:

“Ua iotekir nge esap ir chok, pwe pwan ir ekkewe mi nuku ei pokiten ar kapas;

“Pwe ir meinisin repwe ew chok; ussun en, Semei, non ngang, me Ngang non en, pwe repwe pwan ew chok non kich.”³

Ach winiti ew ina ew itenap mi chok ekeniwin non ewe kapas allimen Jises Kraist me an Kot otot ngeni Noun kewe semirit. Fiti sufon ngeni ewe teninimwen Zion non ranin Enoch ewe, a affat pwe “ir mi ew netip me ew ekiek.”⁴ Ren ekkewe Souneng akkom non ewe Mwichefenin Jises Kraist me nom, ekkewe rekot non ewe Testamen Sofo, “Ekiekin me netipen ewe mwichen chon nuku a ew chok.”⁵

Non pusin ach kinikinin fansoun, ewe Samon a fonou kich, “Ua apasa ngenikemi, oupwe chok ew; pun ika ousap chok ew iwe esap nei ami.”⁶ Me nein ekkewe popun ewe Samon a awora pwata ekkewe Souneng akkom non Missouri rese ponuta ar repwe forata ew nenien Zion pwe ir “rese chufengen anongonong won ewe kochufengen a auchea meren ewe annukun ewe muun selestial.”⁷

Ikewe Kot a nonnom ian non netip meinisin me ekiek, ekkewe aramas ra awewe ngeni ussun ekkei kapas “non ew , ekkewe semeritin Kraist,.”⁸

Nupwen ewe Chon Amanau mi manausefan a pwa ngeni ekkewe aramasen nom non ewe Puken Mormon, I a apareni fiti an ese tipeew ngeni pwe non ewe fansoun nom a wor anini nefinen kewe aramas ussun papatais me ekkoch mettoch. I a annuku:

“Esap wor anini fengen nefinemi, usun mi fen fis me akkom; esap pwan wor anini fengen nefinemi usun ekkewe kinikinin ai we nongonong mi ennet, usun mi fen fis me akkom.

“Pun ennet, ennet ua apasa ngenikemi, i ewe a wor ren ewe ngunun anini i ese feito seniei, nge a feito seni ewe tefin, i ewe semenapen anini.”⁹

Non ach ei fonufan mi wesewesen uren anini fengen, ifa ussun tipeeu epwe tufich akkaewin non ewe Mwichefen, ikewe sipwe aani “emon Samon, ew nuku, ew papatais”?¹⁰ Paul a ngenikich ewe ki:

“Ren chommong me neimi oua fen paptaiseno non Kraist oua pwinitanong ewe manauen Kraist.

“Ese wor sokofesenin chon Jews ika chon Gentiles, nefinen chon fotek ika chon ngaseno, nefinen mwan me fefin: Ami meinisin ouwa ew chok ren ami chufengen non Kraist.”¹¹

Sia kon sokofesen me ren ekkoch fansoun sia kon tipefesen ach sipwe chufengen ussun ew chok won ekkoch mettoch ika fan ekkoch it. Non chok Jises Kraist sia tongeni ennetin winiti ew.

Winiti ew non Kraist a fis ren emon ren emon—sia poputa ren pusin kich. Kich ru kinikin non emon aramas ren inis me ngun me fan ekkoch ra osukosuk fengen non inisich. Ussun Paul a pwarano:

“;Non netipei uwa pwapwa ngeni an Kot ewe annuk mwirin ewe ngun;

“Nge ua pwan kuna ew annuk non [ekkewe] kinikinin [inisi], ra fiu ngeni ewe annukun ai ekiek, me uweieinong non fotek ngeni ewe annukun tipis minne a nom non ngang.“ ¹²

Jises Kraist a pwan emon aramas mi wor inisin me ngunun. A wor sosot ngeni; I a weweiti; I a tongeni anisikich ach sipwe angei etipeeu non kich.¹³ Ina minne, ach angei ewe saram me ewe chenin Kraist, sia achocho ne ngeni ngunuch—me ewe Ngun mi Fel—tufichin nemeni ewe inis. Iwe nupwen sia tur, Kraist, ren An ewe Achasefan, a ngeni kich ewe niffangen aier me ewe tufich ne sotuni sefani.

Ika emon me emon sia “pwinitanong ewe manauen Kraist,” iwe chufengen sia tongeni epinukunuk ach sipwe winiti ew, ussun Paul a apasa “ewe inisin Kraist.”¹⁴ Ach sipwe “pwinitanong manauen Kraist” ewer a pachenong ach fori An “aewin me auchean annuk”¹⁵ ach aewin me auchean pwon, me ika sia tongei Kot, sipwe aponueta An kewe annuk.¹⁶

Chufengen me pwich me fefinach non inisin Kraist a marino nupwen sia tumunoch ngeni ewe oruen annuk—mi weires pichifesenin ewe akoko ngeni ewe aewin—sipwe tongei ekkoch ussun ach pusin tongei kich.¹⁷ Me uwa ekieki pwan mo ew unusochun tipeeu epwe wor nefinach ika sia opuru An ewe Chon Amanau pwarano tekian me pinin ei oruwen annuk—sipwe tong fengen nefinach esap chok ren ach tongei kich nge ussun An tongei kich.¹⁸ Non pungun, ewer “meinisin aramas ra kukuta mochenin chon orur, me fori mettoch meinisin ren efou mas epwe wenengeni ewe chenin Kot.”¹⁹

Preseten Marion G. Romney, a akkom emon chon aninis non ewe Aewin Presetensi, non awewen ifa ussun sia angei kinamwein nikitu me chufengen non ew, a apasa:

“Ika emon aramas, a fangeta ngeni Setan, a masow ren ekewe angangen ewe inis, a osukosuk non inisin. Ika ruemon ra fangeta, emon me emon ir ra osukosuk non inisir me ra fiu fengen. Ika chommong aramas ra fangeta, ew mwichen aramas a [ioni] uwan watten osukosuk me anini. Ika ewe chon nemeni ew fonu a fangeta, epwene wor anini unusen fonufan.”

Preseten Romney a sopweno: “Usun ekkewe angangen ewe inis epwe fis ngeni meinisin, iwe epwe pwan ina usun ewe kapas allimen kinamwe. Ika emon aramas a manaueni, a wor an kinamwe non ninisin. Ika ruemon aramas ra manaueni, emon me emon a wor an kinamwe non inisin me nefiner. Ika ekkewe aramas ra manaueni, ewe muu a wor an unusen kinamwe Nupwen a naf muu ir mi aani pwapwan ewe foun iran ewe Ngun repwe nemeni mokutukutun ewe fonufan, iwe, mwirin chok, ekkewe trumun maun repwe kouno, me ekkewe funiaken maun repwene onununo … (NengeniAlfred Lord Tennyson, ‘Locksley Hall,’ The Complete Poetical Works of Tennyson, ed. W. J. Rolfe, Boston: Houghton-Mifflin Co., 1898, p. 93, lines 27–28.)”²⁰

Nupwen sia “pwinitanong manauen Kraist,” a mecheresino ach sipwe atawei ika isenono sokofesen, tipefesen, me anini Ew amwararen awewen ren okkufufun a pwa non ach uruon Mwichefen. Elter Brigham Henry Roberts (pwan itan B. H. Roberts), a uputiw non England non 1857, a angang ussun emon chon ewe Aewin Mwichen Apungupungun ewe Fik—Met ewe a iteni ikenai ewe Presetensin ekkewe Fik. Elter Robert a emon mi nipwakoch me ese sisine pekus i emon chon peni ewe kapas allim mi niwinsefanito me ewe Mwichefen non ekkewe fansoun mi kon aweires.

Nge Non1895, an Elter Robert angang non ewe Mwichefen a nom non osukosuk ren anini. B. H. a fen fini epwe wisen chon tupuni non ewe mwich minne a fori ewe taropwen annuk non Utah atun a winiti eu state. Mwirin, a fini epwe winiti emon chon sai ngeni wisan non ewe United States Congress nge ese ereni ika tingor an epwe fori ei ngeni ewe Aewin Presetensi. Preseten Joseph F. Smith, emon chon aninis in ewe Aewin Presetensi, censured B. H. ren ewe nipwakingaw non eu mwichenapen pristut. Elter Roberts a nus non ewe uttut me mefi an kuf a fis pokiten an Preseten Smith ekkewe porous. Ese tipeew ngeni ekkwe sou emwenin Mwichefen non ekkoch an interfiu me speech non pekin ponetiks. A tou seni mokutukutun angangen Mwichefen. Non ew mwich mi tam non ewe Salt Lake Tempel fiti ekkewe chochon ewe Aewin Presetensi me Mwichen Apungupung ren ekkewe Engon me Ruemon, B.H a chok nukuchar non an ese mochen ekesiwini an ekiek. Mwirin, “Preseten [Wilford] Woodruff a ngeni [Elter Roberts] unungat wik an epwe ekiekisefani wisan ewe. Ika ese tongeni niamam ren an mwan, repwe ne epichano seni ewe Fik.”²¹

Non ew mwich mwirin mi mwonomon ngeni ekkewe Aposel Heber J. Grant me Francis Lyman, B.H ita akkom ese siwini an memmef, nge tong me ewe Ngun mi Fel ra pochokun. A poputa ne nonou me non mesan ren an kechiw. Ekkewe ruemon Aposel ra tongeni sinei met repwe ponueni ngeni met kewe ra awosukosuka B. H., me ra no fiti ew tingoren memefin netip ren niwinsefanin ewe chiechi nefiner. Ewe soran, mwirin ew nakatamen iotek, Elter Roberts a tinono echo taropwe ngeni Elter Grant me Lyman pwe a moneta an epwe chusefan ngeni pwin kewe.²²

Nupwen mwirin an a churi ewe Aewin Presetensi, Elter Roberts a apasa, “Ua no ngeni ewe Samon me uwa angei saram me emwen seni Ngunun we ai upwe fang ngeni ewe mumuta an Kot.”²³ Mwasangasang ren an tongei Kot, B. H. Roberts a chok soposopono non an nikitu me emon sou emwenin Mwichefen mi nipwakoch tori soponon manauan.²⁴

Sia pwan tongeni kuna non ei minen awewe pwe tipeeu esap chok wewen pwe sipwe tipeew ngeni an meinisin repwe atewe ika neminewe “pusin fori met ra mochen fori ika feinno won en me pusin an. Sise tongeni ach sipwe ew me nukun chok ika si awena ach achocho ngeni ewe ew popun. Wewen, non an B.H. Roberts porous, sipwe fang ngeni ewe mumuta an Kot. Kich chon ewe inisin Kraist mi sokofesen, sia awesano sokofesenin popun non sokofesenin fansoun—ewe sening, ewe mas, ewe mokur, ewe pau, ewe peche—iwe nge meinisin seni ew inis.²⁵ Ina minne, met a auchea sipwe fori esap wor keimu fesen non ewe inis; nge ekkewe kinikinin inisich epwe wor ar pwan tumunoch fengen.²⁶

Etipeeu ese anamota nonnopok, nge a anamota tipeew fengen. Sia tongeni pusin apacha fengeni netipach non tong, ew non nuku me pwon mi pin, me fokkun mwar ren sokofesenin tim, tipesefen won osukosuken muu, anini won anen an epwe taweoch, me pwan ekkoch mettoch. Nge sise tongeni sipwe tipefesen ika anini ren ningeringer ika koum fengen. Anon ewe Chon Amanau:

“Pun ennet, ennet ua apasa ngenikemi, i ewe a wor ren ewe ngunun anini i ese feito seniei, nge a feito seni ewe tefin, i ewe semenapen anini, iwe i a amwasangata netipen aramas pwe repwe anini ren song, emon ngeni pwan emon.

“Nengeni, esap iei ai nongonong mi ennet, ne amwasangata netipen aramas ren song, emon ngeni pwan emon; nge iei ai nongonong mi ennet, pwe ekkena sokkun mettoch repwe kouno.”²⁷

Ew ier ano, Preseten Russell M. Nelson tingorei kich non ekkei kapas: “Ese me neich sipwe nemeni fonu sokkun aramas ika mwokutun ekkoch ika fen memperun pusin ach famini. Nge sia tongeni nemeni pusin kich. Kokoi ikenai, achengicheng pwi me fefinei, pwe oupwe akouono ewe osukosuk mi fis nonnetipom, nonimwom, me nonmanauom. Ireno och me meinisin mochenin efeiengawa ekkoch—ika pwe ekkena mochen pokiten nisosong, awangaw, ika koputen emon a ametekuk. Ewe Chon Amanau a annuku ngeni kich sipwe okunu sapach we epek [nengeni 3 Nifai 12:39],ach sipwe tongei chon oput kich, me iotek fan iten ekkewe ra eitengawa kich [nengeni 3 Nifai 12:44].”²⁸

Ua pwan apasa sefani pwe a chok non me seni ach nikitu me tongei Jises Kraist sia tongeni epinukunuk ach sipwe ew—ew me non, non imw, ew non Mwichefen, pwan ew non Zion, me asen meinisin, ew ren ewe Sam me ewe Nau me ewe Ngun mi Fel.

Ua niwinsefan ngeni met kewe mi fis ren Wik mi Pin me ewe apwapwan napanap an ach Chon Angasano. Ewe Manausefan an Jises Kraist a awora pwarata An pin me I a fen okufu mettoch meinisin. An Manausefan a awora pwarata pwe, chu ngeni I ren pwon mi pin, kich sia pwan tongeni okufu mettoch meinisin me winiti ew. An Manausefan a awora pwarata pwe seni I, manau fochofoch me manau ese much ir mi wesewesen ennet.

Non ei soran, uwa pwarata ussun An Ennetin Manausefan me meinisin mi afata, non iten Jises Kraist, amen.