Ai Ekiek a Komochuno Ei Ekiekin Jises Kraist
Nupwen ka sopweno ne tumunoch ne komochuno ewe ekiek usun Jises Kraist, Ua pwon ngonuk pwe esap chok emwen seni nang nge pwan manamanen nang.
Non ei murinon fansoun Paska, Ua enniwini ewe iotekein ei pochokunen kon, “Guide us, O thou great Jehovah.”1
Ew porous mi amwarar non ewe Puken Mormon a aporousa usun emon anuon seni ew auchean famini itan Alma ewe ekkewe pukefel ra awewei pwe i emon ese nuku a fen ngeni niosun anu muan.2 I a men sinenap non kapas me emichimich, a tunomich ne pesei ekkoch ar repwe tapweno mwirin. Amwararan pwe, emon chon nang a pwato ngeni Alma me chienan kewe. Alma a turuno won ewe puun me a wesen apwangapwang ina minne a kekino ngeni imwan saman we. A nom non ew napanapen mour ese apareni mettoch ren unungat ran.3 Mwirin, a awewei pwe nupwen mi nikinikin peno ngeni ekkewe mi nom unukun, an ekiek a fokkun pochokun nupwen ngunun a netipechou, an ekieki usun manauan an ese aneasochisi an Kot kewe annuk. A anapanapa an ekiek pwe usun a “riaffou ren an a chemenisefani [an] kewe chommongun tipis”4 me “riaffou ren metek esemuch.”5
Non an anonnonun riaffou, a chechemeni an kaeo non an serafo usun “ewe wareton emon Jises Kraist, emon Noun Kot, pwe epwe achasefani ekkewe tipisin fonufan.”6 Mwirin a apasa ei kapas mi ochungu ekiek: “Nupwen ai ekiek a komochuno ei ekiek, ua sio non netipei: O Jises, en Noun Kot, umoumoch ngeni ei.”7 Nupwen a tingor ewe manamanen ewe Chon Amanau, och mettoch mi manaman a fis: “Nupwen ua ekieki ei,” a apasa, “use chiwen chememeni ai kewe tipis.”8 Mwitir chok a mefi kinamwe me saram. “Ese wor mettoch [mi] kon wachemuk me ngarangar usun ai pwapwa,”9 a apasa.
Alma “a komochuno won” ewe ennet usun Jises Kraist. Ika sipwe nounou ekkewe kapas “komochuno won” non ach sipwe weweiti, meni sipwe apasa, “I a komochuno won ewe mechan tit nupwen chok epwene turuno,” wewen a mwitir eitieu poun me inisin ngeni och mettoch mi pochokununo ngeni eu nongonong mi nukuchar.
Non met Alma a fori, an we ekiek mine a tufich me tumunu ei manamanen ennet ren an Jises Kraist asoren achasefan. Angang non nuku non ena ennet, me seni ewe manaman me umoumochun Kot, i a ngaseno seni epinukunukungaw me ureno ren epinukunuk.
Nupwen met mi fis ngeni kich resap kon amwarar usun an Alma, ir mi pwan chok auchea non fansoun fochofoch. Ach ekiek ra pwan “komochuno ei ekiek” usun Jises Kraist me An umoumochun fangeno, me ngunuch ra fen mefi ewe saram me pwapwa ra tapweto.
Tumunochu ewe Ekiek ussun Jises Kraist.
Ai iotek non ei fansoun Paska pwe sipwe fatoch ne anapanapa, apochokuna, me anukuchara ei auchean ekiek ussun Jises Kraist nukanapen ngunuch,10 mut ngeni epwe chengen ne tonong non ach ekiek, emweni kich non met sia ekieki me fori, me sopweno ne wato ewe pwapwan ewe tong an ewe Chon Amanau.11
Amasowa ekiekikich ren ewe manamanen Jises Kraist esapw wewen pwe i chok non ekiekich. Nge wewen pwe unusen ekiekich repwe kouk non An we tong, Mananauan me an afanafan, me An asoren achasefan me ningochun Manausefan. Jises ese non non ew pokuku mi monukuno, pokiten ach ekieki ussun I ra chok nonnom me “meinisin mi nonnom non [kich ra ingeiti] i!”{12 Sia iotek me eniwini non ekiekich ekkewe mettoch sia fen sinei mine a ngeni kich ach sipwe arapakan ngeni I. Sia etiwanong non ekiekich ren napanapan, pukefel mi pin, me kewe kon mi anisi ekiekich seni sokkun osukosuk mine mi osukosuka ekiekich. Ach tongei I esap epeti kich seni ach netipengaw me riafou non ei manau, nge epwe mut ngeni kich ach sipwe weri ekkewe weires fiti ew pochokun mi nap seni pusin ach.
Jesus, the very thought of thee
With sweetness fills my breast;
But sweeter far thy face to see
And in thy presence rest.13
Chechemeni, en emon noun Sam won Nang non pekin ngun. Usun ewe Aposel Paul a awewei, kich “noun Kot.”14 ka fen manaueni pwisin napanapen manauom me mwen om feito fonufan. Samach a fori eu unusochun kokot fan itach sipwe feito won ei fonufan, kaeo, me niwinsefan ngeni I. A tinato Noun we Achengicheng pwe seni An we nifangen Achasefan me Manausefan, sia tongeni manausefan seni mano; me ika sia anganga ach nuku non I me aier seni ach tipis,15 sia musono me angei ewe epinukunuk ren manau ese much.16
Ngeni Ach Ekiek me Ngunuch Watten Tumunoch
Non ei manau, sipwe fokkun tumunochu ekiekich.17 Ekiekich a mutata ach sipwe manau, sipwe fini, me sipwe sinei och me ngaw.18 Ngunuch a angei ewe kopungunon pwarata pwe Kot i Samach, pwe Jises Kraist i ewe Noun Kot, me Ar afanafan ikkena ach emwen ngeni pwapwa ikei me manau ese much mwirin mano.
Ewe ekiek an Alma a komochuno ei ekiekin Jises Kraist. A siwini manauan. Mwichenap ina ew fansoun ach sipwe weweiti met ewe Samon epwe mochen siwpe fori me winiti. A pwan ew fansoun ach sipwe nenengeni ach fefeita. Nupwen ai kokon angang a uweieino non unusen ewe fonufan, ua fen kuna ew watenon pochokun non pekin ngun non ekkewe memper non ewe Mwichefen
Nimu ier a no, a wor ew tingor ach sipwe annomu ewe Chon Amanau non sokkun mettoch meinisin sia fori ren ach aea ewe ennetin iten ewe Mwichefenin Jises Kraist ren Aramas mi Pin non Fansoun Soponon.19 Sia chok apasa itan fiti tekisoson.
Ruanu ier a no, ren okukunano fansoun ach mwichen sakrament, sia anapano ach anonga ach ekiek won ach angei an ewe Samon ewe sakrament. A nap ach ekieki Jises Kraist me wesewesen aucheani non ach pwon ach sipwe chechemeni I fansoun meinisin.20
Fiti ewe towaw fesen ren ewe semwen non unusen fonufan me ewe aninisin Come, Follow Me, ekkewe osukun an ewe Chon Amanau ra winiti auchea watte non imwach kewe, ra anisi ach fel ngeni ewe Chon Amanau non fansoun ewe wik.
Ren ach aponueta an President Russell M. Nelson kapasen ourour ne “rongorong ngeni I,”21 sia nimetisefani ach tufich ne esina ewe mongunungunun ewe Ngun mi Fel me kuna ewe poun ach Samon non manauach.
Ren ewe esinesin me wesinon ekkewe tempel, a nap ach sipwe tonong non imwen ewe Samon me angei An pwonen feioch. A napano ach mefi pochokunen ewe amwararen ningeochun ach Chon Amanau me Chon Angasa.
Preseten Nelson a apasa: “Ese wor mettoch mi mecheres ika pusin fisita usun ach winiti [emon] pochokunen [chon kuno]. Ach tumunoch epwe nukuchar won ewe Chon Amanau me An kapas allim. Mi unusen ounusa ach ekiek ne achocho ne nenengeni I non meinisin ekiek.”22
Ren ach anonga ach ekiek won Jises Kraist, meinisin mettoch unukuch—nupwen ir mi chiwen nom—sia kuner seni ach tong ngeni I. Osukosuk mi kis auchear ra morono, me sia aturano ekkena mettoch rese auchea ngeni An saram me napanapan. Nupwen ka sopweno ne ofota om ekiek ne komochuno ei ekiek usun Jises Kraist, nuku non I, me apwonueta An kewe annuk, Ua pwon ngonuk esap chok ewe emwen seni nang pwe manaman seni nang—manaman minne epwe wato pochokun ngeni om pwon mi pin, kinamwe ngeni om weires, me pwapwa ngeni om feioch.
Chechemeni Jises Kraist
Ekkoch wiik a no, Kathy me ngang aua churi imwen Matt me Sarah Johnson. Won ewe etiip mi wor echo sasingin ar we auchean famini, echo sasingin ewe Chon Amanau mi ning, me eu niosun ewe tempel.
Nour kewe fomon nengin, Maddy, Ruby, Claire, me June, ra pwapwa ne apasa usun watten ar tongei iner we.
Nap seni eu ier iteitan Sarah a fori tetenin met epwe fori ren ar we famini epwe no ngeni ewe tempel pwe ekkewe nengin repwe tongeni papatais fan iten chon ar famini mi manau akkom.
Non November ewe ier a no, Sarah a fori kokotun eu fansoun chuno tempel fan iten ar we famini non ewe nesoponon wik non Decemeber non Aruwanu nge esap Ammon. “Ua anean pwe en mi Tipeeu ren ena,” a apasa ngeni Matt.
A fen affat pwe Sarah a uri cancer, nge ekkewe tokter ra esuku pwe epwe manau non ru ika unungat ier. Non eu mwichen sakrament, Sarah a apasa an pochokunen kapasen pwarata, a apasa pwe met chok epwe fis ngeni i, mi tongei ewe Chon Amanau ren unusen netipan, me “Christ a fen okkufu mano.” Nupwen December a soposopono, amairun an Sarah pochokun a kukkununo, me a no ngeni pioing. Non nesosoren Aruwanu, December 29, a awesano manauan won fonufan. Matt a chok nom unukun Sarah unusen non ewe pwinin.
Fiti netipan a netipeta, me inisin me netipan a unusen pekus, a tori imwan, netipechou fiti noun kewe nengin. An Matt nengeni noun we fon, a kuna ewe achechemen ar tempel appointment mi sokkono non Aruwanu Sarah a fen ota non mwirinon ena ran. Matt a apasa, “Nupwen ai aewin kuna, ua ekieki, Ei esap fis.”
Nge mwirin an Matt ekiek a komochuno ei ekiek: “Ewe Chon Amanau mi manau. Ese wor neni sipwe fen nom ie ren ach famini nap seni non Imwan we mi pin.”
Matt, Maddy, Ruby, Claire, me June ra tori ewe tempel ren ewe kokotun no non tempel Sarah a fen ota fan iter. Fiti chenun mas a suputiw won mesan, Matt a fori ekkewe papatais fiti noun kewe nengin. Ra anononun mefi ar tong me riri esemuch ngeni Sarah, me ra mefi ewe watten tong me oururun kinamwe an ewe Chon Amanau. Matt a aoporousa non pwetete, “Nupwen ua mefi anonnonen netipechou me netipeta, Ua puchor ren pwapwa, ai sinei an Semei amwararen kokkotun amanau.”
Non ei fansoun Paska, ua pwarata ewe unusochun me wesewesen ennet usun an ewe Chon Amanau asoren achasefan ese wor mi nonnongeni me usun An ningen Manausefan. Nupwen om ekiek a chok chiwen komochunuk me feinfeino won ewe ekiek ussun Jises Kraist, me nupwen kopwe sopweno ne anonga manauom won ewe Chon Amanau, Ua pwon ngonuk pwe kopwe mefi An epinukunuk, An kinamwe, me An tong. Non iten Jises Kraist, amen.