Jises Kraist Ina Ewe Ponuan Fansoun Meinisin

Pwi me fefinei mi achengecheng, sia fen motuno non pekin ngun non ekkei ruu omuchunon ran. Ewe mwichen kon a fokkun murinno. Ekkana ra fen afanafan ra fen anisi ewe Samon. Ua iotek pwe oupwe kutta ewe Ngun mi Fel an epwe emwenikemi non ami kaeo nupwen ouwa nenengenochu ekkewe ennet ouwa kaeo seni ei nenien afanafan. Ir ra ennetin feitto seni nang.

Ew wiik seni ikenai ina ewe Easter Sunday. Iei ewe akauchean fansoun namanam ra asomonu fan iten ekkewe chon tapweno mwirin Jises Kraist. Ewe auchean popun sia fori apwapwan Kirisimas pokiten Paska (Easter). Ewe Feitto, Tapweto Mwiri nesson non ei wik epwe ngonuk om kopwe kaeo ewe apwapwan an ewe Chon Amanau tonong non Jurusalem, An enimenima ewe tempel, An riaffou non ewe Ataken Gethsamane, An Irapengesino, An ewe Manausefan, me An pwa ngeni Noun kewe chon tapweno mwirin.¹

Achou fetanei ekkei uwokisin mi pin ussun och mettoch mi pwokus me kutta anen om kopwe tongeni kinisou ngeni Samach won Nang ren an tinato Noun ewe Anamon Jises Kraist.¹ Pokiten Jises Kraist, sia tongeni aier me musono seni ach kewe tipis. Pokiten I, emon me emon kich sipwe manausefan.

Ua pwan tingor ami oupwe kaeo sefan met ewe a fis nupwen ewe Chon Amanau a pwa ngeni ekkewe Nifaits non Merika, ussun mi maketiw non 3 Nifai. Ese mo tam mwen an pwato, ra rong Mongungun nein ekkewe aramas, pachenong ekkei kapasen tekisosonun tingor:

“Ousap niwin ngeniei iei, me aier seni ami kewe tipis, me siwin, pwe upwe tongeni echikarakemi?

“… Nengeni, pei mi umoumoch a keitiu ngenikemi, iwe ion chok epwe feito, i upwe etiwa.”²

Achengicheng pwi me fefinei, Jises Kraist a anapano pwan na chok tingor ngeni ami ikenai. Ua tingor ngeni ami pwe oupwe feitto ren I pwe I epwe tongeni echikara ami! I epwe echikara kemi seni tipis nupwen ouwa aier. I epwe echikara ami seni netipengaw me nuokus. I epwe echikara ami seni ekkewe feiengawen ei fonufan.

Ese nifinifin om kapas eis me osukosuk, a pwa ponuwan non manaauen Jises Kraist me an kewe afanafan fansoun meinisin. Anapano om kaeo ussun An Achasefan, An tong, An umoumoch, An nongonong, me An kapas allimen echikara me fefeita. Kunnu ngeni I! Tapweno mwirin I!

Jises Kraist i ewe popun sia oueta ekkewe tempel. Ew me ew ina Imwan mi pin. Fori ekkewe pwon mi pin me angei ekkewe auchean angangepin non tempel, ussun chok ach kukuta ach sipwe arap ngeni I me ikana, epwe efeiochu manauom non ekkewe an ese pwan wor sokkun fel ngeni epwe tongeni. Ren ei popun, sia fori meinisin non ach pochokun ne fori ekkewe feiochun ewe tempel epwe kon mecheres ngeni nouch kewe memper non unusen fonufan. Ikenai, ua kinisou ai upwe awora esinesin ren kewe kokkot sipwe kauta minefon tempel non ew me ew ekkewe neni:

• Retalhuleu, Guatemala

• Iquitos, Peru

• Teresina, Brazil

• Natal, Brazil

• Tuguegarao City, Philippines

• Iloilo, Philippines

• Jakarta, Indonesia

• Hamburg, Germany

• Lethbridge, Alberta, Canada

• San Jose, California

• Bakersfield, California

• Springfield, Missouri

• Charlotte, North Carolina

• Winchester, Virginia

• Harrisburg, Pennsylvania

Achengicheng pwi me fefinei, ua pwarata pwe Jises Kraist a emweni ekkewe kokotun An Mwichefen. Ua pwarata pwe tapweno mwirin I ina chok ewe an ngeni pwapwa fochofoch. Ua sinei pwe An manaman a feitiw won Noun kewe aramas mi tupon, “eppetir ngeni wenechar me fiti ewe manamanen Kot non wachemuken mwareiti.”⁴ Ua pwarata fiti ai tong me efeioch ngeni emon me emon ami, non ewe it mi pin iten Jises Kraist, amen.