A Namot Epwe Wor Chon Fori Kinamwe

Achengicheng pwi me fefinei, a eu pwapwa ai nom remi. Fansoun ekkei wonu maram ra no, oua chok nonnom non ai ekiek me non ai iotek. Ua iotek pwe ewe Ngun mi Fel epwe otoura met ewe Samon a mochen oupwe rongorong nupwen ua kapas ngeni kemi iei

Fansoun ai we kaeo tokterun reirei chommong ier a no, ua anisi emon chon reirei ewe a tunu efoch peche a fokkun watte ewe paikingin ewe semwenin fetanengawen cha. Ewe angangen reirei a weires. Mwirin, ne apacheta ngeni ewe watten osukosuk, emon chon ewe mwichen reirei a fori ewe angang nge ese murinno, iwe ewe chon reirei a rochongaw non an song. Nukanapan an song, a noutano noun we minen reirei mi uren paiking. A turutiw non nekonun pei!

Meinisin chon non ewe rumwen reirei—tiwenon chok ewe chon reirei ese ukutiw an song—ra nuokus ren ei efeiengawen atai annukun reirei. Kinisou chok, pun ese uriei ewe paiking. Nge ei mettoch a fis a mwoch non ai ekiek. Non chok ena awa, ua pwon ngeni inisi pwe met chok a fis non ai rumwen reirei, usap tongeni song. Ua pwan pwonei non na ran usap tongeni mwonei mettoch non ai song—ika epwe minen reirei ika kapas.

Pwan mo iei, chommong ier mwirin, ua kuna ai ekieki ika ewe minen reirei mi nimengaw a turutiw won pei a kon nap feiengawan nap seni ewe orochongawen anini minne a angawano ach porous fengen me nefinen chommong aramas ikenai. Osufonoch me manauoch usun ra mworono non ei fansoun keimufesen me pochokunen tipefesen.

Namanam tekia, esit, me kapas mi ngaw fan iten ekkoch ir meinisin mi fifis. A chommong mi sinenap non kapas, chon pachenong non pekin ponetiks, chon apwapwa, me ekkoch chon pesepes ra chok kakapas turunufas. Ua unusen aurek pwe chommong aramas usun ra nuku pwe mi unusen ketiw ne apungu, angawa, me eitengawa meinisin ekkewe rese tipeew ngenir. Chommong usun ra chengen ne atai porousen emon ren eitengawa me kapas emetek.

Song ese tongeni pesei. Koput ese apochokuna emon. Anini fengen ese tongeni emwen ngeni amemefin atawei osukosuk. Atongan pwe, fan ekkoch sia kuna nikinikin anini fengen pwan mwo nein pusin kinikinin nonomuch. Sia rong usun ekkewe ra oucheangawei punuwer me nour, ekkewe ra nounou kapasen song ne nemeni ekkoch, me ekkewe ra efeiengawa chochon famini ren “ar rese mochen fos ngeni emon.” Sia rong usun serafo me semirit ekkewe ra eriaffou ekkoch me usun chon angang ra eitengawa chiechier.

Acheingicheing pwi me fefinei, esap iei usun. Kich chon kuno noun Jises Kraist, sipwe eu nenien appiru ren ifa usun ach foffor fengen—akkaewin nupwen a sokofesen ach ekiek. Eu ekkewe mecheresin aanen ach sipwe esinna emon ennetin chon tapweno mwirin Jises Kraist usun kirekirochun ena aramas a angangoch ngeni ekkoch aramas.

Ewe Chon Amanau a affataochu ei non An afanafan ngeni chon tapweno mwirin non ir me ruepek fonufan. “Ra feioch ir ekkewe mi angang fanasengesin kinamwe” I a apasa.¹ “Ika emon epwe posapeek, kopwe pwan okunu ngeni ewe epek.”² Iwe mwirin, ewer, I a awora ewe kapasen fon minne a apochokuna emon me emon kich: “Oupwe tongei chon koum ngeni kemi, efeiochu ir ekkewe ra anumamawa kemi, fofforoch ngenir ekkewe ra oputa kemi o iotekir ekkewe ra eriaffou kemi.”³

Me mwen An mano, ewe Chon Amanau a annuku Noun kewe Engon me Ruemon Aposel pwe repwe tong fengen usun I a fen tonger.⁴ Iwe mwirin A apachata, “Ika oupwe tong fengen nefinemi, iwe, aramas meinisin repwe sinei pwe ami nei chon kaeo.”⁵

An ewe Chon Amanau porous mi fatafatoch: Noun ennetin chon kuno ra aueta, chunata, pesei, echimwata, me ouroura—ese nifinifin ifa usun weiresin ewe napanap. Ennetin chon kuno noun Jises Kraist ir chon fori kinamwe.⁶

Ikenai Palm Sunday. Sia amonneta ne apwapwai ewe mettoch mi kon auchea me nap a rekotitiw won fonufan, ina ewe Achasefan me Manausefan an ewe Samon Jises Kraist Kraist. Eu nein ekkewe napanap sia tongeni asamonu ewe Chon Amanau ina ach sipwe winiti chon fori kinamwe.⁷

An ewe Chon Amanau Achesefan a otufichi ach sipwe tongeni okkufu meinisin ngaw—mi pachenong anini fengen. Ousap sonono ussun ei : anini fengen mi ngaw! Jises Kraist a afanafana pwe ekkewe a wor rer “ewe ngunun anini” i ese feito seni I nge ra “feito seni ewe tefin, i ewe semenapen anini, iwe [ewe tefin] a amwasangata netipen aramas pwe repwe anini ren song, emon ngeni pwan emon.”⁸ Ekkewe ra pesei anini ra fori ewe chok mettoch Setan a fori, ika ir mi apareni ika rese. “Ese wor emon a tongeni angang ngeni ruomon masta.”⁹ Sise tongeni anisi Setan ren ach efeiengawen kapas me ekieki pwe kich mi chiwen tongeni angang ngeni Kot.

Achengicheng pwi me fefinei, ussun ren ach foffor fengen nefinach mi fokkun auchea! Ifa usun ach kapas ngeni me usun ekkoch non imw, non fan, non angang, me won line mi fokkun auchea. Ikenai, ua tingorei kich sipwe angang fengen non ew napanap mi tekia me pin. Ouse mochen auseningoch. “Ika pwe epwe wor och mettoch mi nimenimoch, murino, are och mettochun porousoch”¹⁰ sia tongeni apasa usun pwan emon aramas—ika ngeni ne mesan are nukunupan—epwe ina ach nongonongen ach aporous.

Ika ew pea pupunu non ach wart ra keimufesen, ika emon misineri a niwinikai ngeni imwan, are emon sarafo a tipemwaramarei an kapasen pwarata, ese och om kopwe opungur. Mi namot repwe mefi ewe ennetin tongen Jises Kraist epwe pwano non om kapas me foffor.

Ika emon chienom chon angang won social media a wor an pochokunen ekiekin ponitiks ika muu minne a atai mettoch meinisin en mi nuku non, ew song, ponuwan mi emetek sonuk esap anisi. Aueta weweoch fengen epwe nap angangan sonuk, nge ena met mi namwot ngeni chienom.

Anini a asueno ewe Ngun—fansoun meinisin. Watten tipefesen a apochokuna ewe nuku mi muan pwe anini fengen ina ewe anen awesano osukosuk; nge esap ina. Anini fengen ew mettoch sia finata. Kinamwe ew mettoch sia finata. Mi wor ami pungun finata ne fini anini fengen ika tipeeufengen. Ua pesei kemi ne fini ami oupwe chon fori kinamwe, iei me feinfeino.¹¹

Pwi me fefinei, kich mi wesewesen tongeni siwini ewe fonufan—emon aramas me ew foffor fan ew. Ifa usun? Ren ach anapanapa ifa usun wenecharen sokofesenin ekiek epwe taweno ren sufon fengen me kapas murinno fengen.

Sokofesenin ekiek ir kinikinin pekin manau. Ua angang iteiten ran fengen me noun ewe Samon chon angang ekkewe ese nonno fengen ar kuna osukosuk. Ir mi sinei ua mochen rong ar ekiek me wenecharen memef usun mettoch meinisin aua porous won—akaewin mettoch mi monomon.

Sasing

Preseten Dallin H. Oaks me Preseten Henry B. Eyring

Nei kewe ruemon chon aninis murino, Preseten Oaks me Preseten Eyring, ra eu nenien appiru non ar awewei mefier—akkaewin nupwen repwe sokofesen. Ra fori ren ennetin tong fengen. Ese wor neir a ekieki pwe a kon sinenap ina minne epwe pochokun ne tumunu wisan. Ese wor emon neir a namot an epwe okkuf ngeni ewe pwan emon. Pokiten emon me emon mi ur ren ewe tong ennet, “ewe nimenimochun tong an Kraist,”¹² am aporous mi tongeni emwen me ren ewe Ngunun ewe Samon. Ua men tongei me asamonu ekkei ruemon murinon mwan!

Tong ennet ina ewe safeian anini fengen. Tong ennet ina ewe niffangen ngun a anisikich ach sipwe aturano ewe inisin aramas, ewe mi apangaw, aurek, namanam tekia me mochenia. Tong ennet ina ewe nongonongen nikinikin emon ennetin chon tapweno mwirin Jises Kraist.¹³ Tong ennet a wewen emon chon fori kinamwe.

Nupwen sia etekisona kich me mwen Kot me iotek ren unusen pochokunen netipach, Kot epwe ngeni kich tong ennet.¹⁴

Ekkewe ir mi feioch ren ei niffangen nang ir mi nikitu o kirekiroch. Rese nonowoiti ekkoch me rese eingeing. Rese songokai me rese ekiekingaw fan iten ekkoch.¹⁵

Pwi me fefinei, ewe tongen Kraist mi ennet ina ewe ponuwen ewe anini fengen a aosukosuka kich ikenai. Tong ennet a pesei kich “ne mwarei fengeni an emon me emon chou”¹⁶ nap seni achou emon me emon. Ewe nimenimochun tong an Kraist a mut ngeni kich ne “uta pwe chon pwarata usun Kot fansoun meinisin non mettoch meinisin”¹⁷—akaewin non fansoun noninen. Tong ennet a mut ngeni kich ach sipwe pwomeni ifa usun mwan me fefin noun Kraist ra kapas me foffor—akaewin nupwen sia weri esit.

Iei, use kapas usun “kinamwe ese nifinifin met epwe fis.”¹⁸ Ua kapas usun ach foffor ngeni ekkoch epwe fich ren ach aponuweta ekkewe pwon mi pin sia fori nupwen sia angei ewe sakramen. Oua pwon pwe opwe chechemeni ewe Chon Amanau fansoun meinisin. Non fansoun a masoweni watten osukosuk me ur ren anini fengen, ua tingoreikemi oupwe chechemeni Jises Kraist. Iotek pwe epwe wor om pochokun me mirit om kopwe sinei met oupwe apasa ika fori met ewe I epwe fori. Ren ach tapweno mwirin ewe Kingen Kinamwe, sipwe winiti Noun chon fori kinamwe.

Non ei fansoun oupwene ekieki pwe ei porous epwe wesewesen anisi emon ami mi sinei. Meni oua aneanei pwe epwe anisi atewe ika neminewe an epwe och ngonuk. Ua anean epwe fis! Nge ua pwan anean pwe oupwe nenenong non netipemi ne katon ika mi wor kinikinin namanam tekia ika nonowo mi eppeti kemi seni ami winiti chon fori kinamwe.¹⁹

Ika ami mi ennet usun ami oupwe aninis ne ionfengeni Israel me usun forata akokon nefinen aramas ewe epwe fis tori fansoun esemuch, iei ewe fansoun oupwe nikitano koput. Iei ewe fansoun oupwe kouno ne oumwesimwes pwe ami chok mi pung. Iei ewe fansoun sia kouno ne fori mettoch mi fori an ekkoch repwe fetan nunur ren ar nuokus ika repwe asonga kemi. Iei ewe fansoun oupwe ireno noumi kewe pisekin maun.²⁰ Ika ami kapasen efeiengaw a masoweni asonga me etipisi, iei ewe fansoun oupwe isonareno.²¹ Oupwe uta pochokun non pekin ngun mwan me fefin noun Kraist.

Ewe tempel mi tongeni anisi kich non ach kukuta. Ikena sia feioch ren an Kot manaman, a ngeni kich ewe tufichin okkufu Setan, ewe chon poputani meinisin anini fengen.²² Oturau i seni akokon nefinemi! Eteneki pwe sia pwan esita ewe chon koum ngeni iteiten fansoun sia echikara ew wewengaw ika ponukuono ach sipwe song. Nge, sia tongeni pwari ewe umoumoch minne a nikinikin emon ennetin chon kuno noun Jises Kraist. Chon fori kinamwe eppeti ewe chon koum ngeni.

Kich aramas sipwe winiti ew ennetin saram won ewe chukuchukuta—ew saram minne “ese tongeni monono.”²³ Sipwe pwarano pwe mi wor ew aanen atawei osukosuk mi weires me ew aanen pesei ne awesi tipefesen. Nupwen oupwe pwomeni ewe tong ennet minne ekkewe ennetin chon tapweno mwirin Jises Kraist ra pwarano, ewe Samon epwe anapano ami achocho nap seni met oua ekieki mi tufich.

Ewe epinon ewe kapas allim ina ewe watten epino non fonufan. Kot a kokori meinisin repwe feito ren I, “chon me pwechepwech, chon fotek me chon ngaseno, mwan me fefin.”²⁴ Mi wor neni fan iten meinisin. Iwe nge, ese wor neni fan iten koput, kapung, ika och sokkun anini fengen.

Achengicheng pwii me fefinei, ewe mi murino ese mwo fis ngeni ir ekkewe ra ounusa manauer ne aueta ekkoch. Ikenai upwe etiwa kemi ami oupwe atonna fichi wisemi ren chon kuno non nonnomun ami foffor ngeni ekkoch. Ua efeiochu kemi ami oupwe fori ekkoch ekkesiwin epwe namot pwe manauemi epwe tekia, sufon, me chon tupuni chon tapweno mwirin Jises Kraist.

Ua efeiochukemi pwe oupwe siwini manawangaw ren tingor, koput ren weweoch, me anini fengen ren kinamwe.

Kot mi manau! Jises ii ewe Kraist. I a uta pwe mokuren ewe Mwichefen. Kich Noun chon angang. I epwe anisi kich ach sipwe winiti Noun chon fori kinamwe. Ua fokkun pwarata non ewe it mi pin, iten Jises Kraist, amen.