Klou el Ongdibel
Ongeltacher: Mekengii a Mado er a Babeluades
October 2023 el klou el ongdibel

Ongeltacher: Mekengii a Mado er a Babeluades

Mla er a Elder Neil L. Andersen

Er a Chelechad er a Teruich me a terung el Apostol

A mado er a babeluades a obok er a chelsel a betok el teletael. Moumerang er a temel a Rubak; a klengeltengat a blechoel el mei.

Sera kngara South America er cheliseb, ea Brother Roger Parra er a beluu er a Venezuela a uluchais er tial omeruul el merngak:

“Sera 2019 ea Venezuela a siliseb er a klou el chetituokel el omeruul el mle uchul a klou el ilkolk leng mlo diak a dengki el eim el klebesei.

“Uldikel ma ultok a mlarngii ra rael ra buai, e betok el mechebuul el chad a dimlak a kmal kelir.

“A rebebil a mlomuchel el merechorch a kall ra rua stouang, e melemall a ngidil ngerang el mlara rolir.

“Ngak el ousiobai el meruul e olterau a blauang, a meral mle bekikl er tial siobai er kemam. Me kemam el telungalek, a tilbir el mo merous aikal kall el ngara siobai er kemam el mora rechad el kmal ousbech.

“A ta er a meral milkolk el kesus e a remelemall a klalou e mle berberiid er ker me ker. A di mle tal meringel a bdeluk er ngii a sebecheklel a bechik me a rengelekek.

“Se ra tutau er a mechuached e ak mlor tial kimoruul a blauang er ngii. E mekngit a rengud, le bek el kombalii er a omeruul kall a miltemall er a remerechorech, ngdi mlo rrau a renguk, a ki molterau a bluauang er ngii a diak el telemall. Ngdimlak a tal keskelel el miltemall. A kuleba ngarioul reng el mereng a sulel a Demak er a Babeluades.

“Ak mocha remei, e uluchais er a telungalek er ngak er a klengeltengat me a selbecheklel a Dios el mer kemam.

“Te meral mle mui ra omereng el saul.

“A ketengek el sechal, el Rogelio, el teruich me a eru a rekil, a dilu el kmo, ‘Bapa! Ak medengei el kmo ngera uchul ea stoua er kid a milsebechakl. Kau me a Edil a blechoel el melecha ongeltacher er kemiu.’”

A Odam er a Parra a mlo rokir a cheldecheduch: “A tekingel a Malachi a mle er a uldesuek. ‘Ak mo tomer er a melemall meng diak le berkau, meng diak el bo lolemall a redechel a delmelem er a chetemem’ [Malachi 3:11]. Aki mlo outubuach e meral mereng a sulel a Demmam er a Babeluades er tial ongasireng.”1

siasing/Llecheklel
A telungalk er a Parra.

Ka Molasem er Ngak er Chelechang

A rokui el ngarngii er kid me a kid a mla ra Dios el mei. Sel de oltirakl er a Kristo, eng mededaes a rengud el merous el mora rokui el iliuekl er kid.

Ma ikel rokui lomeskid a Rubak, e ngii a mla olengit er kid el lmuut el di msang Ngii el Dios me a rengedel a teruich el basent er a ikel dosiseb. Ngii a mla yaksok el merkid el kmo sel de merang el kirel a ongeltacher el dolechang, e Ngii a mo “mekengii… a mado ra babeluades, e molechubel … a klengeltengat, meng mo diak a delmerab el sebechel lotekau.”2 Ngii a mla yaksok er kid el kmo Ngii a mo mesebechakl er kid er a mekngit.3 A ikal yaksok a meral mo tmaut,4 a Rubak a melekoi, “ka molasem er ngak er chelechang,”5 el tekoi el diak de betik er ngii ra ngii dil ker er a chelsel chedaol llechukl.

A mado er a babeluades a obok er a chelsel a betok el teletael. A bebil a mora tekingel a klengar ra beluulechad, ea bebil a tekingel a reng. A bebil a mekekokil morngii meng beot er kid el mo diak de ues. Moumerang er a temel a Rubak; a klengeltengat a blechoel el mei.

A ki ngara klengitelreng el kirir tirkel metacherbeserir er a ikel lousbech er tial klengar. A Ikelesia a dirke mle otobed a 54 million el udoud er a Merikel el kirel a mo olngeseu er a metacher beserir el ngalek ma re chedil er a beluulechad el rokir.6 Ma aikal tenget ra sengerenger sel bek el buil, ea re bisop a olngeseu er a rebetok el telael chad ra bek el sandei el tir a telkib el taem el lousbech a kall, bail, me a blai. A di tal semecheklel a chelebuul er tia el beluulechad a ebangkelio er a Jesus Kristo.7

Tekingel a Klaumerang

A Apostol Paulus a mengelechel el kmo a llemesir a rechad a di mora lodengei el tekingir a rechad e bai meringel el mo medengei a ikel mlara Dios.8 A beluulechad a mesaod er a ongeltacher el ngara teletelel a udoud, eng di a chedaol llechul ea ongeltacher a mera er ngii a tekingel a klaumerang. Sel de merang el kirel a ongeltacher er kid a tara rolel a olechotel a rengud el nguu a Rubak meng kot er a chelsel a klengar er kid, el kuk ngaruchei er a ikel domekerreu me a soad. Ak yaksok er a kemiu el sel moumerang er a Rubak, ea klengaltengat er a Babeluades a mo merael mei.

A Jesus a dilu el kmo mnguu el msang “a kloklel a Caesar el mora Caesar; me a ikel kuk mora Dios le bora Dios.”9 A mla Mokiis el Osobel a ulengit er a rechedal a Nephi el mo meluches er a rekord er tir aikel yaksok er Ngii el de betik er a Malachi.10 Chelechal sils er kid, ea Rubak a liluut el smisichii tial chedaol llechul a ongeltacher, el kmo: “Tia ea mong meng uchelel ongeltacher er a rechedak. Me a [tir] a kirir el melechang er a teruich el basent er a ikel rokui el kerrekerngir er a bek el rak; e tiang a llach el mo er tir el mo cherechar.”11

A Rubak a bleketakl el lomekrael a mo teletelel a usbechellel a ongeltacher, el kmo, “Mngai el mei a rokui el ongeltacher el mera olsechelel,”12 belkul a kmo mngai ongeltacher el mora mla moluut el Rengedel, el Ikelesia er a Jesus Kristo er a Uriul el-klebesei el Santo.13 Ngii a omekrael el kmo a ulsbechellel a ikal chedaol ongeltacher a mo okiu a nglunguuch e ngmo souadel lokiu a chelechad er a Kot el Presidency, Chelechad er a Teruich me a Terung el Apostol, Presiding Bishopric, el ngii a tuobed er a ngerel a Rubak el mo er tir, ng dilu a Rubak.14

A Chedaol Ududel a Rubak

Aika el chedaol el udoud a diak el ududir a roungerachel er a Ikelesia. Ng kloklel a Rubak. A re mesiungel a kmal ungil medengelii a ringelel a chedaol teletelel a ngerchelir er a ikal udoud.

A President Gordon B. Hinckley a millekoi el kirel a klengar er ngii er a le kekerei: “Sera kekere el buik e ak uleker a ker el mora demak … el kirel a chitel a udoud er a Ikelesia. Ng ulmeklatk er ngak el kmo a ngerchelek el mlara Dios a mo melecha ongeltacher me a tengetengek. Sel bo kuruul a ikang, [a demak a dilung,] aikel ngii a kudars a dikeal ududek. A ikang a mla mo kloklek a Rubak el lokiu ngii e ng mechedaol.” A demal a dilchelir: “A omengitel a udoud lokiu a roungerachel er a Ikelesia a diak el ngerchelem [kau, e Gordon]. Tir a mo onger el mora Rubak, le Ngii a mo melai er a chimorir a ikel rokui el kildmokl.”15

Kid a melchesuar er sel berraod er sel “mo onger el mora Rubak.”

A Bekerurau el Ongeltacher me a Tengetengiu

Ngara ikel ongeltacher me a tenget el bla modars el mora Rubak, tial mlo merek el rak eng betok er a billion el udoud er a Ngebard a tilobed el mo omekngeltengat er tirkel lousbech a ngesou.16}

E kuk ngar sel klou el ngercheled el omerk er tial mla moluut el ebangkelio er a beluulechad, eng ngarngii a betok er a 71,000 el misionari el mesiou er a 414 el mission.17 E le uchul a ongeltacher er kemiu me a tengetengiu, e a re misionari, e diak el iior er a klungel a losuk erngii a rechad ra blirir, a sebechir el mo mesiou.

A templo a lomekedechor lomertk er a beluulechad el diak el ua idisel. Chelechang, ea 177 el templo a oureor, 59 a lomekedechor er chelechang malechub e te lmuut el meruul, ea 79 a ngara uldasu me a loruul a llecheklel.18 A ongeltacher er kemiu a mesterir a klengeltengat er a templo el mora basio el dita el Rubak a sebechel mesang.

Ngar ngii a betok er a 30,000 el ongdibel el ngara chelsel a betok er a telael el ikelesia me a bebil er a omekedecheraol el ngara 195 el meklou el beluu me a mekekerei el beluu el ngar cheungir.19 E le uchul a ongeltacher er kemiu, e a Ikelesia a mla mukdubech er a bebil er a cheroid el beluu el locha dirkak a tang me borngii el ngii a ngara delongelir a remekedung el Santo el kemiu a locha diak a tang me bo modengelterir.

A Ikelesia a olengeseu a eim el skuul er a daingak.20 El ngarngii a betok er a 145,000 ngalek er a skuul. Dart me a teruich el telael el klass a lolsisechakl er a bek el sandei er a seminary me a institute.21

A ikaikid el klengeltengat me a lmuut el betok a mei el mlara rengeasek me a remechuodel er a bek bedengel a dauch er a udoud el losuk el tir a omelecha er sel meral klungel a ongeltacher.

Sel chedaol klisichel a ngarbab el llechul a ongeltacher a diak lolebodeb lokiu a klungel a udoud el tilobed, ng tir el merau me a chebuul a blal dur tir a Rubak el mo omelechang er a teruich el basent er a kerrekerengir.22 A klisiich a mei sel denguu a klaumera er kid el msa Rubak.23

Sel milsuk el mlo dechelel el mlara Rubak el milkedmokl lokiiu a ongeltacher er kemiu a mla smisiich a ikel lorreked a Ikelesia, el kirel a techall er a mo obal moruchei a urerel a Rubak el ngii a dirkak a tang me desa el tekoi. A rokui a lodengei a Rubak, meng chelsel a merael mei el klebesei, e kid a mo mesa aikel chedaol el moktek er Ngii el mo mutaut.24

Ng Betok a Rolel a Klengaltengat el Mei

A klengeltengat er a ongeltacher e mei el okiu a betok el teletael. Sera1998, e ak ulbengkel a mle-Elder Henry B. Eyring el mlora klou el miting er a Ikelesia er a beluu er a Utah el ngklel a Silicon Slopes, el beluu er a omeruul el beches klalou me a klededall. Tia mle temel a ungil keruul, me a Elder Eyring a mle mellach er tirka el Santo me lak lomekesiu er tir er a rebebil ma kal bol sorir a lmuut el betok. Ak blechoel el lotkii tial yaksok el kmo sel sekum e te omelecha meral klungel a ongeltacher, e a soal a rengrir er a betok el kloklel a beluulechad a mo diak. Di mle chelsel a eru el rak, e sel mle ungil keruul er a beches el klekedall a ngilemed. Te betok a mlo diak a urerir, me a siobai a mlo meringel a lorrurt er sera taem er a losemechokl er a keruul. Tirkel mle otireklii a tekingel a President Eyring a mlo ngeltengat.

Tial yaksok er ngii a mekletkak er a tara tekoi el dilubech. Ak milsang a 12 a rekil el Charlotte Hlimi er a bitara Carcassonne, France, sera 1990 er a kusiou el mission president. A re Hlimis a telungalek loba klaumerang el kiliei er a kekerei el llengiil el delmerab lobetiterir a reteai el ngelekir. Ng mla er ngii a siasing er a Osobel me a profet el ngara kboub. Sera kungedecheduch er ngii el kirel a patiarchal blessing, e a kuleker er a Charlotte el kmong melecha meral klungel a ongeltacher. Ng ulenger, “Ochoi, e President Andersen. A delak a ulsisecheklak el kmo ngarngii a klengeltengat el mei el tekingel a klechad me a tekingel a reng sel domelecha ongeltacher. A delak a ulsisecheklak el kmo sel de blechoel el melecha ongeltacher, eng diak el bol soad a ngerang. E President Andersen, ng diak el somam a ngerang”

siasing/Llecheklel
Telungalk er a Hlimi.

Sera lomeskak a kengei el mo ouchais er a cheldechedechal, ea Charlotte, el ngii a okeua me a eim a rekil e mla merenged er a templo, a uluuchais: “A klaumerang er ngak er a ongeltacher a kmal mle klemerang er sel taem, e lmuut el kmal mesisiich er chelechang. Ak kmal klou el mereng a saul el kirel tial llechul a Dios. El kultirakl er ngii e ak melemolem el ngara klengeltengat.”25

A tara klebesei ea derta er kid a mo rokir a omerollel er tial belulechad. Lluich el rak ra mla memong, el sesel klebesei ruchei ra delal a bechik el, Martha Williams, lemad er a kasinoma, eng ngiluu a kekerei ludoud el mle uldurokl. Ng mle mereched loker er a bechik, er a Kathy, er a checkbook er ngii el mo melecha ongeltacher er ngii. A delal a kmal mle mechitechut meng meringel er ngii el meluches, me a Kathy a ulengit mel bol llechesii tial check. A delal a ulenger, “Diak, e Kathy. Ng soak el dingak el rulii.” E okor e milkekokil el dochelir, “Ng soak el mo melemalt er medal a Rubak.” A tara tekoi el rirelii a Kathy el mora delal a ngiluu tial ongeltacher el seluk ra blil el mo msa bisop er ngii.

Klou a Ututelel el Urelel a Dios

Rodam me a rodos, a Ikelesia er a Jesus Kristo er a Uriul-klebesei el Santo a “mla metuobed el diak el delekedek,”26el lomesterir a betok lungil klengeltengat er a chelsel a belulechad el rokir. Ng morngii a rechad el oiyeng er kid ma re diak. Ak mla omdasu a tekingel a mellomes el Gamaliel, el ngii, sera le ues a ongasireng loruul a Apostol el Petrus me a Johanes, a ulemeklatk er a rengara chelechad er a Jerusalem:

“Bo bechititerir [tirka el chad]: e le alsekum … tia urerel a chad, eng di mo diak a belkul:

“Engdi alsekum eng ngara Dios, eng diak el sebechiu el mekodir; alii … ko mol meues el loldechelakl lomtok er a Dios.”27

Kemiu me a ngak a tebedechel a klou a belkul el urerel a Dios er tial beluulechad. Tia diak el bolak ngbai melemolem lomerk er a beluulechad, el meledaes er a rolel a luut er a Rubak. Ak sioning er a ikel tekingel a President Russell M. Nelson: “Aika el merael mei el sils, e kede mo mes a kot el ngarbab lolchotel a klisichel Osobel el dirkak a ta me le meues er a beluulechad. Delongelel chelechang me sel luut el mei … , Ngii a mo meskid a betok el techall, klengeltengat, me a ongasireng el mora re blak a rengrir.”28

Tiaikid ak sioning er ngii. A Jesus a Kristo. Tia ea chedaol el Urrerel. Ngii a lmuut el mei. El ngara a ngklel a Jesus Kristo, amen.

Uleklatk

  1. Meral cheldechedechal a Roger Parra, Aug. 4, 2023.

  2. Malachi 3:10

  3. Mesa Malachi 3:11. Elder Jeffrey R. Holland a millekoi: “Chelsel a klengar er ngak, tia di okesiu, e ak mla mesa yaksok er a Dios el mutaut el ngii a mo ‘choridii a melemall el [kirek]’ [Malachi 3:11]. Tiaikid el klengeltengat el mesebechakl er kid er a mekngit a mla mochubel el merngak me a rebetik er a renguk el imis meng diak a tekoi el sebechek lousbech el smodii. Engdi a kuumerang el kmo a chedaol el omesebechakl a mla mei, locha telkib er ngii, e le a blak el reng er kid, el derta el chad me a telungalek, el melecha ongeltacher” (“Like a Watered Garden,” Liahona, Jan. 2002, 38).

  4. “A Rubak a mo mekengii a mado er a babeluades el kirel a dousbech, e diak el kirel a ngibesereng. Alsekum meke de omelecha ongeltacher leng soad el mo merau, e kid a meruul er tiang el mekngit a belkul. … A klengeltengat el mora chad el oltobed … a diak el blechoel el lokiu a udoud malechub eng klalou” (Teachings of Gordon B. Hinckley [1997], 657).

  5. Malachi 3:103 Nephi 24:10

  6. Mesa “The Church of Jesus Christ Is Helping Alleviate Global Malnutrition,” Aug. 11, 2023, newsroom.ChurchofJesusChrist.org; dirrek el mesa “How the Church of Jesus Christ and UNICEF Are Keeping Mothers and Children Healthy and Safe,” Aug. 17, 2023, newsroom.ChurchofJesusChrist.org.

  7. “Me a Rubak a ulemekedong er a rechedal el kmo Zion, le tir el mle ta rengrir me a uldesuir, e kiliei el ngara llemalt; e dimlak a chebuul er a delongelir” (Moses 7:18

  8. Mesa 1 Korinth 2:14 A lomdasu a chad a diak el blechoel el tang ngii me a llemesel a Dios. Sera temel a Malachi, e te betok el chad a mle cheroid er a Rubak. A Rubak a ulengit er a rechedal er a telbiil, “Mluut el me er ngak, me ngak luut el mer kemiu.” Sel ongingil tia el ongit el ngara reng a dmolech e klou a belkul el ker el mora derta er kid: “Eng di ke uasei, Aki lmuut el mei er ker?” (Malachi 3:7). Malechub e sel tara belkul a kmo, “Ngera me ak melodech er ngak? Ak mekera a kulekeed er ngak el me er Kau?” A Rubak onger el okiu a osisecheklel a klou el belkul a ongeltacher, el diak el dil llechul a tekoi er a udoud, ng bai rael el omult aikel soad a rengud el bai mo er Ngii.

    Aki mle mesa tiang er a telungalek er kemam. A delal a Kathy a mlo chedal a Ikelesia er sera lluich ma eru a rekil. A Martha me a Bernard Williams a mle ngara Ikelesia el telkib el taem, engdi sera lolukl el mora tara beluu, e te mlo diak lomais el mora ikelesia. A Bernard a mle soldau el mlora tara beluu, me a Martha a millukl el mora blil er a Tampa, Florida, seikid eng ngiluu a siotai er a okdemelel me a anti er ngii el mo kiei lobengterir, e tir a ulemtok er a Ikelesia. Sera le kiliei el mle chebuul, el dioll er a ketengel e diak el ngara ikelesia, a Martha Williams a tilbir el mo omuchel el oldurokl er a ongeltacher er ngii el mora bisop. A uriul er a klengar er ngii, ea loker er ngii el kmo ngera uchul, eng dilu el kmo ng dilbedebekii a kmong ngerang el re misionari a ulsisecheklii el kirel a ongeltacher me a klengeltengat er a Dios: “Aki meral mle ousbech er a klengeltengat er a Dios er a klengar er kemam, ma uchul e ak mlomuchel el loldurokl er a ongltacher er kemam el mle check el mora bisop.” A Martha me a Bernard Williams a liluut el mora Ikelesia. Sel kot el klou el klengeltengat el mo er tir—elolem el telecheroll a mla mukngeltengat sera letibir el mo omelecha ongeltacher er ngii er sera lak a kmal ngera er ngii ng dibai klaumerang er ngii er a Dios me a urungulel el kirel a yaksok er Ngii.

  9. Mateus 22:21

  10. Mesa 3 Nephi 24

  11. Mesa Doctrine and Covenants 119:3–4. “Ongeltacher a otebedel a teruich el basent er a kerkerngel a tang el mora Ikelesia er a Dios (mesa Doctrine and Covenants 119:3–4; olengil a bleketakl el melekoi el bedul a udoud). A rokui el rechedal a Ikelesia el mengerker a kirir el omelecha ongeltacher” (General Handbook: Serving in The Church of Jesus Christ of Latter-day Saints, 34.3.1, Gospel Library).

  12. Malachi 3:10

  13. “Aki omelecha ongeltacher, loltirakl osisecheklel a Osobel, el melai a ongeltacher ‘el mora blil’ [Malachi 3:10; 3 Nephi 24:10]. Ke de meruul er tiang sel dolecha ongeltacher er kid lomsa bishop malechub a branch president. Ng diak domelecha ongeltacher sel dongoit er ngii el mora ikel soad el chelechad lolngeseu ra remechebuul. Aikel dongoit el mora rolngeseu ra remechebuul a mengai er a kuk di ududed, el diak el ongeltacher el ngii a llach el kired el harau el mora osiolel el ngara Rubak” (Dallin H. Oaks, “Tithing,” Ensign, May 1994, 35).

  14. Mesa Doctrine and Covenants 120:1.

  15. Gordon B. Hinckley, “Rise to a Larger Vision of the WorkEnsignMay 1990, 96.

  16. Mesa “The 2022 Report on How the Church of Jesus Christ Cared for Those in Need,” Mar. 22, 2023, newsroom.ChurchofJesusChrist.org.

  17. Ngiluu lokiu a e-mail ell mlara Missionary Department, Sept. 14, 2023.

  18. Mesa “Temple List,” ChurchofJesusChrist.org/temples/list.

  19. Ngiluu lokiu a e-mail el mlara chedal a Ikelesia me a Statistical Records, July 28, 2023.

  20. Nguldimukl er ngii a Brigham Young University, Brigham Young University–Idaho, Brigham Young University–Hawaii, Ensign College, me a BYU–Pathway Worldwide

  21. Ngiluu er a e-mail el mlara Seminaries me a Institutes, July 28, 2023.

  22. Mesa General Handbook34.3.1

  23. President Dallin H. Oaks a uluchais er tial cheldecheduch el kirel a doumerang er a Rubak: “A delak el melakl el dil a ulemekeroul er a retedei el mekekere el ngalek el uleba [kekerei] ludoud. … A kuleker er a delak el kmo ngera meng kmal melecha kmal klou el ongeltacher er a ududel. Ng dirkak a tang me kubes er a omesodel kirel: : ‘Dallin, te locha ngarngii a rechad el sebechir el di ungil beserir el diak el lomelecha ongeltacher, eng di kid a diak. A Rubak e millilt el nguu a demam e mechikak me a kumekeroul er kemiu el ngalek. Tia diak el sebechek el rulii a lak kulai a klengeltengat er a Rubak, ak ngmai a ikal klengeltengat sel kulecha meral klungel a ongeltacher’” (“Tithing,” 33).

  24. E le ngokiu a bok beskemiu, el diak el iior er a kereor el ngii a mei, mel sebechel a ikelesia el dechor el dingii el ngarbab er a rokui el outeliil el ngara cheungel a babeluades, mesa (Doctrine and Covenants 78:14

  25. Tekingel a Charlotte Hlimi Martin, Aug. 30, 2023.

  26. MesaDoctrine and Covenants 1:30

  27. Rrellir 5:38–39

  28. Russell M. Nelson, “Overcome the World and Find RestLiahonaNov. 2022, 95.